15
एखला सोताअज नांय, पेन बीहराहांअ बी वीचार केअजा!
1 आपुंअ वीसवास मोजबुत वेअ तेबी, जीयाहांअ वीसवास लोबलो हाय तीयाहांअ आपुअ वेठी लांअ जोजे! आपुंह सोताअज खुसीअ वीचार नांय केअजी। 2 पेन उलटों, आपुंहमेर्योंअ दोरेक मांहुंअ, सोताअ आर्याअ ख्रीस्ती वीसवासी आत्मीक जीवोनाम मोडें वेअ तीयाअ खातुर तीयाहांन खुसीम राखे आने तीयाहांअ भोलों वेअ एंहडें कामें केअ। 3 काहाका, ख्रीस्त आपुअ नोमुनो हाय। तीयांय सोताअ खुसीअ खातुर काय बी नांह केअयों। पेन उलटों, मांहेंअ तीयाअ नींदा केअत्लें तांहांअ बी तो पोरमेहेराल खुसीम राखांअ कोसीस केअत्लो। ईयु बाबोताम पोवीतोर लेखाणाहांम एंहकींअ लेखलों हाय का, “पोरमेहेरांय मोकलुअला खास राजांय पोरमेहेराल आख्यों, ‘मांहेंअ तोअ नींदा केअत्लें तांहांअ तें मांअज नींदा केअत्लें एंहडोंज मांन लाग्यों।’” 4 जुना जोमानाम लेखलों आथों तों बादों आपनेंह हीकवांअ खातुरुज लेखलों। मोंजे का, पोवीतोर लेखाणाहांम जों लेखलों हाय तीयाकींअ जो उफ आपनेंह मीलेह। तो मीलवीन आपुंह धीरोज राखतेंह। तीयाअ लीदे, पोरमेहेरांय आपुअ खातुर जों केरांअ वोचोन देदोंह तों कीअज एंहडी आपनेंह आस्या रीअ।
5 आपुंहम धीरोज पेदा केअनारो आने आपनेंह उफ देनारा पोरमेहेराल आंय एंहडी ओरुज कीअहुं का, जेंहकींअ ख्रीस्त ईसु जीवत्लो तेंहकींअज एक-बीहराअरी ईली मीलीन रांअ तो तुमनेंह मोदोत केअ। 6 तांहांअ तुमां एक आवाजे पोरमेहेराअ, जो आपुअ मालीख ईसु ख्रीस्तुअ बाहको हाय तीयाअ, गुणगान कीईन तीयाअ मोडाय कीअ सेकाह।
हारी गोठ बादा लोकाहांअ खातुर हाय
7 तीयाअ लीदे, पोरमेहेराल मोडाय मीले तीयाअ खातुर जेंहकींअ ख्रीस्तुंह तुमनेंह सोताअ लोकाहांअ तोरीके मानी लेदाह, तेंहकींअ तुमां बी एक-बीहराल मानी ला। 8 आंय तुमनेंह एंहकींअ आखांअ मागुंह का, पोरमेहेर सोते तीयांय देदलों वोचोन पुरों केअनारो हाय। तों देखावांअ खातुर, मोंजे का, ख्रीस्तुल मोकलांअ बाबोताम तीयांय आमांअ येहुदीहींअ आगलाअ डायाहांन देदलों वोचोन खेरों पोळे तीयाअ खातुर, ख्रीस्त आमांअ येहुदीहींअ सेवोक बोंण्योह। 9 आने येहुदी जातीअ नांह तेंहडें मांहेंअ पोरमेहेरांय तीयाहांपेअ केअली दायाअ लीदे गुणगान केअ तीयाअ खातुर बी ख्रीस्त एंहकींअ सेवोक बोंण्योह। ईयु बाबोताम पोवीतोर लेखाणाहांम दावीद पोरमेहेराल आखता एंहकींअ लेखेह का,
“तीयाअ लीदे आंय येहुदी जातीअ नांह तेंहडा लोकाहांअ नीसमें तोअ गुणगान केअहें।
आंह, आंय तोअ आगलांअ गीत आखेंह।”
10 आने पोवीतोर लेखाणाहांम बीहरी जागे बी एंहकींअ लेखलों हाय का,
“येहुदी जातीअ नांह तेंहडा लोकुंह! तुमां पोरमेहेराअ लोकाहांअरी आनोंद केरा!” 11 आने पोवीतोर लेखाणाअ बीहरी बी एक जागे एंहकींअ लेखलों हाय का,
“येहुदी जातीअ नांह तेंहडा बादा लोकुंह! तुमां मालीखाअ गुणगान केरा!
आने तोरतीमेर्याअ बादा लोकुंह! तीयाअ गुणगान केरा!” 12 आने पोवीतोर लेखाणाहांम येसायांय बी एंहकींअ लेख्योंह का,
“ईसायाअ कुळुमनेअ एक जांअ पेदा वीअ।
तो येहुदी जातीअ नांह तेंहडा लोकाहांपेअ राज चालवीअ।
ते लोक तीयापेअ आस्या राखीअ।”
13 पोवीतोर आत्माअ ताकोताकींअ तुमां खातरी राखतें रा तीयाअ खातुर तुमांअ माज आस्या पेदा केअनारो पोरमेहेर, तुमां तीयापेअ राखला वीसवासाअ मारफोते तुमनेंह पुरी रीते खुसीम राखे ने तुमनेंह सांती दे!
एंहकींअ लेखांअ कारोण
14 मांअ मेराला पावु-बोंअयुहुं, तुमांअ बाबोताम मांन पुरी खातरी हाय का तुमां हारी रीते आने गीयानाअ रीते वोरतुअतेंह। आने तुमां बीहराहांन आत्मीक हीकामोण दीअ सेका एंहडें हाय। 15 तेबी, तुमनेंह फाचों ईत केरावांअ खातुर ईया कागलाम ओमुक बाबोत्या मांयुं चोख्खी रीते लेख्याह। 16 काहाका, पोरमेहेरांय मेरबानी कीईन मांन तुमांअ मोंजे येहुदी जातीअ नांह तेंहडा लोकाहांम सेवा केरांअ नीम्योह। आने तुमां पोवीतोर आत्माअ मारफोते पुरी रीते पोरमेहेराल ओरपोण वेअला आने पोरमेहेराल पोसोंद पोळे एंहडा ओरपोणाअ होच बोंणा तीयाअ खातुर, आंय पोरमेहेरांय देदली हारी गोठ आखांअ काम कीअहुं।
17 तीयाअ लीदे, ख्रीस्त ईसुअ आर्याअ मांअ जोळाणुअ लीदे आंय पोरमेहेराअ खातुर जों काम कीअहुं तीया बाबोताम मांन ओभीमान हाय। 18-19 येहुदी जातीअ नांह तेंहडा लोक हारी गोठ माने तीयाअ खातुर ख्रीस्तुंह मांअ मारफोते जोंबी केअयोंह तोंज, मोंजे का, मांअ सोब्दाहां ने कामाहांकींअ, आने खुब मोडा आने नोवाय लागे एंहडा चोमोत्काराअ कामाहांकींअ, आने पोवीतोर आत्माअ ताकोताकींअ ख्रीस्तुंह जों केअयोंह तीया बाबोतामुज आंय गोगुंह। 20 आने जींहीं ख्रीस्तुअ बाबोताअ हारी गोठ पेअलांअ केडांय बी नांह जाहेर केअयी तेंहडी जागे जायन आंय हारी गोठ जाहेर क्युंव एज मांअ पेअलांअनेअ खुब मोर्जी हाय। काहाका, एकांय टाकला पायापेअ बीहरो चोंणतोर केअ तीयाअ होच, पेअलांअ जींहीं केडांय बी ख्रीस्तुअ बाबोताअ हारी गोठ जाहेर केअयी वीअ तींहीं जायन काम केरांअ मांअ मोर्जी नांह। 21 पेन उलटों, पोवीतोर लेखाणाहांम जों लेखलों हाय तीयाअ पोरमाणे आंय काम कीअहुं। तींहीं एंहडों लेखलों हाय का,
“जीया लोकाहांन तीया बाबोताम पेअलांअ केडांय बी नांह आख्यों, ते लोक तीयाअ हाचाय जांईअ।
आने जे लोक तीया बाबोताम नांह उनाअया, ते लोक तीयाअ गोठ उनाय आने होमजीअ।”
रोम सेहेराअ मुलाकात लांअ पावुलाअ गोठवोणी
22 खुब बाबोतीहींअ ओळचोण आलली तीयाअ लीदे आंय तुमांअ मुलाकात नांह लीअ सेक्यो। 23 पेन आमी ईंहींर्योंअ काम पुरोंज वीअ गीयोंह आने खुब वोरसेनेअ तुमांअ मुलाकात लांअ आंय मोर्जी राखी रीयोह। 24 मोंजे, स्पेन वीस्ताराम आंय जांअ हाय तांहांअ आंय तुमांअहीं टोलेंह। आने थोळाक दीह तुमांअहीं रांअ मांन मोको मीलीअ एंहडी आंय आस्या राखुंह। हातींअ तुमां मांन स्पेन जांअ खातुर तुमनेंह बोंणे तोतीअ मोदोत कीअहा एंहडी बी आंय आस्या राखुंह। 25 पेन आमी ता आंय, येरुसालेमामेर्याअ पोरमेहेराअ लोकाहांअ मोदोत केरांअ खातुर पोयसा टोलव्याह ते लीईन, येरुसालेम जाहुं। 26 माकेदोनीया आने आखाया वीस्ताराअ ख्रीस्ती लोकाहीं सोतेज एंहडों नोक्की केअलों का, दान टोलवीन येरुसालेमामेर्याअ पोरमेहेराअ लोकाहांम जें गोरीब हाय तीयाहांन तों मोकली देवुलोंअ। 27 तीयाहां सोताअ मेतेज एंहडों नोक्की केअलों ए गोठ खेरी। पेन होकीकोतुम ता, ते येरुसालेमामेर्याअ पोरमेहेराअ लोकाहांअ मोदोत केरांअ बांदांअला हाय। मोंजे का, तीया येहुदी ख्रीस्तींहपनेअज येहुदी जातीअ नांह तेंहडा ख्रीस्तींहन आत्मीक लाब मील्योह। तीयाअ लीदे, येहुदी जातीअ नांह तेंहडा मांहांहांअ, येरुसालेमाअ येहुदी ख्रीस्तींहन पोयसा दीईन मोदोत केरांअज जोजे। 28 जे पोयसा टोलव्याह ते बादा हारकींअ येरुसालेम पोचवीन हातींअ आंय तुमांअहीं रीईन स्पेन जाहें। 29 आने मांन खातरी हाय का, आंय तुमांअहीं मुलाकात लेहें तांहांअ ख्रीस्त आपनेंह बादाहांन सुटा आथे आसीरवाद दीअ।
30 आपुंह मालीख ईसु ख्रीस्तुअ मांहेंअ हाय। आने पोवीतोर आत्मा आपनेंह एक-बीहरापेअ माया राखावेह। तीयाअ लीदे, तीयु मायाअ आदारे आंय तुमनेंह कालावाला कीअहुं का, तुमां मांअरी मीलीन मांअ खातुर पोरमेहेराल खुब ओरुज केअजा का, जें येहुदी लोक ख्रीस्तुपेअ वीसवास नांह राखता तीयाहांअ आथामनेअ तो मांन वाचावे। 31 आने आंय जे पोयसा लीअ जाहुं ते येरुसालेमामेर्या पोरमेहेराअ लोक लीअ ले तीयाअ खातुर बी ओरुज केअजा। 32 तांहांअ पोरमेहेराअ मोर्जी वीअ ता, आंय तुमांअहीं खुसीम आवी सेकुं आने तुमांअरी रीईन आराम कीअ सेकुं। 33 बादाहांन सांती देनारो पोरमेहेर तुमांअ बांठांअरी रे! आमेन!