5
ख्रीस्ती मोंडोळाम नीती वोगुराअ वोरतोन चालवी मा लेतें!
1 ओमुक लोकाहीं मांन खोबुर देदीह का, तुमांअ मोंडोळाम नीती वोगुराअ वोरतोन चाली रीयोंह! एगांह ता सोताअ बाहकाअ राखली थेअयुलुज राखीह। एंहडी खाराब बाबोत ता हाचा पोरमेहेराल नांय ओअखुअनारा लोकाहांम बी नांय वेअती वीअ। 2 तुमांअ मोंडोळाम एंहडों चालेह तेबी तुमां केंहकींअ ओभीमान कीअ सेका? ए ता खुब ओपमानुअ गोठ हाय! तुमांअ ता दुखी वेरांअ जोजत्लों, आने एंहडों खोटों काम केअनाराल तुमांअ सोंगोतुमनेअ a काडी थोवांअ जोजत्लों। 3 आंय सोरीलाअ रीते bतुमांअरी नांह तेबी, मोनाअ रीते cता तुमांअरीज हाय। तीयाअ लीदे, आंय तींहीं तुमांअरीज हाजोर वीअ तेंहकींअ होमजीन मांयुं, एंहडों खोटों काम केअनाराल मांअ चुकादो दीईज देदोह। 4-5 आने मांयुं एंहडों नोक्की केअयोंह का, मालीख ईसुंय तुमनेंह देदला आदीकाराकींअ तुमां टोलवाअहा तांहांअ, आंय बी मोनाअ रीते तुमांअरीज रेहें। आने तांहांअ आपुअ मालीख ईसुअ ताकोत तुमाहांपेअ वेअता तीया मांहांअल सेतानाअ आथाम dतुमांअ होपी देवुलोंअ। तांहांअ सेतान तीया मांहांअ सोरीलाल रीबावीअ आने तों मांहुंअ सोताअ खोटा कामुअ खातुर दुखी वीईन तों सोळी दीअ। हातींअ तीयाअ आत्मा, मालीख ईसु फाचो आवीअ तीदीह, e वाचाय जाय।
6 तीया मांहांअरी तुमांअ वेहवार आजी चालुज हाय तेबी तुमां ओभीमान राखतेंह तों बोराबोर नांह। तुमां जांअतेंहज का, मोगलुअला बादा नोटाल फुलवी देनारा थोळाकुज खोमीराअ होच, तीया एकुज मांहांअ पाप आखा मोंडोळाल बीगाळी टाकीअ। 7 तीयाअ लीदे, मोगलुअला नोटाल फुलवुअनारा खोमीराअ होच जों खाराब मांहुंअ हाय, तीयाल तुमांअ मोंडोळामनेअ काडी थोवा, ईयाअ खातुर का, जेंहकींअ तुमां खोमीरा वोगुराअ नोवा मोगलुअला नोटुअ होच हारें हाय तेंहकींअ खोरेखोर हारी चाल-चोलगोतीवालें रांअ चालुज राखा। काहाका, पास्का तेहवारुपेअ चोळवाअनारा घेटाअ बोचाअ भोगुअ होच ख्रीस्तुंह सोताअ जीवुअ भोग दीईज देदोह। 8 तीयाअ लीदे, आपुंह पोरमेहेराल पुरी रीते होपाअला लोकाहांअ तोरीके जीवजी! जेंहकींअ येहुदी लोक तो तेहवार खोमीरा वालो जुनो मांडो खायन नांय, पेन खोमीरा वोगुराअ ताजो मांडो खायन उजवुअत्ला, तेंहकींअ आपुंह पाप आने खोटाय सोळी दीईन चोख्खा मोनाकींअ जीवजी आने पोरमेहेराअ हाचायु पोरमाणे चालजी!
9 मांयुं एक कागलाम तुमनेंह एंहडों लेखलों का, नीती वोगुराअ वोरतोन राखनारा लोकाहांअरी वेहवार मा राखतें। 10 तांहांअ तों लेखांअ ओर्थो एंहडो नांय आथो का, सीनालों केअनारा, का लोब राखनारा, का लुटनारा, का मुरती पुंजा केअनारा लोक जे ख्रीस्तुपेअ वीसवास नांह राखता तीयाहांअरी तुमांअ वेहवार नांय राखुलोंअ। काहाका, तेंहडा लोकाहांन टाली टाकांअ वीअ ता, ईयु दुन्यामनेअज तुमांअ नींगी जांअ पोळे। 11 पेन तों लेखांअ ओर्थो एंहडो आथो का, जें सोताल वीसवासी पावुह का बोंअहीं आखावीन बी सीनालों केअतेंह, का लोब राखतेंह, का मुरतींअ पुंजा केअतेंह, का बीहराहांअ नींदा केअतेंह, का साकतेंह, का लुटतेंह, तीयाहांअरी काय बी वेहवार मा राखतें आने एंहडा मांहांहांअरी बोहीन खातें बी मा। 12-13 मोंडोळाम नांह तेंहडा लोकाहांअ नीयाय केरांअ काम मांअ नांह। तीयाहांअ नीयाय ता पोरमेहेरुज कीअ। पेन जे मोंडोळाम तुमांअरी हाय, तीयाहांअ नीयाय ता तुमांअज केरांअ पोळेकने? तीयाअ लीदे, पोवीतोर लेखाणाहांम जेंहकींअ लेखलों हाय तेंहकींअ केरा: “तीया खाराब काम केअनाराल तुमांअ सोंगोतुमनेअ f काडी थोवा!”