27
पावुल वाहाणुम बोहीन रोम सेहेराअवेल जाहे
1 ईटाली जांअ आमांअ नोक्की वीयों तांहांअ, आमां वाहाणुम बोहीन तींहीं जांअ नींग्या। पावुलुल आने बीहरा खुब केदीहींन “बादसाअ सेनाअ” नांवें सोयनीकाहांअ टुकळीअ ओमोलदाराल होपी देदा। तीया ओमोलदाराअ नांव जुलीयु आथों। 2 आसीया वीस्तारामेर्याअ वाहाणुंअ खुब टेसोनुंहपेअ उबी रेतों जानारा वाहाणुम आमां बोठा। तों वाहाण आसीया वीस्ताराअ आदरामीत्तीयुम सेहेराअ आथों। आमांअरी माकेदोनीया वीस्ताराअ थेस्सालोनीका सेहेराअ आरीस्तारकु बी आथो। 3 बीहरे दीह आमां सीदोन टेसनुपेअ उत्या। सोयनीकाहांअ ओमोलदार जुलीयांह पावुलुपेअ मेरबानी केअयी आने तीयाल तीयाअ दोस्दारुंअ कोअ गोवारो रांअ राज्या देदी, ईयाअ खातुर का ते पावुलाअ जोरुल्या पुर्या पाळे। 4 हातींअ तींहींनेअ आमां नींग्या। हुंबुर वारों लागत्लों तीयाअ लीदे आमां सीपरु बेटुअ उत्तोरुअ वेलेनेअ आगलांअ चाल्या, ईयाअ खातुर का तों वारों आमनेंह नोळे नांय। 5 आने कीलीकीया ने पांफुलीया वीस्ताराअ पाहीर्योअ दोरीयो उनखावीन लुकीया वीस्ताराअ मुरा टेसोनुपेअ आमां आवी पोच्या। 6 तींहीं ईटाली जानारा आलेकसांदर्याअ एक वाहाण देखीन सोयनीकाहांअ ओमोलदारांय आमनेंह तींहमें बोहावी देदा।
7 बागे-बागे जाता, खुब दीह हातींअ, आमां खुब मुसीबोत्या वेठीन जेंहकींअ-तेंहकींअ आसीया वीस्ताराअ कीनीदु पोच्या। वाराअ लीदे आगलांअ जावाय तेंहडों बी नांय आथों आने दीह उगताअ वेल बी जावाय एंहडों नांय आथों तीयाअ लीदे, आमां सोलोमोनेअ पाहलीअ तोळी कीरेत बेटुअ जागेनेअ आगलांअ चाल्या, 8 आने दोकसीण काठे बागे-बागे आगलांअ जायन लासेया सेहेराअ टेसोन जों सुंदर नांवांअ आखात्लों तींहीं जेंहकींअ तेंहकींअ आवी पोच्या।
तोफानुम वाहाण पाजाय जाहे
9 तींहीं खुब दीह वीती गीया। आने वाहाणुम बोहीन दोरीयाम जावुलोंअ दीहु-दीहु खाराब हावामानुअ लीदे खोतोरनाक वेअतों जाहलों। 10 तीयाअ लीदे, पावुलुंह सालाह देदी का, “पावुहुं! मांन लागेह का, आपुअ खातुर आमी ए मुसाफोरी एकदोम खोतोरनाक नींगीअ। आपुंह वाहाण आने बीडारो ता गोमावुंहज। पेन आरी-आरी आपुअ जीव बी गोमावांअ पोळीअ।” 11 पेन सोयनीकाहांअ ओमोलदारांय पावुलाअ आखली गोठ नांय मानी, पेन उलटों वाहाणुवालांअ आने वाहाण चालवुअनारा मांहांहांअ उपरीअ गोठ मानी। 12 आने हीयालाम रांअ खातुर तों टेसोन हारों नांय आथों तीयाअ लीदे, आमांअमेर्यांअ खुब जांअहांअ वीचार बी तींहीं रांअ नांय आथो। तीयाअ लीदे, आमां तींहींनेअ नींगीन, बोंणे ता फेनीकस जायन हीयालाम तींहींज रांअ वीचारत्ला। फेनीकस कीरेत बेटुअ वाहाणुअ एक हारों टेसोन आथों। आने तींहीं उत्तोर दीसाअ खुणामनेअ तीयाअ बारे दोरीयाअ बेनुं वेल खुल्लों वेअहे।
दोरीयाम वादुंअ
13 दोकसीणु वेल्योंअ वारों बागे-बागे चालांअ टेक्यों तांहांअ, आगलांअ जांअ काय वांदो नांह एंहकींअ वीचारीन तीयाहां आगलांअ जांअ लोंगुर उसली लेदी आने कीरेत बेटुअ तोळी-तोळी चालवांअ टेक्या। 14 पेन जाराक वाअ लागी आने हावामान बोदलाय गीयों। आने उत्तोर दीसाअ हुदी वेल्याअ बेटुपनेअ वादुंअ होच वारों चालांअ टेक्यो। तीया वाराअ नांव उत्ता हाय आने वाहाण तींहमें घेराय गीयों। 15 वाराअ लीदे वाहाण आगलांअ चालवी जांअ मेहनोत नोककामी गीयी। तीयाअ लीदे, आमां तीयाल वाराअरी तांणायांअ देदों। 16 हातींअ आमां कावुदा नांवांअ एक हानांअ बेटुअहीं पोच्या। तीया बेटुअ दोकसीणुअ वेल वादारे वारों नांय लागत्लों। तींहीं जे आमांअ वाहाणुअ फाचलांअ बांदीन आमां लीअ जाहला तीयु हानीअ उळील आमां पांअयांमेनेअ वाहाणुपेअ उसली लेदी। 17 तीयु हानीअ उळील वाहाणुपेअ तांय लेदी हातींअ आमां एंहें-तेंहेंनेअ दोअळें टोलवीन वाहाण पाजाय नांय जाय तीयाअ खातुर वाहाणुअ आगलां-फाचलांअ दोअळें बांदी काडयें। पेन सुरती, मोंजे, लीबीया नांवांअ दोरीयाअ फाटाम वाहाणुअ एठर्योअ भाग गाळाय जाय एंहकींअ वीचारीन आमां वाहाण बागे जाय तीयाअ खातुर पोतळाहांअ सोळ उतावी लेदा, आने वाहाण एंहकींअज वाराअरी बागे-बागे तांणायांअ देदों। 18 बीहरे दीह बी खुब तोफान चालुज आथों आने तीयाकींअ वाहाण खुब आलत्लों। तीयाअ लीदे, तीयाहां वाहाणुमेर्योअ बीडारो दोरीयाम फेकी देदो। 19 तीजे दीह बी तोफान तेंहडोंज आथों। तीयाअ लीदे, तीयाहां वाहाणुअ सादाने बी दोरीयाम टाकी देदें। 20 खुब दीह नींगी गीया तेबी दीह नांय देखाअयो का तारा बी नांय देखाअया। तीयाअ लीदे, आमां कांहीं हाय ने केल्ली वेल जाताह तीयाअ खोबुरुज नांय पोळत्ली। जेंहकींअ-जेंहकींअ तोफान वादतोंज जाहलों, तेंहकींअ-तेंहकींअ आमांअ वाचायांअ आस्या बी ओसी वेअती जाहली।
21 खुब लांबा सोमोय लोगुंअ आमांअमेर्याअ केडांय बी नांय खादों। आखरीप, पावुलुंह बादाहांअ आगलांअ जायन आख्यों, “कीरेतनेअ आगलांअ नांय जावुलोंअ एंहकींअ जांहांअ मांयुं आखलों तांहांअ, तुमांअ मांअ आखलों मानांअ जोजत्लों। जो तुमां मांअ आखलों मानता ता, ईं वाहाण आने वाहाणुमेर्योअ माल आपुंह नांय गोमावता। 22 तेबी, हींमोत राखजा एंहकींअ आंय आखुंह। काहाका, तुमांअमेर्योअ केडो बी मोअनारो नांह। पेन वाहाण ओतोंअज गोमावांअ पोळीअ। 23 मांअ एंहकींअ आखांअ कारोण ईं हाय का, जीया पोरमेहेराअ मांहुंअ आंय हाय ने जीयाअ सेवा आंय कीअहुं, तीयाअ दुत गीयी रातीं मांअहीं आवीन मांअ पाही उबी रीयो आने मांन आख्यों, 24 ‘पावुल, बीतो मां! बादसाअ तोअ तापास वेअ तीयाअ खातुर तुं तीयाअ आगलांअ नोक्कीज हाजोर वीअहो। आने तोअरी वाहाणुम जानारांअ जीव बी तोअ लीदे वाचावी लांअ पोरमेहेरांय वोचोन देदोंह।’ 25 तीयाअ लीदे पावुहुं, हींमोत राखा! मांन पोरमेहेरापेअ भोरुचो हाय का, मांन जेंहकींअ होरगाअ दुतांय आख्योंह तेंहकींअज बोंणीअ। 26 पेन वादुंअ आपनेंह एगाह बेटुप टाकी दीअ आने वाहाणुल बी पाजी टाकीअ।”
27 वादुंअ चालु वेअलों तीयाअ चोवदामी रातीं, आमांअ वाहाण वादुम तांणाअतों-तांणाअतों आदरीयाअ दोरीयाम आवी पोच्यों। आमां ईंहीं-तींहीं ठोकाअत्ला तांहांअ पोरा-पोर रातीं वाहाणुअ चालवुअनारांहन एंहडों लाग्यों का, जोमीन पाही आवती जाहे। 28 दोअळीअरी वोजोन बांदीन पांय माप्यों ता, एक होव ने वीह फुट नींग्यों। थोळाक आगलांअ जायन फाचों माप्यों ता नेवुं फुट नींग्यों। 29 आमांअ वाहाण एगाह खोळकाअरी ठोकाय जाय एंहडी बीख लागता तीयाहां वाहाणुअ फाचलाअ भागामनेअ चार लोंगुर्यें उताव्यें, आने जोमीन देखाय तीयाअ खातुर उजालों वेरांअ ते पोरमेहेराल ओरुज केरांअ टेक्या। 30 वाहाणुअ चालवुअनारा नाही जांअ मोको होदत्ला आने वाहाणुअ आगलाअ भागामनेअ लोंगुर उतावांअ नाटे तीयाहां हानीअ उळी दोरीयाम उतावली। 31 पेन पावुलुंह सोयनीकाहांअ ओमोलदाराल आने सोयनीकाहांन आखी देदों का, “ए बादा नाही जाय ता, आपुंह वाचाजी नांय।” 32 तांहांअ सोयनीकाहां हानीअ उळीअरी बांदलें दोअळें वाडी टाक्यें आने तीयुल पांअयांम तोळी पाळी।
33 उजालों वेरांअ तीयारी आथी तांहांअ, पावुलुंह बादाहांन खांअ खातुर कालावाला केअया आने आख्यों, “आज चोवदा दीह वीअ गीया, तुमां काय बी खादों नांह। चींताम तुमांअ पुखुज हेलाय गीयीह। 34 मोंजे, आंय तुमनेंह कालावाला कीअहुं का, थोळों-थोळों तेबी खाय ला। तांहांअज तुमां जीवता रीअ सेकाह। काहाका, तुमांअमेर्याअ एकाअ बी बाल वाको नांह वेअनारो।” 35 एंहकींअ आखीन पावुलुंह मांडो आथाम लेदो आने बादाहांअ देखताज पोरमेहेराअ आभार मान्यो आने पाजीन तो खांअ टेक्यो। 36 तांहांअ आमनेंह बादाहांन उफ मील्यो। 37 आने आमां बादा बेन होव सोंतेर आदमी खांअ टेक्या। 38 बादाहां तारायन खाय लेदों, आने वाहाणुम गोंव पोअला ते तीयाहां वाहाणुल ओलकों केरांअ खातुर दोरीयाम टाकी देदा।
39 उजालों वीयों तांहांअ, वाहाणुअ चालवुअनारांहन केल्ला जागापेअ सोते हाय तीयाअ होमुज नांय पोळी। पेन तीयाहां रेटीअ काठावालो दोरीयाअ फाटो देख्यो। आने बोंणे तांव वाहाणुल तीया फाटाम लीअ जांअ तीयाहां वीचार केअयो। 40 तांहांअ तीयाहां लोंगुर बांदलें तें दोअळें वाडी टाक्यें ने लोंगुर्यें दोरीयामुज रांअ देदें, आने वाहाणुअ कोवोंडोरुअ आर्येंअ दोअळें टीलें केअयें, आने आगाळी सोळुअ पोतळाल चोळवीन तोळीअ वेल वाहाणुल जावावांअ टेक्या। 41 पेन दोरीयाअ बेन होया टोलवाअतल्या तींहमें वाहाण पोळ्यों आने आगलांअ जाय नांय सेक्यों, आने वाहाणुअ फाचलो भाग चुहा ठोकाअत्ला तीयाअ लीदे पाजायांअ टेक्यो। 42 केदी तोरीन नाही जाय ता सारकार तीयाहांअ बोदले सोयनीकाहांन साज्या केरीअ एंहकींअ वीचारीन केदीहींन माय टाकांअ सोयनीकाहां वीचार केअयो। 43-44 पेन सोयनीकाहांअ ओमोलदार पावुलुल वाचावांअ मागत्लो तीयाअ लीदे, तीयांय तीयाहांन तेंहकींअ केअता रोकया, आने जीयाहांन तोरता आवळुअतों वीअ तीयाहांन पांअयांम कुदी पोळीन तोरता-तोरता तोळी पोचांअ आख्यों, आने तोरता नांय आवळे तीयाहांन पाट्यांहपेअ बोहीन नेता वाहाणुअ पाजाअला गोंवें तीया भागुपेअ बोहीन तोळीपेअ पोची जांअ हुकोम केअयो। एंहकींअ कीईन आमां बादा हारकींअज जोमीनुपेअ पोची गीया।