25
रोम राज्याअ बादसाहपेअ पावुल नीयाय मागेह
1 सोताल होपाअली नोवी जोवाबदारी लीईन तीन दीह हातींअ, राजपाल फेस्तु कायसारीयानेअ येरुसालेम गीयो। 2 तींहीं येहुदीहींअ मोडा पुंजाराहां आने आगलांअ पोळता येहुदीहीं तीयाअ आगलांअ पावुलुपेरीअ फोरीयाद केअयी, 3 आने तीयाल एंहडी ओरुज केअयी, “मेरबानी कीईन तुं पावुलुल येरुसालेम लीअ हादावीन तीयाअ केस ईंहीं चालवो ता हारों।” पेन होकीकोतुम ता दोबी रीईन पावुलुल वाटेज माय टाकांअ तीयाहां गोठवोणी केअली। 4 पेन फेस्तुंह आख्यों, “पावुल कायसारीयाअ जेलाम हाय आने थोळाकुज दीहुम आंय सोतेज तींहीं जानारो हाय। 5 मोंजे, तुमांअमेर्याअ हारा-हारा आगेवान मांअरी आवे, आने तीयांय जे काय गुना केअया वीअ तीयाअ तींहीं फोरीयाद केअ!”
6 आंठ-दोहेक दीह रीईन हातींअ, फेस्तु कायसारीया फाचो गीयो आने बीहरे दीह तो नीयाय केरांअ बोठो। तीयांय पावुलुल लीअ आवांअ हुकोम केअयो। 7 पावुल तींहीं आलो तांहांअ, येरुसालेमामनेअ आलला ते येहुदी पावुलाअ हीं टोलो वोली गीया आने मोडा-मोडा गुना तीयाअ माथे पाळांअ टेक्या। पेन तीयाअ ते साबीती नांय दीअ सेक्या। 8 पावुलुंह सोताअ वाचाव केअता एंहकींअ आख्यों, “मांयुं येहुदीहींअ नीयोमाहांअ वीरुद का, तीयाहांअ मोंदीराअ वीरुद का, रोम सारकाराअ वीरुद काय बी गुनो नांह केअयो।”
9 येहुदीहींअ आगेवानाहांअ आगलांअ हारो गोंणायांअ खातुर फेस्तुंह पावुलुल फुच्यों, “तुं येरुसालेम आवीन तींहीं मांअ आगलांअ तोअपेरीअ फोरीयादींअ नीयाय केरावांअ राजी हाय का?”
10 तांहांअ पावुलुंह आख्यों, “नांह, खुद बादसाअ कोरुटाम आंय आलोह, आने ईंहींज मांअपेरीअ फोरीयादींअ तापास वेरांअ जोजे। तुं सोते बी हारकींअ जांअहो का, मांयुं येहुदीहींअ काय बी खोटों नांह केअयों। 11 जो मांयुं कायदो तोळीन मोताअ साज्या मीले एंहडो गुनो केअयो वीअ ता, आंय तींहमेंनेअ सोटकी जांअ नांह मागतो। पेन, ईं मांहेंअ मांअपेअ जे गुना थोवतेंह तीयाअ काय बी साबीती नांह ता, मांन तीयाहांअ आथाम होपांअ बी केडाल होक नांह। तीयाअ लीदे, आंय कालावाला कीअहुं का, बादसा सोतेज रोमुम मांअ नीयाय केअ।”
12 तांहांअ फेस्तुंह तीयाल सालाह देनाराहांअरी चारचा कीईन पावुलुल आख्यों, “तुंयुं बादसाहपेअज नीयाय माग्योह तीयाअ लीदे, बादसाअहीं नीयाय मीलवांअ तोअ जांअ पोळीअ!”
आगरीप्पा राजाअ आगलांअ पावुल
13 थोळाक दीह हातींअ आगरीप्पा राजा, आने तीयाअ बोंअहीं बेरनीके, फेस्तुल नोवा राजपालु तोरीके आवकार केरांअ कायसारीया आलें। 14 तें तींहीं खुब दीह रेहलें तांहांअ फेस्तुंह तीयाहांन पावुलाअ केसुअ जाण केअता आख्यों, “आगलोअ राजपाल फेलीकस, एक मांहांअल जेलाम रांअ दीईन गीयोह। तीयाअ नांव पावुल हाय। 15 आने आंय येरुसालेम आथो तांहांअ, येहुदीहींअ मोडा पुंजाराहां आने वोळीलाहीं मांअ आगलांअ तीयाअ फोरीयाद केअली आने तीयाल साज्या केरांअ मागणी केअली। 16 पेन मांयुं तीयाहांन एंहकींअ आखलों, ‘जीयापेअ गुनो थोवाअहे तीयाल गुनो थोवनारांअ उरु-बुरु सोताअ वाचाव केरांअ जांव लोगुंअ तोक नांय मीले, तांव लोगुंअ तीयाल साज्या केरांअ रोम राज्याअ रीत नांह।’ 17 तीयाअ लीदे, पावुलुपेअ गुनो थोवनारा मांअरी ईंहीं आलला तांहांअ जाराक बी वाअ लागव्या वोगुर बीहरेज दीह मांयुं कोरुटाम बोहीन तीयाल तींहीं लीअ आवांअ हुकोम केअलो। 18 पेन तीयापेअ फोरीयाद केअनाराहां, आंय धारत्लो तेंहकींअ रोम सारकाराअ कायदो तोळांअ बाबोताम एक बी मोडा गुनाअ फोरीयाद नांय केअयी। 19 उलटों, तीयाहांअ फोरीयाद ता, तीयाहांअ येहुदी धोरमाअ जुदों-जुदों मानांअ बाबोताम, आने एगोंह ईसु नांवांअ मांहुंअ जों मोय गीयोंह, पेन पावुल तीयाल फाचो जीवतो वीयोह एंहकींअ आख्या केअहे, तीया बाबोताम आथी। 20 एंहडी बाबोताम केंहकींअ तापास केरुलोंअ, तीयाअ आंय गुचवोंणुम पोळी गेहलो। 21 तीयाअ लीदे, मांयुं पावुलुल फुचलों का, ‘ईयु बाबोतीहींअ नीकाल येरुसालेम जायन केरावांअ तुं राजी हाय का?’ पेन सोताअ केसुअ नीकाल जांव लोगुंअ बादसा-माहराज्याअ आथे नांय आवे तांव लोगुंअ सोताल चोकी-पेहरांम राखांअ पावुलुंह सोतेज ओरुज केअयीह। मोंजे, आंय तीयाल बादसाअहीं मोकलांअ तीयारी क्युंव तांव लोगुंअ तीयाल जेलाम राखांअ मांयुं हुकोम केअयोह।”
22 तांहांअ आगरीप्पा राजांय राजपाल फेस्तुल आख्यों, “आंय बी ईं मांहुंअ काय आखांअ मागेह तों उनायांअ हाय।” तांहांअ फेस्तुंह तीयाल आख्यों, “हाकाल तुं तीयाअ गोठ उनाय सेकोह।”
23 तांहांअ बीहरे दीह राजा आगरीप्पा आने बेरनीके खुब ठाट-माठ कीईन दोरबारुम गीयें। तीयाहांअरी सोयनीकाहांअ उपरी ओमोलदार आने सेहेराअ आगलांअ पोळता थोळाक लोक बी आथा। राजपाल फेस्तुंह हुकोम केअयो तांहांअ सोयनीक पावुलुल दोरबारुम लाला। 24 हातींअ फेस्तुंह आख्यों, “माहराज आगरीप्पा आने ईंहीं हाजोर रेहला बीहरा बादा लोकुंह! तुमां ईया मांहांअल हेअताह। ईयाअ वीरुद येरुसालेमाअ आने ईया सेहेराअ येहुदीहीं मांअ आगलांअ फोरीयाद केअयीह। आने ते बोंबली-बोंबलीन आखत्ला का, ‘ईयाल एक घेळी बी जीवतो मां राखाह!’ 25 पेन तापास केअता मांन एंहडों जांणाअयों का, मोताअ साज्या केराय एंहडो काय बी गुनो ईयांय नांह केअयो। आने तीयांय सोतेज बादसा माहराजुपेअ तीयाअ केसुअ नीकाल माग्योह तीयाअ लीदे मांयुं तीयाल बादसाअहीं मोकली दांअ नोक्की केअयोंह। 26 पेन बादसा माहराजुपेअ ईयु बाबोताम काय लेखुलोंअ, तों मांन होमजाअतों नांह। तीयाअ लीदे, आंय ईयाल तुमांअ बादाहांअ आगलांअ लालोह। खास कीईन, माहराज आगरीप्पा, तोअ आगलांअ आंय लालोह, ईयाअ खातुर का आपुंह तीयाल तापासजी आने तींहमेंनेअ तीया बाबोताम लेखांअ मांन कायक मीले। 27 काहाका, केदीपेअ मांहेंअ जो गुनो थोवतेंह तो देखाव्या वोगुर तीयाल बादसाअहीं रोम सेहेराम मोकली देवुलोंअ ईं मांन बोराबोर नांह लागतों!”