13
राज्याअ ओमोलदाराहांअ खातुर आपुअ फोरोज
1 राज केअनारा ओमोलदाराहांअ ताबांम दोरेक वीसवास्याअ रांअ जोजे। काहाका, ओमोलदाराहांन नीमनारो ता पोरमेहेरुज हाय। एंहडो एक बी ओमोलदार नांह का जीयाल पोरमेहेरांय नांय नीम्यो वीअ। 2 तीयाअ लीदे, जेंबी तीया ओमोलदाराहांअ वीरुद केअतेंह, तें पोरमेहेराअ गोठवोणीअज वीरुद केअतेंह एंहकींअ आखाय। आने ते ओमोलदार तीयाहांन नोक्कीज साज्या दीअ। 3 हारें कामें केअनारांअ ता ओमोलदाराहांन बीयांअ जोरुल नांह। पेन खाराब कामें केअनारांअज ओमोलदाराहांन बीयांअ पोळेह। तीयाअ लीदे, तुमाहांमेनेअ केडों बी ओमोलदाराहांन बीयांअ नांय मागतों वीअ ता, तों हारें कामेंज केअ! जो तुं हारों क्योव ता, ते ओमोलदार तुल साबासी दीअ। 4 काहाका, तोअ भोलों केरांअ खातुरुज पोरमेहेरांय तीयाहांन सोताअ सेवोकुंअ तोरीके नीम्याह। पेन तुं खोटों क्योव ता, तीयाहांन तोअ बीयांअ पोळे। काहाका, लोकाहांन साज्या दांअ तीयाहांन जो आदीकार मील्योह तो बोराबोरुज हाय। ते ओमोलदार ता खोटों केअनाराहांन साज्या दांअ खातुर पोरमेहेरांय मोकलुअला सेवोक हाय। 5 मोंजे, तीयाहांअ ताबांम रांअ जोरुल हाय। ते ओमोलदार आपनेंह साज्या दीअ एंहडी बीखुअ लीदेज नांय पेन ते आपुअ फोरोज हाय एंहकींअ होमजीन तीयाहांअ ताबांम रेजी तों जोरुल हाय।
6 ईयाज कारोणे, तुमां वेरा बी पोअतेंह। ते ओमोलदार ता पोरमेहेरांय तीयाहांन होपलों काम कालजी राखीन केअनारा सेवोकुज हाय।
7 जीया बी ओमोलदाराअ जों काय लाग-रींगों वीअ, तों देजा! जीया ओमोलदाराअ जाकात लागती वीअ, तीयाल जाकात पोअजा! जीया ओमोलदाराअ आपुअ बीख राखांअ जोजे, तीयाअ बीख राखजा! जीयाहांन आपुअ मान दांअ जोजे, तीयाहांन मान देजा!
एक बीहरापेअ माया राखजा!
8 एक बीहरापेअ माया राखजा! आने तेंहकींअ माया राखतेंज रेजा! आने एंहकींअ केरुलोंअ तों ता केडापेअ कोरजों चोळव्या बोराबोर हाय एंहडों गोंअजा! जोंबी बीहरापेअ माया राखेह, तीयांय पोरमेहेराअ हुकोम पुरी रीते पाल्याह एंहकींअ आखाय। 9 काहाका, “सीनालों कीअहो मा!,” “चोरी कीअहो मा!,” “लोब राखोह मा!,” एंहडा हुकोम आने बीहरा बादाज हुकोम “तुं सोतापेअ जेंहडी माया राखोह, एंहडीज माया बीहराहांपेअ बी राखजे!” एंहडा ईया एकुज हुकोमुम होमाय जाताह।
10 बीहराहांपेअ माया राखनारें कीदीह बी बीहराहांअ खोटों नांय केअ। तीयाअ लीदे, एंहकींअ आखाय का, बीहराहांपेअ माया राखनारें पोरमेहेराअ नीयोम पुरी रीते पालनारें हाय। 11 मांयुं जों पेअलांअ आख्योंह तों बादोंज केअजा! काहाका, आमीर्योअ सोमोय कोतोअ खाराब हाय तों तुमां जांअतेंहज। आने तुमां जांअतेंहज का, ए ता नींद उगळी गेहला मांहांअ होच चोट-पोटयो बोंणीन काम केरांअ वोखत हाय। काहाका, ख्रीस्त आपनेंह आखरीप वाचावांअ हाय तो वोखत पाहीज हाय। तो वोखत ता, जांहांअ आपुंह ख्रीस्तुपेअ वीसवास राखलो तांहांअ ओतोअ पाही नांय आथो। 12 रात पुरी वेरांअ तीयारीम वीअ तेंहकींअ, ईयु खाराब दुन्याम जीवांअ आपुअ वोखत आमी लोग-भोग पुरो वेरांअ तीयारीम हाय। आने ख्रीस्त फाचो आवांअ सोमोय एकदोम पाही आलोह। तीयाअ लीदे, मांहेंअ जें खाराब कामें केअतेंह, तें खाराब कामें केरांअ आपुंह सोळी देजी! आने दीहाअ सोताअरी आथ्यारें बांदीन तीयार वीअ जानारा सोयनीकुअ होच, आपुंह एंहडें कामें केअतें रेजी का जें सेतानाअरी लोळांअ आपनेंह मोदोत केअ। 13 आने ख्रीस्तुअ फाचो आवांअ वोखत आवीज गीयोह एंहकींअ होमजीन तीयाल सोबे एंहडी रीते आपुंह वोरतोन राखजी! साकटें बोंणीन मोज-सोकुम नांय पोळजी! सीनालाअ जेंहडों केल्ली बी जातीअ खोटों काम आपुंह नांय केअजी! आने बाथ-भानगोळ नांय केअजी! बीहरा लोकाहीं पेअ आदराय नांय राखजी! 14 पेन उलटों, बीहरें मांहेंअ मालीख ईसु ख्रीस्त केंहडो हाय तों हीअ सेके तीयाअ खातुर, तीयाअ बादाज गुण तुमांअ जीवोनाहांम उतावजा! आने तुमांअ पापी मोर्जींहन गोंवें तेंहडें कामें केरांअ वीचारुज सोळी दा!