2
कुरुसापेअ जोळाअला ख्रीस्तुअ बाबोताअ हारी गोठ
1 दाखला तोरीके मांअ पावु बोंअयुहुं, केडांय बी आजी लोगुंअ जांअयी नांह ते पोरमेहेराअ गोठ आंय तुमांअहीं आवीन जाहेर केअत्लो तांहांअ, मांयुं भासोण केरांअ हारी आवळोत नांह वापरी आने मांहांअ गोणतीम जों गीयान लागतों वीअ तों बी नांह वापर्यों। 2 आंय तुमांअरी आथो तांहांअ मांयुं एंहडों नोक्की कीअ लेदलों का, कुरुसापेअ मोअला ईसु ख्रीस्त सीवाय बीहरी केल्ली बी बाबोतीपेअ धीयान नांय देवुलोंअ। 3 आने आंय तुमांअहीं आललो तांहांअ मांन एंहडों लागलों का, ईं मोडों काम आंय नांय कीअ सेकुं। आने ख्रीस्त मांअ मारफोते जों केरावांअ मागत्लो तों आंय कीअ नांय सेकुं एंहडी बीखुअ लीदे आंय कापी उठत्लो। a 4 आने मांअ गोठ आने मांअ बोद एकदोम सीदो-सादो आथो। मांयुं गीयानुवाला आने मांहांअल गोंवीं जाय एंहडा हारा-हारा सोब्दा वापरीन बोद नांह देदो। उलटों, पोवीतोर आत्माअ ताकोतुपेअज मांयुं भोरुचो राखलो। 5 मांयुं एंहडों ईयाअ खातुर केअलों का, मांहांअ गीयानुपेअ तुमां भोरुचो नांय राखा, पेन पोरमेहेराअ ताकोतुपेअज भोरुचो राखा।
पोवीतोर आत्मा देहे तों गीयान
6 तेबी, जें वीसवासाम पाकें हाय, तीयाहांअरी आंय गीयानाअ गोठ्या आखुंहज। पेन ईं गीयान ता, दुन्याअ लोकाहांअ का नास वीअ जानारा हाय तेंहडा ओमोलदाराहांअ गीयानाअ होच नांह। 7 आमां ता पोरमेहेराअ एंहडों गीयान हीकवुअताह का, जों बीहरा मांहांहांअ आगलांअ पोरमेहेरांय पेअलांअ जाहेर नांह केअयों। पेन पोरमेहेरांय दुन्या बोंणावली तीयाअ पेअलांअज नोक्की केअलों का, ईया गीयानाअ मारफोते आमनेंह मोडाय मीले। 8 ख्रीस्तुल कुरुसापेअ जोळनारा ओमोलदाराहांमेर्याअ केडांय बी ईं गीयान होमजयों नांह। जो ते होमजुअता ता, मोडायावाला मालीखाल ते कुरुसापेअ नांय जोळता। 9-10 पेन उलटों, पोरमेहेरांय तों गीयान आपनेंह वीसवास्यांहन जाहेर केअयों। ईयाअ आदार पोवीतोर लेखाणाहांम मीलेह। तींहीं एंहकींअ लेखलों हाय: पोरमेहेरांय ता, तीयाअ आत्माअ मारफोते तीयाअ भेदुवालों गीयान आपनेंह जाणाव्योंह। काहाका, होमजांअ ओगर्या हाय एंहड्या पोरमेहेराअ गोठ्या सुदा, बादों जांअनारो आत्मा जांय जाहे।
“जे वोस्तु डोंअहांह नांह देख्या, आने जीयुंअ बाबोताम काने नांह उनाअया,
का जीयुंअ बाबोताम मांहांअ मोनाम वीचार बी नांय आलो वीअ,
ते वोस्तु पोरमेहेरांय तीयापेअ माया राखनारांअ खातुर तीयार केअयाह।” 11 मांहांअ बाबोताम वीचारजी ता, मांहांअ मोनुअ गोठ्या तीया मांहांअ आत्मा सीवाय केडाल बी खोबुर नांय पोळे। तेंहकींअज कीईन पोरमेहेराअ मोनुअ गोठ्या पोरमेहेराअ आत्मा सीवाय केडाल बी नांय खोबुर पोळे। 12 दुन्याअ लोकाहांन मील्योह तो आत्मा आपनेंह नांह मील्यो। पेन उलटों, पोरमेहेरांय मोकलुअलो तीयाअ सोताअ आत्माज आपनेंह मील्योह, ईयाअ खातुर का, पोरमेहेरापेनेअ आपनेंह मीलला वोरदानुंअ आपुंह ओनुभोव केअजी। 13 जांहांअ ए बाबोत्या आमां तुमनेंह आखताह, तांहांअ आमां मांहांहांअ गीयानुकींअ आवनारा सोब्दा नांह वापरुअता। उलटों, आमां पोवीतोर आत्मांय आमनेंह देदला सोब्दा वापरुअताह। आंह, आत्मीक बाबोत्या होमजावांअ खातुर आमां तीया आत्माअ सोब्दा वापरुअताह। 14 जें मांहेंअ ख्रीस्ती वीसवासी नांह, तें पोरमेहेराअ आत्मा देहे तें वोरदानें होमजी नांह सेकतें। तीया मांहांहांन तीया वोरदानुंअ गोठ्या ओकली वोगुराअ लागत्याह। आने तें तीया वोरदानुंअ ओर्थो बी होमजी नांह सेकतें। काहाका, जीयांयम पोवीतोर आत्मा हाय तेंज तीया वोरदानुंअ ओर्थो होमजी सेकतेंह। 15 आमांहम पोवीतोर आत्मा हाय आने आमां ईयु आत्मीक बाबोतीहींअ ओर्थो होमजी सेकताह। पेन बीहरें मांहेंअ आमनेंह होमजीज नांह सेकतें। 16 ईयाअ आदार पोवीतोर लेखाणाहांम मीलेह। तींहीं एंहकींअ लेखलों हाय का, “मालीखाअ मोनुल जांअनारों केडों बी हाय का? तीयाल सालाह दीअ सेके एंहडों केडों बी हाय का?”
पेन आमां ता ए बादया गोठ्या होमजी सेकताह। काहाका, आमां ख्रीस्तुअ होच वीचारताह। \f + \fr २।१६ \ft गीरीक नोवा काराराम, , “आमाहांपेअ ख्रीस्ताअ मोन हाय” एंहकींअ हाय।\ f*