13
1 तोरतीमेर्येंअ मांहेंअ आने होरगामेर्याअ दुत गोगताह ते बादयाज बोल्या आंय गोगी सेकुं तेबी, जो आंय बीहराहांपेअ माया नांय राखुं ता, आंय जों गोगुं तों, आवाज केअनारी काटणीअ होच आने खोकळुअनारी खोंजुरीअ होच काय बी ओरथा वोगुराअ वीअ। 2 पोरमेहेराअ गोठ जाहेर केरांअ वोरदान मांअपेअ वेअ, आने आजी पोरमेहेरांय जाहेर नांह केअया एंहड्या बादी बाबोतीहींअ भेद आंय जांअतो वीअ, आने सादारोण रीते आंय जांय नांह सेकतो एंहडी बाबोतीहींअ बी आंय जाणकार व्युंव, आने हुकोम कीईन डोगुंहन बी होरकावी सेकुं ओतोअ बादो वीसवास बी मांअपेअ वेअ, पेन जो आंय बीहराहांपेअ माया नांय राखुं ता, मांअ काय बी कींमोत नांह। 3 आंय मांअपेर्योंअ बादों गोरीबाहांन दीअ द्युंव, आने आगीम भोगु तोरीके बाली टाकांअ मांअ सोरील बी आंय होपी द्युंव, ईयाअ खातुर का तीया बाबोताम आंय ओभीमान क्युंव, पेन आंय बीहराहांपेअ माया नांय राखुं ता, मांन काय बी लाब नांय मीले।
4 बीहराहांपेअ माया राखनारो ख्रीस्ती धीरोज राखीन तीयाहांअ बादों वेठी लेहे, आने तीयाहांपेअ दाया बी केअहे; आने तो आदराय नांह राखतो, का ओभीमान नांह केअतो, का मोड्या-मोड्या गोठ्या नांह केअतो। a 5 बीहराहांपेअ माया राखनारो ख्रीस्ती तीयाहांअरी खोटी रीते नांह वोरतुअतो, का सोताअज फायदाअ नांह वीचारतो, का चीळवाय नांह जातो; आने बीहराहां तीयाअ खोटों केअयों वीअ तीयाल तो सोताअ मोनाम नांह राखी थोवतो। b 6 बीहराहांपेअ माया राखनारो ख्रीस्ती बीहरा मांहांहांन खोटें कामें केअता देखीन खुस नांह वेअतो, पेन तीयाहांन हाचें कामें केअता देखीन खुस वेअहे। c 7 बीहराहांपेअ माया राखनारो ख्रीस्ती बीहराहां सोताल केअलों नुकसान बादों वेठी लेहे। तो बीहरा लोकाहीं पेअ वीसवास राखेह। आने तो बीहरा लोकाहीं पेअ कायोम खातरी राखेह, आने बादा सोजोगुंहम धीरोज राखेह। d
8 पोरमेहेराअ गोठ जाहेर केरांअ वोरदान, एक दीह ता काम नांय आवे; पेअलांअ नांय हीक्या वीअ एंहडी बोलींहम गोगांअ वोरदान बी एक दीह ता काम नांय आवे; आने सादारोण रीते मांहेंअ जांय नांह सेकतें एंहडी बाबोतीहींअ जाणकारी बी एक दीह ता काम नांय आवे; पेन माया ता, कायोमुज कामाम आवनारी हाय। 9 सादारोण रीते आपुंह जांय नांह सेकतें एंहडी बाबोतीहींअ आपुअ जाणकारी आरदी हाय, आने पोरमेहेराअ गोठ जाहेर केरांअ वोरदान बी आरदोंज हाय; 10 पेन ख्रीस्त जो खामी वोगुराअ हाय तो आवीअ तांहांअ, e ईयु खामीवाली बाबोतीहींअ जोरुल नांय पोळे। f
11 आंय हानोअ पोयरो आथो तांहांअ, हानांअ पोयराहांअ होचुज मांन लागणी वेअत्ली आने हानांअ पोयराअ होचुज आंय वीचारत्लो। पेन आंय मोडो वीयो तांहांअ, हानांअ पोयराअ होच वोरतांअज मांयुं सोळी देदोंह। 12 आमी आपुंह आरसाम हेअतें वीअ तेंहकींअ पोरमेहेराअ बाबोताअ हाचाय थोळी-थोळी जांअतेंह। पेन जांहांअ ख्रीस्त आवीअ तांहांअ, आपुंह पोरमेहेराअ हाचाय पुरी रीते जांय लीहुं। आमी आंय बादों पुरी रीते नांह ओअखुअतो। पेन तांहांअ ता, जेंहकींअ पोरमेहेर मांन पुरी रीते ओअखेह, तेंहकींअ आंय बी बादों पुरी रीते ओअखेंह।
13 आमी कायोम टीकनार्या बाबोत्या ता ए तीनुंज हाय: पोरमेहेरापेअ आपुंह राखतेंह तो वीसवास, पोरमेहेर सोताअ आखल्या पोरमाणे केअनारो हाय एंहडी आपुंह राखतेंह ते आस्या, आने बीहराहांपेअ आपुंह राखतेंह ते माया; ईया तीनुंहमनेअ मोडाम-मोडी बाबोत ता, बीहराहांपेअ आपुंह राखतेंह ते मायाज हाय। g