2
पोवीतोर आत्माअ पुरा काबाम वीसवासी मांहेंअ
1 पास्का तेहवार वोली गीयो ने तीयाअ पाचास दीह हातींअ पेंतेकोस्तु तेहवार आलो। ईसुल पोरमेहेरांय मोकलुअला खास राजा तोरीके माननारें बादें मांहेंअ तीदीह एक जागे टोलवाअलें। 2 तांहांअ एककायुंअज, खुब वारों लागतों वीअ तेंहडो जुगामेनेअ मोडो आवाज आलो। आने जीया कोअमें तें मांहेंअ टोलवाअलें, तीया आखा कोअमें तें तो आवाज उनाअयें। 3 हातींअ तीयाहां आगीअ हान्या-हान्या जीबलींअ होच एगोंह कांवींह देख्यों। आने ते जीबल्या वाटाय जायन एक-एक तीया बादा मांहांहांपेअ उत्या आने ओटक्या। 4 तांहांअ पोवीतोर आत्मांय तीयाहांन पुरी रीते सोताअ काबाम लेदें। आने पोवीतोर आत्मांय तीयाहांन जेंहकींअ गोती देदी तेंहकींअ तें तीयाहांन आवळुअतल्या नांय एंहड्या ओजांणी बोलींहम गोगांअ टेक्यें।
5 तांहांअ येहुदी लोक दुन्याअ खुब देसाहांम नेअ येरुसालेम सेहेराम तेहवार वालांअ आलला। ते नीयोमीत पोरमेहेराअ भोकती केअनारा आथा। 6 तो आवाज उनायन तीया येहुदी लोकाहांअ एक मोडो टोलो तींहीं टोलवाय गीयो। आने ते बादा एकदोम कांहवायज रीया। काहाका, ईसुपेअ वीसवास केअनारें गोगत्लें तों, तीयाहांमेर्योंअ दोरेक मांहुंअ सोताअज बोलीम उनाअयों।
7 आने कांहवांयज रीईन ते एक-बीहराल आखत्ला का, “तांहांअ ए बादया बोल्या ईयांहन केंहकींअ आवळुअत्याह? ईं गोगनारें बादें मांहेंअ ता गालील जील्लाअज हायकने? 8 तेबी, जीया देसाहांम आपुंह जोनम्याह तीया देसाहांअ बोलींहम तीयाहांन गोगता आपुंह उनाअताह! 9 आपुअरी ता, पारतीया, एलाम, मेसोपॊतेमींया, येहुदीया, कापादोकीया, पोंतु, आसीया वीस्तार, 10 फीरुगीया, पाम्फुलीया, मीसोर, आने लीब्या देसाअ कुरेन सेहेराअ पाहल्याअ वीस्ताराहांमेनेअ आलला लोक हाय। आने आपुंहमनेअ थोळाक ता, रोम सेहेरामेनेअ येरुसालेमाम मुलाकाते आलला येहुदी लोक हाय, आने बीहरा धोरमामनेअ येहुदी बोंणला बीहरा लोक बी हाय। 11 ने आपुंहमनेअ थोळाक ता, कीरेत बेटुमनेअ, आने आराबीयानेअ आलला लोक हाय। तेबी, पोरमेहेरांय केअला मोडा-मोडा कामाहांअ बाबोताम, ईया मांहांहांन आपुअ बोलींहम गोगता आपुंह बादा उनाअताह!” 12 एंहकींअ कीईन, ते बादा खुब कांहवांयज रेहला, आने गुचवोंणुम पोळीन एक-बीहराल फुच्या केअत्ला का, “ईं बादों काय वीअ रीयोंह?” 13 पेन बीहरा लोकाहीं वीसवास्यांअ मोस्कुरी केअता आख्यों, “ईं बादें ता पीदलें हाय, तीयाअ लीदे तें एंहडों गोगतेंह!”
14 तांहांअ पीतोर, मालीखाअ बीहरा ओग्यार खास चेलाहांअरी उबी रीयो, आने बोंबलीन लोकाहांअ टोलाल बोद देता आख्यों, “मांअ जात-भाय येहुदीहीं, आने येरुसालेमाम रेनारा बीहरा बादा लोकुंह! मांअ गोठ कान मांडीन उनाया! 15 तुमांअमेर्याअ थोळाकाहांन एंहकींअ लागेह का, आमां बादें पीदलें हाय। पेन आमां पीदलें नांह। आजी ता वेगर्येंअ नोवुज वाजतेंह, आने ओडे वेगर्योंअ-वेगर्योंअ केल्लों बी मांहुंअ नांह पीतों। 16 पेन ईयु वेगीअ तुमां जों काय हेअताह, तीया बाबोताम ता पोरमेहेराअ गोठ जाहेर केअनारा योयेलुंह भोवीसवाणी केअली। तीयांय एंहकींअ भोवीसवाणी केअली का,
17 पोरमेहेरांय आख्यों, ‘सेल्ला दीहाहांम,
आंय बादा मांहांहांन मांअ पोवीतोर आत्मा देहें।
तीयाअ पोरीणामे, तुमांअ पोयरा आने पोयर्या मांयुं जाणावली गोठ जाहेर कीअ।
तुमांअ जुवान पोयराहांन दोरसोन वीअ आने तीयाअ मारफोते तें मांअ हाचाय जांय,
आने तुमांअ डाया मांहांहांन होपनें पोळीअ आने तीयाअ मारफोते तें मांअ हाचाय जांय।
18 आंह, तीया दीहाहांम आंय मांअ सेवा केअनारा थेअ-आदमील
मांअ पोवीतोर आत्मा देहें।
आने तें मांयुं जाणावली गोठ जाहेर कीअ।
19 आने आंय लोकाहांन भोवीस्याअ बाबोताम चेतवांअ खातुर उपेअ जुगाम चोमोत्कार,
आने एठाअ तोरतीपेअ रोगुत, आग, आने खुब तुअरों,
एंहड्या बादया नीसाण्या बी देखावेंह।
20 मालीख दुन्याअ लोकाहांअ नीयाय कीअ तो खास ने मोडो दीह आवे तीयाअ पेअलांअ एंहडों बोंणीअ का,
दीह उजवोळ नांय दे,
आने चांद रोगुताअ होच रातो-चोळ वीअ जाय।
21 आने तांहांअ जेंबी मांहेंअ सोताल वाचावांअ खातुर मालीखाल ओरुज कीअ,
तीयाहांन तो वाचावीअ।’
22 ओ ईसरायेल लोकुंह! ए गोठ उनाया! तुमां जांअताहज का, पोरमेहेरांय नाझारेथ गांवांअ ईसुअ मारफोते तुमांअ आगलांअ सोताअ आदीकारुवालें कामें, जें लोकाहांन नोवाय लागे एंहडें आथें तें आने चोमोत्कार केरावला तीयाकींअ तीयांय ए साबीती देदली का, ईसु तीयांयज पोसोंद केअलो जांअ आथो। 23 तीयांय पेअलांअज नोक्की केअलों का, ईसुअ सोताअ चेलाहांमेर्योअ एक जांअ, तीयाल तुमांअ आथुंम तेरावी दीअ। पोरमेहेरांय तीयाअ योज्ना एंहकींअज केअली। आने तीया बाबोताम तो पेअलांअनेअज जांअत्लो बी। तीयाज ईसुल तुमां पोरमेहेराअ नीयोम नांय जांअनारा लोकाहांअ आथुंम होपी देदलो, आने तीयाल कुरुसापेअ जोळीन माय टाकावलो। 24 पेन पोरमेहेरांय तीयाल मोताअ दुखुमनेअ सुटकारो दीईन जीवतो उठव्यो; काहाका, मोत तीयाल सोताअ बांदाणुम नांह राखी सेक्यों। 25 पोरमेहेरांय मोकलुअला खास राजांय सोताअ बाबोताम जों आख्योंह तों, दावीद राजांय एंहकींअ कीईन लेख्योंह,
‘ओ मालीख, आंय जांअहुं का, तुं कायोम मांअरी हाय।
तुं मांअ हुदी वेल हाय। तीयाअ लीदे, मांहेंअ मांन हेरान केअ तांहांअ आंय नांय बीयुं।
26 मोंजे, मांअ मोनाम खुब खुसी हाय।
आने आंय खुसीम आवीन तीयाअ गुणगान कीअहुं;
मोय जानारा मांहांअ होचुज आंय बी हाय तेबी आंय तोअपेअ भोरुचो राखेंह।
आने आंय एंहडी आस्या राखुंह का,
27 तुं मांअ जीवुल मोअलांअ कोलीम सोळी नांय दीहो,
का तोअ पोवीतोर पोयराअ, मोंजे मांअ मुरदाल तुं होळी नांय जांअ दीहो।
28 तुं मांन फाचो जीवतो कीअहो,
आने तोअ हाजरीम मांन पुरो आनोंद दीहो।’
29 मांअ जातीअ पावुहुं, ईयाअ वीचार केरा! मांयुं आमीं आख्या ए बादया गोठ्या, दावीदांय सोताअ बाबोताम नांह लेख्या। तो मोअलो ने तीयाल डाटलो। आने तीयाअ मुरदों डाटलों तों कोबीर आज दीह लोगुंअ आपुअ आगलांअ हाय। 30 पेन दावीद सोते पोरमेहेराअ गोठ जाहेर केअनारो आथो आने तीयाअज होच तीयाअ वोसुलाअ एक आदमील राजा बोंणावांअ पोरमेहेरांय होम खायन वोचोन देदलों, तों बी तीयाल ईत आथों। 31 पोरमेहेर जों काम केअनारो आथो, तों दावीदांय आगलांअनेअज जांअलों। तीयाअ लीदे तीयांय ख्रीस्त फाचो जीवतो वीअ तीया बाबोताम भोवीसवाणी केअली। ख्रीस्तुअ बाबोताम तीयांय एंहकींअ आखलों, ‘पोरमेहेर तीयाल मोअलांअ कोलीम सोळी नांय दे, आने तीयाअ मुरदों होळी नांय जाय।’ 32 ईयाज ईसुल पोरमेहेरांय मोअलांमेनेअ फाचो जीवतो उठव्योह। ईयु होकीकोतुअ आमां बादा साक्सी हाय। 33 आने पोरमेहेरांय ईसुल होरगाम सोताअ हुदी वेल बोहाव्योह, आने जेंहकींअ ईसुअ पोरमेहेर बाहकांय तीयाल वोचोन देदलों, तेंहकींअ ईसुल पोरमेहेरापेनेअ पोवीतोर आत्मा मील्यो, आने ईया पोवीतोर आत्माल तीयांय आमाहांपेअ उताव्यो। तोंज आमी तुमां हेअताह आने उनाअताह। 34-35 दावीद होरगाम नांह चोळ्यो। पेन तीयांय ख्रीस्तुअ बाबोताम आख्यों,
‘मालीखांय मांअ मालीखाल आख्यों,
आंय तोअ दुसमोनाहांन हारवीन तोअ पागे नांय पोळावुं तांव लोगुंअ,
तुं मांअ हुदी वेल बोह!’
36 तीयाअ लीदे, ओ ईसरायेल लोकुंह! तुमां बादा नोक्कीज जांय लेजा का, ईयाज ईसुअ बाबोताम आंय तुमनेंह आखुंह। तीयाल कुरुसापेअ जोळनारा ता तुमांज हाय। पेन पोरमेहेरांय ता तीयाल मालीख आने ख्रीस्त बोंणाव्योह!”
37 पीतोराअ गोठ उनायन तीया लोकाहांन सोताअ गुनांअ भान वीयों, आने तीयाहां पीतोराल आने मालीखाअ बीहरा खास चेलाहांन फुच्यों, “आमांअ जातीअ-पावुहुं, आमांअ काय केरांअ जोजे?”
38 तांहांअ पीतोरांय तीयाहांन आख्यों, “पोरमेहेर तुमांअ पाप माफ केअ तीयाअ खातुर तुमांअमेर्योअ दोरेक जांअ सोताअ पाप सोळीन पोरमेहेराअ वाट तेअ आने ईसु ख्रीस्तुअ नांवांअ बापतीस्मा ले। आने तांहांअ पोरमेहेर तुमनेंह भेट तोरीके पोवीतोर आत्मा दीअ। 39 काहाका, जो पोवीतोर आत्मा दांअ पोरमेहेरांय वोचोन देदोंह, तों ता तुमांअ खातुर, तुमांअ वोसुलामेर्यांअ खातुर, आने सेटर्या-सेटर्याअ मांहांहांअ खातुर, मोंजे का, जीया-जीयाहांन मालीख आपुअ पोरमेहेर सोताअहीं आवांअ हादेह, तीयाहांअ बादाहांअ खातुर हाय।” 40 पीतोरांय ईयाअ केअता आजी बीजया बी खुब गोठ्या आखीन तीयाहांन साक्सी देदी आने बोद केअयो का, “ईया खुब खाराब येहुदी लोकाहांपेअ जे सीक्सा आवी पोळनारी हाय, तींहमेंनेअ वाचावांअ पोरमेहेरापेअ मोदोत मागजा!”
41 तीयाअ लीदे, जीया लोकाहीं पीतोराअ गोठ मानी तीयाहांन मालीखाअ खास चेलाहां बापतीस्मा देदों, आने एंहकींअ कीईन तीदीह लोग-भोग तीन हाजार मांहेंअ ख्रीस्तुपेअ वीसवास केअनारांअ टुकळीम उमेराअयें। 42 तें मांहेंअ मालीखाअ खास चेलाहांअ बोद उनायांअ कायोम मोर्जी राखत्लें, आने बीहरा वीसवासी मांहांहांअरी मीलत्लें, आने तीयाहांअरी मीलीन मालीखाअ मोताअ ईयादगीरीअ मांडो खाहलें, आने पोरमेहेराल ओरुज केअत्लें।
ख्रीस्ती मोंडोळाअ धारमीक जीवोन
43 मालीखाअ खास चेलाहांअ मारफोते खुब चोमोत्कार आने नोवाय लागे एंहडें खुब कामें वीयें। आने ईया कारोणे, ईसुपेअ वीसवास नांय केअनारा येरुसालेमाअ मांहांहांन बादाहांन बीख लागी। 44 वीसवासी मांहेंअ बादें आरीज रेहलें, आने जोरुल पोळे तांहांअ सोताअ माल-मीलकोत टुकळीअ खातुर वापरांअ तीयार राखत्लें। 45 तीयाहांमेनेअ थोळेंक सोताअ माल-मीलकोत वेची टाकीन जे पोयसा उबजे ते टुकळीमेर्याअ लोकाहांन तीयाहांअ जोरुलीहींअ पोरमाणे वाटी देहलें। 46 तें रोददीह एक मोनुअ वीईन येरुसालेमाअ मोंदीराम पोरमेहेराअ भोकती केअत्लें, आने मालीखाअ मोताअ ईयादगीरीअ मांडो खांअ खातुर तें एक-बीहराअ कोअमें टोलवाअत्लें, आने खुसाली ने गोरीबळा मोनाहांकींअ सोताअ मांडो एक-बीहराअरी वाटीन खाहलें। 47 आने तें पोरमेहेराअ गुणगान केअत्लें, आने बादा लोकाहांन तें खुबुज गोंवत्लें। आने जीयाहांन पोरमेहेर तीयाहांअ पापाहांअ सीक्सामेनेअ वाचावत्लो, तीयाहांन मालीख ईसु रोददीह वीसवास्यांअ टुकळीम उमर्या केअत्लो।