22
पावुलाअ सोताअ वाचाव
1 “ईसरायेल वोळीलाहीं आने मांअ बीहरा येहुदी पावुहुं! मांअ वाचावुम आंय तुमनेंह जों आखुंह तों उनाया।” 2 पावुलुल तीयाहांअ सोताअज बोलीम गोगतो उनायन ते बादा एकदोम ठाकाज वीअ गीया। पावुलुंह आगलांअ आख्यों, 3 “आंय बी येहुदीज हाय। आंय कीलीकीया जील्लाअ तारसु सेहेराम जोन्मुअलो, आने ईया येरुसालेमामुज मोडो वीयोह, आने आपुअ आगलाअ डायाहांन मोसेंय देदला नीयोम पालांअ बी मांयुं ईंहींज गामालीयेल नांवांअ गुरुपनेअ सीकसोण लेदोंह। आने पोरमेहेरापेअ आज तुमनेंह जेंहडी खुब लागणी हाय तेंहडीज लागणी मांन बी आथी। 4 तीया कारोणे ईसुअ पोंथाअ नास केरांअ खातुर ईया पोंथाअ पालनारांहन मांयुं खुब दुखें पाळ्येंह। मांयुं तीयाहांमेर्याअ आदमीहींन आने बायाहांन हाकलीहींकींअ बांदावीन जेलाम कोंडाव्येंह आने थोळाकाहांन माय बी टाकाव्येंह। 5 ईयु गोठीअ मोडांम मोडो पुंजारो आने आपुअ येहुदी पोंचाअ बादा लोक बी साक्सी हाय। तीयाहांपेनेअज मांयुं दामास्कु सेहरुमेर्याअ येहुदी पावुंहपेअ कागलों लेखी मागलों आने तीया कागलाम तीयाहां मांन एंहडो आदीकार देदलो का आंय तीया सेहेराम जायन तींहीं जें ईसुअ पोंथाअ मांहेंअ आथें तीयाहांन बांदीन साज्या देवावांअ येरुसालेम लावी सेकुं।
पावुलाअ साक्सी
(खास चेलाहांअ कामें ९:१-१९; २६:१२-१८)
6 आने आंय दामास्कु सेहेराम पोचांअ तीयारीम आथो तांवज, पारगाअ सोमोये ओचींतोज मांअ चारु वेल दीपलावी टाके एंहडो उजवोळ पोळ्यो। 7 आने आंय पुंय आसाटाय पोळ्यो आने मांन एक आवाज एंहकींअ आखता उनाअयो का, ‘सावुल! सावुल तुं मांन काहा सोतावोह?’ 8 तांहांअ मांयुं तीयाल फुच्यों, ‘साहेब, तुं केडो हाय?’ तांहांअ तीयांय आख्यों, ‘आंय नाझारेथावालो ईसु हाय! मांअपेअ वीसवास राखनाराहांन सोतावीन तुं खोरेखोर मांनुंज सोतावोह।’ 9 मांअरी आथा तीयाहां तो उजवोळ ता देखलो, पेन मांअरी गोठ्या केअनाराअ आवाज ते उनाअया तेबी तो काय आखेह तों ते होमजी नांय सेक्या। 10 मांयुं मांअरी गोठ्या केअनाराल फुच्यों, ‘मालीख, आंय काय क्युंव?’ तांहांअ मालीखांय मांन आख्यों, ‘उठ आने दामास्कु सेहेराम जो! तोअ काय-काय केरुलोंअ, तों बादों हातींअ तुल जांणांवाय!’ 11 तीया उजवोळाअ लीदे आंय आंदलो वीअ गेहलो तीयाअ लीदे, मांअ आर्याअ मांअ आथ तीईन मांन दामास्कु सेहेराम तीईन लीअ गीया। 12 दामास्कु सेहेराम आनान्या नांवांअ मांहुंअ रेहलों। तों धोरमाअ नीयोम हारकींअ पालनारों आने पोरमेहेराअ खुब भोकती केअनारों आथों। आने तींहींर्येंअ बादें येहुदी मांहेंअ तीयाल खुब मानत्लें। 13 तो मांअहीं आलो आने मांअ पाही उबी रीईन आखांअ टेक्यो का, ‘ओ मांअ पावुह सावुल, तुं फाचो देखतो वेअ!’ आने तीयुज घेळी आंय फाचो देखतो वीअ गीयो आने मांयुं तीयाल देख्यो। 14 आजी तीयांय मांन आख्यों, ‘आपुअ आगलाअ डायाहांअ पोरमेहेरांय तुल पोसोंद केअयोह, ईयाअ खातुर का, तोअ जीवोनाम तीयाअ मोर्जी काय हाय तों तुं जांव आने तीया धोरमी मांहांअ, मोंजे, ख्रीस्तुअ तुं दोरसोन क्योव आने तीयाअ गोठ्या उनाओ। 15 काहाका, दुन्याअ लोकाहांअ आगलांअ तुं तीयाअ साक्सी पुरनारो बोंणोह। तुंयुं तीयापेनेअ जों काय देख्योंह आने जों काय तुं उनाअयोह, तीया बाबोताम बीहराहांन तोअ आखी देखावुलोंअ हाय। 16 तांहांअ आमी वादारे वाअ काहाल लागवोह? उठीन मालीखाल ओरुज कीईन बापतीस्मा ले! आने तो तोअ पाप तुवी टाकीअ।’
येहुदी जातीअ नांह तेंहडा लोकाहांअ सेवोक बोंणावांअ पावुलुल पोरमेहेर हादेह
17 “आंय फाचो येरुसालेम आलो हातींअ एक दीह आंय मोंदीराम पोरमेहेराल ओरुज केअत्लो तांहांअ मांन एक दोरसोन वीयों। तींहमें मालीखांय मांन आख्यों, 18 ‘उत्वाल केअ! आने येरुसालेमामनेअ नींगी जो! काहाका, ईहींनेअ मांहेंअ मांअ बाबोताम तुं जे साक्सी दीहो, ते माननारें नांह।’ 19 तांहांअ मांयुं आख्यों, ‘मालीख, तें बादें जांअतेंहज का, आंय भोकती मोंडोळाअ कोअ-कोअ जायन तोअपेअ वीसवास राखनाराहांन तीअ लावीन जेलाम कोडावत्लो आने चापकाहांअ मार ठोकावत्लो। 20 आने तें तोअ बाबोताम साक्सी देनारा स्तेफानुल माय टाकत्लें तांहांअ तींहमें आंय बी हांज आथो आने तीयाल माअनारांअ पोतळें आंय हाचवुअत्लो। मोंजे, मांअ जीवोनाअ बोदलाणुअ बाबोताम जांयन तें मांअ गोठ जोरुल मानीअ।’ 21 पेन तीयांय मांन आख्यों, ‘येरुसालेमामनेअ जातो रे! काहाका, मांअ तुल सेटे येहुदी जातीअ नांह तेंहडा लोकाहांम मांअ बाबोताअ गोठ जाहेर केरांअ मोकलुलोंअ हाय।’” 22 येहुदी जातीअ नांह तेंहडा लोकाहांअ बाबोताम पावुलुंह नांय आख्यों तांव लोगुंअ तीया लोकाहीं पावुलाअ गोठ उनाअयी। पेन हातींअ जोरपेअ-जोरपेअ बोंबलांअ टेक्या का, “ईयाल पोतावी टाका! ईयु तोरतीपेअ तीयाअ नांव तुवी टाका! तो जीवतो रांअ लायोक नांह!” 23 ते बादा सोताअ पोतळें चीरी टाकीन उचे उबालत्ला आने उदलो उडवुअत्ला। 24 मोंजे तीया ओमोलदारांय पावुलुल कील्लाम लीअ जांअ हुकोअ केअयो आने बादा लोक तीयाअ वीरुद काहाल बोंबलुअताह तों जांणांअ खातुर पावुलुल चापकाहांअ मार ठोकी-ठोकीन कोबुल केरावांअ सोंयनीकुंहन हुकोम केअयो। 25 आने तीयाहां तीयाल चापकाहांअ मार ठोकांअ खातुर बांदयो तांहांअ तीयाअ पाही उबी रेहला सोयनीकाहांअ ओमोलदाराल पावुलुंह आख्यों, “गुनो साबीत वीया वोगुर केल्ला बी रोमुअ नागरीकुल चापकाहांअ मार ठोकुलोंअ तों कायदेसर हाय का?” 26 तांहांअ तीया ओमोलदारांय तीयाअ उपरी ओमोलदाराल आख्यों, “तुं ईं काय कीअ बोठोह? ओ आदमी ता रोमुअ नागरीक हाय!” 27 तांहांअ तीया उपरी ओमोलदारांय जायन पावुलुल फुच्यों, “मांन आखेअ का, तुं रोमुअ नागरीक हाय का?” तांहांअ पावुलुंह आख्यों “आंह, हुदींअज आंय रोमुअ नागरीक हाय!” 28 तांहांअ तीया उपरी ओमोलदारांय पावुलुल आख्यों, “आंय ता खुब रोकोम खोरचीन रोमुअ नागरीक बोंण्योह।” तांहांअ पावुलुंह आख्यों, “आंय ता जोन्मेदेखुंज रोमुअ नागरीक हाय!” 29 हातींअ पावुलाअ गोठ उनायन तीयाअ गुनाअ तापास केअनारा ते सोयनीक नाही पोळ्या, आने पावुल रोमुअ नागरीक हाय तेबी तीयाल बांदावीन ने चापकाहांअ मार ठोकावीन सोते रोमुअ कायदो तोळ्योह तों ईत आवता तो उपरी ओमोलदार बी काबराय गीयो।
येहुदी पोंचाअ आगलांअ पावुल
30 बीहरे दीह तीया ओमोलदारांय, पावुलाअ आथ-पाग बांदला ते हाकल्या सोळ्या आने येहुदी पावुलाअ वीरुद काहा ओतीअ धामाल केअताह तों जांणांअ खातुर मोडा पुंजाराहांअ आने येहुदी पोंचाअ एक मीटींग हादी आने तो पावुलुल तीयु मीटींगुअ आगलांअ लीअ गीयो।