26
राजा आगरीप्पाअ आगलांअ पावुल सोताअ वाचाव केअहे
1 हातींअ राजा आगरीप्पांह पावुलुल आख्यों, “सोताअ वाचावुम तुं जों आखांअ हाय तों आख!” तांहांअ पावुलुंह सोताअ आथ लांबो कीईन सोताअ वाचाव केअता एंहकींअ आख्यों,
2 “माहराज आगरीप्पा! वोळीलाहीं मांअपेअ थोवला ईया गुनांअ मांअ वाचाव केरांअ तोअ आगलांअ जो मोको मांन मील्योह, तीयाअ लीदे आंय सोताल नोसीबदार गोंअहुं। 3 काहाका, आंय जांअहुं का, आमांअ येहुदीहींअ बादा रीवाज आने आमांअ येहुदीहींअ-येहुदीहींअ नीसमें जे होमजोणुअ फोरोक हाय तीयु बाबोतीहींअ तुल ओनुभोव हाय। तीयाअ लीदे, मेरबानी कीईन तुं मांअ गोठ धीरोज राखीन उनाअ!
4 आंय हानो आथो तेहेअनेअज, मोंजे का, सुरुवातुमनेअज मांअ सोताअ लोकाहांम आने येरुसालेमाम आंय केंहकींअ जीवत्लो तों, बादों येहुदी आगेवान हारकींअज जांअताह। 5 ते मांन पेअलांअनेअज हारकींअ जांअताह का, आंय आमांअ धोरमाअ कोळोकुम-कोळोक फोरीसी पोंथाअ मांहुंअ तोरीके हारों धोरमी जीवोन जीवतो आलोह। ते धारे ता, ईयु बाबोतीअ ते साक्सी दीअ सेके। 6 आने आज मांन कोरुटाम ईयाअ खातुर लालाह का, आमांअ आगलाअ डायाहांन पोरमेहेरांय जों वोचोन देदोंह तों तो पुरों कीअ एंहकींअ आंय आस्या राखुंह। 7 ईंज वोचोन पोरमेहेर पुरों कीअ एंहडी आस्या राखीन मांअ येहुदी जातीअ बार कुळाहांअ मांहेंअ रात-दीह एक मोने पोरमेहेराअ भोकती केअया केअतेंह। आने ओ माहराज! तेज आस्या आंय राखुंह तीयाअ लीदे येहुदी आगेवान मांन गुनेगार गोंअताह। 8 आने ओ येहुदीहीं! पोरमेहेर मोअलाहांन फाचो जीवतो कीअ सेकेह ए गोठ तुमनेंह काहा मान्याम नांह आवती? 9 पेअलांअ ता आंय बी नाझारेथावाला ईसुपेअ वीसवास राखनारांअ वीरुद केरांअ खातुर, मांन जोतोंअ बोंणे तोतोंअ बादों कीअ सुटांअज मांअ फोरोज होमजुअत्लो। 10 मोंजे, मांयुं येरुसालेमाम बी तेंहडोंज केअलों, आने मोडा पुंजाराहां मांन आदीकार देदलो तो वापरीन ईसुअ पोंथाअ खुब-बादा लोकाहांन जेलाम कोंडावला, आने तीयाहांन मोताअ साज्या केरांअ बाबोताम आंय बी हांज आथो। 11 खुब वोखत आंय येहुदीहींअ भोकती मोंडोळाअ कोअ-कोअ जायन ईसुअ पोंथाअ लोकाहांन ईसुअ नाकार केरावांअ खातुर तीयाहांन साज्या केरावत्लो। मांन तीयाहांपेअ ओतीअ बादी रोग चोळत्ली का तीयाहांन साज्या केरांअ खातुर आंय बीहरा देसाहांअ सेहेराहांम बी जाहलो।
पावुल तीयाअ बोदलाणुअ बाबोताम आखेह
(खास चेलाहांअ कामें ९:१-१९; २२:६-१६)
12 तीयाज कामे, एक दीह आंय येरुसालेमामेर्याअ मोडा पुंजारांयपनेअ आदीकार आने हुकोम लीईन दामास्कु जाहलो। 13 तांहांअ ओ माहराज, वाटे लोग-भोग पारगाप, दीहाअ उजवोळाअ केअता वादारे उजवोळ जुगामेनेअ मांअ आने मांअ आर्यांअ चारु वेल पोळ्यो। 14 आमां बादा पुंय आसाटाय पोळला आने आंय हीबरु भासाम एक आवाज एंहकींअ आखता उनाअयो का, ‘सावुल, सावुल, तुं मांन काहाल सोतावोह? मांअ मोर्जीअ वीरुद चुलायन तुं सोतालुज नुकसान कीअहो!’ 15 तांहांअ मांयुं फुच्यों, ‘साहेब, तुं केडो हाय?’ तांहांअ मालीखांय आख्यों, ‘आंय ईसु हाय। मांअपेअ वीसवास केअनाराहांन सोतावीन तुं खोरेखोर मांनुंज सोतावोह! 16 पेन आमी तुं उठ! मांयुं तुल मांअ सेवोक आने साक्सी तोरीके नीमांअ खातुर तुल दोरसोन देदोंह। तुल आमी मांयुं जों दोरसोन देदोंह, आने आजी जें खुब दोरसोनें आंय देनारो हाय, तीया बाबोताम तोअ दुन्याअ लोकाहांन आखांअ पोळीअ। 17 आंय तुल तोअ सोताअ लोकाहांम आने येहुदी जातीअ नांह तेंहडा लोकाहांम मोकलेंह आने आंय तुल तीयाहांअ आथामनेअ वाचावेंह। 18 आंह, आंय तुल येहुदी जातीअ नांह तेंहडा लोकाहांअहीं मोकलेंह, ईयाअ खातुर का तुं जायन तीयाहांअ आत्मीक डोंआं उगाळो, आने तें मांहेंअ आत्मीक आंदारामनेअ आत्मीक उजवोळाम आवे, आने सेतानाअ ताकोतुमनेअ सुटीन पोरमेहेराअ ताकोतुअ ओनुभोव केअ। हातींअ मांअपेर्याअ तीयाहांअ वीसवासाअ लीदे, तीयाहांन सोताअ पापाहांअ माफी मीलीअ, आने पोरमेहेराअ पोसोंद केअला लोकाहांम ते बी आवी जाय।’
पावुल सोताअ कामुअ बाबोताम आखेह
19 “तांहांअ ओ माहराज आगरीप्पा! जुगाम मांयुं देखलों तीया दोरसोनुम मालीख ईसुंय मांन जों आखलों, तीयाअ पोरमाणे केरांअ आंय चुकयोज नांह। 20 मांयुं पेअलांअ दामास्कु सेहरुमेर्याअ लोकाहांन बोद देदो, हातींअ येरुसालेम सेहरुमेर्याअ येहुदी लोकाहांन बोद देदो। आने तेंहकींअज कीईन येहुदीया जील्लाअ येहुदी लोकाहांन आने येहुदी जातीअ नांह तेंहडा लोकाहांन बी बोद देदो। तीयाहांन मांयुं आख्यों, ‘तुमां तुमांअ पापाहांअ लीदे दुखी वीईन ते सोळी दा आने पोरमेहेराअ वाटे आवा! आने हारें कामें कीईन देखावा का तुमांअ जीवोन बोदलाय गीयोंह।’ 21 आंय एंहडा बोद देहलो तीयाअ लीदे थोळाक वोळीलाहीं येरुसालेमाअ मोंदीराम मांन तेअलो, आने ते मांन माय टाकांअ कोसीस केअत्ला। 22 पेन पोरमेहेरांय मांन वाचावलो तीयाअ लीदे आंय हानांअ-मोडा खुब लोकाहांअ आगलांअ ए होकीकोती आखांअ खातुर आज लोगुंअ जीवतो हाय। मोसेंय आने पोरमेहेराअ गोठ आखनाराहां जों काय बोंणांअ आगाह्या केअल्या, तीयाअ सीवाय बीहरों काय बी आंय नांह हीकवुअतो। 23 तीयाहां एंहडी भोवीसवाणी केअली का, ‘ख्रीस्त दुख वेठीन मोय, आने येहुदीहींन आने जे येहुदी नांह तीयाहांन आत्मीक उजवोळ मीलनारो हाय एंहडों जाहेर केरांअ खातुर तो मोअलांमेनेअ जीवतो उठीअ, आने एंहकींअ तो मोअलांमेनेअ जीवतो उठनारांहम पेअलांम-पेअलोअ बोंणीअ।’ तीयु भोवीसवाणी पोरमाणे ईसु मोअयो ने फाचो जीवतो उठ्यो आने तोज ख्रीस्त हाय!”
24 पावुल सोताअ वाचावुम एंहकींअ आखत्लो तांवज, फेस्तु बोंबलीन आखी उठ्यो, “पावुल, तुं गांडो वीअ गीयोह। तुं वादारे लेख्योह तीयाअ लीदे तोअ मोगोज गीयोंह।”
25 तांहांअ पावुलुंह आख्यों, “खुब मानुवाला फेस्तु! आंय गांडो नांह वीअ गीयो। उलटों, आंय ता हाच्या आने ओकलीवाल्या गोठ्या कीअहुं। 26 आने माहराज आगरीप्पा ईसुअ बाबोताम ईं बादों हारकींअ जांअहे। आंय खुल्ला दीलेज आखुंह। काहाका, मांन खातरी हाय का, ईया बोनावुंअ बाबोताम तीयाल बादीज खोबुर हाय। काहाका, ईसुल जोंबी वीयों, तों बादों ओजाण्या खुणाम नांह बोंण्यों। 27 माहराज आगरीप्पा! पोरमेहेराअ गोठ आखनारा जुना जोमानाअ सेवोकुंअ लेखाणाहांन तुं मानोह का? मांन खातरी हाय का तुं ते नोक्कीज मानोह।”
28 तांहांअ आगरीप्पांह पावुलुल आख्यों, “ईया थोळाकुज वोखताम तुं मांन ख्रीस्ती बोंणावी सेकोह एंहकींअ तुं धारोह का?”
29 तांहांअ पावुलुंह जोवाब देदो, “थोळाक वोखताम का वादारे वोखताम, तीयाअ काय वांदो नांह। आंय ता पोरमेहेराल एंहडी ओरुज कीअहुं का तुं ओतोअज नांय, पेन आज मांअ गोठ्या उनाअनारें बादेंज मांअ होच ख्रीस्ती बोंणी जाय। फोक्तो तें मांअ होच जेलाम ओतेंअ नांय कोंडायाहांअ जोजे।” 30 हातींअ राजा आगरीप्पा, राजपाल फेस्तु, बेरनीके आने बीहरें बादें उठीन नींग्यें। 31 दोरबारुमनेअ नींगीन तें एक-बीहराल आखत्लें, “ईया मांहांय मोताअ साज्या मीलवांअ लायोक का जेलाम कोंडायाहांअ लायोक काय बी नांह केअयों।” 32 आगरीप्पांह फेस्तुल आख्यों, “ईं मांहुंअ बादसाहपेअ नीकाल नांय मागतों ता, ईयाल आपुंह सोळी थोवता।”