7
ख्रीस्ती वोराळाअ बाबोताम हीकामोण
1 तुमां मांअपेअ लेखला कागलाम जे बाबोत्या तुमां फुचल्या तीयाअ आमी आपुंह चारचा केअजी! तुमांअ लेख्या पोरमाणे, आदमी बायाअरी सांवसारुअ सोबोंद नांयज बांदे तों तीयाअ खातुर हारोंज हाय। a 2 पेन खुब मांहेंअ ओनुती रीते सांवसार केअतेंह। तीयाअ लीदे, आंय एंहडी सालाह दीहुं का, दोरेक आदमीअ सोताअ कोअवाली रे ने दोरेक बायाअ सोताअ आदमी रे।
3 आदमी सोताअ कोअवालीअरी सांवसारुअ सोबोंद राखांअ ना नांय पाळे, आने एंहकींअज कीईन कोअवाली बी सोताअ कोअवालाअरी तो सोबोंद राखांअ ना नांय पाळे। 4 एखली कोअवालील सोताअ सोरीलुपेअ होक हाय एंहडों नांह। पेन तीयुअ कोअवालाल बी तीयुअ सोरीलुपेअ होक हाय; तेंहकींअज कीईन एखला कोअवालाल सोताअ सोरीलुपेअ होक हाय एंहडों नांह। पेन तीयाअ कोअवालील बी तीयाअ सोरीलुपेअ होक हाय। 5 तीयाअ लीदे, कोअवालाअ ने बायाअ एक-बीहराअरी सांवसारुअ सोबोंद राखांअ ना नांय पाळांअ जोजे! जो बेनुंअ राजी-खुसी वीअ ता, वादारे सोमोय पोरमेहेराल ओरुज केरांअ खातुर तें थोळाक वोखताअ खातुर सांवसारुअ सोबोंद बोंद राखी सेके। हातींअ फाचें तें बेनुं एक-बीहराअरी तो सोबोंद चालु राखे! काहाका, ईयु बाबोताम सोताअ मोनुंहन काबाम राखांअ तीयाहांअ ताकोत नांय वीअ ता, सेतान तीयाहांन बीहरा केडाअरी सांवसार केरांअ लालचावीअ। b 6 थोळाक सोमोयाअ खातुर सांवसारुअ से सेटे रांअ तुमनेंह राज्या दांअज आंय एंहकींअ आखुंह। तुमांअ तेंहडों केरांअज जोजे एंहडो आंय हुकोम नांह केअतो। 7 बादें ख्रीस्ती मांहेंअ मांअ होच सोळेंज रे एंहडी मांअ ता मोर्जी हाय। पेन आपुंह बादें हारकें नांह। पोरमेहेरांय थोळाकाहांन वोराळ कीईन रांअ वोरदान देदोंह आने बीहराहांन कुवारें रांअ वोरदान देदोंह।
8 आमी आंय, जीयाहां वोराळ नांह केअयों तेंहडा मांहांहांन cआने जीया कोअवालाहांअ कोअवाल्या मोय गीयाह आने जीयु कोअवालींअ कोअवाला मोय गीयाह तीयाहांन dएंहकींअ आखुंह, तें मांअ होच सोळेंज रे तों तीयाहांअ खातुर हारों हाय। 9 पेन तें सोताअ मोनुंहन काबाम नांय राखी सेके ता, तें वोराळ कीअ ले! एंहकींअ कीईन तें सांवसार केरांअ सोताअ मोर्जी पुरी कीअ सेके। सोळें रीईन जीव बाल्या केअ तीयाअ केअता, वोराळें कीअ ले तोंज तीयाहांअ खातुर हारों हाय।
10 आमी आंय जीया ख्रीस्तीहीं वोराळ केअयोंह तीयाहांन हुकोम नांह केअतो, पेन पोरमेहेरांय देदलो हुकोम आखुंह: कोअवाली सोताअ कोअवालाअ से सुटी नांय पोळांअ जोजे! 11 पेन जो ते तीयाअरीनेअ सुटी पोळे ता, तीयुअ बीहरों कोअ नांय केरांअ जोजे। नेता सोताअ कोअवालाअरी होमजी जायन फाची जोळाय जांअ जोजे। आने आदमीअ बी सोताअ कोअवालील फारगुती नांय दांअ जोजे।
12 आने आमी जें बाकी रीयेंह तीया ख्रीस्तींअ खातुर मालीख नांह आखतो, पेन आंय आखुंह, एक ख्रीस्ती आदमीअ कोअवाली ख्रीस्ती वीसवासी नांय वीअ आने ते तीयाअरीज रांअ राजी वीअ ता, तो तीयुल फारगुती नांय दे। 13 तेंहकींअज कीईन, एक ख्रीस्ती बायाअ कोअवालो ख्रीस्ती वीसवासी नांय वीअ आने तो तीयुअरीज रांअ राजी वीअ ता, ते तीयाल सोळी नांय दे। 14 काहाका, वीसवासी नांह एंहडा कोअवालाल तीयाअ वीसवासी कोअवालीअ लीदे पोरमेहेरांय सोताअ लोकाहांमेर्योअ बोंणावी देदोह। आने वीसवासी नांह एंहडी कोअवालील तीयुअ वीसवासी कोअवालाअ लीदे पोरमेहेरांय सोताअ लोकाहांमेरीअ बोंणावी देदीह। नेता तीयाहांअ पोयरें पोरमेहेराअ खातुर एठें बोंणी जातें। पेन आमी ता पोरमेहेर तीयाहांन सोताअ लोकाहांमेर्येंअ गोंणेह। 15 तीयाअ लीदे, ख्रीस्ती बोंणीन हातींअ बी, तुं ख्रीस्तुल नांय माननाराअरी कोअवाली-कोअवाला तोरीके जीवांअ चालु राखो ता, तीयाकींअ तुं पोरमेहेराअ खातुर एठो नांह बोंणी जातो। तेबी, जो वीसवासी नांह तो कोअवालो तीयाअ वीसवासी कोअवालीअ से, नेता जे वीसवासी नांह ते कोअवाली सोताअ वीसवासी कोअवाला से जुदेंज पोळांअ मागतें वीअ ता, तीयाहांन जुदें पोळांअ देवुलोंअ। एंहडी बाबोताम वीसवासी पावुह का बोंअयुंहनरी रांअ का जुदा पोळांअ बेनाहांमेनेअ गोंवें तों केरांअ सुट हाय। काहाका, पोरमेहेराअ पोयरें एक-बीहराअरी सांतीम रे, तेज पोरमेहेराअ मोर्जी हाय। 16 ओ ख्रीस्ती कोअवाली! ख्रीस्ती नांह तेंहडो तोअ कोअवालो तोअ लीदे पापाहांअ सीक्सामेनेअ वाचाय का नांय, तों तुं जांअती नांह। ओ ख्रीस्ती कोअवाला! ख्रीस्ती नांह तेंहडी तोअ कोअवाली तोअ लीदे पापाहांअ सीक्सामेनेअ वाचाय का नांय, तों तुं जांअतो नांह।
पोरमेहेराअ मोर्जी पोरमाणे जीवा!
17 मांअ ओतोंअज आखुलोंअ हाय का, तुमाहांमेनेअ दोरेक मांहुंअ सोमाजुम सोत-सोताल मालीखांय देदली हालातुअ पोरमाणे आने पोरमेहेरांय तीयाल सोताअ बोंणावांअ हादलों तांहांअ जीयु हालोताम तों आथों, तीयु हालोताम सोताअ जीनगी जीवे! बादा मोंडोळाअ लोकाहांन मांअ ओज नीयोम हाय। 18 दाखला तोरीके, पोरमेहेरांय एक मांहांअल सोताअ बोंणावांअ हादयों तीयाअ पेअलांअज तीया मांहांअ सुन्नोत वेअली वीअ ता, आमी तों तीयु सुन्नोतुअ नीसाणींहन दोबावांअ नांय कोसीस केअ। आने पोरमेहेरांय एक मांहांअल सोताअ बोंणावांअ हादयों तीयाअ पेअलांअ तीया मांहांअ सुन्नोत वेअली नांय वीअ ता, आमी तो सोताअ सुन्नोत केरावांअ नांय कोसीस केअ। 19 काहाका, एक मांहांअ सुन्नोत वीयी वीअ का नांय तीयाकींअ काय फेर नांह पोळतो। पेन तों मांहुंअ पोरमेहेराअ हुकोम पाले तेज खास गोठ हाय।
20 पोरमेहेरांय तुमनेंह सोताअ बोंणावांअ हादलें तांहांअ तुमां जीयु हालोताम आथें, तीयुज हालोताम जीवांअ चालु राखजा! 21 पोरमेहेरांय तुमनेंह हादलें तांहांअ जो तुमां गुलाम आथें ता, तीयाअ तुमां चींता मा कीअहा। तेबी, गुलामीमेनेअ सुटांअ तुमनेंह मोको मीले ता, तुमां सुटी जाजा! 22 पोरमेहेरांय तुमनेंह हादलें तांहांअ जो तुमां गुलाम आथें ता, ईत केरा का, आमी मालीखांय तुमनेंह सेतानाअ काबामनेअ सोळव्येंह। तेंहकींअज कीईन, पोरमेहेरांय तुमनेंह हादलें तांहांअ जो तुमां गुलाम नांय वेरी ता, ईत केरा का, आमी तुमां ख्रीस्तुअ गुलाम बोंण्येंह। 23 खुब मोडी कींमोत चुकवीन ख्रीस्तंह तुमनेंह सोताअ लोक बोंणाव्याह। तीयाअ लीदे, ख्रीस्तुपेअ वीसवास नांय केअनारा लोकाहांअ खाराब होंवांयुंअ तुमां गुलाम मा बोंणतें! 24 तीयाअ लीदे मेराला पावु-बोंअयुहुं, दोरेकुल जीयु हालोताम पोरमेहेरांय हादलों, तीयुज हालोताम रीईन तों पोरमेहेराअरी सोबोंद राखे!
कुवारी पोयरीहींअ आने रोंडेअ बायाअ बाबोताम हीकामोण
25 ख्रीस्ती कुवारांअ बाबोताम तुमां मांन जों फुचलों, तीया बाबोताम आमी आंय लेखुंह। ईयाहांअ बाबोताम आखांअ मालीखांय मांन काय बी हुकोम नांह केअयो। तेबी मालीखाअ दायाअ लीदे खातरीवाला मांहांअ तोरीके तीयाहांअ बाबोताम आंय मांअ सोताअ सालाह दीहुं। 26 आमीर्योअ आकरो सोमोय हेअता मांन लागेह का, आमीरीअ तुमांअ हालोतामुज तुमां रा तों तुमांअ खातुर हारों हाय। 27 जो तोअ कोअवाली वीअ ता, तीयुल सोळी थोवांअ कोसीस मा केअतो! आने जो तुं सोळो वीअ ता, कोअवाली राखांअ कोसीस मा केअतो! 28 पेन जो तुं वोराळ क्योव ता, तों पाप नांह। तेंहकींअज कीईन, ख्रीस्ती कुवारी पोयरी वोराळ केअ, तों बी पाप नांह। पेन वोराळ केअनाराहांन वोराळाअ कारोणे पेदा वेअनारें वादाराअ दुखें वेठांअ पोळीअ। सोळें रांअ तुमनेंह उफ दांअ मांअ ईरादो ओ हाय का, तीया दुखाहांमेनेअ तुमां वाचाय जा।
29 मेराला पावु-बोंअयुहुं, मांअ आखुलोंअ एंहकींअ हाय का, टुक सोमोयाम ख्रीस्त फाचो आवनारो हाय। e तीयाअ लीदे, जीयाहांअ वोराळ वीयोंह, f तें मालीखाल पुरी रीते ओरपोण वेअला मांहांहांअ तोरीके सोळें वेअ तेंहडा वोरते! 30 जें मोअलाअ फाचलांअ रोळनारें हाय, तें मालीखाल पुरी रीते ओरपोण वेअला मांहांहांअ तोरीके आनोंदुम वीअ तेंहडें वोरते! आने जें आनोंद केअनारें हाय, तें मालीखाल पुरी रीते ओरपोण वेअला मांहांहांअ तोरीके रोळतें वीअ तेंहडें वोरते! आने जीयाहां वोस्तु वेचाअत्या लेदयाह, तें मालीखाल पुरी रीते ओरपोण वेअला मांहांहांअ तोरीके ते वोस्तु सोताअ नांह तेंहडें वोरते! 31 आने ईयु जीनगीअ वेहवारुअ कामुंहम भाग लेनारें, मालीखाल पुरी रीते ओरपोण वेअला मांहांहांअ तोरीके तीया कामुंहम चोटलें नांय वीअ तेंहडें वोरते! काहाका, ईयु दुन्याअ वोस्तु आमी जेंहडया हाय तेंहडया वादारे वोखत नांह रेनार्या।
32 तुमां चींता वोगुर रा एज मांअ मोर्जी हाय। तीयाअ लीदेज आंय ईं बादों लेखुंह। जों ख्रीस्ती मांहुंअ कुवारों हाय, तों मालीखाल केंहकींअ खुस राखुलोंअ तीयाअज वीचारुम रेहे। तीयाअ लीदे तों मालीखाअ काम केरांअ वादारे सोमोय देहे। 33 पेन जीया आदमींह वोराळ केअयोंह, तो सोताअ कोअवलील खुस राखांअ वीचारुम रेहे। तीयाअ लीदे, तीयाल ईयु दुन्याअ बाबोतीहींअ चींता रेहे। 34 एंहकींअ कीईन तीयाअ मोन बेनुं वेले वाटाय जाहे। तेंहकींअज कीईन, वोराळ केअया वोगुराअ बाय का कुवारी पोयरी मालीखाअ सेवा केरांअ बाबोतामुज चींता राखेह। काहाका, ते सोताअ सोरीलाल आने आत्माल मालीखालुज ओरपोण केरांअ मागेह। पेन वोराळ केअली बाय सोताअ कोअवालाल केंहकींअ खुस राखुलोंअ तीयाअ चींताम रेहे। तीयाअ लीदे, ते रोजर्याअ जीवोनाअ बाबोतीहींअ चींता राखेह। 35 ए बाबोत्या आंय तुमांअ भोलायाअ खातुरुज आखुंह, वोराळाअ बाबोताम तुमनेंह बांदाणुम राखांअ खातुर नांह। तुमां हाची रीते ने बोराबोर वोरता आने बीहरा केंहडापेअ बी धीयान देया वोगुर तुमां सोताल मालीखाअ सेवाअ खातुर होपी दा, तीयाअ खातुरुज आंय ईं बादों आखुंह।
36 साकुरपुळो केअलो वीअ तेंहडा लोकाहांअ बाबोताम आंय आखुंह, साकुरपुळो केअला आदमील एंहकींअ लागे का, सोते वोराळ लांबावी-लांबावीन, जीयु बायाअरी तीयाअ साकुरपुळो वीयोह तीयुल ओन्याय कीअ रीयोह, आने तीयाल कोअवाली वोगुर रेवाय नांय, वोराळ केरांअज पोळे एंहडों वीअ ता, तीयाअ मोर्जी पोरमाणे तें बेनुं वोराळ कीअ सेके। तींहमें काय पाप नांह। 37 पेन साकुरपुळो केअलो वीअ एंहडा आदमींह, जो आमी वोराळ नांयज केरुलोंअ एंहडो मोनाम पाको गाठ वाली लेदो वीअ, आने तीयाल वोराळ केरांअ उत्वाल नांय वीअ, आने तीयाल कोअवाली वोगुर चाली जाय एंहडों वीअ, आने तीयु पोयरील कुवारी तोरीकेज जालवी राखांअ सोताअ मोनाम नोक्की केअयों वीअ ता, तो तेंहकींअज केअ तों, तीयाअ खातुर हारों हाय। 38 मोंजे, जो आदमी सोताअरी साकुरपुळो केअली बायाअरी वोराळ केअहे, तो हारों केअहे। आने जो आदमी वोराळ नांह केअतो, तो वादारे हारों केअहे।
39 जांव लोगुंअ कोअवालो जीवतो वीअ तांव लोगुंअ तीयाअ कोअवाली तीयाअरी बांदाअली रेहे। पेन जो तो मोय जाय ता, तीयुल गोंवें तीया आदमीअ कोअ केरांअ सुट हाय। पेन तो आदमी बी ख्रीस्ती वेरांअ जोजे। 40 पेन ते रोंडेअ बाय बीहरों कोअ केअया वोगुर रे ता, ते वादारे सुखी रीअ एंहकींअ मांन लागेह। आंय एंहकींअ धारुंह का, एंहडी सालाह आंय पोवीतोर आत्माअ दोरवोणी पोरमाणेज दीहुं।