12
पोवीतोर आत्मा देहे तें वोरदानें
1 मांअ पावु-बोंअयुहुं, पोवीतोर आत्मा आपनेंह देहे तीया वोरदानुंअ बाबोताम तुमां मांन फुचला सोवालुअ जोवाब आमी आंय दीहुं। तीयाहांअ बाबोताम तुमां बोराबोर जांय ला एंहडी मांअ मोर्जी हाय। 2 तुमनेंह खोबुर हाय का, तुमां ख्रीस्ती बोंण्यें तीयाअ पेअलांअ, खुब बाबोतीहींअ दोरवोणीकींअ तुमां, गोगी नांय सेके एंहडी मुरतींअ aपुंजा केरांअ ईंहीं-तींहीं फीर्या केअत्लें। 3 तीयाअ लीदे मांअ एंहडी मोर्जी हाय का, तुमां ए गोठ होमजी ला: मोंजे का, पोरमेहेराअ आत्मा केडाल बी, “ईसु हाराप लागलो हाय!” एंहकींअ नांय गोगावे, आने पोवीतोर आत्माज केडाल बी, “ईसु खोरेखोर मालीख हाय!” एंहकींअ गोगावी सेकेह।
4 वोरदानें खुब जातीअ हाय। पेन तें आपनेंह देनारो पोवीतोर आत्मा एकुज हाय। 5 एंहकींअज कीईन मालीखाअ सेवा खुब जातीअ हाय, पेन ते सेवा केअनारें आपुंह एकुज मालीखाअ सेवा केअतेंह। 6 जुदी-जुदी रीते पोरमेहेर काम केअहे। पेन आपुंहम बादांम काम केअनारो पोरमेहेर एकुज हाय। 7 आपुंह एक-बीहरा मोदोत केअजी तीयाअ खातुर पोवीतोर आत्मा आपुंहमेर्योअ दोरेकुल वोरदान देहे।
8 थोळाक ख्रीस्तींहन पोवीतोर आत्मा गीयानावाल्या गोठ्या आखांअ वोरदान देहे, आने बीहराहांन तोज आत्मा तें सादारोण रीते जांय नांह सेकतें एंहड्या गोठ्या आखांअ वोरदान देहे। 9 थोळाक ख्रीस्तींअ मोनुंम तोज आत्मा पोरमेहेरापेअ भोरुसो पेदा केअहे। आने बीहराहांन तोज आत्मा आजार्याहांन हारें केरांअ वोरदान देहे। 10 थोळाक ख्रीस्तींहन तो चोमोत्कार केरांअ वोरदान देहे, आने बीहराहांन तो पोरमेहेराअ गोठ जाहेर केरांअ वोरदान देहे। आने बीहराहांन तो केडाल गोगावनारो पोरमेहेराअ आत्मा हाय का खाराब आत्मा हाय तों पारखांअ वोरदान देहे। थोळाक ख्रीस्तींहन तो जे तीयाहां हीक्या नांय वीअ तेंहडी बोलींहम गोगांअ वोरदान देहे। आने बीहराहांन तो तीयु बोलींहम आखली गोठीहींअ खुलासो दांअ वोरदान देहे। 11 ईं बादें वोरदानें ख्रीस्तींहन वाटी देनारो एकुज पोवीतोर आत्मा हाय। तो सोताअ मोर्जी पोरमाणे दोरेक ख्रीस्ती मांहांल जुदों-जुदों वोरदान देहे।
आपुंह बादें एकुज सोरीलाअ भाग हाय
12 जेंहकींअ मांहांअ सोरीलाम खुब भाग हाय तेबी सोरील ता एकुज हाय, तेंहकींअ ख्रीस्तुअ लोक खुब हाय तेबी ते एकुज टोलामेर्याअ हाय। 13 आपुंहम थोळेंक येहुदी हाय आने थोळेंक येहुदी जातीअ नांह। थोळेंक गुलाम हाय आने थोळेंक गुलामीमेनेअ सुटें वेअलें हाय। पेन आपुंह बादें एकुज आत्माअ मारफोते एकुज टोलाम जोळाअलें रेजी तीयाअ खातुर आपुंह बापतीस्मा लेदोंह। आने आपनेंह बादाहांन एकुज आत्मा मील्योह।
14 बीहरा ख्रीस्ताअ आर्याअ आपुअ सोबोंदुम आपुंह मांहांअ सोरीलाअ भागुंअ होच हाय। मांहांअ सोरील एकुज भागुकींअ नांह बोंणतों, पेन खुब भाग मीलीन एक सोरील बोंणेह। 15 “आंय आथ नांह मोंजे, आंय सोरीलाअ भाग नांह” एंहकींअ जो पाग आखे ता, तो सोरीलाअ भाग नांह एंहडों नांय आखाय। 16 “आंय डोंओं नांह, मोंजे आंय सोरीलाअ भाग नांह” एंहकींअ जो कान आखे ता, तो सोरीलाअ भाग नांह एंहडों नांय आखाय। 17 जो आपुअ आखों सोरील डोंओं वेअतों ता, आपुंह उनाय नांय सेकतें। जो आपुअ आखों सोरील कान वेअतों ता, आपुंह हुंगावी नांय सेकतें।
18 पेन होकीकोत ता ए हाय का, पोरमेहेरांय खुब भागुंहकींअ आपुअ सोरीलें बोंणाव्येंह आने दोरेक भागाल तीयांय सोताअ मोर्जी पोरमाणे गोठव्योह। 19 जो आखों सोरील एकुज भागाअ वेअतों ता, केंहडों ठीकाणा वोगुराअ तों देखाअतों। 20 पेन होकीकोतुम ता, भाग खुब हाय तेबी सोरील एकुज हाय। 21 “मांन तुमांअ जोरुल नांह” एंहकींअ डोंओं आथुंहन आखी नांह सेकतो। आने “मांन तुमांअ जोरुल नांह” एंहकींअ मुनकों पागुंहन आखी नांह सेकतों।
22 होकीकोतुम ता, आपुअ सोरीलाअ थोळाक भाग आपनेंह नोबला आने खास कामुअ नांह जाणाअता। पेन तीया भागुंअ वोगुर ता आपनेंह चालेज नांय। 23 आने आपुअ सोरीलाअ जीया भागुंहन आपुंह ओलका गोंअतेंह, तीयाज भागुंअ आपुंह वादारे कालजी बी राखतेंह। तीयाअ लीदे, ते भाग बीहराहांन देखायांअ नांय जोजे तीयाअ खातुर आपुंह तीयाहांन पोतळांहकींअ हारकींअ-हारकींअ दोबावतेंह। 24 तांहांअ सोरीलाअ बीहरा भागुंहन तीयाहांअ होच कालजी राखीन हाचवांअ जोरुल नांह पोळती। उलटों, पोरमेहेरांय सोते आपुअ सोरीलाअ भागुंहन एंहडी रीते गोठव्याह का तीया ओलका गोंणाअनारा भागुंहन आपुंह कालजी राखीन हाचवुअजी आने तीयाहांन मान देजी। 25 आने ईयाकींअ सोरीलाअ बादा भागाहांम एक होप जालवाय रेहे, ईयाअ खातुर का, बादाज भाग एक-बीहराअ हारकी रीते कालजी राखे। 26 जो एक भागाल दुख लागे ता, तीयाअरी सोरीलाअ बादाज भागुंहन दुख लागेह; आने एक भागाल मान मीलेह ता, बादाज भाग तीयाअरी खुस वेअताह।
27 तुमां बादें मीलीन ख्रीस्ताअ सोरील हाय आने तुमांअमेर्योअ दोरेक वीसवासी तीया सोरीलाअ भाग हाय। 28 मोंडोळाअ खातुर पोरमेहेरांय नीमला सेवोकुंअ ए ईयादी हाय: पेअलांम-पेअलाअ जागे मालीखाअ खास चेला, बीहरी जागे पोरमेहेराअ गोठ जाहेर केअनारा, तीजी जागे बोद देनारा, हातींअ चोमोत्कार केअनारा, हातींअ आजार्याहांन हारें केअनारा, आने हातींअ गोरीबाहांन मोदोत केअनारा, आने हातींअ मोंडोळाअ कारभारो चालवुअनारा, आने हातींअ पेअलांअ हीकया नांय वीअ एंहड्या ओजाण्या बोल्या गोगनारा। 29 ईयांहमेर्याअ बादाज मालीखाअ खास चेला नांह। बादाज पोरमेहेराअ गोठ जाहेर केअनारा नांह। तेंहकींअज कीईन, बादाज बोद देनारा नांह। आने चोमोत्कार केरांअ सोत बादाहां पेअ नांह। 30 आने आजार्याहांन हारें केरांअ सोत बादाहां पेअ नांह। आने पेअलांअ हीक्या नांय वीअ एंहडी ओजाणी बोलींहम गोगांअ वोरदान बादाहां पेअ नांह। आने एंहडी ओजाणी बोलींहम आखली गोठीहींअ खुलासो दांअ वोरदान बादाहां पेअ नांह। 31 पेन तुमां एंहडें वोरदानें मीलवांअ मोर्जी राखजा का, जीयांयकींअ मोंडोळाअ लोकाहांन वादाराम-वादारे आत्मीक लाब मीले।
पोवीतोर आत्मा देहे तीया वोरदानाहांन वापरांअ हाराम-हारी रीत
पेन आमी आंय पोवीतोर आत्मा देहे तीया वोरदानाहांन वापरांअ हाराम-हारी रीत आखुंह।