24
येहुदी आगेवान पावुलुपेअ गुनो थोवताह
1 पावुलुल राजपालाअ आथाम होपीन पांच दीह वीया हातींअ, मोडांम-मोडो पुंजारो आनान्या थोळाक येहुदी आगेवानाहांन आने तेरतुल्लु नांवांअ एक वोकीलुल लीईन तींहीं आलो आने तीयाहां पावुलाअ वीरुद फोरीयादी केअया। 2 पावुलुल तीयाहांअ आगलांअ लाला तांहांअ तेरतुल्लुंह तीयाअ वीरुद राजपालाअ आगलांअ एंहकींअ कीईन फोरीयादी केअया:
“खुब मानुवाला साहेब! तोअ खुब ओकलीवाली आगेवानीअ लीदेज आमां येहुदी लोक कायोम सांतीम रीअ सेकताह। आने तुं लांबो वीचारनारो हाय तीयाअ लीदेज ईया देसाअ मांहांहांअ फायदाअ कामें वेअतेंह ने वीकास वेअताह। 3 तीयाअ खातुर आमां तोअ खुब आभार मानताह। 4 पेन तोअ वादारे सोमोय नांय वेळफाय तीयाअ खातुर मुददाअ गोठ आंय तोअ आगलांअ टुकमें रोजु कीअहुं। ते तुं उनाय ल्योव एंहडी तुल मांअ ओरुज हाय। 5 आमां जांअयाह का ईं मांहुंअ भानगुळ्या उब्या केअनारों हाय। ओ आखी दुन्यामेर्याअ बादी जागेर्याअ येहुदीहींन रोम सारकाराअ वीरुद कायोम धामाल केरांअ चोळवेह। नाझारेथावालांअ नांवांअ खुब खोतोरनाक पोंथाअ तो आगेवान हाय। 6 ओ मोंदीराल बाटलावांअ केअत्लो तांवज आमां ईयाल तीअ लेदलो। आमांअ धोरमाअ नीयोमाहांअ पोरमाणे आमां तीयाअ नीयाय केरांअ आथा। 7 (पेन सोयनीकाहांअ उपरी ओमोलदार लुसीयु तींहीं आवी गेहलो आने जोबोर-जोस्तीज आमांहपनेअ तीयाल पाळावी लीअ गेहलो आने तीयाअ वीरुद फोरीयाद केरांअ खातुर तोअहीं आवांअ आमनेंह हुकोम केअलो।) 8 ईया मांहांअलुज ईयु बाबोताम फुचीन ए गोठ हाची हाय का नांह तीयाअ खातरी कीअ सेकोह। तो बी एंहकींअज आखीअ।” 9 फोरीयादी केरांअ आलला तीया बीहरा येहुदीहीं बी आख्यों, तेरतुल्लुंह जों आखलों, तों खेरोंज हाय।
राजपाल फेलीकसुअ आगलांअ पावुल सोताअ वाचाव केअहे
10 हातींअ राजपालांय पावुलुल गोगांअ ईसारो केअयो। तांहांअ पावुल आखांअ टेक्यो का,
“साहेब फेलीकस! तुं खुब वोरसेनेअ ईया वीस्ताराअ लोकाहांअ नीयाय केअतो आलोह। तीयाअ लीदे, तोअ आगलांअ मांअ वाचावुअ गोठ आखता मांन खुब खुसी वेअहे। 11 तुं सोतेज ईयांहन फुचीन खातरी कीअ सेकोह का, येरुसालेमाअ मोंदीराम पोरमेहेराअ भोकती केरांअ आंय गेहलो आने आंय तींहीं बार केअता वादारे दीह नांह रीयो। 12-13 ओताअ दीहाहांम मोंदीराम का भोकती मोंडोळाअ कोअमें धामाल वेअ एंहडी मांयुं चारचा नांह केअयी का केडाल चोळव्यें बी नांह। मोंजे, एंहडों केअता तीयाहां मांन देख्यो वीअ तीयाअ ते साबीती दीअ नांह सेकता। 14 पेन ओतोंअ आंय कोबुल कीअहुं का, ए लोक जीयाल खोतोरनाक पोंथ आखताह, तीया पोंथुल पालीन आंय, आमांअ डायें जीयाअ भोकती केअत्लें तीया पोरमेहेराअ भोकती कीअहुं। नीयोम चोपळीम आने पोरमेहेराअ गोठ जाहेर केअनारांअ चोपळींहम जों काय लेखलों हाय तों बादोंज आंय मानुंह। 15 आने हारा-माठा बादाहांनुंज पोरमेहेर जीवतो उठवीअ एंहडी तीयाहांअ जे आस्या हाय, तेंहडीज आस्या आंय बी राखुंह। 16 आने तीयाअ लीदे, पोरमेहेराअ ने मांहांहांअ आगलांअ चोख्खा दीलुअ रांअ आंय मेहनोत केअतो आलोह। 17 खुब वोरसें वीती गीयें हातींअ, मांअ जातीअ लोकाहांन मोदोत केरांअ खातुर पोयसा दांअ आने पोरमेहेराल भोग चोळवांअ खातुर आंय आमी-आमीज येरुसालेम गेहलो। 18 चोख्खा वेरांअ ते वीदी आंय केअत्लो तांहांअ थोळाक येहुदी लोकाहीं मांन मोंदीराम देखलो। तींहीं मांहांहांअ टोलो बी नांह टोलवायो का धामाल बी नांह वेयी। पेन आसीया वीस्ताराअ थोळाक येहुदी बी तींहीं आथा। 19 तीया येहुदीहींअ मांअ वीरुद काय बी फोरीयाद केरुलोंअज आथी ता तीयाहांअ तोअहीं आवांअ जोजत्लों। पेन ते तोअहीं नांह आला। 20 ईया लोकाहांनुंज फुच का, जांहांअ येहुदी पोंचाअ आगलांअ मांन लीअ जायन तीयाहां मांअ तापास केअली तांहांअ तीयाहांन मांअ केल्लो गुनो झुळलो। 21 मांयुं तीयाहांअ आगलांअ बोंबलीन ओतोंअज आखलों, ‘मोअलें मांहेंअ फाचें जीवतें वेअतेंह एंहकींअ आंय जाहेर कीअहुं। तीयाज कारोणें तुमां मांन गुनालो गोंअताह।’”
22 राजपाल फेलीकसुल ईसुअ पोंथाअ खुब जाणकारी आथी। तीयाअ लीदे, तो धारतो ता तींहींना-तींहींज तीयाअ नीकाल लावी सेकत्लो, पेन तो नांय लालो। उलटों तीयांय आख्यों, “पावुलुल तीईन ईंहीं मोकलुअनारो सोयनीकाहांअ उपरी ओमोलदार लुसीयु आवीअ तांहांअ आंय ईया केसुअ नीकाल केअहें।” 23 हातींअ राजपालांय सोयनीकाहांअ ओमोलदाराल एंहडो हुकोम केअयो, “पावुलुल जेलाम लीअ जायन चोकी राखजा, पेन तीयाअरी केदीअ होच मां वोरतुअता! केल्लों बी मांहुंअ तीयाल मीलांअ मागतों वीअ का तीयाल काय दांअ मागतों वीअ ता, तीयाल ओटकावता मा!”
24 थोळाक दीह हातींअ, राजपाल फेलीकस तीयाअ कोअवाली दुरुसील्लाअरी फाचो कायसारीया आलो। दुरुसील्ला येहुदी जातीअ आथी। तीयाहां पावुलुल हादाव्यो आने ईसु ख्रीस्तुपेअ वीसवास राखांअ बाबोताम तें तीयापेनेअ उनाअयें। 25 पेन पावुलुंह गोठ्या आखता-आखता धोरमी जीवोनाअ बाबोताम, मोनुल काबाम राखांअ बाबोताम, आने आवनारा नीयायाअ बाबोताम आखांअ जेंहडों चालु केअयों का, राजपाल फेलीकस काबराय गीयो आने आखी उठ्यो, “हारों, आमी तांव तुं जो! मांन सोमोय मीलीअ तांहांअ फाचो तुल हादावेंह।” 26 पावुलुपनेअ रुसवोतुअ पोयसा मीलीअ एंहडी फेलीकसुल आस्या आथी। तीयाअ लीदे तो घेळी-घेळी पावुलुल हादावीन तीयाअरी गोठ केअत्लो। पेन पावुलुंह तीयाल काय बी रुसवोत नांय देदी। 27 एंहकींअ केअता-केअता बेन वोरसें नींगी गीयें। फेलीकस राजपालाअ बोदली वीअ गीयी आने तो येहुदींहम हारो गोंणायांअ खातुर पावुलुल जेलाम ुंज रांअ दीईन गीयो। आने तीयाअ जागापेअ फेस्तु राजपाल बोंणीन आलो।