4
मालीखाअ खास चेलाहांअ सेवा
1 मोंजे, बादाहांअ आमनेंह खाली ख्रीस्ताअ सेवा केअनारा आने पोरमेहेरांय आमी लोकाहांअ आगलांअ खोलीह ते हाचाय जाहेर केअनारा जोवाबदार कारभारी गोंणांअ जोजे। 2 आने आमांअ जेंहडा कारभारींअ ता, सोताअ सेटाल ईमानदार वेरांअ जोरुल हाय। ओ गुण बादा कारभारींहम वेरांअ जोजे एंहडी बादा लोकाहांअ आस्या रेहे। 3 मोंजे, आंय सोताअ काम ईमानदार रीईन कीअहुं का नांह तीया बाबोताम तुमां का मांहांहांअ केल्लों बी कोरोट गोंवें तो चुकादो दे, तीयाअ मांन काय पोळली नांह। आने तीयाअ आंय सोते बी चुकादो नांह देतो। 4 मांयुं काय बी खोटों नांह केअयों एंहडोंज मांअ जीवुम लागेह। तेबी मांअ ईमानदारीअ एज साबीती नांह। मांअ नीयाय कीईन आंय ईमानदार हाय एंहडो चुकादो देनारो ता मालीखुज हाय। 5 तीयाअ लीदे, नोक्की केअलो सोमोय आवे तीयाअ पेअलांअ, मोंजे का, मालीख ईसु फाचो आवे तीयाअ पेअलांअ, तुमां केडाअ बी बाबोताम चुकादो मा देतें। मालीख आवीअ तांहांअ तो, आमी जे आंदाराम दोबल्या बाबोत्या हाय, तीयुहुंन जाहेराम लावीअ, आने मांहांहांअ मोनाहांअ सुपा ईरादा बी उगाळा पाळीअ। तांहांअज पोरमेहेराअ दोरेक सेवोकुल जोतीअ साबासी मीलांअ जोजे तोतीअ साबासी तीयाल पोरमेहेरापेनेअ मीलीअ। 6 पावु-बोंअयुहुं, आंय जों आखतो रीयोह तीयाकींअ तुमनेंह लाब मीले तीयाअ खातुर मांयुं मांअ ने आपोल्लोअ दाखलो देदोह, ईयाअ खातुर का, “पोवीतोर लेखाणाहांम जों लेखलों हाय तीयाअ होदबार मा जाहा!” एंहडी आखाअती गोठीअ ओर्थो तुमां आमांअ जीवोनाहांमनेअ हीकी ला। तांहांअ, तुमां तुमांअ एक आत्मीक आगेवानाअ वेल तांयन बीहरा आत्मीक आगेवानुल उतावी नांय पाळाह आने चेकलाय नांय जाहा। 7 तुमां बीहराहांअ केअता चोळ्यातें हाय एंहकींअ तुमां धारतेंह का? पोरमेहेरांय तुमनेंह नांय देदों वीअ एंहडों तुमाहांपेअ काय बी हाय का? तुमाहांपेअ जोंबी हाय तों बादों ता पोरमेहेरांयज देदों वीअ ता, तों बादों तुमां सोतेज मीलव्यों वीअ एंहडों ओभीमान काहा केअतेंह?
8 तुमनेंह आत्मीक रीते जों जोजे तों बादों तुमां एगुंहवार्योंअ मीलवी लेदोंह एंहकींअ तुमां धारतेंह का? पोवीतोर आत्मा देहे तें बादें वोरदानें तुमां एगुंहवार्येंअ मीलवी लेदेंह एंहकींअ तुमां धारतेंह का? aआने आमनेंह सोळीन तुमां राजा बोंणी गीयेंह एंहकींअ बी तुमां धारतेंह का? तुमां राजा बोंणी जा एज मांअ मोर्जी हाय। तांहांअ आमां बी तुमांअरी राज कीअहुं। 9 ओमुक वोखत मांन एंहडों लागेह का, पोरमेहेरांय आमनेंह मालीखाअ खास चेलाहांन लोळायुम तेराअला केदीहींअ होच बोंणाव्याह, का जीयाहांन लोकाहांअ आगलांअ माय टाकांअ खातुर जीतला मांहांअ आरीम सेवुट राखीन लीअ जातेंह। आने मांन एंहडों बी लागेह का, आमां आखी दुन्यामेर्याअ लोकाहांअ ने होरगाअ दुताहांअ आगलांअ तामासोज बोंणी गीयाह।
10 आमां ख्रीस्तुल ओरपोण वेअला हाय तीयाअ लीदे आमां मुरखांअ होच लागताह। पेन तुमां धारतेंह का, ख्रीस्ताअ आर्याअ तुमांअ सोबोंदुअ लीदे तुमां गीयानी हाय। आने आमां नोबला हाय पेन तुमां ताकोतावालें हाय! तुमां नांवांअतें हाय पेन आमां कींमोतु वोगुराअ हाय! 11 आज दीह लोगुंअ खुब वोखत आमां पुखा-फांअप्या रीयाह। आने आमाहांपेअ पुरतें पोतळें बी नांय आथें। आने खुब वोखत आमां मार बी खादोह। आने आमांअ सोताअ कोएं-बांएं बी नांह। 12 आमां आमांअ आथाहांकींअ मेहनोत-मोजरी कीईन जीवताह। आमांअ नींदा केअनाराहांन आमां आसीरवाद देताह। लोक आमांअ सोतावोणी केअताह ते आमां वेठी लेताह। 13 जांहांअ मांहेंअ आमांअ बाबोताम खोटों आखतेंह, तांहांअ आमां तीयाहांन बागेनेअज जोवाब देताह। तेबी लोकाहांअ नोजराम आमां दुन्याअ उकळाअ होच बोंणी गीयाह। आने आज दीह लोगुंअ तीयाहांअ नोजराम आमांअ गोंणती कुटाराअ ओतीअज हाय।
14 ए बादया गोठ्या आंय तुमनेंह नाजवावांअ नांह लेखतो, पेन मांअ मेराला आत्मीक पोयराहांअ तोरीके तुमनेंह चेतवांअ लेखुंह। 15 काहाका, ख्रीस्तुअ बाबोताम तुमनेंह हीकवुअनारा बीहरा मास्तोर दोह हाजार वेअ तेबी, आंय एखलोज तुमांअ बाहको हाय। b काहाका, ख्रीस्त ईसुअ आर्याअ तुमांअ जोळाणुअ लीदे आंय तुमनेंह हारी गोठ जाहेर कीईन तुमांअ बाहको बोंण्योह! 16 तीयाअ लीदे, आंय तुमनेंह कालावाला कीअहुं का, आंय जेंहकींअ जीवुंह तेंहकींअज तुमां बी जीवा!
17 ईयु बाबोताम तुमनेंह मोदोत केरांअ खातुरुज, मांयुं तीमोथील तुमांअहीं मोकल्योह। तो मांअ सोताअ पोयरो वेय एंहकींअ आंय तीयापेअ माया राखुंह। तो ईमानदारी रीते मालीखाअ सेवा केअहे। ख्रीस्त ईसुअ आर्याअ मांअ जोळाणुअ लीदे जों जीवोन आंय जीवुंह, तीया बाबोताम तो तुमनेंह ईत केरावीअ। मांअ जीवांअ रीत ता, दोरेक ख्रीस्ती मोंडोळाम आंय जो बोद दीहुं, तीया पोरमाणेज हाय। 18 मांन खोबुर हाय का, आंय तुमांअहीं नांयज आवुं आने तुमांअ बोदाअ बाबोताम तुमनेंह ठोपको नांयज द्युंव एंहकींअ धारीन, तुमांअमेर्याअ थोळाक ओभीमानी बोंणी गीयाह। 19 पेन मालीखाअ मोर्जी वीअ ता, आंय तुमांअहीं माहरीज आवेंह, आने तांहांअ हीअ लेहें का, ते ओभीमानी लोक खाली मोडया-मोडया गोठ्या ओताअज केअताह, का हुदींअज तीयाहांपेअ पोरमेहेराअ ताकोत हाय। 20 काहाका, लोकाहांअ जीवोनाम पोरमेहेर राज केअहे तों ता, ते जों आखताह तीयाकींअ नांय, पेन पोरमेहेराअ ताकोताकींअ ते जों केअताह तीयाकींअज देखाय आवेह। 21 जो तुमां मांअ आखल्या पोरमाणे नांय चालाह ता, आंय तुमांअहीं आवीन तुमनेंह सीक्सा केअहें। जो तुमां मांअ आखल्या पोरमाणे चालाह ता, आंय मायालु ने मीठा सोबावे तुमांअहीं आवेंह। तुमांअ काय मोर्जी हाय?