14
बीहरा वीसवास्यांअ टीका मा केअतें!
1 तुमांअ आर्याअ वीसवास्यांहम जें वीसवासाम नोबलें हाय तीयाहांन बी आवकारजा! पेन तें जों मानतेंह तीया बाबोताम तीयाहांअरी वाद-वीवाद मा केअतें! 2 दाखला तोरीके, ओमुक वीसवासी माने का तीयाल बादी जातीअ मांडो खाय सेकाय। पेन बीहरें वीसवासी मांहेंअ एंहडी सोंका राखतेंह का ओमुक-ओमुक बाबोतीहींअ पोरमेहेर तीयाहांन सुट नांय दे। आने तें मानतेंह का, तीयाहांन माह-मासी नांय खाय सेकाय। 3 बादी जातीअ मांडो खावाय एंहडों माननारें मांहेंअ ओमुक जातीअ मांडो नांयज खावाय एंहकींअ माननाराहांन ओलकें नांय गोंणांअ जोजे। तेंहकींअज कीईन, ओमुक मांडो नांयज खावाय एंहकींअ माननारांअ बी बादी जातीअ मांडो खावाय एंहकींअ माननाराहांन गुनालें नांय आखांअ जोजे। काहाका, पोरमेहेरांय सोतेज तीया मांहांहांन बी सोताअ मांहेंअ मानी लेदेंह। 4 बीहरा मांहांअ चाकोराल गुनालो आखांअ तुल काय बी होक नांह। तीयाल मानी लांअ का गुनालो आखांअ जोवाबदारी ता तीयाअ सेटुअज हाय। तों मांहुंअ माह-मासी खाहे का नांह खातों तीयाअ पारवाअ केअया वोगुरुज पोरमेहेर तीयाल सोताअ मांहुंअ मानी लीअ। काहाका, तीयाल टीकवी राखांअ मालीखापेअ ताकोत हाय।
5 थोळेंक मांहेंअ ओमुक-ओमुक दीहुंहन बीहरा दीहाहांअ केअता वादारे मोडो गोंअतेंह आने बीहरें थोळेंक मांहेंअ बादा दीहुंहन हारकाज गोंअतेंह। एंहडी बाबोतींहम दोरेक मांहुंअ सोतेज सोताअ मोनाम नोक्की केअया पोरमाणे चाले! 6 ओमुक दीहुंहन मोडा गोअनारें मालीखाल मान दांअ खातुरुज तेंहकींअ केअतेंह। बादी जातीअ मांडो खानारें तीया मांडाअ खातुर पोरमेहेराअ आभार मानतेंह। तीयाअ लीदे, मालीखाल मान दांअ खातुरुज तें तो मांडो खातेंह। एखली साक-भाजी खानारें बी तीयाअ खातुर पोरमेहेराअ आभार मानीन मालीखाल मान दांअ खातुरुज तें खातेंह। 7 आपुंहमेर्योंअ केडों बी सोताल राजी राखांअ ओतोंअज नांह जीवतों आने मोअतों। 8 आपुंह जीवतेंह तांहांअ बी आपनेंह सोताल ओतेंअज राजी राखांअ नांय पेन मालीखाल बी राजी राखांअ कोसीस केरांअ जोजे। मोंजे, जीवजी तांहांअ बी आने मोअहुं तांहांअ बी आपुंह मालीखाअज मांहेंअ हाय। 9 मोअला आने जीवता लोकाहांअ मालीख वेरांअ खातुरुज ख्रीस्त मोअयो आने फाचो जीवतो वीयो।
10 धोरमाअ ओमुक नीयोम पालनारें तुमां तुमांअ आर्याअ जे वीसवासी ते नीयोम नांह पालता तीयाहांन गुनाला आखा ता ते नाज आवे एंहडी गोठ हाय। आने ते नीयोम नांय पालनारें नीयोम पालनारांहन ओलकें गोंएं ता, ते बी नाज आवे एंहडीज गोठ आखाय। काहाका, एक दीह आपुंह बादेंज पोरमेहेर आपुअ कामाहांअ नीयाय केअ तीयाअ खातुर तीयाअ आगलांअ उबी रीहुं। 11 ईं आपुंह जांअतेंह। काहाका, पोवीतोर लेखाणाहांम बी एंहडों लेखलों हाय:
“मालीख आखेह का, ‘कायोम रेनारो आंय, मांअ सोताअ होम खायन आखुंह,
बादें मांहेंअ मांन तीयाहांअ मालीख तोरीके कोबुल कीईन मांअ पागे पोळीअ,
आने बादें सोताअ मुंयें कोबुल कीअ का आंय तीयाहांअ पोरमेहेर हाय।’”
12 तीयाअ लीदे, ईं चोख्खों देखाय आवेह का, आपुंह केअला कामाहांअ बाबोताम आपुंहमेर्याअ दोरेकुअ पोरमेहेराल हीसाब दांअ पोळीअ।
तोअ आर्याअ वीसवास्याल पापाअ खाडाम मा पाळोह
13 बादाहांअ नीयाय केअनारो ता पोरमेहेरुज हाय। तीयाअ लीदे, आपुंह एक बीहराल गुनालें गोंणांअ सोळी देजी। पेन उलटों, तुमां तुमांअ मोनाहांम एंहडो गाठ वाली लेजा का, तुमां एंहडों काय बी नांय केरा का, जों देखीन तुमांअ आर्येंअ वीसवासी पापाम पोळी जाय। 14 मालीख ईसुअ आर्याअ मांअ जोळाणुअ लीदे, मांन पुरी खातरी हाय का, बादी जातीअ मांडो खांअ पोरमेहेरांय सुट देदीह। पेन जो केडाल ओमुक मांडो खांअ पोरमेहेरांय सुट नांह देदी एंहकींअ लागतों वीअ ता, तीयाअ खातुर तो मांडो होकीकोतुमुज खांअ लायोक नांह। आने तीयाअ लीदे एंहडो मांडो खांअ तीयाल उफ मा देतो। 15 तुं जो मांडो खाहो तीयाकींअ तोअ आर्याअ वीसवास्याअ सोताअ मोनुपेर्योअ वीसवास उठी जाय तेबी तुं एंहडों खांअ चालुज राखो ता, ईयाअ ओर्थो ओ हाय का, तुं बीहराहांपेअ माया राखनाराअ होच नांह वोरतुअतो। जीयाअ खातुर ख्रीस्त मोअयो, तों मांहुंअ तुं ओमुक मांडो खाहो तीया कारोणे आत्मीक रीते नास वेअ एंहकींअ मा बोंणांअ देतो। 16 जों केरांअ तुमनेंह सोताल हारों लागे तेबी तीयाअ पोरीणामे तुमांअ आर्याअ वीसवासी पापाम पोळे आने बीहरें मांहेंअ तुमांअ बाबोताम खोटों आखे, तों तुमां मा केअतें। 17 आपुअ जीवोनाम पोरमेहेराअ राज्याअ ओनुभोव केअजी तों, आपुंह खांअ-पीयांअ बाबोताअ नीयोम पालजी का नांय पालजी तीयाअरी लागतों वीअगुअतों नांह। पेन उलटों, तीयाअ ओनुभोव ता, पोवीतोर आत्माअ ताकोताकींअ हाची रीते आने बीहराहांअरी ईली-मीलीन रीईन आने खुसीम रीईन कीअ सेकाय। 18 ईयु होकीकोतुल धीयानाम राखीन जें ख्रीस्तुअ सेवा केअतेंह, तेंज पोरमेहेराल राजी राखी सेकतेंह आने तीयाहांन बीहरें मांहेंअ बी मांन दीअ।
19 तीयाअ लीदे आपुंह ख्रीस्ती पावुह-बोंअयुंहम सांती पेदा केअ आने एक बीहराल मोजबुत बोंणावे एंहडें कामें कायोम हुची-हुचीम केअजी। 20 केल्ला बी वीसवास्याअ जीवोनाम पोरमेहेरांय जों काम केअयोंह, तीयाअ तुं ओमुक मांडो खाहो तीयाकींअ नास मा केअतो। बादीज जातीअ मांडो खांअ पोरमेहेरांय सुट देदीह। पेन ओमुक मांडो तुं खाव ने तुल देखीन बीहरों मांहुंअ बी मोनाम आचकातों जायन खाय आने एंहकींअ कीईन तीयाल पाप केरांअ उफ मीले एंहडों वीअ ता, ईयाअ ओ ओर्थो वेअहे का, खोरेखोर तुं खोटोंज कीअहो। 21 माह खाताम का होरो पीताम नेता एंहडों बीहरों केल्लों बी काम केअताम तोअ आर्याअ वीसवास्याल आत्मीक नुकसान वेअतों वीअ ता, तों नांय खाव आने तों नांय पीयो आने एंहडों केल्लों बी काम नांय क्योव तोंज तोअ खातुर हारों हाय। 22 एंहडी बाबोतींहम तुं जों मानों, तों तुं जांव आने पोरमेहेरुज जांएं। बीहराहांन तों जोबोर-जोस्ती मानावांअ कोसीस मा केअतो। सोते तो जों काय केअहे तीया बाबोताम सोते गुनालो नांह एंहकींअ जीयाअ जीवुम लागतों वीअ तीयाअरी पोरमेहेर खुस हाय। 23 जो मांडो खांअ सोताअ मोनाम आचकातो वीअ, तो मांडो खांअ तुं उफ दयोव आने तो खानारो सोते पोरमेहेराअ नोजराम खेरों कीअ रीयोह का खोटों एंहकींअ बेन वीचारुंअ खाय ता, तो खानारो पोरमेहेराअ नोजराम गुनालोज हाय। काहाका, सोते जों काय कीअ रीयोह तों खेरोंज कीअ रीयोह एंहडो पाको वीसवास तीयाल नांह रेतो। सोते जों काय बी केअतेंह तों पोरमेहेराअ नोजराम खेरोंज हाय एंहडो वीसवास जीयाहांन नांह रेतो, तें पापुज केअतेंह एंहकींअ आखाय।