कोरींथ सेहेराअ मोंडोळाल पावुलाअ पेअलोंअ कागलों
1
सालामाअ गोठ
1-2 कोरींथ सेहेरामेर्याअ पोरमेहेराअ मोंडोळाअ लोकाहांन आंय पावुल ईं कागलों लेखुंह। पोरमेहेरांय सोताअ मोर्जीकींअ मांन ख्रीस्त ईसुअ खास मोकलुअलो चेलो बोंणांअ हादयोह। आंय ईं कागलों लेखुंह तांहांअ, आपुअ ख्रीस्ती पावुह सोस्थेने बी ईंहीं मांअरी हाय। तुमनेंह आने आपुअ मालीख ईसु ख्रीस्तुअ भोकती केअनारा बादी जागर्याअ लोकाहांन पोरमेहेरांय सोताअ पोवीतोर लोक बोंणांअ हादयाह। तुमां आने ते ख्रीस्त ईसुअरी जोळाअयाह तीयाअ लीदे तुमां बादा पोरमेहेराअ लोक बोंण्याह। ख्रीस्त आपुअ बी मालीख हाय आने तीयाहांअ बी मालीख हाय।
3 आपुअ पोरमेहेर बाहको आने मालीख ईसु ख्रीस्त तुमांअ बादाहां पेअ मेरबानी केअ ने तुमनेंह बादाहांन सुख-सांती दे!
पावुल पोरमेहेराअ आभार मानेह
4 ख्रीस्त ईसुंय तुमांअ खातुर जों केअयोंह तीयाअ लीदे, a पोरमेहेरांय तुमाहांपेअ मेरबानी केअयीह। 5 तुमां ख्रीस्त ईसुअरी जोळाअयेंह तीयाअ लीदे तुमां बादी बाबोतींहम बोरखोतुवालें बोंण्येंह। आने तुमनेंह पोरमेहेराअ गोठ जाहेर केरांअ वोरदान आने बादी आत्मीक होकीकोतुंअ बाबोताअ गीयान मील्योंह। तीयाअ लीदे, आंय कायोम तुमांअ खातुर मांअ पोरमेहेराअ आभार मान्या कीअहुं। 6 ख्रीस्तुअ बाबोताम आमां तुमनेंह आखली गोठ तुमांअ जीवोनाहांम हारकींअ उतीह तों चोख्खी रीते देखाअहे। 7 तीयाअ लीदे, आपुअ मालीख ईसु ख्रीस्त फाचो पोरगोट वेरांअ हाय तीयाअ वाट जोवतें रेनारा तुमां पोवीतोर आत्मा देहे तें बादें वोरदानें खोरेखोर मीलव्येंह। 8 पोरमेहेर सोतेज तुमनेंह वीसवासाम पाकें राखीअ, ईयाअ खातुर का, आपुअ मालीख ईसु ख्रीस्त पोरगोट वीअ तीदीह लोगुंअ तुमां गुना वोगुराअ रा। 9 पोरमेहेर, जीयांय सोताअ पोयरा ने आपुअ मालीख ईसु ख्रीस्ताअ री सोबोंद राखांअ तुमनेंह हादयेंह, तो सोताअ आखल्या पोरमाणे केरांअ ईमानदार हाय।
कोरींथ मोंडोळाअ लोकाहांम फाट-फुट
10 मांअ पावु-बोंअयुहुं, आपुअ मालीख ईसु ख्रीस्तुंह मांन देदला आदीकाराकींअ आंय तुमनेंह कालावाला कीअहुं का, तुमां बादें तुमांअ बोली-चालीम, वीचारुम, आने ईरादाम, पुरी रीते एक मोनुअ रेजा, ईयाअ खातुर का, तुमांहम फाट-फुट पोळ्याह ते हुदरी जाय। 11 मांअ पावु-बोंअयुहुं, एंहकींअ आखांअ कारोण ईं हाय का, कुलोवेअ कुटुंबुअ थोळाकाहीं मांन एंहडी खोबुर देदीह का तुमांहम फाट-फुट पोळ्याह। 12 आंय एंहकींअ आखांअ मागुंह का, तुमांहम ओलोग-ओलोगुज गोठ्या चालत्याह। तुमाहांमेनेअ थोळेंक आखतेंह का, “आमां पावुलाअ मांहेंअ हाय।” तांहांअ बीहरें आखतेंह का, “आमां आपोल्लोअ मांहेंअ हाय।” तांहांअ बीहरें आखतेंह का, “आमां पीतोराअ मांहेंअ हाय।” तांहांअ बीहरें आखतेंह का, “आमां ता ख्रीस्तुअ मांहेंअ हाय।” 13 एंहड्या फाट-फुट पाळीन तुमां खोरेखोर ख्रीस्तुअ कुटका-कुटकी केअतेंह। तुमांअ पापाहांअ सीक्सामेनेअ तुमनेंह वाचावांअ खातुर b कुरुसापेअ जोळाअनारो ता नोक्कीज आंय पावुल नांय आथो। नोक्कीज तुमां मांअ चेलाहांअ तोरीके c बापतीस्मा नांह लेदों। 14 आंय पोरमेहेराअ आभार मानुंह का, कीरीस्पु आने गायु सीवाय तुमांअमेर्याअ बीहरा केडाल बी मांयुं बापतीस्मा नांह केअयों। 15 मोंजे, तुमाहांमेनेअ केडों बी एंहकींअ नांह आखी सेकतों का, तीयांय मांअ चेला तोरीके d बापतीस्मा लेदों। 16 (आंह, आमी मांन ईत आवेह का, स्तेफानुल आने तीयाअ कुटुंबुअ मांहांहांन बी मांयुं बापतीस्मा केअयों। ईयाहांअ सीवाय बीहरा केडाल बी मांयुं बापतीस्मा केअयों वीअ एंहडों मांन ईत नांह।) 17 एंहकींअ आंय ईयाअ लीदे आखुंह, ख्रीस्तुंह मांन बापतीस्मा केरांअ नांह मोकल्यो, पेन तीयाअ बाबोताअ हारी गोठ जाहेर केरांअज मोकलुअलो तों तुमां जांआं। आने तों काम बी मांहांअ गीयानाअ आदारे सोब्दा वापरीन नांय केअयों, ईयाअ खातुर का, कुरुसापेअ ख्रीस्त मोअयो तीयु गोठीमेरीअ ताकोत नोककामी नांय वीअ जाय।
पोरमेहेराअ ताकोत आने गीयान
18 ख्रीस्त कुरुसापेअ मोअयो ते गोठ नासाअ वाटे चालनारा लोकाहांन ओकली वोगुराअ लागेह। पेन पापाहांअ सीक्सामेनेअ वाचायांअ वाटे जानारा आपुअ खातुर ता ते गोठ पोरमेहेराअ ताकोत देखावेह। 19 ईयाअ आदार पोवीतोर लेखाणाहांम मीलेह। तींहीं पोरमेहेर आखेह,
“आंय देखावी देहें का, सोताल गीयानी आखावनारा लोकाहांअ गीयान
आने सोताल हुच्यार आखावनाराअ हुच्यारी बादी नोक्कामी हाय।” 20 एंहकींअ वीअ ता, सोताल गीयानी आखावनारांअ कींमोत कायज नांह रीयी। नीयोम हीकवुअनाराहांअ कींमोत बी कायज नांह रीयी। आने खुब हारकींअ चारचा केअनारांअ कींमोत बी कायज नांह रीयी। पोरमेहेरांय देखाव्योंह का, तीयाअ बीख नांय राखनारांअ गीयान नोककामों हाय।
21 पोरमेहेरांय सोताअ मोडा गीयानुकींअ एंहडी गोठवोणी केअयीह का, दुन्याअ लोक सोताअ गीयानुकींअ तीयाल ओअखीज नांय सेके। पेन उलटों, जे हारी गोठ आमां जाहेर केअताह आने जे खुब लोकाहांन ओकली वोगुराअ लागेह, तीयुपेअ मांहांहां राखला वीसवासुकींअज तीयाहांन वाचावांअ पोरमेहेरांय नोक्की केअयोंह। 22 ते हारी गोठ पोरमेहेरापेनेअज आलीह का नांह तीयाअ साबीतीअ खातुर येहुदी लोक चोमोत्कार हेरांअ मागताह, आने येहुदी जातीअ नांह तेंहडा लोक, जों गीयानुवालों लागेह तों उनायांअ मोर्जी राखताह। 23 मोंजे, जांहांअ आमां कुरुसापेअ जोळाअला ख्रीस्तुअ बाबोताअ गोठ जाहेर केअताह, तांहांअ येहुदी लोकाहांन खोटों लागेह, आने येहुदी जातीअ नांह तेंहडा लोकाहांन ते गोठ ओकली वोगुराअ लागेह। 24 पेन जीयाहांन सोताअ लोक बोंणांअ पोरमेहेरांय हादयाह, ते हातींअ येहुदी जातीअ वेअ, का बीहरी जातीअ वेअ, तीयाहांन पोरमेहेर कोतोअ ताकोतावालो आने गीयानुवालो हाय तों देखावनारो ता ख्रीस्तज हाय। 25 काहाका, मांहांअ नोजराम मुरखाय लागनारी पोरमेहेराअ ए योज्ना होकीकोतुम ता मांहांअ गीयानु केअता खुब वादारे गीयानुवाली हाय। आने मांहांअ नोजराम जे पोरमेहेराअ नोबलाय लागेह, ते होकीकोतुम ता मांहांअ ताकोतु केअता खुब वादारे ताकोतावाली हाय। 26 मांअ पावु-बोंअयुहुं, मांअ एंहडी मोर्जी हाय का, ईयु होकीकोतुअ बाबोताम तुमां वीचार केरा। जांहांअ पोरमेहेरांय तुमनेंह ख्रीस्तुअ चेलें बोंणांअ हादलें, तांहांअ तुमाहांमेनेअ खुब दुन्याअ बीहरा लोकाहीं अ गोंणतीम, नांह ता गीयानी, का खुब ताकोतावालें, का नांह ता खुब मोडा कुटुंबुअ वोसुलामेर्येंअ आथें। 27 तेबी, सोते गीयानी हाय एंहकींअ धारनारांहन नाजवावांअ खातुर पोरमेहेरांय जांय जोवीन एंहडा मांहांहांन पोसोंद केअयें, का जें दुन्याअ बीहरा लोकाहीं अ गोंणतीम ओकली वोगुराअ हाय। आने ताकोतावालांहन नाजवावांअ खातुर पोरमेहेरांय एंहडा मांहांहांन पोसोंद केअयेंह का जें, दुन्याअ बीहरा लोकाहीं अ गोंणतीम नोबलें हाय। 28 दुन्याअ लोकाहांअ नोजराम जें मोडें गोंणाअतेंह तीयाहांअ मोडायाअ काय कींमोत नांह तों देखावांअ खातुर, पोरमेहेरांय एंहडा मांहांहांन पोसोंद केअयेंह का जें, दुन्याअ बीहरा लोकाहीं अ नोजराम नीचें आने ओलकें गोंणाअतेंह। 29 ईयाअ पोरीणामे, केडों बी पोरमेहेराअ आगलांअ सोताअ बाबोताम ओभीमान नांह कीअ सेकतों। 30 तुमनेंह ख्रीस्त ईसुअरी जोळनारो ता पोरमेहेरुज हाय। आने ख्रीस्तुंह आपुअ खातुर जों केअयोंह तीयाअ लीदेज पोरमेहेराअ गीयान आपनेंह मील्योंह, आने पोरमेहेर आपुअ पाप तुवी टाकेह, आने आपुंह पोरमेहेराअ खास लोक बोंणताह, आने पोरमेहेर आपनेंह आपुअ पापाहांअ गुनामनेअ सोळवेह। 31 तीयाअ लीदे, जेंहकींअ पोवीतोर लेखाणाहांम लेखलों हाय तेंहकींअ आपुंह केअजी! तींहीं एंहकींअ लेखलों हाय:
“केडों बी केल्ली बी बाबोताम ओभीमान केरांअ मागतों वीअ ता,
तों मालीखांय तीयाअ खातुर जों केअयोंह तीयाअ खातुरुज ओभीमान केअ!”