3
पीतोर आने योहान एक खोळ्या मांहांअल चालतो केअताह
1 क दीह पारगाप तीन वाजे, पीतोर आने योहान पोरमेहेराल ओरुज केरांअ मीटींगुम भाग लांअ येरुसालेमाअ मोंदीराम गीया। 2 ते मोंदीराअ पाही पोच्या तांहांअ, थोळेंक मांहेंअ जोन्मेदेखुंअ एक खोळ्या मांहांअल मोंदीराअहीं उसली लावत्लें। तें तीयाल रोददीह मोंदीराअ ‘ओसोल’ नांवांअ गेटुअहीं, मोंदीराम जानारांहपेअ भीक मागांअ बोहावी जाहलें। 3 तीया भीकारींह पीतोर आने योहानाल मोंदीराम जाता देखीन तीयाहांपेअ भीक मागी। 4 तांहांअ पीतोर आने योहान एक धारीया तीयाल हीअज रीया। आने पीतोरांय तीयाल आख्यों, “आमांअ वेल हेअ!” 5 तांहांअ तीयाहांपेनेअ पोयसा मीलीअ एंहडी आस्या राखीन तीया खोळ्यांह तीयाहांअ वेल हेअयों। 6 पेन पीतोरांय तीयाल आख्यों, “तुल दांअ खातुर मांअपेअ पोयसा-मोयसा * ता नांहज। पेन मांअपेअ जोंबी हाय तों आंय तुल दीहुं। नाझारेथावाला ईसु ख्रीस्तुअ नांवें आंय तुल हुकोम कीअहुं का, उठीन चालतो वीअजो!” 7 हातींअ पीतोरांय खोळ्या मांहांअ आथ तीईन उठव्यो। तांहांअ तुरुतुज तीयाअ पागुंहम आने गुडांहम गोती आली। 8 आने तों मांहुंअ कुदीन उठ्यों आने चालांअ टेक्यों। हातींअ चालतों-कुदतों आने पोरमेहेराअ गुणगान केअतों तों पीतोर आने योहानाअरी मोंदीराम गीयों। 9 तींहींर्याअ बादा लोकाहीं तीयाल चालता देख्यों, आने पोरमेहेराअ गुणगान केअता उनाअया। 10 मोंदीराअ ‘ओसोल’ नांवांअ गेटुअहीं बोहीन भीक मागत्लों तों ईंज हाय एंहकींअ तीयाहां तीयाल ओअख्यों तांहांअ तीयाहांन खुब नोवाय लागी।
पीतोर मोंदीराम बोद देहे
11 तों मांहुंअ, पीतोर आने योहानाल बोराबोर तीईन उबी रेहलों। ओतांअम ता बादा लोकाहांन खुब नोवाय लागली, आने ते बादा सालोमोनाअ चोवठा नांवांअ जागे दोवळी आला। 12 तीया लोकाहांन देखीन पीतोरांय तीयाहांन आख्यों, “मांअ जात-भायुहुं, ओ चोमोत्कार देखीन तुमनेंह काहा नोवाय लागेह? आने आमांअ सोताअ आदीकाराकींअ का भोकतीकींअ ईया मांहांअल आमां हारों केअयों वीअ एंहकींअ धारीन तुमां आमांअ वेल एक धारीया काहा हीअज रीयाह? 13 होकीकोतुम ता, आपुअ आगलाअ डाया आबराहाम, ईसाक आने याकोब जीयाअ भोकती केअत्ला तीया पोरमेहेरांय तीयाअ सेवोक ईसुल मोअलांमेनेअ जीवतो कीईन मान देदोंह। आने तीयाअ साबीती तोरीकेज ओ चोमोत्कार वीयोह। ईयाज ईसुल तुमां रोम सारकाराअ ओमोलदार पीलाताल होपी देदलो। पीलातांय तीयाल सोळी दांअ नोक्की केअलों तेबी तुमां पीलाताअ आगलांअ तीयाअ नाकार केअलो। 14 ईसु ता पोवीतोर आने हाचो आथो तेबी, तुमां तीयाअ ता नाकार केअयो, पेन एक खुनी मांहांअल सोळी थोवांअ पीलातापेअ मागणी केअयी। 15 एंहकींअ कीईन, खेरों जीवोन देनारा तीयाल माय टाकनारा ता तुमांज हाय। पेन पोरमेहेरांय तीयाल जीवतो उठव्यो। आने ईयु होकीकोतुअ आमां साक्सी हाय। 16 तुमांअ आगलांअ उबी रेहलों ईं मांहुंअ केंहडों खोळ्यों आथों तों तुमां जांअताहज। ईसुपेअ आमां राखला वीसवासाअ लीदेज ईं मांहुंअ हारों वीयोंह। आंह, ईसुपेअ आमां राखला वीसवासाअ लीदेज ईं मांहुंअ तुमांअ बादाहांअ देखता पुरी रीते हारों वीयोंह।
17 मांअ जात-भायुहुं, मांन खोबुर हाय का, ईसुज ख्रीस्त हाय एंहडी तुमनेंह खोबुर नांय आथी। तीयाअ लीदे, तुमां ने तुमांअ आगेवान एंहकींअ कीईन वोरतुअला। 18 पेन पोरमेहेरांय तीयाअ गोठ जाहेर केअनारांअ बादाहांअ मारफोते जे भोवीसवाणी केअली, ते तीयांय एंहकींअ कीईन हाची पाळी। ते भोवीसवाणी एंहडी आथी का, ‘ख्रीस्तुल दुखें वेठीन मोरांअ पोळीअ।’ 19 तीयाअ लीदे, पोरमेहेर तुमांअ पापाहांअ ईयादी नुसी टाके तीयाअ खातुर तुमां सोताअ पाप सोळीन पोरमेहेराअ वेल वोली आवा। 20 तांहांअ मालीखाअ हाजरीमनेअ आत्मीक गोती मीलवांअ सोमोय आवीअ। आने तुमांअ खातुर ख्रीस्ताल * तो फाचो मोकली दीअ। तो खास राजा ईसुज हाय। 21 पोरमेहेरांय तीयाअ जाणावली गोठ जाहेर केअनारा पोवीतोर सेवोकुंअ मारफोते खुब वोरसांअ पेअलांअ जेंहकींअ जाहेरात केअली तेंहकींअ, जांव लोगुंअ तो बादी वोस्ताहांन नोव्या नांय बोंणावे तांव लोगुंअ, तीयांय मोकलुअला खास राजाल होरगाम रांअ पोळीअ। 22 मोसेंय बी आख्योंह, ‘मालीख तुमांअ पोरमेहेर तुमांअ सोताअ लोकाहांमेनेअ , मांअ होच बीहरो एक तीयाअ जाणावली गोठ जाहेर केअनारो उबो कीअ। तो जों-जों आखे तों तुमां मानजा!’ 23 हातींअ मोसेंय आख्यों, ‘तीया सेवोकुअ गोठ उनायन जेंबी मांहेंअ तीयाअ पोरमाणे नांय चाले, तीयाहांन पोरमेहेर तीयाअ लोकाहांमेनेअ काडी थोवीअ। आने तीयाहांअ पुरे-पुरो नास कीअ।’ 24 पोरमेहेराअ गोठ जाहेर केअनारा सामुयेलुंह आने तीयाअ फाचलांअ नेअ जे पोरमेहेराअ गोठ जाहेर केअत्ला तीयांय बादाहां बी, आमीर्याअ दीहाहांम जों वीअ रीयोंह तीया बाबोताम जाहेरात केअयीह। 25 पोरमेहेरांय तीयाअ जाणावली गोठ जाहेर केअनारा सेवोकुंअ मारफोते देदलें वोचोनें बी तुमनेंहज लागु पोळतेंह। आने एंहकींअज कीईन ‘आंय तोअ वोसुलामेर्याअ एक मांहांअ मारफोते तोरतीपेर्याअ बादा लोकाहांन आसीरवाद देहें’ एंहडों आबराहामाल आखीन पोरमेहेरांय तुमांअ आगलाअ डायाहांअ री केअलो कारार बी तुमनेंहज लागु पोळेह। 26 तीयाअ लीदे, तुमनेंह बादाहांन तुमांअ खाराब वाटींहमनेअ फीरवीन आसीरवाद दांअ खातुर पोरमेहेरांय तीयाअ सेवोक ईसुल उबो केअलो आने तीयाल पेअलांम-पेअलो तुमां ईसरायेल लोकाहांअहींज मोकलुअलो।”