10
ईसरायेल लोकाहांअ दाखलापनेअ हीकामोण
1 मांअ पावु-बोंअयुहुं, खुब वोरसांअ पेअलांअ आपुअ आगलाअ डायाहांन उजाळाम जे ओनुभोव वेअला, ते आंय तुमनेंह ईत केरावांअ मागुंह। तीयाहांन बादाहांन पोरमेहेरांय वादलाअ खांबुकींअ वाट देखावली आने तीयाहांन हाचवुअलें aआने तीयाहां बादाहां चोमोत्काराअ रीते रातो दोरीयो उनखावी देदलो। 2 आने तें बादें मोसेअ चेलें बोंणांअ खातुर वादलाअ थुले चाल्यें आने तीयाहां बादाहां चोमोत्काराअ रीते दोरीयो उनखावी देदलो। b 3 आने तीयाहां बादाहां, पोरमेहेरांय तीयाहांन चोमोत्काराअ रीते पुरो पाळलो तोज मांडो c खादलो। 4 आने बादाहां, पोरमेहेरांय तीयाहांन चोमोत्काराअ रीते पुरों पाळलों तोंज पीणों dपीदलों; मोंजे का, तीयाहांअ आरी-आरीज जानारांह जों खोळकों पुरों पाळलों, तीया खोळकामनेअज तीयाहां तों पीणों पीदलों; आने तीयाहांअ आरी-आरी जानारो ता, ख्रीस्त सोतेज आथो। 5 तेबी, पोरमेहेर तीयाहांमेर्याअ खुब लोकाहांपेअ राजी नांय आथो। तीयाअ लीदे, तें मोय गेहलें आने तीयाहांअ मुरदें उजाळाम जेंहें-तेंहें पोळी रेहलें।
6 ए बादा बोनाव आपनेंह चेतवांअज बोंणला, ईयाअ खातुर का, तीया लोकाहांअ होच आपुंह बी खाराब वोस्ताहांअ लालोच नांय राखजी, 7 का तीयाहांमेर्यांअ थोळाकुंअ होच आपुंह बी झुटा देवुंअ मुरतींअ पुंजा नांय केअजी। ईयु बाबोताम पोवीतोर लेखाणाहांम एंहडों लेखलों हाय का, “होनांअ बोंणावला वासळाअ मुरतीअ भांडाराम मांहेंअ खांअ-पीयांअ बोठें। हातींअ उठीन तें नाच्यें आने मोज-मोज्या केरांअ टेक्यें।” 8 तीयाहांमेर्याअ थोळाकाहीं खाराब रीते सांवसार केअलो। आने तीयाअ पोरीणामे, एकुज दीहुम तेवीस हाजार मांहेंअ मोय जाय एंहडों पोरमेहेरांय केअलों। तीयाहांअ होच आपुंह खाराब रीते सांवसार नांय केअजी! 9 तीयाहां होदबार खोटाय केअयी तेबी मालीख तीयाहांन सीक्सा केअहे का नांह केअतो तों हेरांअ तीयाहांमेर्यांअ थोळाकाहीं मालीखाअ पारखों केअलों, आने तीयाअ पोरीणामे, हापळाहां तीयाहांन चावीन माय टाकलें। तीयाहांअ होच आपुंह पोरमेहेराअ पारखों नांय केअजी! 10 पोरमेहेराअ वीरुद तीयाहांमेर्याअ थोळाकाहीं टुटणांअ चालु केअलों, आने तीयाअ लीदे पोरमेहेरांय मोकलुअला होरगाअ दुतांय तीयाहांअ नास केअलो। तीयाहांअ होच आपुअ टुटणांअ नांय जोजे! 11 ते बादया बाबोत्या आपनेंह चेतवोंणी मीले तीयाअ खातुर तीयाहांअ जीवोनाम वीत्या। आने ईया युगुअ ओंताअ सोमोयाम रेनारा आपनेंह तीयापेनेअ हीकामोण मीले तीयाअ खातुर पोवीतोर लेखाणाहांम ए गोठ्या लेखल्या हाय।
12 तीयाअ लीदे, जोबी एंहडों धारतों वीअ का, सोते वीसवासाम पाको हाय, तो सोते तेंहडा पापाम नांय पोळी जाय तीयाअ कालजी राखे! 13 जांहांअ बी तुमनेंह खोटों केरांअ लालोस आवे, तांहांअ तुमां ईत राखजा का, बीहरा बादा लोकाहांन बी तेंहडीज लालोस आलली। पोरमेहेर ता, सोते देदला वोचोनु पोरमाणे वोरतुअनारो हाय। आने तुमनेंह तीयु लालोसुम पोळ्या वोगुर रेवाय नांय एंहडी मोडी लालोस तो तुमांअ जीवोनाम आवांअ नांह देतो। पेन उलटों, तुमनेंह खोटों केरांअ लालोस आवे तांहांअ खोटों नांय केरांअ तो तुमनेंह वाट देखावीअ।
मुरतींअ पुंजा-पात्री कीअहाज मा!
14 तीयाअ लीदे मांअ मेराला दोस्दारुहुं, मुरतींअ पुंजा-पात्री केरांअज सोळी दा! 15 तुमनेंह होमजुण्यें मांहेंअ गोंईन आंय ए गोठ तुमनेंह आखुंह। आंय जों आखुंह तों खेरों हाय का नांह तों तुमां सोतेज नोक्की केअजा! 16 मालीखाअ मांडो खातीअ वोखत, आपुंह दाराख्साअ रोहाअ पीयालो आथाम लीईन पोरमेहेराअ आभार मानीन तो दाराख्साअ रोह पीतेंह; तीयाकींअ आपुंह बादें ख्रीस्तुंह पाळला तीयाअ रोगुतुकींअ, मीलनारा फायदा मीलवुअतेंहकने? तेंहकींअज कीईन, तीयु वोखत रोटली पाजीन आपुंह खातेंह तीयाकींअ आपुंह ख्रीस्तुंह भोगु तोरीके सोताअ सोरील देदलों तीयाअ पोरीणामे मीलनारा फायदा मीलवुअतेंहकने? 17 एकुज रोटली आपुंह वाटी खातेंह आने तीयाकींअ आपुंह देखावतेंह का, आपुंह खुब हाय तेबी आपुंह एकुज सोरीलाअ भाग हाय।
18 ईसरायेल लोकाहांअ बाबोताम वीचार केरा! तीयाहांअ रीवाजा पोरमाणे पोरमेहेराल वेदीपेअ जे भोग चोळवाअताह, तीया भोगुंहम तीयाअ वाटा खानारांअ भाग रेहेक्ने? 19 आंय काय आखांअ मागुंह तीयाअ तुमनेंह होमुज पोळेह का? मुरती होकीकोतुम देव हाय एंहकींअ आंय आखुंह का? नेता मुरतील चोळवुअलो मांडो होकीकोतुम भोग हाय एंहकींअ आंय आखुंह का? 20 नांह, बीलकुल नांय। आंय ता एंहकींअ आखुंह का खेरा पोरमेहेराल नांय ओअखुअनारें मांहेंअ वेदीपेअ जे भोग चोळवुअतेंह, ते ता तें पोरमेहेराल नांय, पेन पुतळाहांनुंज चोळवुअतेंह। जो तुमां पुतळाहांन चोळवुअलो मांडो खातेंह ता, तीयाअ ओर्थो ओ हाय का, पुतळें जों केअतेंह तों तुमां बी केअतेंह एंहकींअ आखाय। आने मांअ मोर्जी एंहडी नांह का, तुमां पुतळाहांअरी सोबोंद बांदा। 21 मालीखाअ मांडो खातीअ वोखत वापराअनारो दाराख्साअ रोह पीया, ने पुतळाहांअ भोकती केरांअ खातुर उजवाअनारा तेहवारुम वापराअनारो दाराख्साअ रोह बी पीया एंहडों बोंणांअज नांय जोजे; आने एंहकींअज कीईन तुमां मालीखाअ मांडाअ वाटो बी खा, आने पुतळाहांअ भोकतीअ खातुर तीयार केअला मांडाअ वाटो बी खा एंहडों बी बोंणांअज नांय जोजे। 22 तांहांअ जेंहकींअ ईसरायेल लोकुंह बीहरा देवुंअ पुंजा-पात्री कीईन मालीखाल रोग चोळवुअली, तेंहकींअ पुतळाहांअरी सोबोंद राखीन आपुंह बी मालीखाल रोग चोळवुअजी का? एंहडों नांयज बोंणे! आपुंह नोक्कीज जांअतेंह का, मालीखाअ केअता आपुंह वादारे गोतीवालें नांह। तीयाअ लीदे, जो आपुंह मुरतींअ भोकतीम भाग लेजी ता, मालीखाअ सीक्सामेनेअ आपुंह वाचायज नांय सेकुंह।
पोरमेहेराल मोडाय मीले तीयाअज खातुर बादों केरा!
23 तुमाहांमेनेअ थोळेंक आखतेंह का, “गोंवें तों केरांअ आमनेंह वीसवासींहन सुट हाय।” तांहांअ आंय तीयाहांन आखुंह, “तुमांअ गोठ बोराबोर हाय, पेन बादोंज तुमांअ हाराअ खातुर नांह।” गोंवें तों केरांअ वीसवासींहन सुट हाय, पेन बादोंज बीहराहांन वीसवासाम वादांअ मोदोत नांह केअतों। 24 केल्ला बी वीसवास्याअ सोताअ ओतोंअज नांय, पेन बीहराहांअ भोलों वेअ तीयाअ बी वीचार केरांअ जोजे। 25 खाटकीअ दुकानाम वेचाअनारों माह ‘मुरतील चोळवुअलों-मोळवुअलों वीअ का?’ एंहडी जीवुम काय बी सोंका राख्या वोगुर तों लीईन खांअ तुमनेंह सुट हाय। 26 काहाका, पोवीतोर लेखाणाहांम लेख्या पोरमाणे, ‘तोरती आने तीयापेर्योंअ बादों मालीखाअज हाय।’ 27 ख्रीस्तुपेअ वीसवास नांय केअनारो केडो बी तुमनेंह सोताअ कोअ खांअ हादे आने जो तुमां तींहीं जांअ मागतें वीअ ता जाजा! आने तुमांअ वाटाम जोबी मांडो तो दे, तो ‘मुरतील चोळवुअलों-मोळवुअलों वीअ का?’ एंहडो सोवाल फुच्या वोगुर तो खाजा! 28 पेन आरी खांअ बोठलो एगोह वीसवासी तुमनेंह एंहकींअ आखे का, “ओ मांडो मुरतील चोळवुअलो हाय” ता, तों जाणावनाराअ खातुर आने हारा-माठाअ जाण केअनारा तीयाअ जीवुअ खातुर तो मांडो मा खातें। 29 मोंजे का, हारा-माठाअ जाण केअनारा तुमांअ सोताअ जीवुअ खातुर नांय, पेन तुमनेंह जाण केअनारा तीया मांहांअ जीवुअ खातुर तो मांडो मा खातें!
तुमाहांमेनेअ एगोंह एंहकींअ फुचे का, “मांन जों खेरों लागेह तों केरांअ मांन जे सुट हाय ते वापरुअता नोबला जीवुवाला वीसवास्याअ मांन काहा ओटकावांअ जोजे? 30 जो मांडो आंय खाहुं तीयाअ खातुर जो आंय पोरमेहेराअ आभार मानुं ता, एंहकींअ कीईन पोरमेहेराअ आभार मानीन खादला मांडाअ खातुर मांन दोस दांअ केडाल होक हाय?” 31 तांहांअ आंय आखुंह, “तुमां खा-पीया का बीहरों काय बी केरा, तों बादों तों हेअनारें मांहेंअ पोरमेहेराअ गुणगान केअ तीयु रीतेज केअजा!” 32 येहुदी लोकाहांन, का येहुदी जातीअ नांह तेंहडा लोकाहांन, का पोरमेहेराअ केल्ला बी मोंडोळाअ लोकाहांन आत्मीक नुकसान नांय वेअ तेंहडों जीवोन जीवजा! 33 एंहडोंज जीवोन आंय बी जीवुंह। आंय जोंबी कीअहुं तीयाकींअ बादाहांन खुस राखांअ आंय कोसीस कीअहुं। आंय मांअ सोताअ हाराअ खातुरुज नांह वीचारतो, पेन बीहरा बादाहांअ हाराअ खातुर बी वीचारुंह, ईयाअ खातुर का, पोरमेहेर तीयाहांन बी पापाहांअ सीक्सामेनेअ वाचावी ले।