9
मालीखाअ खास चेलाअ होक आने फोरोज्या
1 मांअ मोर्जी पोरमाणे केरांअ मांन बी होक हायक्ने? आंय बी मालीखाअ खास चेलोज हायकने? आने मांयुं बी मालीख ईसुल देखलोकने? आने मालीखाअ खातुर मांयुं केअला कामुअ पोरीणामेज तुमां बी ख्रीस्ती बोंण्येंहकने? 2 बीहरें मांन मालीखाअ खास चेलो नांय माने तेबी, तुमांअ ता नोक्कीज मानांअज जोजे का आंय मालीखाअ खास चेलो हाय। काहाका, मांअ सेवाअ मारफोते ख्रीस्ती बोंणलें तुमां सोतेज आंय मालीखाअ खास चेलो हाय तीयाअ साबीती हाय।
3 आंय मालीखाअ खास चेलो नांह एंहकींअ मांअ बाबोताम आखनारांहन मांअ वाचावुम ईंज मांअ आखुलोंअ हाय। 4 मांअ कामुअ खातुर तुमांअ कोअ आवीन खांअ-पीयांअ मांन होक नांह का? 5 मांअ बी कोअवाली वेअती ता, पीतोर आने मालीखाअ बीहरा खास चेला, आने मालीखाअ पावुह जेंहकींअ सोताअरी सोत-सोताअ कोअवालींहन लीअ जाताह तेंहकींअ मांन बी मांअ कोअवालील सेवाम लीअ जांअ आने आमांअ जोरुलीहींअ खातुर तुमांहपनेअ पोयसाहांअ मोदोत मीलवांअ होक नांय रेतो का? 6 तुमां मालीखाअ बीहरा बादा खास चेलाहांअ बादया जोरुल्या पुर्या पाळतेंह तांहांअ, मांअ आने बारनाबाअ ओतोंअज आमांअ जोरुलीहींअ खातुर मेहनोत-मोजरी केरांअ पोळे का? ते मोदोत तुमांहपनेअ मीलवांअ आमनेंह बी होक हायकने? 7 केल्लो बी सोयनीक सोताअ खोरचे लोस्कोरुम सेवा दीअ का? केल्लो बी खेळुत सोताअ दाराख्साअ वाळीअ फोलवें नांय खाय का? केल्लो बी भारवाळ सोताअ घेटाहांअ दुद नांय खाय का? 8 मांअ सेवाअ खातुर तुमांहपनेअ पोयसाहांअ मोदोत मीलवांअ मांन जो होक हाय तीया बाबोताम होमजावांअ खातुर आंय मांहांअ ओनुभोवुअ दाखला ओताअज नांह देतो। पोरमेहेराअ नीयोमाम बी ईयु होकीकोतुल टेको मीलेह। 9 काहाका पोरमेहेरांय मोसेल देदला नीयोमाहांअ चोपळीम एंहडों लेखलों हाय का, “मोलांअ खातुर खोलाम चोळवुअला डोगरांअ मुंयांअरी गोळवें मा बांदतो!” तुमां वीचारा! एंहकींअ आखांअ फाचलांअ पोरमेहेराल डोगरांअ ओतीअज चींता हाय का? 10 नांह! खोरेखोर आमांअ बाबोताम बी पोरमेहेरांय एंहकींअ नांह आख्यों का? आंह, आमांअ बाबोतामुज तीयांय एंहकींअ आख्योंह। खेत खेळनारा आने ओनाज मोलनारा मोजुर पाकुअ भाग मीलवांअ आस्या राखताह। तेंहकींअज आमां ख्रीस्ती सेवोक बी जीयांयम सेवा केअताह ते लोक आमांअ जोरुल्या पुर्या पाळे एंहडी आस्या राखी सेकताह।
11 आमां तुमनेंह आत्मीक बाबोत्या देदयाह। तीयाअ बोदलाम आमांअ जीवोनाअ जोरुल्या तुमांहपनेअ मीलवुअजी तींहमें काय खोटों हाय? 12 तुमांहम सेवा केअनारा बीहरा सेवोकुंहन तीयाहांअ जीवोनाअ जोरुल्या तुमांहपनेअ मीलवांअ होक वीअ ता, आमांअ जीवोनाअ जोरुल्या तुमांहपनेअ मीलवांअ तीयाहांअ केअता आमनेंह वादारे होक नांह का? तेबी, आमां तीया होकु पोरमाणे तुमाहांपेअ मागणी नांह केअयी। पेन उलटों, आमां ख्रीस्तुअ बाबोताअ हारी गोठ फेलावांअ कामाम ओळचोण नांय बोंणजी तीयाअ खातुर, आमां बादों सोतेज वेठी लेदोंह।
13 तुमांअ नोक्कीज ईत केरांअ जोजे का, जे मोंदीराम सेवा केअताह, ते मोंदीराम ओरपोण केअल्या वोस्तु खाताह, आने जे वेदीअ आगलांअ सेवा केअताह, तीयाहांन वेदीपेअ चोळवुअला भोगुंहमनेअ भाग मीलेह। 14 तीयाज पोरमाणे, मालीखांय एंहडो हुकोम केअयोह का, हारी गोठ जाहेर केअनारांअ जीवोनाअ जोरुल्या, ते हारी गोठ माननारा लोक पुर्या पाळे।
15 तेबी, मांयुं ईया होकुंहमनेअ एक बी होकुअ लाब नांह लेदो। आने तीया होकुंअ लाब लांअ खातुर एंहकींअ लेखतो बी नांह। खोरेखोर ता, हारी गोठ उनाअनारांहपनेअ बोदलाम काय बी लेदा वोगुर हारी गोठ जाहेर केअता जो आनोंद मांन मीलेह तो काय बी लीईन गोमावी द्युंव तीया केअता, मोय जांअ आंय वादारे पोसोंद कीअहुं। 16 हारी गोठ जाहेर कीअहुं तींहमें ओभीमान राखांअ मांन काय होक नांह। ते जाहेर केरांअ ता पोरमेहेरांय होपली मांअ एक फोरोज हाय। हारी गोठ जाहेर नांय क्युंव ता, मांअ खातुर ते दुखाअ गोठ आखाय।
17 जो आंय सोताअ मोर्जीकींअ हारी गोठ जाहेर केअतो ता, तीयाअ मांन बोदलो मीलतो। पेन पोरमेहेरांय मांन ईं काम केरांअज पोसोंद केअयोह, आने आंय ता खाली तीयांय होपलों कामुज कीअहुं तीयाअ लीदे, मांअ मोर्जींअ सोवालुज पेदा नांह वेअतो। 18 तांहांअ मांन बोदलो काय मीलीअ? ओज का, हारी गोठ जाहेर केअता मांन जे होक मीलताह ते बादा जाता कीईन काय बी लेदा वोगुर आंय हारी गोठ जाहेर क्युंव।
19 आंय केडाअ बी दाबाअलो नांह तेबी, बोंणे तोताअ वादारे मांहांहांन ख्रीस्तुअहीं लावांअ खातुर मांयुं सोताल बादाहांअ गुलाम बोंणाव्योह। 20 येहुदींहम आंय सेवा केअत्लो तांहांअ तीयाहांन ख्रीस्तुअहीं लावांअ खातुर आंय बी तीयाहांअ धोरमाअ रीवाज पालत्लो। आंय नीयोम ाहांअ बांदाणुम नांह तेबी, ते नीयोम पालनारांहन ख्रीस्तुअहीं लावांअ खातुर आंय बी तीयाहांअ धोरमाअ रीवाज पालत्लो। 21 एंहकींअज कीईन जांहांअ आंय मोसेंय देदला नीयोम नांह पालनारा येहुदी जातीअ नांह तेंहडा लोकाहांम सेवा केअत्लो तांहांअ, तीयाहांन ख्रीस्तुअहीं लावांअ खातुर आंय बी येहुदीहींअ धोरमाअ रीवाज नांय पालत्लो। ईयाअ ओर्थो ओ नांह का, मांयुं पोरमेहेराअ नीयोम नांह पाल्यो। मांयुं एंहडों ईयाअ खातुर केअयों का, आंय ख्रीस्तुअ नीयोम पालुं।
22 ओमुक मांडो खावाय का नांह एंहडी सोंका राखनारा लोकाहांम aसेवा केअत्लो तांहांअ तीयाहांन ख्रीस्तुअहीं लावांअ खातुर, आंय बी तीयाहांअ होच बोंणी गेअलो। एंहकींअ कीईन जीया बी लोकाहांम आंय रीयोह, तीया लोकाहांन जे-जे बाबोत्या हाच्या लागतल्या ते मांयुं मांअ मोन मायन बी केअयाह, ईयाअ खातुर का केल्ली बी रीते बादाहांन आंय ख्रीस्तुअहीं लावी सेकुं। 23 हारी गोठीअ फेलावांअ खातुरुज ईं बादों आंय कीअहुं, ईयाअ खातुर का, तीयु गोठीअ मारफोते लोकाहांन मीलनारा आसीरवाद मांन बी मीले।
24 तुमनेंह खोबुरुज हाय का, होरीफायुम खुब मांहेंअ दोवळुअतेंह, पेन तीयाहांमेर्योंअ एकुज जीतेह आने ईनाम मीलवेह। तुमां बी होरीफायु रुपी ख्रीस्ती जीवोन एंहकींअ जीवा का, पोरमेहेरापेनेअ तुमनेंह बोदलो मीले। 25 होरीफायुम भाग लांअ तीयारी केअनारों दोरेक मांहुंअ कोळोक नीयोम पालीन तालीम लेहे। तों ता नास वीअ जानारों ईनाम मीलवांअ खातुरुज ओतीअ बादी मेहनोत केअहे। पेन आपुंह ता, कीदीह बी नास नांय वेअनारों ईनाम मीलवांअ खातुर कोळोक नीयोम पालीन ख्रीस्ती जीवोन जीवतेंह। 26 तीयाअ लीदे, ईनाम मीलवांअ ईरादो राखीन दोवळुअनाराअ होच आंय बी तेंहडोज ईरादो राखीन ख्रीस्ती जीवोन जीवुंह। आने आरी कुस्ती लोळनाराल बादाज मुकका लागे एंहकींअ ठोकनाराअ होच आंय बी ख्रीस्ती जीवोना रुपी कुस्ती बोराबोरुज लोळुंह। 27 आंय मांअ सोरीलाल कोळोक तालीम दीईन तीयाल मांअ वोसुम राखुंह। बीहराहांन हारी गोठ जाहेर केअनारो आंय सोतेज तीयु गोठीअ मारफोते मीलनारा आसीरवाद मीलवांअ लायकात गोमावी नांय द्युंव तीयाअ खातोरुज आंय एंहकींअ कीअहुं।