8
मुरतींहन चोळवुअलो मांडो खावुलोंअ का नांय खावुलोंअ?
1 ‘मुरतींहन चोळवुअलो मांडो खांअ जोजे का नांय खांअ जोजे?’ एंहकींअ तुमां मांन फुच्योंह। तीयाअ जोवाब देता आमी आंय आखुंह:
तुमाहांमेनेअ थोळेंक आखतेंह: ‘आपनेंह बादाहांन ईयु बाबोताम जाणकारी हाय।’ एंहडी जाणकारीकींअ ता मांहुंअ ओभीमानीज बोंणेह। पेन एक-बीहरापेरीअ मायाकींअ ता आपुंह आत्मीक रीते वादतेंह। 2 केडों बी एंहकींअ धारे का सोतापेअ बादी जाणकारी हाय, तों खोरेखोर तीयाअ जों जांणांअ जोजे तों हारकींअ नांह जांअतों। 3 पेन पोरमेहेर तीयापेअ माया राखनाराहांन ओअखेह।
4 तांहांअ मुरतींहन चोळवुअला मांडाअ बाबोताम आपुंह काय आखजी? तो मांडो आपुअ खांअ जोजे का? आपनेंह खोबुर हाय का, होकीकोतुम मुरतीम ता काय सोत नांह। आने आपनेंह ईं बी खोबुर हाय का, खेरो पोरमेहेर ता एकुज हाय। 5 थोळेंक मांहेंअ मानतेंह का, जुगामेनेअ आने तोरतीपेअ देव आने धोणी आखावनारा खुब हाय। 6 पेन आमां मानतेंह का, एकुज पोरमेहेर हाय जो आपुअ आत्मीक बाहको बी हाय। आने तीयांयज बादों होरज्योंह। तीयाअ लीदेज आपुंह हायाताम हाय। आने एकुज मालीख हाय, मोंजे, ईसु ख्रीस्त। तीयाअ मारफोतेज पोरमेहेरांय बादों होरज्योंह आने तीयाअ मारफोतेज आपनेंह कायोम टीकनारों जीवोन मील्योंह।
7 तेबी, ओमुक ख्रीस्तींहन ईयु बाबोताम खोबुर नांह। तीयाअ पोरीणामे, थोळेंक ख्रीस्ती मांहेंअ आमी लोगुंअ एंहडें टेवाय गीयेंह आने वीचारतें वीअ गीयेंह का, मुरत्या होकीकोतुम देवुज हाय। आने मुरतींहन चोळवुअलो मांडो खातीअ वोखत तीयाहांन लागेह का, तो मांडो होकीकोतुम खेरा देवुंअ पारसादुज हाय। मुरतींअ बाबोताअ हाचाय तें जांय नांह सेकतें तीयाअ लीदे तीयाहांन लागेह का, तो मांडो खायन तें एठें बोंणी जातेंह। 8 आपुंह जों खातेंह तीयाकींअ आपुंह पोरमेहेराअ नोजराम वादारे हारें नांह बोंणतें। आने आपुंह जो नांह खातें तीयाकींअ आपनेंह काय खोट नांह जाती। आने आपुंह जो खातेंह तीयाकींअ आपनेंह काय फायदो बी नांह वेअतो। 9 पेन मुरतींहन चोळवुअलो मांडो खांअ बाबोताम पोरमेहेरांय तुमनेंह जे सुट देदीह, तीयुकींअ तुमां, जीया लोकाहांन एंहडी पाकी खातरी नांह का तो मांडो खांअ पोरमेहेर तीयाल सुट दीअ का नांय, तीया लोकाहांन आत्मीक नुकसान नांय वेअ तीयाअ कालजी राखजा!
10 कादास एंहकींअ बोंणे का, एंहडो मांडो खांअ खोटों हाय एंहकींअ माननारों मांहुंअ, तो मांडो खांअ खोटों नांह एंहकींअ माननारा तोअ जेंहडा मांहांअल मुरतीअ मोंदीराम खाता देखे ता, मुरतील चोळवुअलो तो मांडो खांअ तीयाल बी नोक्कीज उफ मीली जाय। 11 आने एंहकींअ कीईन मुरतींहन चोळवुअलो मांडो खांअ बाबोताअ तोअ एंहडी “जाणकारीअ” लीदे, एंहडा मांहांअ आत्मीक नास वीअ का जीयाल वाचावांअ बी ख्रीस्त मोअयो। 12 आने जों केरुलोंअ खोटों हाय, एंहकींअ माननारा बीहरा ख्रीस्ती पावु-बोंअयुंहन तोंज केरांअ उफ दीईन तुं तीयाहांअ वीरुद पाप कीअहो। आने एंहकींअ कीईन तुं ख्रीस्तुअ वीरुद बी पाप कीअहो। 13 आंय जों खाहुं तीयाकींअ जो आंय आत्मीक रीते बीहरा ख्रीस्तीअ नास क्युंव ता, a एंहडो मांडो b आंय जीवुं तांव लोगुंअ फाचो कीदीह बी नांयज खांव। काहाका आंय बीहरा ख्रीस्तीअ आत्मीक रीते नास केरांअ नांह मागतो।