4
येहुदी पोंचाअ आगलांअ पीतोर आने योहान
1 पीतोर आने योहान आजी तीया लोकाहांअरी गोठ्या केअत्ला तांहांअज मोडा पुंजारा, मोंदीराअ चोकीदाराहांअ आगेवान, आने थोळाक सादुकी लोक तींहीं आला। 2 ते खीजवाअला। काहाका, पीतोर आने योहान एंहकींअ हीकवुअत्ला का, “ईसु मोअलांमेनेअ फाचो जीवतो उठ्योह।” आने ईयापनेअ ते एंहडों साबीत केअत्ला का, मोअलें मांहेंअ फाचें जीवतें वीअ। आने सादुकी लोक, मोअलें मांहेंअ जीवतें वीअ एंहडों नांह मानता। 3 तीयाअ लीदे, तीयाहां पीतोराल आने योहानाल तीईन, बीहरो दीह उगे तांव लोगुंअ जेलाम पुरी देदा। काहाका, तीयाहांन तेअला तांहांअ वाअतों पोळी गेहलों। 4 तेबी, जे पीतोर आने योहानाअ गोठ्या उनाअला, तीयाहांमेनेअ खुब लोकाहीं ईसुपेअ वीसवास केअयो। तीया वीसवास केअनारा आदमींअ आकळो लोग-भोग पांच हाजार वीयो।
5 बीहरे दीह येहुदीहींअ ओमोलदार, वोळील, आने नीयोम हीकवुअनारा येरुसालेमाम टोलवाअया। 6 तीयाहांअरी मोडांम-मोडो पुंजारो आन्ना आथो। आने कायफा, योहान, आलेकसांदेर, आने मोडांम-मोडा पुंजाराअ बीहरें जातुलें बी आथें। 7 तीयाहां पीतोर आने योहानाल सोताअ आगलांअ उबी राखीन फुच्यों, “तुमां केल्ली ताकोताकींअ ईया खोळ्या मांहांअल चालतों केअयों? आने केडाअ आदीकाराकींअ * तुमां एंहकींअ केअयों?”
8 तांहांअ पोवीतोर आत्माअ पुरा काबाम रीईन पीतोरांय तीयाहांन आख्यों, “लोकाहांअ ओमोलदाराहां आने वोळीलाहीं, 9 आमां खोळ्या मांहांअ खातुर जों भोलों केअयों तीया बाबोताम आज तुमां आमनेंह सोवाल फुचताह। 10 तांहांअ आंय तुमनेंह आने बीहरा बादा ईसरायेल लोकाहांन चोख्खी रीते आखुंह, नाझारेथ गांवांअ ईसु ख्रीस्तुअ आदीकाराकींअ आने तीयाअ ताकोताकींअ ईं मांहुंअ हारों वीयोंह आने आपुअ आगलांअ उबी रीयोंह। आने तीया ईसुल कुरुसापेअ जोळीन माय टाकनारा ता तुमांज हाय। पेन पोरमेहेरांय तीयाल जीवतो उठव्योह। 11 ईयु बाबोताम पोवीतोर लेखाणाहांम एंहकींअ लेखलों हाय:
‘बोंगलो बांदनाराहां तुमां जीया ढोगळाल नोक्कामों गोंअलो,
तोज ढोगळो बोंगलाल मोजबुत राखनारो ढोगळो * बोंण्योह।’ 12 ईया ईसु सीवाय बीहरा केडाअ बी मारफोते मांहेंअ तीयाहांअ पापाहांअ सीक्सामेनेअ वाचाय नांह सेकतें। लोकाहांन तीयाहांअ पापाहांअ सीक्सामेनेअ वाचावांअ खातुर आखी दुन्याम * ईसु सीवाय बीहरा केडाल बी पोरमेहेरांय नांह नीम्यो।”
13 पीतोर आने योहानाअ हींमोत देखीन आने ते ता सीदा-सादा आने ओभोण आदमीज हाय तों जांयन तीया येहुदी पोंचाअ लोकाहांन नोवाय लागी। तीया लोकाहांन ईं बी होमजाअयों का ते बेनुं ईसुअरी आथा। 14 पेन ते पीतोराअ आने योहानाअ वीरुद काय बी आखी नांय सेक्या। काहाका, हारों वेअलों तों मांहुंअ पीतोराअ ने योहानाअरीज उबी रेहलों। 15 तीयाअ लीदे, तीयाहां पीतोर आने योहानाल कोअमेंनेअ बारे जांअ हुकोम केअयो। आने ते बारे गीया हातींअ ते लोक माजाअ-माज चारचा केरांअ टेक्या।
16 ते एक-बीहराल फुचत्ला का, “ईया आदमीहींन आपुंह काय आखजी?” आने ते एक-बीहराल आखत्ला, “तीयाहां खुब नोवाय लागे एंहडों जों चोमोत्काराअ काम केअयोंह तों येरुसालेमाम रेनारा बादा लोकाहांन खोबुर हाय। आने तीया कामुअ आपुंह बी नाकार नांह कीअ सेकता। 17 पेन ते गोठ लोकाहांम आजी वादारे नांय फेलाय जाय तीयाअ खातुर आपुंह तीयाहांन चेतवोंणी देजी का, ‘आमीनेअ तुमांअ फाचा केडाअरी बी ईसुअ बाबोताम गोठ्या नांय केरुलोंअ?’” 18 हातींअ तीयाहां पीतोर आने योहानाल फाचा माज हादीन आख्यों, “ईसुअ बाबोताम कीदीह बी फाचा तुमांअ गोठ्या केरुलोंअज नांय आने बोद बी देवुलोंअ नांय।”
19 पेन पीतोरांय ने योहानांय तीयाहांन आख्यों, “आमां तुमांअ आखलों मानजी का पोरमेहेराअ आखलों मानजी? पोरमेहेराअ नोजराम ईया बेनाहांमेनेअ काय बोराबोर आखाय तों तुमांज आखा। 20 आमां जों-जों देख्योंह आने उनाअयाह, तीया बाबोताम बीहराहांन आख्या वोगुर आमनेंह रेवायज नांय।”
21 तांहांअ पोंचाअ लोकाहीं आजी वादारे कोळोक रीते तीयाहांन चेतवोंणी देदी, आने हातींअ तीयाहांन सोळी थोव्या। तीयाहांन केंहकींअ साज्या केरुलोंअ, तोंज पोंचाअ लोकाहांन नांय हुज्यों। काहाका, नोवाय लागे एंहडों जों काम तीयाहां केअलों तीयाअ लीदे बादें मांहेंअ पोरमेहेराअ गुणगान केअत्लें। 22 चोमोत्काराअ रीते हारों वेअलों तों मांहुंअ चालीस वोरसांअ केअता वादारे उंमोरुअ आथों।
वीसवासी लोक सोताल हींमोत मीले तीयाअ खातुर पोरमेहेराल ओरुज केअताह
23 येहुदी धोरमाअ पोंचुंअहींनेअ सुटया का तुरुतुज पीतोर आने योहान तीयाहांअ आर्याअ वीसवास्यांअ टुकळीम गीया। आने पुंजाराहां आने वोळीलाहीं तीयाहांन जों आखलों, तों बादों तीयाहां तीया वीसवास्यांहन आख्यों। 24 तों उनायन तीयाहां बादाहां एक मोने पोरमेहेराल ओरुज केअयी, “ओ मालीख! जुग, तोरती, दोरीयो, आने तीहमेर्योंअ बादों तुंयुंज बोंणाव्योंह। 25 तुंयुंज पोवीतोर आत्माअ मारफोते तोअ सेवोक आने आमांअ आगलाअ डाया दावीदाअ मुंयें आखाव्योंह का,
‘येहुदी सीवायाअ ओंणजातीअ मांहेंअ पोरमेहेर मालीखाअ वीरुद नोककामोंज खीजवाअतेंह।
तीयाहांन खोबुर नांह का, एंहडों खीजवायन काय फायदो नांह।
आने देसाहांअ लोक पोरमेहेराअ वीरुद कावोतरें केअताह।
तीयाहांन खोबुर नांह का, एंहडें कावोतरें कीईन कांय फायदो नांह।
26 तोरतीपेअ ओमोल चालवुअनारा राजा,
मालीखाअ आने तीयांय सोते पोसोंद कीईन ख्रीस्ताअ * वीरुद
लोळाय केरांअ तीयार वीयाह।’
27 आमनेंह खोबुर हाय का, ईं बादों खेरोंज हाय। काहाका, खोरेखोर एंहकींअज ईया सेहेराम हेरोद आने पोंतीयु पीलात, येहुदी सीवायाअ लोक, आने ईसरायेल लोक, बादारी मीलीन, तोअ पोवीतोर सेवोक ईसु, जीयाल तुंयुं नीमीन खास राजा बोंणाव्योह, तीयाअ वीरुद टोलवाअयाह। 28 आने एंहकींअ कीईन तीयांय तोअ ताकोतु आने मोर्जीकींअ तुंयुं पेअलांअ जों नोक्की केअलों तों बादों पुरों केअयों। 29 आने आमी ओ मालीख! येहुदी पोंचाअ लोकाहीं तोअ सेवोकुंहन जे धोमक्या देदयाह ते तुं उनाअ, आने लोकाहांन तोअ हारी गोठ जाहेर केरांअ तीया सेवोकुंहन मोडी हींमोत पुरी पाळ! 30 आने आजार्याहांन हारें केअनारी तोअ ताकोत मोकली दे! आने तोअ पोवीतोर सेवोक ईसुअ आदीकाराकींअ आजार्याहांन हारें केरांअ आने नोवाय लागे एंहडें कामें केरांअ तोअ सेवोकुंहन मोदोत केअ!”
31 एंहकींअ तीयाहां पोरमेहेराल ओरुज केरांअ पुरों केअयों तांहांअ, जीया कोअमें तें टोलवाअलें तों कोअ आली उठ्यों। आने तें बादें पोवीतोर आत्माअ पुरा काबाम आलें आने हींमोत राखीन पोरमेहेराअ गोठ आखांअ टेक्यें।
वीसवासी लोक सोताअ मीलकोत एक-बीहराअरी वाटीन वापरुअताह
32 ईसुपेअ वीसवास राखनारांअ मोंडोळामेर्येंअ बादें मांहेंअ एक मोनुअ ने एक जीवुअ वीईन रेहलें। तीयाहांमेर्योंअ केडों बी मीलकोताअ बाबोताम मांअ-तोअ एंहडों नांय राखत्लों। तीयाहांपेअ जोंबी वेअ, तों एक-बीहराहांअरी वाटत्लें। 33 मालीखाअ खास चेलाहां मोडी ताकोताकींअ साक्सी देदी का, मालीख ईसु जीवतो उठ्योह। आने तीयाहांअ बादाहां पेअ पोरमेहेरांय खुब मेरबानी केअयी। 34-35 मोंडोळाम एंहडों एक बी मांहुंअ नांय आथों का, जीयाल केल्ली बी वोस्ताअ खोट पोळी वीअ। काहाका, जीया-जीयांयपेअ जोमीन का पोंगें आथें, तींहमेर्येंअ थोळेंक मांहेंअ तें वेची देहलें। आने तीयाअ जे पोयसा उबजुअत्ला, ते लावीन मालीखाअ खास चेलाहांन होपी देहलें। आने ते चेला ते पोयसा मोंडोळाअ दोरेक मांहांअल तीयाअ जोरुलीअ पोरमाणे वाटी देहला। 36-37 दाखला तोरीके, योसेफ नांवांअ एक मांहांय सोताअ खेत वेच्यों; आने तीयाअ जे पोयसा उबज्या, ते लावीन मालीखाअ खास चेलाहांन होपी देदा। तीयांय तीयाअ नांव बारनाबा पाळलों। तीयाअ नांवांअ ओर्थो “उंह चोळवुअनारो” हाय। बारनाबा लेवीअ कुळुम जोन्मुअलो आने तो सीपरु बेटुमेर्योअ आथो।