3
पोरमेहेराअ सेवाम आर्याअ सेवोक
1 मेराला पावु-बोंअयुहुं, आंय तुमांअरी आथो तांहांअ, पोवीतोर आत्माअ काबाम रेनारा लोकाहांअरी a जेंहकींअ गोठ्या केराय तेंहकींअ तुमांअरी आंय गोठ्या नांह कीअ सेक्यो। पेन उलटों, सोताल जीवुम गोंवें तेंहडेंज कामें केअनारा आने वीसवासाम काचा हाय तेंहडा लोकाहांअरी जेंहकींअ गोठ्या केराय तेंहकींअ मांन तुमांअरी गोठ्या केरांअ पोळत्लों। 2 हानांअ पोयराहांन जेंहकींअ दुदुज पीयावांअ पोळे तेंहकींअ मांअ तुमनेंह हेलल्या-हेलल्या आत्मीक गोठ्याज हीकवांअ पोळलों। ओगर्या-ओगर्या आत्मीक गोठ्या आंय तुमनेंह हीकवी नांह सेक्यो। काहाका, एंहड्या गोठ्या तुमां होमजी सेका एंहडें नांय आथें। आने आमी बी तुमां ते होमजी सेका एंहडें नांह। 3 काहाका, आजी बी तुमां सोताल जीवुम गोंवें तेंहडेंज कामें केअतेंह। तुमां एक-बीहरापेअ आदराय राखतेंह आने एक-बीहराअरी चुलाअतेंह बी। तीयापेनेअ एंहडी साबीती वेअहे का, तुमां सोताल जीवुम गोंवें तेंहडेंज कामें केअतेंह। 4 तुमाहांमेनेअ थोळेंक आखतेंह का, “आमां पावुलाअ चेलें हाय,” आने बीहरें आखतेंह का, “आमां ता आपोल्लुअ चेलें हाय।” ईयापनेअ ईं साबीत वेअहे का, तुमां बी ईयु दुन्याअ बीहरा लोकाहीं अ होचुज वोरतुअतेंह।
5 आपोल्लो आने आंय bता पोरमेहेराअ सेवोकुज हाय, आने आमां तुमनेंह ईसु ख्रीस्तुपेअ वीसवास राखांअ मोदोत केअयीह। आमनेंह दोरेकुल मालीखांय होपलों कामुज आमां केअताह। 6 तुमनेंह पेअलांअम-पेअलांअ ख्रीस्तुअ बाबोताअ हारी गोठ जाहेर केअनारो आंयज आथो। c तेंहकींअज कीईन हारी गोठीअ बाबोताम तुमनेंह वादारे बोद देनारो आपोल्लो आथो। d पेन तुमनेंह आत्मीक जीवोनाम वादावनारो ता पोरमेहेरुज हाय। e 7 तांहांअ आंय ने आपोल्लो, आमां बेनुं खास मांहेंअ नांह। f पेन हारी गोठ माननाराहांन आत्मीक रीते वादावनारो पोरमेहेरुज खास हाय। g 8 आंय आने आपोल्लो बेनुं आरी-आरीज एकुज ईरादो राखीन काम केअताह। h आमांअ सोताअ कामुअ आदारे पोरमेहेर आमनेंह बोदलो दीअ। i 9 ईत केरा! आपोल्लो आने आंय बेनुं आरी मीलीन पोरमेहेराअ खातुर काम केअताह। तुमां आमांअ नांह। जेंहकींअ खेत तीयाअ धोणीअ हाय, तेंहकींअ तुमां पोरमेहेराअ हाय। j
जेंहकींअ बोंगलो तीयाल बांदनाराअ नांह पेन तीयाअ धोणीअ हाय, तेंहकींअ तुमां पोरमेहेराअ हाय। k 10 बोंगलो बांदता पेअलांअ पायो टाकनारा आवळीदार कोळ्याअ होच, पोरमेहेरांय मांन देदलों वोरदान वापरीन पेअलांम-पेअलांअ तुमनेंह ख्रीस्ताअ बाबोताअ गोठ आखनारो आंयज आथो। जेंहकींअ पायापेअ बीहरा लोक बांदताह, तेंहकींअ फाचलांअ नेअ बीहराहां तुमनेंह ख्रीस्ताअ बाबोताम वादारे हीकव्यों। जेंहकींअ बांदनारों दोरेक मांहुंअ तों केल्लो माल वापरेह तीयाअ कालजी राखेह, तेंहकींअ ख्रीस्ताअ बाबोताम हीकवुअनारों दोरेक मांहुंअ तों काय हीकवेह तीयाअ कालजी राखांअ जोजे। 11 जेंहकींअ लोक बोंगलो बांदांअ खातुर एकुज पायो टाकी सेकताह, तेंहकींअ आमां लोकाहांन एकुज गोठ, मोंजे, ईसु ख्रीस्तुअ बाबोताअ गोठुज दीअ सेकताह। 12 आने लोक होनो, चांदी, ने कींमती ढोगळा जेंहडा कींमती ने नांय बोले एंहडा माल वापरीन पायापेअ बोंगलो बांदी सेकताह। नेता, लाकळें ने पाराअ जेंहडा कींमोतु वोगुराअ ने बोले एंहडा माल वापरीन बी ते बोंगलो बांदी सेकताह। 13 फाचलांअ नेअ ईं चोख्खों देखाय आवीअ का, बोंगलो बांदांअ खातुर तीयाहां केल्ली जातीअ माल वापरुअला। तेंहकींअज, जांहांअ लोक पोरमेहेराअ हाचाय बीहराहांन हीकवे, तांहांअ फाचलांअ नेअ ईं चोख्खों देखाय आवीअ का, केलल्या गोठ्या तीयाहां हीकवुअल्या। पोरमेहेर लोकाहांअ नीयाय कीअ तीदीह तो तों चोख्खों देखावी दीअ। 14 बोंगलाम आग लागे तांहांअ खोबुर पोळीअ का, बांदनाराहां सोताअ कामाम बोले नांय एंहडा माल वापरुअला का बोले एंहडा माल वापरुअला। तेंहकींअज, पोरमेहेर आमांअ नीयाय कीअ तांहांअ खोबुर पोळीअ का, आमां बीहराहांन कींमती आने वादारे टीके एंहडा बोद देदा का नांह। जो बांदनारांह बोंगलो बांदांअ खातुर बोले नांय एंहडा माल वापर्या वेरीअ ता, तीया बांदनाराल हारो बोदलो मीलीअ। तेंहकींअज, जो आमां बीहराहांन कींमती आने वादारे टीके एंहडा बोद देदा वेरीअ ता, पोरमेहेर आमनेंह हारो बोदलो दीअ। 15 पेन जो आमां देदला बोद कींमती आने वादारे टीके एंहडा नांय वीअ ता, आमनेंह तीयाअ बोदलो नांह मीलनारो। पोरमेहेर आमनेंह नोरकाम जाता ता वाचावी लीअ। एखलो ओज लाब आमनेंह मीलीअ। तांहांअ आमांअ हालोत, आगीम चाललायन जेअ वाचाय जानारा मांहांअ हालोताअ होच वीअ।
16 तुमां पोरमेहेराअ मोंदीर हाय आने पोरमेहेराअ आत्मा तुमांअ माज वोहती केअहे तों तुमां नोक्कीज जांअतेंह। 17 मोंजे ईत केरा का, जो केडों बी मोंडोळाम फाट-फुट पाळीन पोरमेहेराअ मोंदीराअ नास केरांअ कोसीस कीअ ता, पोरमेहेर तीया मांहांअ नास कीअ। काहाका, पोरमेहेराअ मोंदीर पोवीतोर हाय आने तों मोंदीर ता तुमां सोतेज हाय। 18 तुमां सोताल ठोगते मां! तुमाहांमेनेअ जों केडों ख्रीस्तुपेअ वीसवास नांय केअनारा लोकाहांअ धारांअ पोरमाणे सोताल ओकलीवालों धारतों वीअ ता, तों पोरमेहेराअ धारांअ पोरमाणे ओकलीवालों बोंणांअ खातुर बीहराहांअ आगलांअ मुरखों बोंणे। 19 काहाका, ख्रीस्तुल नांय माननारा लोकाहांअ गीयान पोरमेहेराअ नोजराम मुरखाय हाय। ईयु बाबोताम पोवीतोर लेखाणाहांम एंहकींअ लेखलों हाय का,
“जे सोताल ओकलीवाला धारताह,
तीयाहांन पोरमेहेर तीयाहांअ हुच्यारीकींअज पाळी टाकेह।” 20 फाचों पोवीतोर लेखाणाहांअ बीहरी एक जागे लेखलों हाय का,
“पोरमेहेर जांअहें का, जे सोताल ओकलीवाला धारताह,
तीयाहांअ दोलील्या आने वीचार बी नोककामा हाय।” 21 तीयाअ लीदे, तुमाहांमेनेअ केडों बी, तुमांअ ख्रीस्ती आगेवानुंहमेर्याअ केडाअ बी बाबोताम ओभीमान नांय केअ। पोरमेहेरांय तुमांअ लाबुअ खातुरुज आमांअ जेंहडा आगेवान तुमनेंह देदाह। 22 तो हातींअ आंय पावुल वेअ, का आपोल्लो वेअ, का पीतोर वेअ, का दुन्या वेअ, का जीवोन वेअ, का मोत वेअ, का आमीर्याअ सोमोयाम बोंणनार्या बाबोत्या वेअ, का भोवीस्यांम बोंणनार्या हाय ते बाबोत्या वेअ, बादों तुमांअ फायदाअ खातुरुज पोरमेहेरांय देदोंह। आने बादों तुमांअज हाय। 23 पेन तुमां सोते ख्रीस्तुअ हाय, आने ख्रीस्त पोरमेहेराअ हाय।