28
माल्टा बेटुम पावुल
1 ओळचोंणु वोगुर आमां तोळीपेअ पोची गीया तांहांअ आमनेंह खोबुर पोळी का तो माल्टा बेट हाय। 2 बेटुअ रेवासीहीं आमाहांपेअ खुब माया देखावी। हीयालों लागत्लो आने वोहरात पोळांअ टेकलो तीयाअ लीदे, तीयाहां आग बाली ने हेकायांअ खातुर आमनेंह आवकार केअयो। 3 पावुलुंह थोळेंक लाकळें वीसी लावीन आगीम टाक्यें, तांवज एक झेरी हापळों आकठामनेअ नींग्यों। तों पुजलाअलों तीयाअ लीदे बाकलाय गेहलों, आने तों पावुलाअ आथाअरी वेटलाय गीयों आने तीयाल चावी रीयों। 4 पावुलाअ आथाअरी हापळाल टांगलाअतों देखीन बेटुअ रेवासी एक-बीहराल आखांअ टेक्यें का, “ईं मांहुंअ नोक्कीज खुनी वीअ। दोरीयामनेअ ईं वाचाय गीयों, पेन नीयाय केअनारो देव ईयाल नांय सोळे।” 5 पेन पावुलुंह हापळाल आगीम फोकळी टाक्यों आने पावुलुल काय बी नांय वीयों। 6 पेन तें मांहेंअ ता धारत्लें का, आमी ईयाल हुजो चोळी जाय नेता ओ आसाटाय पोळीन मोय जाय। खुब वाअ लोगुंअ हेअयों, पेन पावुलुल काय नांय वीयों। तांहांअ पावुलाअ बाबोताअ तीयाहांअ वीचार बोदलाय गीया। तें आखांअ टेक्यें का, “ईं मांहुंअ एगोह देवुज वीअ।”
7 तींहींनेअ जागेज तीया बेटुअ ओमोलदार मांहांअ जोमीन आथी। तीयाअ नांव पुब्लीयु आथों। तो आमनेंह तीयाहांअहीं हादी गीयो आने तीन दीह लोगुंअ तीयांय खुस वीईन आमांअ गोवारी चाकरी केअयी। 8 आमां तीयाहांअहीं आथा तांहांअ, पुब्लीयाअ बाहको मांदो आथो। तीयाल बोरो चोळत्लो आने मोअळा वेअत्ला। पावुलुंह तीयाअ फातारीअहीं जायन पोरमेहेराल ओरुज केअयी आने पुब्लीयाअ बाहकापेअ आथ थोव्या तांहांअ तो हारो वीअ गीयो। 9 तो हारो वीअ गीयो तों देखीन बेटुमेर्येंअ बीहरें मांदे मांहेंअ बी तींहीं आलें, आने पावुलुंह तीयाहांन बी हारें केअयें। 10 तीयाअ पोरीणामे, तीयाहां जुदी-जुदी रीते आमनेंह खुब मान-पान देदों, आने तीयाहां आमांअ मुसाफोरीअ खातुर जेबी जोरुल्या आथ्या, ते बादया वोस्तु आमनेंह देदया।
माल्टा बेटनेअ रोम सेहेराअ वेल
11 हातींअ, माल्टा बेटुपेअ हीयालों वीतावांअ आलेकसांदरीयाअ एक वाहाण थोबलों तींहमें आमां बोठा। तीया वाहाणुपेअ रोमुअ बेन देवुंअ नीसाणी कोतरुली आथी। 12 हातींअ आमां सुराडुस सेहेर जायन तींहीं तीन दीह रीया। 13 आमांअ वाहाण तींहींनेअ तोळी-तोळी रेग्युम आवी पोच्यों। आने एक दीह हातींअ दोकसीण दीसाअ वेल्योंअ वारों चालु वीयों तांहांअ बीहरे दीह आमां पुत्योली पोच्या। 14 तींहीं आमनेंह थोळाक वीसवासी मीली गीया, आने आमनेंह तीयाहां सांत दीह लोगुंअ तीयाहांअरी रांअ ओरुज केअयी। एंहकींअ तीयाहांअरी सांत दीह रीईन हातींअ आमां पाकठी वाटे रोम सेहेर जांअ नींग्या। 15 रोम सेहरुमेर्याअ वीसवासी लोकाहांन, आमां आवताह तीयाअ खोबुर पोळली तीयाअ लीदे, तीयाहांमेर्याअ थोळाक लोक आमनेंह मीलांअ ‘आप्पीयाअ बाजार’ आलला। आने बीहरा लोक ‘तीन दोरोमसाला’ नांवांअ जागे आलला। तीयाहांन मीलीन पावुलुंह पोरमेहेराअ आभार मान्यो आने तीयाहांन मीलीन तीयाल उफ मील्यो।
रोम सेहेराम पावुल
16 आमां रोम सेहेराम पोच्या हातींअ, रोम सारकारुंह पावुलुल एक खानगी कोअ राखांअ सुट देदी। तीयापेअ नोजुर राखांअ खाली एक सोयनीक ओतोअज तीयाअरी राख्यो। 17 रोम पोचीन तीन दीह हातींअ पावुलुंह रोम सेहरुमेर्याअ येहुदी आगेवानाहांन मीलांअ हादया। ते आगेवान तींहीं टोलवाअया तांहांअ पावुलुंह तीयाहांन आख्यों, “मांअ पावुहुं, मांयुं आपुअ जातीअ लोकाहांअ वीरुद आने आपुअ आगलाअ डायाहां देदला रीत रीवाजा ंअ वीरुद काय बी नांह केअयों। तेबी तींहींर्याअ आपुअ येहुदी लोकाहीं मांन येरुसालेमामनेअ तीईन रोम सारकाराअ ओमोलदाराहांअ आथाम होपी देदलो। 18 रोम सारकाराअ ओमोलदाराहां मांअ जोवाब लेदलो, आने मोताअ साज्याअ लायोकुअ आंय गुनेगार नांह तीयाअ तीयाहांन खोबुर पोळली तांहांअ, ते मांन सोळी दांअ मागत्ला। 19 पेन आपुअ येहुदी लोकाहीं तीया बाबोताम वांदो उठाव्यो। तीयाअ लीदे, तीयाहां मांन नांय सोळ्यो, आने ना सुटके मांअ बादसाल ओरुज केरांअ पोळ्यों। तेबी, आपुअ जातीअ लोकाहांअ वीरुद मांअ काय फोरीयाद नांह। 20 मांयुं तुमनेंह ईं जाणावांअ ईंहीं हादयाह का, जीया ख्रीस्तुअ आवांअ बीहरें येहुदी मांहेंअ वाट जोवतेंह, तो ख्रीस्त आवीज गीयोह एंहडो आंय वीसवास कीअहुं। तीया वीसवासाअ लीदेज मांन केदी बोंणीन ए बेळ्या पोवांअ पोळ्याह।”
21 तांहांअ तीया आगेवानुंह पावुलुल आख्यों, “आमनेंह येहुदीया जील्लामेर्याअ आपुअ लोकाहांपेनेअ एक बी कागलों तोअ बाबोताम नांह मील्यों, आने तींहींनेअ ईंहीं आवनारों केल्लों बी येहुदी मांहुंअ तोअ बाबोताम खाराब गोठ नांह लालों। 22 पेन तुं काय मानोह तों आमां जांणांअ मागताह। काहाका, ईया ईसुअ पोंथाअ लोकाहांअ बाबोताम बादी जागे मांहेंअ खाराब गोगतेंह, ओतीअ आमनेंह खोबुर हाय।”
23 तीयाअ लीदे, फाचा मीलांअ तीयाहां एक दीह नोक्की केअयो। नोक्की केअला दीह, पेअलांअ केअता वादारे येहुदी लोक पावुल रेहलो तींहीं टोलवाअया। पावुलुंह तीयाहांन वेगीअ वेलेनेअ वाअती वेल लोगुंअ पोरमेहेराअ राज्याअ बाबोताम गोठ्या होमजाव्या, आने मोसेंय देदला नीयोमाहांअ आने पोरमेहेराअ गोठ जाहेर केअनारा जुना जोमानाअ बीहरा लोकाहीं अ गोठ्या आखतो जायन ईसुअ बाबोताअ तीयाहांन खातरी केरावांअ तीयांय कोसीस केअयी। 24 तीयाअ गोठ्या उनायन थोळाकाहांन वीसवास बोठो। पेन बीहराहांन नांय बोठो। 25 ते बादा एक-बीहराअरी वाद-वीवाद कीईन तींहींनेअ जाता रांअ तीयारीम आथा। तांहांअ पावुलुंह तीयाहांन आख्यों, “पोवीतोर आत्मांय पोरमेहेराअ गोठ जाहेर केअनारा येसायाअ मारफोते आपुअ आगलाअ डायाहांअ बाबोताम जों आखलों, तों तुमांअ बाबोताम बी खेरोंज हाय। तीयांय आखलों, 26 “पोरमेहेरांय येसायाल आख्यों,
‘तुं मांअ ईसरायेल लोकाहांन जायन एंहकींअ आखेअ का,
तुमां मांअ गोठ उनाअया कीअहा,
पेन काय बी नांय होमजाह।
तुमां नोजरे हीअहा,
पेन आंय काय कीअहुं तों तुमनेंह काय बी हुजनारों नांह।
27 काहाका, तुमांअ ओकुल बेरजाय गीयीह,
आने तुमांअ कान उंडाय गीयाह,
तुमांअ डोंआं मीचाय गीयाह।
नेता, तुमां तुमांअ डोंआंह कींअ हेअता,
कानुंह कींअ उनाअता,
आने मोनाम होमजी जायन फाचा मांअहीं वोली आवता,
आने आंय बी तुमनेंह हारा केअतो।’”
28 तीयाअ लीदे, तुमां बोराबोर होमजी लेजा का, पापाहांअ सीक्सामेनेअ वाचायांअ बाबोताम पोरमेहेराअ ए गोठ, जे लोक येहुदी नांह तीयाहांअहीं बी पोरमेहेरांय मोकली देदीह। आने तुमां ते गोठ माना का नांय माना, पेन ते लोक ए गोठ नोक्कीज मानीअ।” 29 पावुलाअ गोठ पुरी वीयी तांहांअ ते लोक रोगीम चारचा केअता-केअता तींहींनेअ जाता रीया।