14
आत्मीक वोरदानुंअ बाबोताम वादारे हीकामोण्या
1 बीहराहांपेअ माया राखुलोंअज तुमांअ एकदोम खास ईरादो वेरांअ जोजे। पेन आरी-आरी बीहरें आत्मीक वोरदानें, खास कीईन, पोरमेहेराअ गोठ जाहेर केरांअ वोरदान मीलवांअ बी एकदोम खुब मोर्जी राखजा! 2 पेअलांअ नांय हीक्या वीअ एंहडी ओजाणी बोलींहम गोगनारें वीसवासी बीहरा मांहांहांअरी नांय, पेन पोरमेहेराअरी गोगतेंह। केडों बी तीयाहांअ गोठ्या होमजुअतों नांह। ते ता पोवीतोर आत्माअ ताकोताकींअ एंहड्या गोठ्या आखतेंह का जे पेअलांअ मांहेंअ नांय जांअत्लें। 3 पेन पोरमेहेराअ गोठ जाहेर केअनारें वीसवासी ते गोठ बीहरा लोकाहांन आखतेंह आने तीयाहांन उफ आने हींमोत दीईन मालीखुपेर्याअ वीसवासाम वादांअ मोदोत केअतेंह। 4 पेअलांअ नांय हीकया वीअ एंहडी ओजाणी बोलींहम गोगनारें वीसवासी मालीखुपेर्याअ वीसवासाम सोते ओतेंअज मोजबुत बोंणतेंह; पेन पोरमेहेराअ गोठ जाहेर केअनारें वीसवासी आखा मोंडोळाअ लोकाहांन तीया वीसवासाम मोजबुत बोंणावतेंह।
5 पेअलांअ नांय हीकया वीअ एंहडी ओजाणी बोलींहम तुमां बादें गोगा एंहकींअ ता मांअ बी मोर्जी हाय। पेन पोरमेहेराअ गोठ तुमां बादें जाहेर केरा एज मांअ वादारे मोर्जी हाय। काहाका, ओजाणी बोलींहम गोगांअ वोरदानु केअता, पोरमेहेराअ गोठ जाहेर केरांअ वोरदान वादारे चोळ्यातों आने कामुअ हाय। जाहेर आरादनाम जो एक वीसवासी ओजाणी बोलीम गोगे ता, तीयाअ खुलासो देनारो एगोह तेबी वीसवासी मोंडोळाम वेरांअ जोजे, ईयाअ खातुर का, तीयाकींअ आखा मोंडोळाअ लोकाहांन कायक आत्मीक फायदो वीअ।
6 मेराला पावु-बोंअयुहुं, आंय तुमांअहीं आवीन तुमां पेअलांअ नांय हीकया वीअ एंहडी ओजाणी बोलीम गोगुं ता, तीयाकींअ तुमनेंह काय बी फायदो नांय वीअ! पेन पोरमेहेरांय मांन जाहेर केअली गोठ तुमांअहीं लीअ आवुं, का खास आत्मीक जाणकारीअ गोठ तुमनेंह आखुं, का पोरमेहेराअ गोठ जाहेर क्युंव, का बोद द्युंव ता, तीयाकींअज तुमनेंह कायक फायदो वीअ। 7 जीवु वोगुराअ वाजें, ते पावी वेअ, का तारींवालों वाजों वेअ, पेन तीयाहांअ सुर बोराबोर नांय वाजे ता, तींहमें वाजनारो राग केल्लो हाय तों केडों बी जांय नांय सेके! 8 आने जो पीपारो वाजवुअनारो सोयनीक चोख्खो आवाज उनाय एंहडों नांय वाजावे ता, बीहरो केल्लो बी सोयनीक लोळायुअ खातुर तीयार नांय वीअ। 9 एंहकींअज कीईन, उनाअनारें मांहेंअ नांय होमजे एंहडी बोलींहम तुमां गोगा ता, तुमां काय आखांअ मागतेंह तों तें नांयज होमजे। काहाका, तों ता, तुमां उजाळाम गोठ्या केअतें वीअ तेंहडों लागीअ।
10 ईयु दुन्याम जुदया-जुदया खुब बोल्या हाय। आने ते बादया ता ते होमजुअनारांअ खातुर फायदावाल्या हाय। 11 जो आपुंह ते बोल्या गोगनारांअ गोठ्या नांय होमजी सेक्जी ता, ते आपुअ खातुर काय फायदावाल्या नांह। आने ते बोल्या गोगनारें बी आपुअ गोठ्या नांय होमजी सेके। 12 तीयाअ लीदे, तुमां आत्मीक वोरदानें मीलवांअ मोर्जी राखतेंह तांहांअ, पोरमेहेरापेअ एंहडें आत्मीक वोरदानें मागा का जें आखा मोंडोळाअ लोकाहांन वीसवासाम पाका वेरांअ मोदोत केअ।
13 तीयाअ लीदे, पेअलांअ नांय हीक्या वीअ एंहडी ओजाणी बोलींहम गोगांअ जींयांहपेअ वोरदान हाय तें, पोरमेहेराल एंहडी ओरुज केअ का तो तीयाहांन तीयाअ ओर्थो बीहराहांन होमजावांअ वोरदान बी दे। 14 काहाका, जो आंय ओजाणी बोलींहम पोरमेहेराल ओरुज कीअहुं ता, मांअ आत्माज ओरुज केअहे, पेन तांहांअ मांअ मोन काय बी नांह केअतों। a तीयाअ लीदे, ते ओरुज मांन नांह होमजाअती।
15 एंहकींअ वीअ ता, आंय काय केअहें? आंय मांअ आत्माअ मोदोताकींअ बी ओरुज केअहें, आने मांअ मोनुअ मोदोताकींअ बी ओरुज केअहें। आने आंय मांअ आत्माअ मोदोताकींअ बी गीतें आखेंह, आने मांअ मोनुअ मोदोताकींअ बी गीतें आखेंह। 16-17 जो तुं सोताअ आत्मामुज पोरमेहेराअ गुणगान क्योव ता, तों नांय होमजुअनारें तोअरी जोळायन पोरमेहेराअ गुणगान केंहकींअ कीअ सेके? तुं जों आखोह तों तें नांय होमजे ता, तोअरी जोळायन तें पोरमेहेराअ आभार केंहकींअ मानी सेके आने केंहकींअ ‘आमेन’ आखी सेके? तुं हारकींअ पोरमेहेराअ आभार मानतो वीअ तेबी, तोअरी हाजोर रेहला बीहरा वीसवास्यांहन तीयाकींअ काय बी आत्मीक फायदो नांह मीलतो।
18 तुमांअ बादाहांअ केअता वादारे वोखत आंय ओजाणी बोलींहम गोगुंह। तीयाअ लीदे, आंय पोरमेहेराअ आभार मानुंह। 19 तेबी, मोंडोळाअ जाहेर आरादनाम ओजाणी बोलीम दोह हाजार सोब्दा गोगुं तीयाअ केअता, उनाअनाराहांन होमजाय एंहडी बोलीम तीयाहांअ फायदो वेअ एंहडा पांच सोब्दा गोगुं तों मांन वादारे गोंवें।
20 मेराला पावु-बोंअयुहुं, पोवीतोर आत्मा देहे तीया वोरदानुंअ बाबोताम तुमां हानांअ पोयराहांअ होच होमुज मा राखतें! खोटाय केरांअ बाबोताम हानांअ पोयराहांअ होच गुना वोगुराअ बोंणजा! पेन पोवीतोर आत्मा देहे तीया वोरदानुंअ बाबोताम आत्मीक रीते मोडा वेअला मांहांहांअ होचुज होमुज राखजा! 21 पोवीतोर लेखाणाहांम लेखलों हाय का,
“मालीख आखेह का,
‘मांअ सोताअ लोकाहांन चेतवांअ खातुर आंय
ओजाणी बोलींहम गोगनारा लोकाहांअ मारफोते तीयाहांअरी गोगेंह;
आने आंय पोरदेसी लोकाहांअ मुंयें बी तीयाहांअरी गोगेंह।
तेबी तें मांअ गोठ नांय मानीअ।’”
22 तीयाअ लीदे, होमजी लेजा का, ओजाणी बोलीम गोगुलोंअ वीसवास केअनारांअ खातुर नांय, पेन वीसवास नांय केअनारांअ खातुर पोरमेहेराअ हाजरीअ साबीती हाय; पेन पोरमेहेराअ गोठ जाहेर केरुलोंअ वीसवास नांय केअनारांअ फायदाअ खातुर नांय, पेन वीसवास केअनारांअ फायदाअ खातुर हाय। 23 तीयाअ लीदे, तुमां बादें आरादनाअ खातुर टोलवाया तांहांअ, जो बादेंज ओजाणी बोलींहम गोगांअ टेके, आने एंहडा आत्मीक वोरदानुंअ बाबोताम नांय जांअतें वीअ तेंहडें मांहेंअ, का वीसवास नांय केअनारें तींहीं आवे आने तुमनेंह बादाहांन एकुळ्येंज ओजाणी बोलींहम गोगता उनाय ता, तें तुमनेंह गांडेंज आखेकने? 24 पेन तीयाअ बोदले, तुमां बादें पोरमेहेराअ गोठ जाहेर केरा, आने वीसवास नांय केअनारें का जें एंहडें आत्मीक वोरदानुंअ बाबोताम नांय जांअतें वीअ तेंहडें मांहेंअ तींहीं आवे ता, तुमां जों आखा तीयाकींअ तीयाहांन सोताअ पापाहांअ भान वीअ आने पोरमेहेर तीयाहांअ नीयाय केअनारो हाय तों तें जांय जाय। 25 आने तुमांअ गोठ उनाअता तीयाहांअ मोनाहांअ वीचार जाहेर वीअ जाय आने तें कोबुल कीअ का, “पोरमेहेर खोरेखोर तुमांहम हाय” आने एंहकींअ आखीन तें गुठोणें पोळीन पोरमेहेराअ भोकती कीअ।
आरादनाम बादों रीतोसोर वेअ तीयाअ कालजी राखजा!
26 मांअ पावु-बोंअयुहुं, आमी लोगुंअ मांयुं जों काय आख्यों तों फाचों आंय टुकमें आखुंह: तुमां पोरमेहेराअ भोकती केरांअ टोलवाया तांहांअ, तुमाहांमेनेअ केडों भोजोन आखें, केडों बोद दे, केडों पोरमेहेरांय तीयाल खास रीते जाहेर केअली गोठ आखे, केडों ओजाणी बोलींहम गोगे, आने केडों ओजाणी बोलींहम आखाअली गोठीअ खुलासो दे। पेन तों बादों ईयाअ खातुर केरा का, बादा वीसवास्यांहन फायदो मीले, आने तों तीयाहांन मालीखुपेर्याअ वीसवासाम पाकें बोंणांअ मोदोत केअ। 27 पेअलांअ नांय हीक्या वीअ एंहडी बोलींहम तुमां गोगा ता, वादाराम-वादारे बेन-तीन जांएं गोगे! आने तें वार्यें-पारग्यें गोगे, आने तें जों गोगतेंह तीयाअ खुलासो बीहरों केडों दे! 28 पेन तीयाअ खुलासो दीअ सेके एंहडों केडों बी तींहीं हाजोर नांह एंहकींअ तीयाहांन पेअलांअनेअ खोबुर वेअ ता, तें जाहेर आरादनाम तीयु बोलींहम नांय गोगे। पेन सोताअ मोनु-मोनाम सोत-सोताअ पोंगाहांम पोरमेहेराअरी तींहमें गोगे!
29 पोरमेहेरांय तीयाहांन ओमुक गोठ जाणावीह एंहकींअ जें धारतेंह, तीयाहांमेनेअ बेन का तीन जांएं ते गोठ जाहेर केअ। आने बीहरें बादें ते गोठ खोरेखोर पोरमेहेरापेनेअ आलीह का नांह तों नोक्की केअ! 30 पेन तींहीं बोठलांहमनेअ केडाल बी पोरमेहेर खास गोठ जाहेर केअ ता, पोरमेहेरांय सोताल ओमुक गोठ जाणावीह एंहकींअ धारनारों, ते गोठ आखता ओटकी जाय, आने जीयाल पोरमेहेरापेनेअ खास गोठ मीलीह तीयाल गोगांअ दे! 31 एंहकींअ कीईन, पोरमेहेरांय सोताल ओमुक गोठ जाणावीह एंहकींअ धारनारें बादें वार्यें-पारग्यें ते गोठ जाहेर केअ, ईयाअ खातुर का, बादें वीसवासी आत्मीक गोठ्या हीके आने तीयाहांन बादाहांन उफ मीले। 32 ईत राखजा का, पोरमेहेराअ गोठ जाहेर केरांअ वोरदान केंहडीवेल वापरुलोंअ तों, तों वोरदान मीलवुअला वीसवास्यांअ आथामुज हाय, आने तीयाअ लीदे तें सोताअ गोगुलोंअ वारी आवे तांव लोगुंअ उबी रीअ सेके। 33 काहाका, जाहेर आरादनाम आपुंह खागा-वागा वोरतुअजी, एंहडी पोरमेहेराअ मोर्जी नांह, पेन बीहरा बादा मोंडोळुंहम चालेह तेंहकींअ, आपुंह बी एक-बीहराअरी होप कीईन आने सांतीम वोरतुअजी, एज तीयाअ मोर्जी हाय।
34 जाहेर आरादनाम वीसवासी बाया ठाकयाज रे! बोदाअ बाबोताम सावाल फुचीन ते आरादनाम ओळचोण पेदा केअ तों बोराबोर नांह। नीयोम चोपळीम लेख्या पोरमाणे, ते सोताअ कोअवालाहांअ ताबांम रे! 35 तीयुहुंअ काय बी जांणांअ मोर्जी वीअ ता, ते कोअमें सोताअ कोअवालाल फुचे। काहाका, जाहेर आरादनाम ओळचोण पेदा केअ एंहकींअ बाया बोदाअ बाबोताम सोवाल फुचे तों सोबतों नांह। 36 आंय जों आखुंह तों जो तुमां नांय मानतें वीअ ता आंय एंहकींअ जोवाब दीहुं: ईत केरा का पोरमेहेराअ गोठ पेअलांअम-पेअलांअ तुमांअहींनेअ नांह आली, आने ते गोठ उनाअनारें बी तुमां एखलें नांह। 37 “आंय पोरमेहेराअ गोठ जाहेर केअनारों हाय” का “आंय आत्मीक मांहुंअ हाय” एंहकींअ तुमाहांमेनेअ जों केडों धारे ता, तीयाअ जांणांअ जोजे का, आंय तुमनेंह लेखुंह तो बी मालीखाअज हुकोम हाय। 38 पेन जो तों ईयापेअ धीयान नांय दे ता, पोरमेहेर बी तीयापेअ धीयान नांय दीअ।
39 तीयाअ लीदे मेराला पावु-बोंअयुहुं, पोरमेहेराअ गोठ जाहेर केरांअ वोरदान मीलवांअ खुब मोर्जी राखजा।