6
आर्याअ वीसवास्याअ वीरुद कोरोटाम केस मा केअतें!
1 तुमाहांमेनेअ केडाअ बी, बीहरा वीसवास्यांअरी केल्ली बी जातीअ भानगुळ वेअ ता, तीयाअ नीकाल लावांअ खातुर तो बीहरा ख्रीस्तींअहीं जांअ बोदले खेरा पोरमेहेराल नांय ओअखुअनारांअहीं जांअ मोर्जी राखेह ते खुब नाज आवे एंहडी गोठ हाय। a 2 आपुंह ख्रीस्ती लोक ख्रीस्तुपेअ वीसवास नांय केअनारा लोकाहांअ नीयाय केअनारा हाय तीयाअ तुमनेंह खोबुर नांह का? जो तुमां ख्रीस्तुपेअ वीसवास नांय केअनारा लोकाहांअ नीयाय केअनारें हाय ता, तुमांअ नीसमुरीअ ना जेंहडी बाबोतीहींअ नीकाल लावांअ बी तुमां लायोक नांह का? 3 आपुंह होरगाअ दुताहांअ बी नीयाय केअनारें हाय तों तुमां नांह जांअतें का? तांहांअ ईयु जीनगीअ लागती-वीअगुअती बाबोतीहींअ नीकाल आपुंह नोक्कीज लावी सेकतेंह। 4 मोंजे, तुमांहम एंहडी बाबोतीहींअ भानगुळ्या उब्या वेअत्याह तांहांअ, जे ख्रीस्ती वीसवासी नांह bएंहडा जोजुंअहीं नीयाय केरावांअ तुमां काहा जातेंह? 5 तुमनेंह नाजवावांअ खातुरुज आंय एंहकींअ आखुंह। वीसवास्या-वीसवास्यांअ नीसमें जे भानगुळ्या पेदा वेअत्याह तीयुहुंअ नीकाल लावे एंहडो ओकलीवालो वीसवासी c एक बी तुमांअ मोंडोळाम नांह का? 6 एक ख्रीस्ती बीहरा ख्रीस्तीपेअ केस केअहे ओतोंअज नांय पेन जे वीसवासी नांह तेंहडांहन तीया केसुअ नीकाल केरावेह ते, कोतीअ नाज आवे एंहडी गोठ हाय!
7 तुमांहम एक-बीहराअरी भानगुळ्या हाय तीयाकींअ ईं देखाय आवेह का, सेतानांय तुमनेंह पुरी रीते हारवी देदेंह। मोंडोळामेर्योअ केडो बी वीसवासी तुमांअ खोटों केअहे तांहांअ तों तुमां काहा नांह वेठी लेतें? तो तुमनेंह ठोगेह तांहांअ तों बी तुमां काहा नांह वेठी लेतें? तों तुमांअ वेठी लांअ जोजे! 8 पेन होकीकोतुम जों बोंणेह तों ता ईं हाय का, तुमांज बीहराहांअ खोटों केअतेंह आने तीयाहांन ठोगतेंह। तों ता खाराबुज हाय। पेन, तुमां सोताअ ख्रीस्ती पावु-बोंअयुंअज खोटों केअतेंह आने तीयाहांन ठोगतेंह, तों ता तीयाअ केअता बी वादारे खाराब हाय।
तुमांअ सोरीलुंहन पोरमेहेराअ मोडायाअ खातुर वापरुअजा!
9 खोटों केअनाराहांन पोरमेहेराअ राज्याअ आसीरवाद d नांय मीले तीयाअ तुमनेंह खोबुर नांह का? ठोगाय मा जातें! खाराब रीते वोरतुअनारांहन, का मुरतींअ पुंजा केअनाराहांन, का सीनालों केअनाराहांन, का पोयसाअ खातुर बीहरा आदमीहींन सोताअरी सांवसार केरांअ देनारा आदमीहींन, का बीहरा आदमींअरी सांवसार केअनारा आदमीहींन, 10 का चोरी केअनाराहांन, का लोब राखनाराहांन, का साकल्यांहन, का बीहराहांअ नींदा केअनाराहांन, का लुटनारांहन, पोरमेहेराअ राज्याअ आसीरवाद e नांय मीले। 11 तुमाहांमेनेअ थोळेंक ता, पेअलांअ एंहडेंज आथें। पेन आमी पोरमेहेरांय तुमांअ पाप तुवी टाक्याह, आने तुमां पोरमेहेराल पुरी रीते ओरपोण वेअला fलोक बोंणी गीयाह, आने मालीख ईसु ख्रीस्तुंह gआने आपुअ पोरमेहेराअ पोवीतोर आत्मांय hतुमांअ भोलायाअ खातुर जों केअयोंह तीयाअ लीदे, पोरमेहेरांय तुमनेंह गुना वोगुराअ जाहेर केअयाह।
12 तुमाहांमेनेअ केडों एंहकींअ आखे का, “मांअ सोरीलुकींअ गोंवें तों केरांअ मांन सुट हाय।” तांहांअ आंय तीयाल आखुंह, “तोअ आखुलोंअ बोराबोर हाय। पेन आपुंह जों केअतेंह, तों बादोंज आपुअ भोलायाअ खातुर नांह।” बीहरों केडों एंहकींअ आखे का, “जों केरांअ पोरमेहेरांय ना नांह पाळी, तों बादों केरांअ मांन सुट हाय।” पेन आंय तीयाल बी आखुंह, “आंय ता केल्ली बी खाराब मोर्जीअ, का होंवांयुंअ गुलाम बोंणनारो नांह।” 13 तुमाहांमेनेअ बीहरों केडों एंहकींअ आखे का, “सांवसार सोरीलाअ खातुर आने सोरील सांवसारुअ खातुरुज हाय। मोंजे, खाराब रीते आपुंह सांवसार केअजी तेबी, आपनेंह आत्मीक रीते नुकसान नांह वेअनारों।” पेन आंय तीयाल बी आखुंह: “एगु दीह पोरमेहेर सांवसारुअ आने सोरीलाअ बेनुंअ नास कीअ।” पोरमेहेराअ एंहडी मोर्जी नांह का, आपुंह आपुअ सोरीलुंहन खाराब रीते सांवसार केरांअ खातुर वापरुअजी। पेन तीयाअ एंहडी मोर्जी हाय का, आपुंह आपुअ सोरीलुंहन मालीख ईसुअ सेवा केरांअ खातुर वापरुअजी। आपुअ सोरीलाहांपेअ ओमोल चालवुअनारो ता मालीख ईसुज वेरांअ जोजे। 14 आने जेंहकींअ पोरमेहेरांय आपुअ मालीख ईसुल मोअलामेनेअ जीवतो उठव्योह, तेंहकींअ तो आपुअ सोरीलुंहन बी सोताअ ताकोताकींअ मोअलामेनेअ जीवतें उठवीअ। 15 तुमनेंह नोक्कीज खोबुर हाय का, तुमांअ सोरीलें ख्रीस्तुअ हाय। तीयाअ लीदे, वेस्याअरी सांवसार केरांअ खातुर आपुअ सोरीलुंहन ख्रीस्तुपनेअ लीअ लेजी तों बोराबोर नांहज। 16 तुमां नोक्कीज जांअतेंह का, वेस्याअरी सांवसार केअनारो तीयुअरी एकुज सोरीलाअ बोंणी जाहे। काहाका, सांवसार केअनारांअ बाबोताम पोवीतोर लेखाणाहांम बी एंहडों लेखलों हाय का, “आदमी आने बाय iएक सोरीलाअ बोंणी जाय।” 17 पेन मालीखाअरी जोळाअनारों मांहुंअ तीयाअरी आत्मीक रीते एकुज सोरीलाअ jबोंणी जाहे।
18 खाराब रीते सांवसार मा केअतें! kईया पापुकींअ सोरीलाल जोतोंअ नुकसान वेअहे, तोतोंअ नुकसान बीहरा केल्ला बी पापुकींअ नांह वेअतों। पेन खाराब रीते सांवसार केरांअ lता तुमांअ सोरीलुंहन खुब नुकसान केअनारो पाप हाय। 19 तुमां नोक्कीज जांअतेंह का, तुमांअ सोरीलें पोवीतोर आत्माअ मोंदीर हाय। आने तो आत्मा तुमांअ माज वोहती केअहे। आने पोरमेहेरांय तो तुमनेंह देदोह। आने तुमांअ धोणी तुमां नांह। पेन पोरमेहेरुज तुमांअ धोणी हाय। 20 पोयसा दीईन गुलाम वेचाअता राखनारा सेटुअ होच तुमनेंह सोताअ लोक बोंणावांअ खातुर पोरमेहेरांय तीयाअ पोयराल सोताअ रोगुत पाळीन मोरांअ मोकल्यो। आने तीयाअ मोतुकींअ पोरमेहेरांय तुमनेंह सोताअ लोक बोंणाव्याह। तीयाअ लीदे, तुमांअ सोरीलुंहन पोरमेहेराअ मोडायाअ खातुर वापरुअजा!