21
पावुल येरुसालेमाअ वाटे जाहे
1 एफेसु सेहेराअ मोंडोळाअ वोळीलुंअ वीदाय लीईन हातींअ, आमां तींहींनेअ नींगीन वाहाणुम बोठा। आने पादराज कोस बेट आला। बीहरे दीह तींहींनेअ रोड्स बेट गीया, आने हातींअ दोरीयाअ तोळीपेर्याअ पातारा गीया। 2 आने तींहींनेअ आमनेंह फीनीकीया वीस्ताराम जानारों बीहरों एक वाहाण मीली गीयों। तींहमें बोहीन आमां आगलांअ जांअ नींग्या। 3 सीपरु बेट देखायांअ टेक्यो तांहांअ, आमां तीयाल उलटीवेल टाली टाकीन सीरीया गीया, आने तींहींनेअ तुर सेहेर जायन उत्या। काहाका, तुर सेहेराम वाहाणुमनेअ माल उतावुलोंअ आथो। 4 तींहीं आमनेंह थोळेंक वीसवासी मील्यें, आने तींहीं आमां एक आठवाळ्यों लोगुंअ तीयाहांअरी रीया। पावुलुल येरुसालेमाम काय वेअनारों हाय तों तींहींर्याअ लोकाहांन पोवीतोर आत्मांय जांणावलों। तीयाअ लीदे तीयाहां पावुलुल आख्यों, “तुं येरुसालेम मा जातो!” 5 पेन तींहींनेअ जाहाज नींगांअ सोमोय वीयो तांहांअ, आमां तींहींनेअ नींगीन येरुसालेम जांअ तीयार वीया। तुरुअ ते वीसवासी लोक बादा, तीयाहांअ थेअ-पोयराहांअरी आमनेंह थोवांअ दोरीयाअ तोळी लोगुंअ आला। हातींअ आमां दोरीयाअ तोळी गुठोणें पोळीन पोरमेहेराल ओरुज केअयी, 6 आने एक-बीहराल आवजो कीईन आमां वाहाणुम बोही गीया। आने ते बादा सोत-सोताअ कोअ फाचा गीया। 7 तुरनेअ आगलांअ जाता आमां टोलेमायसा पोच्या। तींहीं आमां वीसवास्यांहन मील्या, पेन तीयाहांअरी एकुज दीह रीया। 8 बीहरे दीह आमां तींहींनेअ नींगीन कायसारीया आला। तींहीं फीलीप, जो येरुसालेमाअ मोंडोळाम मोदोत केअनारामेर्योअ एक आथो, तो रेहलो। तो हारी गोठ जाहेर केअनारो आथो। आमां तीयाअरी रीया। 9 फीलीपाअ चार कुवार्या पोयरीया आथ्या। ते पोवीतोर आत्मांय जाणावली गोठ आखनार्या आथ्या।
10 आमां तींहीं थोळाक दीह रोकाअया तांहांअ, येहुदीया जील्लामेनेअ आगाबु नांवांअ एक मांहुंअ तींहीं आलों। तों मांहुंअ बी पोवीतोर आत्मांय जाणावली गोठ जाहेर केअनारों आथों। 11 तों आमनेंह मीलांअ आलों तांहांअ, तीयांय पावुलाअ कोंबोराअ पोट्टो लेदो, आने तीयाकींअ सोताअ आथ-पाग बांदया। हातींअ तीयांय आख्यों, “पोवीतोर आत्मा एंहकींअ आखेह का, ‘जीयाअ ओ पोट्टो हाय, तीयाल येरुसालेमाम येहुदी आगेवान एंहकींअ कीईन बांदीअ, आने तीयाल येहुदी जातीअ नांह तेंहडा लोकाहांन होपी दीअ।’” 12 तीयाअ गोठ उनायन तींहींर्याअ लोक आने आमां बी पावुलुल येरुसालेम नांय जांअ कालावाला केअया केअत्ला।
13 पेन पावुलुंह आख्यों, “तुमां रोळी-रोळीन मांन येरुसालेम जाता काहाल ओटकावताह? मालीख ईसुअ खातुर येरुसालेमाम जेलाम कोंडायाहांअ ता काय, पेन तीयाअ खातुर मोरांअ बी आंय तीयार हाय।” 14 पावुलुंह आमांअ गोठ नांय मानी तांहांअ आमां ते गोठुज सोळी देदी आने आख्यों, “मालीखाअ मोर्जी पुरी वेअ!”
पावुल येरुसालेमाम पोचेह
15 थोळाक दीह हातींअ, आमां जांअ तीयारी केअयी, आने पाकठीयाज येरुसालेम जांअ आमां नींग्या।
16 कायसारीयानेअ थोळाक वीसवासी आमांअरी आला आने ते आमनेंह मीनासोनुअ कोअ हादी गीया। तो सीपरु बेटुअ रेवासी आथो, आने पेअलार्योअ वीसवास्यांहमेर्योअ एक वीसवासी आथो। 17 आमां येरुसालेम पोच्या तांहांअ, तींहींर्याअ वीसवासी लोकाहीं खुब खुस वीईन आमनेंह आवकार देदो।
18 बीहरे दीह पावुल आमनेंह आरी लीईन येरुसालेम मोंडोळाअ आगेवान याकोबाल मीलांअ गीयो। येरुसालेमाअ मोंडोळाअ बीहरा बादा आगेवान बी तींहीं आथा। 19 तीयाहांन बादाहांन सालाम कीईन हातींअ पावुलुंह, तीयाअ सेवा कीईन पोरमेहेरांय येहुदी जातीअ नांह तेंहडा लोकाहांम जों-जों काम केअलों, तों एक-एक कीईन आखी देखाव्यों।
20 तीयाअ गोठ उनायन बादाहां पोरमेहेराअ गुणगान केअया। हातींअ तीयाहांमेर्याअ एक आगेवानुंह पावुलुल आख्यों, “पावुल, आमांअ पावुह! तुं जांअहो का, येहुदींहमनेअ बी हाजारु लोक वीसवासी बोंण्याह। ते बादा आपुअ नीयोम कोळोक रीते पालताह। 21 येरुसालेमामेर्याअ आपुअ येहुदी ख्रीस्तींहन तोअ बाबोताम एंहडी गोठ जांणांअ मीलीह का, तुं येहुदी जातीअ नांह तेंहडा लोकाहांम रेनारा येहुदी लोकाहांन एंहडों हीकवोह का, ‘तुमां मोसेंय देदला नीयोम पालांअ सोळी दा! तुमांअ पोयराहांअ सुन्नोत केरावांअ सोळी दा! आने बीहरा येहुदी धारा पालांअ बी सोळी दा!’ 22 तांहांअ आमी आपुंह काय केअजी? काहाका, तुं ईंहीं आलोह तीयाअ तीयाहांन खोबुर पोळीज जानारी हाय।
23 मोंजे, आमां एंहडी सालाह देताह का, आमांहमनेअ चार जांअहांहां बादा राखीह। 24 तीयाहांअरी जोळायन तुं बी मोंदीराम जो! आने चोख्खो वेरांअ वीदी केराव, आने तीया चार जांअहांअ चोख्खा वेरांअ वीदीअ खोरचो बी तुं दे! हातींअ सोताअ बादा पुरी वीयीह तों देखावांअ ते सोताअ मुंनकें बोळावे! हातींअ ते बादा जांय जाय का, तोअ बाबोताम उडल्या गोठ्या बादया खोट्या हाय आने तुं सोते ता नीयोम ाहांन बोराबोरुज पालोह। 25 पेन जे येहुदी जातीअ नांह तेंहडा ख्रीस्ती हाय तीयाहांन ता आमां एक कागलांम पेअलांअज सालाह लेखी मोकल्याह। मोंजे का, तीयाहांअ खाली आतोंअज पालांअ जोजे का, मुरतींहन चोळवुअलों माह नांय खावुलोंअ, रोगुत नांय पीयुलोंअ, डुअकायन माअला जोनावोराहांअ माह नांय खावुलोंअ, आने केल्ली बी जातीअ सीनालों नांय केरुलोंअ।”
26 पावुलुंह तीयाहांअ सालाह मानी लेदी आने तो तीया चार जांअहांअरी जोळाय गीयो आने बीहरे दीह मोंदीराम जायन चोख्खा वेरांअ वीदी केरावी। हातींअ मुंनकें बोळावांअ वीदी केंहडीवेल वीअ आने दोरेकुअ खातुर भोग केंहडीवेल चोळवांअ हाय तों तीयांय तींहीं जाहेराम आख्यों।
पावुलुल तेअताह
27 बादाअ सांत दीह पुरा वेरांअ तीयारी आथी तांहांअ, तो फाचो मोंदीराम गीयो। तींहीं आसीया वीस्तारामेनेअ आलला थोळाक येहुदी आथा। ते पावुलाअ वीरुद केअनारा आथा। तीयाहां पावुलुल मोंदीराम हीअ काडयो, आने बादा लोकाहांन पावुलाअ वीरुद चोळवी थोव्या। आने तीयाहां पावुलुल तीअ लेदो आने ते बादा बोंबलांअ टेक्या का, 28 “ईसरायेल लोकुंह! आवा-आवा! ईं तों मांहुंअ ईंहीं हाय। ईं जींहीं-तींहीं बादाहांअ आगलांअ आपुअ लोकाहांअ वीरुद, आपुअ धोरमाअ नीयोमाहांअ वीरुद, आने ईया मोंदीराअ वीरुदुज गोठ्या केअहे। आने तों येहुदी जातीअ नांह तेंहडा लोकाहांन मोंदीराम लीअ आवीन मोंदीराल बाटलावेह बी।” 29 तीयाहां एंहकींअ आख्यों काहाका, एफेसु सेहेराअ रेवासी तुरोफीमुल, का जो येहुदी नांय आथो तीयाल, तीदीहज पावुलाअ री येरुसालेम सेहेराम फीरता देखलो। तीयाअ लीदे, तीयाहां एंहडों धारी लेदलों का, तीयाहांअ नीयोमाहांअ वीरुद पावुल तीयाल बी मोंदीराम लीअ आलो वीअ।
30 आखा सेहेराम उचाट फेलाय गीयो आने हातींअ धामाल वीअ गीयी। बादा लोक दोवळुअता-दोवळुअता तींहीं टोलवाय गीया, आने पावुलुल तांय काडीन मोंदीराअ बारे काडी थोव्यो। आने पावुलुल माय टाके तांहांअ तीयाअ रोगुत मोंदीराम नांय पोळे तीयाअ खातुर, तीयाहां तुरुतुज मोंदीराअ बांअणें बुजी देदें। 31 आने ते पावुलुल माय टाकांअ तीयारीम आथा तांवज रोम सारकाराअ सोयनीकाहांअ उपरींहन खोबुर पोळी गीयी का आखा सेहेराम धामाल फाटी नींगीह। 32 मोंजे, तो तुरुतुज सोयनीकाहांन आने सोयनीकाहांअ ओमोलदाराहांन लीईन तींहीं दोवळी गीयो। तीया उपरी ओमोलदाराल आने सोयनीकाहांन देखीन लोकाहीं पावुलुल ठोकांअ बोंद केअयों। 33 तीया ओमोलदारांय पावुलुल तीईन तीयाल बेन हाकलीहींकींअ बांदांअ हुकोम केअयो। हातींअ तीयांय टोलामेर्याअ लोकाहांन फुच्यों, “ओ केडो हाय? ईयांय काय केअयोंह।” 34 तांहांअ टोलामनेअ थोळाकाहीं काय आख्यों, तांहांअ बीहरा थोळाकाहीं बीहरोंज काय आख्यों। कोकाअ आने उचाटुअ लीदे तो ओमोलदार होकीकोत जांय नांय सेक्यो। तांहांअ तीयांय पावुलुल कील्लाम लीअ जांअ हुकोम केअयो। 35 सोयनीक पावुलुल दादोरु लोगुंअ चालवी गीया। टोलामेर्याअ लोक ओताअ बादा खीजवाअला आथा का तींहींनेअ पावुलुल उसली जांअ पोळ्यों। 36 काहाका, लोक तीयाअ फाचलां-फाचलांअ आवत्ला आने बोंबलीन आखता आवत्ला का, “ईयाल पोतावी टाकजी!”
पावुल टोलामेर्याअ लोकाहांअरी गोठ्या केअहे
37 सोयनीक पावुलुल कील्लाम लीअ वीहांअ तीयारीमुज आथा तांहांअ पावुलुंह तीया ओमोलदाराल आख्यों, “आंय एक गोठ तुल आखुं का?” 38 तांहांअ ओमोलदारांय तीयाल आख्यों, “तुल गीरीक बोली आवळेह का? थोळाक वोखत पेअलांअ मीसोर देसाअ जीया मांहांय आगेवान बोंणीन चार हाजार जांअहांन आथ्यारें लीईन सारकाराअ वीरुद धामाल केरावांअ खातुर तीयार केअला आने जीयांय सोताअ हाडडो उजाळाम बोंणावलो, तों मांहुंअ तुं नांह का?” 39 तांहांअ पावुलुंह आख्यों, “नांह, आंय तो नांह। आंय ता कीलीकीया वीस्ताराअ नावांअता तारसु सेहेराअ रेवासी येहुदी हाय। आंय तुल ओरुज कीअहुं का, मांन लोकाहांन गोठ आखांअ दे!” 40 तांहांअ ओमोलदारांय पावुलुल गोगांअ राज्या देदी। मोंजे, पावुलुंह दादोरुपेअ उबी रीईन आथाअ ईसारो कीईन लोकाहांन ठाका रांअ आख्यों। आने तुरुतुज ते ठाका रीया। तांहांअ तीयांय येहुदीहींअ सोताअ आरामीक बोलीम गोगांअ चालु केअयों।