5
आनान्या आने साफीरा
1 पेन आनान्या नांवांअ एक मांहुंअ आथों। तीयाअ कोअवालीअ नांव साफीरा आथों। आनान्यांह तीयाअ जोमीनाअ एक भाग वेची टाक्यो। 2 तीयाअ जे पोयसा उबजया तींहमेनेअ तीयांय, तीयाअ कोअवालीअरी गोठ कीईन, थोळाक पोयसा दोबावी देदा। हातींअ तीयांय बीहरा पोयसा लावीन मालीखाअ खास चेलाहांन होपी देदा। * 3 तांहांअ पीतोरांय आनान्याल आख्यों, “आनान्या, सेतान तोअ पुरो कोब्जो ले एंहडी तोक तुंयुं तीयाल काहाल देदी? एंहकींअ कीईन तुंयुं तोअ जोमीनाअ उबजुअला पोयसांहमनेअ थोळाक दोबावी देदा ने पोवीतोर आत्मान तुं झुटों बी गोगोह। 4 ते जोमीन तुंयुं वेची तीयाअ पेअलांअ तोअ सोताअज आथीकने? आने ते वेचीन हातींअ जे पोयसा उबजुअला ते बी तोअ सोताअज आथाकने? तांहांअ एंहडो ठोग-धोंदो केरांअ तोअ मोनाम वीचार काहा आलो? तुं आमनेंह ओतोअज झुटों नांह गोग्यो, पेन पोरमेहेराल बी झुटों गोग्योह।”
5 पीतोराअ ए गोठ्या उनाअताज आनान्या पुंय आसाटाय पोळीन मोय गीयो। आने जें-जें ईया बोनावाअ बाबोताम उनाअयें, तीयाहांन बादाहांन खुब बीख लागी। 6 हातींअ थोळाक जुवान आदमी कोअमें आला, आने आनान्याअ मुरदाल पोतळाम चोंअडावीन बारे लीअ गीया, आने तीयाल तीयाहां डाटी देदों।
7 लोग-भोग तीन कालाक हातींअ आनान्याअ कोअवाली, जीयु खोलीम पीतोर आथो तींहीं आली। पेन तीयुअ कोअवालाल जों वेअलों तीयाअ तीयुल खोबुर नांय आथी। 8 तीयुअ कोअवालांह देदला पोयसा देखावीन पीतोरांय तीयुल फुच्यों, “मांन आखेअ का, तुंयुं ने तोअ कोअवालांह ओताअज पोयसांहम तुमांअ जोमीन वेचली का?”
तांहांअ तीयुंय जोवाब देदो, “आंह ओताअज पोयसांहम वेचली।”
9 तांहांअ पीतोरांय तीयुल आख्यों, “तुमां जों ठोगांअ काम केअयोंह तों, पोरमेहेराअ आत्मा जांय जायन बीहराहांन तों जाहेर केअहे का नांह तीयाअ पारखों केरांअ तुमां बेनुंह काहाल होप केअयोह? उनाअ! तोअ कोअवालाल डाटी आवनारा आदमी आमीज बांअणाअहीं लोगुंअ आवी पोच्याह। आने ते तोअ मुरदाल बी डाटांअ लीअ जाय।”
10 पीतोरांय एंहकींअ आख्यों का तुरुतुज ते पुंय आसाटाय पोळी आने मोय गीयी। ते जुवान आदमी कोअमें आला; आने तीयुल मोअली देखीन तीयुअ मुरदाल बारी लीअ गीया, आने तीयुअ कोअवालाअ मुरदाल डाटलों तीयुज जागे तीयुअ मुरदाल बी डाटी देदों। 11 येरुसालेमाअ मोंडोळाअ बादा लोकाहांन, आने ईया बोनावाअ बाबोताम उनाअनारा बीहरा बादा लोकाहांन, खुब बीख लागी।
मालीखाअ खास चेला चोमोत्कार आने नोवाय लागे एंहडें कामें केअताह
12-15 तींहींनेअ बादें वीसवासी मांहेंअ एक मोनुअ वीईन मोंदीराम “सालोमोनाअ चोवठों” नांवांअ जागे टोलवाअत्लें। बीहरें मांहेंअ तीयाहांन खुब मान देहलें। पेन आनान्या आने साफीराअ होच बेन मोनुअ वीअ तेंहडों केडों बी तीयाहांअरी जोळायांअ हींमोत नांय केअत्लों। तेबी, वादारे ने वादारे बायुहुं ने आदमीहीं मालीखापेअ वीसवास केअयो। मालीखाअ खास चेलाहां लोकाहांअ आगलांअ खुब चोमोत्कार आने नोवाय लागे एंहडें कामें केअयें। तीयाअ पोरीणामे, मांहेंअ आजार्याहांन खाटलांहम हुवावीन आने डोली कीईन उसली लावत्लें। आने पीतोर वाटे जाय तांहांअ, ओसाम-ओसो थोळाक मांहांहांपेअ तीयाअ सांय तेबी पोळे आने तें हारें वीअ जाय एंहडी आस्या राखीन तीयाहांन हेरीहींम हुवावी थोवत्लें। 16 येरुसालेमाअ पाहल्याअ गांवांमेनेअ बी लोकाहांअ टोला आजार्यें मांहांहांन आने पुतळें लागला मांहांहांन लीईन आवत्ला। आने तें बादें हारें वेअत्लें।
येहुदी आगेवान मालीखाअ खास चेलाहांन सोतावताह
17 मोडांम-मोडो पुंजारो, आने तीयाअ आर्याअ जे सादुकी आथा, ते बादा मालीखाअ खास चेलाहांअरी आदरायुं गोगत्ला। 18 तीयाहां तीया चेलाहांन तेरावीन जेलाम कोंडावी देदा। 19 पेन मालीखांय मोकलुअला एक होरगाअ दुतांय रातींअ आवीन जेलुअ बांअणें उगाळी देदें आने चेलाहांन जेलुअ बारे काडी थोव्या। हातींअ तीयांय तीयाहांन आख्यों, 20 “मोंदीराम जा, आने ईया नोवा जीवोनाअ गोठ लोकाहांन आखा।” 21 तांहांअ ते चेला बोळे-वेगर्याअ मोंदीराम गीया आने लोकाहांन बोद दांअ टेक्या।
ओताअमुज, मोडांम-मोडा पुंजारा आने तीयाअ आर्याहां ईसरायेल लोकाहांअ बादा वोळीलुंहन टोलवीन पोंच बोहाव्या। हातींअ तीयाहां मालीखाअ खास चेलाहांअ तापास केरांअ खातुर तीयाहांन जेलाम नेअ लीअ आवांअ खातुर मोंदीराम चोकीदाराहांन मोकल्या। 22 पेन चोकीदाराहां आवीन हेअयों ता, ते चेला जेलाम नांय आथा। तीयाअ लीदे, तीया चोकीदाराहां फाचा पोंचाअ आगलांअ आवीन खोबुर देदी का, 23 “आमां हेअयों ता, जेलुअ बांअणांहन हारकींअज टालें मारलें आथें। आने जेलुअ चोकीदार बी बारे उबलाज आथा। पेन आमां जेलुअ बांअणें उगाळीन हेअयों ता, तींहीं केडों बी नांय आथों।” 24 तीयाहांअ गोठ उनायन मोंदीराअ चोकीदाराहांअ उपरी आने मोडा पुंजारा “तीया चेलाहांअ काय वीयों वीअ?” एंहकींअ वीचारुम पोळी गीया। 25 तांहांअ एक मांहांय आवीन खोबुर देदी का, “एय उनाया! जीया आदमीहींन तुमां जेलाम कोंडावला, ते ता मोंदीराम लोकाहांन बोद देताह।”
26 तांहांअ चोकीदाराहांअ उपरी सोताअरी चोकीदाराहांन लीईन मोंदीराम गीयो, आने मालीखाअ खास चेलाहांन तेअया। पेन तीयाहांन तेरांअ तीयांय जोबोर-जोस्ती नांय केअयी। काहाका, चेलाहांअरी खाराब रीते वोरतुअजी ता बादा लोक आमनेंह ढोगळाटीन माय टाकीअ एंहडी तीयाहांन बीख आथी। 27 एंहकींअ कीईन तीया खास चेलाहांन लीअ आवीन पोंचाअ आगलांअ उबी राख्या। आने मोडांम-मोडा पुंजारांय तापासांअ चालु केअता तीयाहांन फुच्यों, 28 “आमां तुमनेंह ईया ईसुअ बाबोताम लोकाहांन बोद नांय देवुलोंअ एंहडो कोळोक हुकोम नांह केअयो का? तांहांअ काहा तुमां आखा येरुसालेमाम तीयाअ नांवांअ बोद दीअ वोल्याह? तुमां तीयाअ खुनाअ गुनो बी आमांअ माथे पाळांअ मागताह का?” 29 पेन पीतोरांय आने बीहरा चेलाहां तीयाहांन जोवाब देदो, “आमांअ ता, ईयु बाबोताम मांहांहांअ नांय, पेन पोरमेहेराअ आखलोंज मानांअ जोजे। 30 जीया ईसुल तुमां कुरुसापेअ जोळीन माय टाकलो, तीयाल पोरमेहेरांय मोंजे का, जीया पोरमेहेराअ आपुअ आगलेंअ डायें भोकती केअत्लें तीयांय, फाचो जीवतो केअयोह। 31 आने पोरमेहेरांय तीयाल आगेवान आने वाचावनारा तोरीके होरगाम सोताअ हुदी वेल बोहाव्योह। ईसरायेल लोकाहांन सोताअ पाप सोळीन पोरमेहेराअ वेल वोली आवांअ तोक दांअ खातुर तीयांय एंहडों केअयोंह, ईयाअ खातुर का, पोरमेहेर तीयाहांअ पाप माफ केअ। 32 ईसुल जों-जों वेअलों तीयु बाबोतीहींअ आमां बी साक्सी हाय, आने पोरमेहेर तीयाअ आखलों माननाराहांन जो पोवीतोर आत्मा देहे तो बी साक्सी हाय।”
33 पोंचाअ लोक चेलाहांअ ए गोठ उनाअया तांहांअ, ते चेलाहांन खुब खीजवाअया आने तीयाहांन माय टाकांअ तीयार वीअ गीया। 34 पेन गामालीयेल नांवांअ एक फोरीसी, जो सोते नीयोम हीकवुअनारो आथो, आने जीयाल बादा लोक मान देहला, तीयांय पोंचाअ आगलांअ उबी रीईन मोंदीराअ चोकीदाराहांन हुकोम केअयो, ते चेलाहांन थोळीक वाअ बारे लीअ जाय। 35 हातींअ तीयांय पोंचाअ लोकाहांन आख्यों, “ईसरायेल लोकाहीं, ईया आदमीहींन तुमां जों केरांअ तीयार वीयाह, तों बोराबोर होमजी वीचारीन केअजा! 36 थोळाक वोखत पेअलांअ थीयुदा नांवांअ एक मांहुंअ उबों वेअलों। तों सोताल मोडों मांहुंअ आखावत्लों। आने रोम सारकाराअ वीरुद धामाल केरांअ लोग-भोग चारहोव आदमी तीयाअरी जोळाअला। पेन तीयाल थोळाक लोकाहीं माय टाक्यो। तांहांअ तीयाअ बादा चेला वेरगाय गीया। आने तीयाअ ते बादी टुकळीज टुटी गीयी। 37 हातींअ वोहतीअ गोंणती वेअत्ली तांहांअ गालील जील्लाअ येहुदा उबो वेअलो। आने तीयांय बी थोळाक लोकाहांन सोताअरी कीईन तीयाहांन सारकाराअ वीरुद धामाल केरावांअ चोळव्या। पेन तीयाअ नास वीयो। आने तीयाअ चेला बी बादा एंहें-तेंहें वेरगाय गीया। 38 तीयाअ लीदे, आमी ईयु बाबोताम मांअ तुमनेंह एंहकींअ आखुलोंअ हाय का, ईया आदमीहींन काय बी मां केअता! ईयाहांअ जों केरुलोंअ वीअ तों केरांअ दा। काहाका, ए योज्ना आने कामें केरावनारों मांहुंअज वीअ ता, तों बादों टुटी पोळीअ। 39 पेन तों केरावनारो जो पोरमेहेरुज वीअ ता, तीयाहांन तुमां ओटकावी नांह सेकनारा। उलटों तुमां पोरमेहेराअरी भानगुळ केअनारा गोंणाअहा।”
तांहांअ पोंचाअ लोकाहीं गामालीयेलुअ सालाह मानी लेदी। 40 आने मालीखाअ खास चेलाहांन माज हादी लावीन तीयाहांन चापकाहांअ मार ठोकाव्यो, आने “ईसुअ बाबोताम फाचो कीदीह बी बोद नांय देवुलोंअ”, एंहडो हुकोम कीईन तीयाहांन सोळी देदा। 41 तांहांअ मालीखाअ खास चेला सोताल पोरमेहेरांय ईसुअ खातुर ओपमान वेठांअ जेंहडा लायोक गोंअया तीयाअ लीदे आनोंद केअता-केअता पोंचाअ आगलांअनेअ जाता रीया। 42 आने तीयाहां रोददीह मोंदीराम आने कोअ-कोअ ईसुअ बाबोताम बोद दांअ आने ईसुज ख्रीस्त हाय ते गोठ जाहेर केरांअ चालुज राख्यों।