23
1 येहुदी पोंचाअ लोकाहांअवेल एकधारों हीईज रीईन पावुलुंह आख्यों, “मांअ पावुहुं, आंय आज लोगुंअ चोख्खा दीले हारों जीवोन जीवतो आलोह तीयाअ ता पोरमेहेर साक्सी हाय!” 2 तांहांअ मोडांम-मोडा पुंजारा आनान्यांह पावुलाअ पाही उबी रेहला लोकाहांन पावुलाअ मुंयुंपेअ ठोकांअ हुकोम केअयो। 3 तांहांअ पावुलुंह तीयाल आख्यों, “ओ ढोंगी, तुं मांन काय ठोकावोह? पोरमेहेर तुल ठोकीअ! तुं मोसेंय देदला नीयोमाहांअ चोपळीअ आदारे नीयाय केरांअ खातुर नीमाअयोह। तेबी, मांअ गुनाअ साबीती केअया वोगुर तुं मांन ठोकावोह आने एंहकींअ कीईन तुं ते नीयोम तोळोह।” 4 तांहांअ पावुलाअ पाही उबी रेहलांह तीयाल आख्यों, “पोरमेहेराअ मोडांम-मोडा पुंजाराअ नींदा केरांअ तोअ हींमोत केंहकींअ चाली?” 5 तांहांअ पावुलुंह आख्यों, “पावुहुं, तो मोडांम-मोडो पुंजारो हाय एंहडी मांन खोबुर नांय आथी, नेता आंय एंहकींअ नांय आखतो। काहाका, पोवीतोर लेखाणाहांम लेखलों हाय का, ‘तुमांअ ओमोल चालवुअनारा केल्ला बी ओमोलदाराअ नींदा मां कीअहो!’” 6 येहुदी पोंचाअ थोळाक फोरीसी पोंथाअ लोक आथा आने थोळाक सादुकी पोंथाअ लोक आथा तों पावुलुंह हेअयों तांहांअ तीयांय बोंबलीन आख्यों, “मांअ पावुहुं, आंय फोरीसी पोंथाअ हाय आने फोरीसी पोंथाअ माननारा याहकी-बाहकाअ पोयरो हाय। आने फोरीसी पोंथुम जेंहकींअ मानतेंह तेंहकींअ मोअलें फाचें जीवतें वीअ एंहकींअ आंय मानुंह। तीयालुज गुनो गोंईन आज मांन ईया पोंचाअ आगलांअ गुनेगारु तोरीके तीअ लालाह।” 7 पावुलाअ गोठ उनायन पोंचाअ लोकाहांम बेन भागला पोळी गीया आने बोला-चाली वीयी। 8 काहाका, सादुकी पोंथाअ लोक मोअलें मांहेंअ फाचें जीवतें वीअ तेंहडों नांह मानता आने होरगाअ दुत का आत्मा हाय एंहडों बी नांह मानता। पेन फोरीसी पोंथाअ लोक ईं बादोंज मानताह। 9 तांहांअ तींहीं बादा बोंबली-बोंबलीन गोगांअ टेक्या। नीयोम हीकवुअनारा थोळाक, जे फोरीसी पोंथाअ आथा ते उबी रीईन आखांअ टेक्या का, “ईया मांहांय काय बी गुनो केअयो वीअ एंहडों आमनेंह नांह देखाअतों। कादास एक आत्मांय नेता होरगाअ दुतांय तीयाल गोठ केअयी वीअ। मोंजे, तीयांय जों आख्योंह तों खेरोंज वीअ।” 10 भानगुळ वादती जाहली आने सोयनीकाहांअ उपरी ओमोलदाराल एंहडों लाग्यों का, ते बादा पावुलुल मायन कुटका-कुटका कीअ टाकीअ। तीयाअ लीदे, तीयांय पावुलुल कील्लाम उसली लावांअ सोयनीकाहांन हुकोम केअयो।
11 तीदीहज रातीं मालीखांय पावुलुल दोरसोन दीईन आख्यों, “हींमोत राखजे! काहाका, जेंहकींअ तुंयुं ईंहीं येरुसालेमाम मांअ बाबोताअ हाचाय जाहेर केअयीह, तेंहकींअज रोम सेहेराम बी जाहेर केरांअ पोळीअ।”
पावुलुल माय टाकांअ कावोतरों
12 बीहरे दीह वेगीअ येहुदी लोकाहांअ एक टुकळी टोलवाअयी आने तीया लोकाहीं एंहडो होम खादो का, “जांव लोगुंअ आमां पावुलुल माय नांय टाकजी, तांव लोगुंअ आमां काय बी नांय खाजी आने काय बी नांय पीजी।” 13 होम खानारा चालीस केअता वादारे आदमी आथा। 14 ते बादा मोडा पुंजाराहांअहीं आने बीहरा आगेवानाहांअहीं गीया आने तीयाहांन आख्यों, “आमां एंहडो होम खादोह का, जांव लोगुंअ आमां पावुलुल माय नांय टाकजी, तांव लोगुंअ खाजी नांय। 15 तीयाअ लीदे, तुमां एंहकींअ केरा: रोम राज्याअ सोयनीकाहांअ उपरी ओमोलदाराल एंहकींअ कालावाला कीईन होमजावा का, ‘ईया मांहांअ हारकींअ तापास केरांअ आमां आमांअ पोंचाअ आगलांअ लीअ जांअ मागताह।’ पेन तीयाल ईंहीं लीअ आवतीअ वोखत, आमां तीयाल आवता-आवता वाटेज माय टाकुंह।” 16 पेन पावुलाअ पांअजांहन तीयाहांअ गोठीअ खोबुर पोळी गीयी। तीयांय कील्लाम जायन ते गोठ पावुलुल आखी देदी। 17 तांहांअ पावुलुंह सोयनीकाहांअ ओमोलदाराल हादीन आख्यों, “ईया पोयराल उपरी ओमोलदाराहांअहीं लीअ जो! ओ एगीह बातनी दांअ मागेह।” 18 तांहांअ तो ओमोलदार तीया पोयराल उपरी ओमोलदाराहांअहीं लीअ गीयो आने उपरी ओमोलदाराल आख्यों, “आपुंह जेलाम कोंडयोह तीया पावुलुंह ईया पोयराल तोअहीं लीअ आवांअ मांन आख्यों। काहाका, तीयापेअ एगीह खानगी बातनी हाय एंहकींअ तो आखेह।” 19 तांहांअ तो ओमोलदार तीया पोयराल खानगीम हादी गीयो आने तो काय बातनी लालोह तों फुच्यों। 20 तीया पोयराहां आख्यों, “थोळाक येहुदीहीं एंहडों कावोतरों केअयोंह का, पावुलाअ वादारे हारकींअ तापास केरांअ बानो काडीन तीयाल येहुदी पोंचाअ आगलांअ लीअ आवांअ खातुर तुल ओरुज केरुलोंअ। 21 पेन तुं तीयाहांअ गोठ मानतो मां! काहाका, तीयाहांमेर्यांअ चालीस केअता वादारे जांअ पावुलुल माय टाकांअ खातुर वाटे दोबी रेनारा हाय। पावुलुल जांव लोगुंअ माय नांय टाके तांव लोगुंअ मांडो नांय खावुलोंअ ने पांई नांय पीयुलोंअ तीयाहां होम खादोह। तुं हां पाळो ओतीअज वाअ हाय।” 22 हातींअ तीया उपरी ओमोलदारांय एंहकींअ आखीन तीया पोयराल मोकल्यो का, “तुंयुं मांन ए बातनी देदीह एंहडी केडाल बी खोबुर नांय पोळांअ जोजे।”
23 हातींअ तीया उपरी ओमोलदारांय बेन ओमोलदाराहांन हादीन आख्यों, “आज रातीं नोव वाजे कायसारीया जांअ खातुर बेन होव सोयनीक आने कोळांहपेअ सोवारी केअनारा सीत्तेर सोयनीक आने भालांहकींअ लोळनारा बेन होव सोयनीक तीयार केरा! 24 आने पावुलाअ ने तीयाअ आर्यांअ खातुर कोळा तीयार केरा आने तीयाल राजपाल फेलीकसुअहीं लीअ जा!” 25 हातींअ तीयांय राजपालाल ईं कागलों लेख्यों:
26 “मेरबान राजपाल साहेब फेलीकसोन, कोलोदीयु लीसीयुअ सालाम! 27 ईया मांहांअल येहुदी लोकाहीं तेअलों आने तें ईयाल माय टाकांअ तीयारीम आथें तांवज आंय मांअ सोयनीकाहांअरी तींहीं पोची गेहलो आने तीयाल वाचावी लेदलो। काहाका, मांन खोबुर पोळली का ओ रोमुअ नागरीक हाय। 28 येहुदी लोकाहांअ ईयाअ बाबोताम काय फोरीयाद हाय तों जांणाअ आंय तीयाल येहुदीहींअ पोंचाअ आगलांअ लीअ गेहलो। 29 तांहांअ मांन खोबुर पोळी का, तीयाहांअ फोरीयाद तीयाहांअ धोरमाअ नीयोमाहांअ बाबोताम ओतीअज आथी ने आपुअ रोम राज्याअ कायदाअ बाबोताम नांय आथी। आने एंहडी एक बी फोरीयाद नांय आथी का जीयुकींअ आपुअ रोम सारकाराअ कायदा पोरमाणे तीयाल जेलाम कोंडी सेकाय का मोताअ सोज्या देवाय। 30 ईयाल माय टाकांअ थोळाक येहुदीहीं कावोतरों केअयोंह एंहडी बातनी मीलताज मांयुं तीयाल तोअहीं मोकली देदोह। आने तीयापेअ फोरीयादी केअनाराहांन आख्योंह, ईयाअ वीरुद जे काय फोरीयाद केरांअ वीअ, ते तोअहीं आवीन केअ।”
31 सोताल मीलला हुकोमा पोरमाणे ते सोयनीक पावुलुल लीईन रातमां-रात आंतीपात्री पोची गीया। 32 चालता गेहला ते सोयनीक पावुलुल तींहीं थोवीन बीहरे दीह फाचा येरुसालेमाअ कील्लाम आवता रीया। आने कोळापेअ सोवारी केअनारा सोयोनीक पावुलुल आगलांअ लीअ गीया। 33 कोळापेअ सोवारी केअनारा सोयनीकाहां कायसारीया सेहेराम पोचीन राजपाल फेलीकसोनुल कागलों पोचव्यों आने पावुलुल बी तीयाल होपी देदो। 34 राजपाल फेलीकसुंह कागलों वाचीन पावुलुल फुच्यों, “तुं केल्ला राज्याअ हाय?” आने तो कीलीकीया राज्याअ हाय एंहकींअ उनायन तीयांय आख्यों, 35 “तोअपेअ फोरीयाद केअनारा ईंहीं आवीअ तांहांअ आंय तोअ गोठ्या उनाअहें आने तीयाअ नीकाल केअहें।” हातींअ तीयांय पावुलुल हेरोद राजांय बांदावला मेहेलाम राखांअ आने चोकी केरांअ हुकोम केअयो।