11
1 जेंहकींअ आंय ख्रीस्तुअ नोमुना पोरमाणे चालुंह, तेंहकींअ तुमां मांअ नोमुना पोरमाणे चाला।
जाहेर आरादनाअ खातुर हीकामोण्या
2 ख्रीस्ती सेवाम मांयुं जोंबी केअयोंह आने तुमनेंह हीकव्योंह, तों तुमां कायोम ईत केअतेंह। आने जे ख्रीस्ती बोद मांयुं तुमनेंह देदाह आने जे ख्रीस्ती रीवाज मांयुं तुमनेंह होप्याह, तीयाअ पोरमाणे तुमां चालतेंह तीयाअ लीदे आंय तुमनेंह साबासी दीहुं। 3 पेन तुमां आजी एक बाबोत जांय ला एंहडी मांअ मोर्जी हाय। मोंजे का, दोरेक आदमीअ उपरी ख्रीस्त हाय, आने दोरेक बायाअ उपरी तीयुअ कोअवालो हाय, आने ख्रीस्तुअ उपरी पोरमेहेर हाय। 4 तीयाअ लीदे, जाहेर आरादनाम जोबी आदमी सोताअ मुनकों फांगीन पोरमेहेराल ओरुज केअहे, का पोवीतोर आत्मांय तीयाल जाणावली गोठ जाहेर केअहे, तो सोताअज ओपमान केअहे। 5 तेंहकींअज कीईन, जाहेर आरादनाम जेबी बाय सोताअ मुनकों उगाळों राखीन पोरमेहेराल ओरुज केअहे, का पोवीतोर आत्मांय तीयुल जाणावली गोठ जाहेर केअहे, ते बी सोताअज ओपमान केअहे। काहाका, मुनकों फांग्या वोगुर एंहडों केरुलोंअ सोताअ मुनकों बोळावी टाके तीयाअ बोराबोर हाय। 6 आंह, जो ते सोताअ मुनकों नांय फांगे ता, ते सोताअ मुनकों बी कातरावी टाके। पेन एक बाय सोताअ मुनकों कातरावी टाके का बोळावी टाके तों तीयुअ खातुर नाज आवे एंहडी गोठ हाय। तीयाअ लीदे, जाहेर आरादनाम तीयुअ सोताअ मुनकों फांगांअज जोजे। 7 आदमील पोरमेहेरांय सोताअ रुपाम बोणाव्योह आने सोताअ सोबावाअ होचुज तीयाल सोबाव देदोह। तीयाअ लीदे, आरादनाम तीयाअ सोताअ मुनकों फुंगांअ नांय जोजे। पेन बाय ता आदमीअ मोडाय देखावेह। 8 काहाका, पोरमेहेरांय पेअलांम-पेअला आदमील बायुमनेअ नांह बोंणाव्यो। पेन तीयांय पेअलांम-पेअली बायुल आदमीमनेअ बोंणावी। 9 आने बायाअ फायदाअ खातुर तीयांय आदमील नांह बोंणाव्यो, पेन आदमीअ फायदाअ खातुर तीयांय बायुल बोंणावी। 10 तीयाअ लीदे, जाहेर आरादनाम बायाअ सोताअ मुनकापेअ पोतळों फांगांअ जोजे, ईयाअ खातुर का, होरगाअ दुताहांन बी खोबुर पोळे का, ते तीयुअ कोअवालाअ ताबांम रेहे।
11 पेन मालीखाअ वीचारुअ पोरमाणे ता, a बायुल आदमीअ जोरुल हाय आने आदमील बायाअ जोरुल हाय। b 12 काहाका, पेअलांम-पेअली बायुल पोरमेहेरांय आदमीमनेअ बोंणावली तेबी, तेहेअनेअ बादाज आदमी बायुमनेअज जोन्मुअताह। आने बादों हायाताम लावनारो ता पोरमेहेरुज हाय।
13 एक बाय जाहेर आरादनाम सोताअ मुनकों उगाळों राखीन पोरमेहेराल ओरुज केअ तों तीयुल सोबे का? ईयु बाबोताम तुमां सोतेज वीचार केअजा! 14 आदमी लांबें चोट्यें राखे तों तीयाअ खातुर नाज आवे एंहडी गोठ हाय एंहकींअ, कुदरोत बी तुमनेंह हीकवेहकने? 15 पेन बाय लांबें चोट्यें राखे ता तें तीयुअ खातुर सोबा वादावनारें हाय एंहकींअ कुदरोत बी तुमनेंह हीकवेहकने? काहाका, ते तीयुल सोताअ मुनकों फांगांअ खातुर देदेंह। 16 पेन ईयु बाबोताम केडों बी वाद-वीवाद केरांअ मागतों वीअ ता, तीयाल मांअ ओतोंअज आखुलोंअ हाय: जाहेर आरादनाम ईयाअ सीवाय बीहरो रीवाज नांय वेरांअ जोजे एंहडों आमां मालीखाअ खास चेला आने पोरमेहेराअ बीहरा मोंडोळाअ मांहेंअ बी धारतेंह।
मालीखाअ मोताअ ईयादगीरीअ मांडो
17 आमी ए हीकामोण तुमनेंह देता मांन तुमांअ एक गोठ नांह गोंवती। काहाका, तुमां आरादना मीटींगुंहम टोलवाअतेंह तीयाकींअ काय हारों बोंणांअ बोदले खोटोंज बोंणेह। 18 आंय एंहडों उनाअयोह का, तुमां आरादनाअ खातुर टोलवाअतेंह तांहांअ पेअलांम-पेअलांअ तुमांहम फाट-फुट पोळत्याह। आने आंय थोळों-घोणों मानुंह का तों खेरों हाय। 19 पोरमेहेराअ नोजुराम तुमाहांमेनेअ केडें हाचें हाय तीयाअ बोराबोर खोबुर पोळे तीयाअ खातुर तुमांहम फाट-फुट पोळे तों बी हारोंज हाय।
20 तीयाअ लीदे, तुमां टोलवाअतेंह तांहांअ तुमां जों खातेंह तों खोरेखोर मालीखाअ मोताअ ईयादगीरीअ मांडो* खातें वीअ एंहडों नांह लागतों। 21 काहाका, खांअ वोखत तुमाहांमेनेअ थोळेंक सोताअ मांडो बीहराहांअ वाट जोव्या वोगुर माहरी-माहरी खाय जातेंह। तीयाअ पोरीणामे, थोळेंक पुखेंज रीअ जातेंह। तांहांअ बीहरें बोराबोर खाय-पीन साकी उठतेंह। 22 खांअ पीयांअ खातुर ता तुमांअ सोताअ पोंगें हायक्ने? मोंजे, मालीखाअ मोताअ ईयादगीरीअ मांडो तुमां खातेंह तांहांअ ईगलाय कीईन तुमां गोरीब वीसवास्यांहन नाजवावतेंह। आने एंहकींअ तुमां पोरमेहेराअ मोंडोळाअ ओपमान केअतेंह। ईयु बाबोताम मांअ तुमनेंह काय आखुलोंअ? तुमां जों केअतेंह तों मांन गोंवेंह एंहकींअ आंय आखुं का? नांह, एंहकींअ ता आंय नांयज आखुं।
मालीखाअ मोताअ ईयादगीरीअ मांडो खांअ वीदीअ बाबोताम पावुलुल मीललो रीवाज
(माथी २६:२६-२९; मार्क १४:२२-२५; लुक २२:१४-२०)
23 ओ पोवीतोर मांडो खांअ वीदीअ बाबोताम मालीखांय सोते मांन जों आखलों तों ईंज हाय, आने ते वीदी जेंहडी मांन मीलीह तेंहडीज आंय तुमनेंह बी होपुंह। जीयु रातीं येहुदांय तीयाल दोगो कीईन तेराव्यो तीयाअ पेअलांअ मालीख ईसुंय मांडो लेदो, 24 आने तीयाअ खातुर पोरमेहेराअ आभार मानीन तो पाज्यो, आने तो सोताअ चेलाहांन देता तीयाहांन आख्यों, “ओ मांडो तुमांअ खातुर आंय देनारो हाय तीया मांअ सोरीलाअ नीसाणी cहाय। तुमांअ खातुर मांयुं जों केअयोंह तों ईत केरांअ dओ मांडो खा!” 25 एंहकींअज कीईन, खाय लेदों हातींअ तीयांय दाराख्साअ रोहाअ पीयालो लेदो आने तो सोताअ चेलाहांन देता तीयाहांन आख्यों, “ईया पीयालामेर्योअ दाराख्साअ रोह पोरमेहेर तुमांअरी जो नोवो कारार केअहे तो पाको केरांअ खातुर आंय मांअ जों रोगुत पाळनारो हाय तीयाअ नीसाणी हाय। e जांहांअ-जांहांअ तुमां ओ दाराख्साअ रोह पीया, तांहांअ-तांहांअ, मांयुं तुमांअ खातुर जों केअयोंह, तों ईत केरांअ f तो पीजा!” 26 मोंजे ईयाअ ओर्थो ओ हाय का, जीयु बी वोखत एंहकींअ कीईन तुमां ओ मांडो खातेंह आने पीयालामेर्योअ ओ दाराख्साअ रोह पीतेंह, तांहांअ, मालीख फाचो आवे तांव लोगुंअ तुमां तो तुमांअ खातुर मोअयो तीयाअ जाहेरात केअतेंह।
मालीखाअ मोताअ ईयादगीरीअ मांडो खांअ रीत
27 तीयाअ लीदे, जोबी ख्रीस्ती बीहरा ख्रीस्तींहपेअ लागणी राख्या वोगुर g ओ मांडो खाहे आने एंहकींअ कीईन तो मालीखाअ ओपमान केअ ता, ईयाअ ओ ओर्थो वेअहे का, बादें वीसवासी एकुज टुकळी वेरांअ जोजे आने तीयाहांम फाट-फुट नांय पोळांअ जोजे ए होकीकोत तो होमजुअतो नांह आने ईयु बाबोताम तो गुनालो गोंणाय। 28 मोंजे, दोरेक वीसवासी सोताअ जीवुम तापास कीईन काय बी खोटों जाणाय ता तीयाल काडी टाके! आने हातींअज ईयु वीदीम वापराअनारो मांडो खाय आने दाराख्साअ रोह पीये। 29 काहाका, जो तुमां मालीखाअ सोरीलाअ ओर्थो होमज्या वोगुर तो मांडो खा ने तो दाराख्साअ रोह पीया ता, पोरमेहेर तुमनेंह सीक्सा कीअ। 30 ईयाज कारोणाअ लीदे, तुमाहांमेनेअ खुब नोबलें आने आजार्यें हाय आने बीहरें थोळेंक ता मोय बी गीयेंह।
31 पेन ओ मांडो खाता पेअलांअ, आपुअ जीवुम काय खोटों हाय का नांह तों तापासीन हातींअ आपुंह खातें ने पीतें ता मालीख आपनेंह सीक्सा नांय केअतो। 32 ख्रीस्तुपेअ वीसवास नांय केअनारा लोकाहांअरी सेल्ले दीह पोरमेहेर आपनेंह ख्रीस्तींहन बी सीक्सा नांय केअ तीयाअ खातुर मालीख आमीज आपनेंह नीती वोगुराअ आपुअ वोरतोनुअ खातुर सीक्सा कीईन वारेह। 33 तीयाअ लीदे मांअ मेराला पावु-बोंअयुहुं, मालीखाअ मोताअ ईयादगीरीअ मांडो खांअ खातुर तुमां टोलवाया तांहांअ एक-बीहराअ वाट जोवजा आने बादें आरीज तो खाजा! 34 जोंबी पुखों वेअ तों सोताअ कोअ खाय ले! तांहांअ तुमां ओ मांडो खांअ टोलवाया तांहांअ बीहरा वीसवास्यांहपेअ तुमनेंह लागणी नांह तीयाअ खातुर पोरमेहेर तुमनेंह सीक्साअ चुकादो नांय दे। बीहरों बादों आंय तुमांअहीं आवेंह तांहांअ सीदों केअहें।