15
ख्रीस्त जीवतो उठ्यो तोज हारी गोठीअ आदार हाय
1 आमी मेराला पावु-बोंअयुहुं, मांयुं तुमनेंह पेअलांअ जाहेर केअली हारी गोठीअ बाबोताम फाचो तुमनेंह ईत केरावीन आंय तीयाअ ओर्थो होमजावांअ मागुंह। ते गोठ तुमां मानी लेदली आने तीयाअ पोरमाणे चालीन तुमां वीसवासाम पाकें बी वीयेंह। 2 मांयुं तुमनेंह जों आखलों तीयापेअ जो तुमां पाको वीसवास राखी रा तांहांअज एंहकींअ आखाय का पोरमेहेर तुमनेंह तीयु हारी गोठीकींअ वाचावतो रेहे। नेता तीयाअ ओर्थो ओ हाय का, तुमां नोक्कामोज वीसवास केअयोह।
3 ख्रीस्तुपनेअ मांयुं हीकली तेज खास मुददाअ गोठ मांयुं तुमनेंह बी हीकवुअली। ते गोठ ए हाय: पोवीतोर लेखाणाहांम लेख्या पोरमाणे ख्रीस्त आपुअ पापाहांअ खातुर मोअयो। 4 लोकाहीं तीयाल डाट्यो, आने पोवीतोर लेखाणाहांम लेख्या पोरमाणे पोरमेहेरांय तीजे दीह तीयाल फाचो जीवतो उठव्यो। 5 हातींअ तीया ख्रीस्तुल पीतोरांय a देख्यो। आने हातींअ बीहरा सोमोयाम मालीखाअ दोह खास चेलाहां b तीयाल देख्यो। 6 फाचलांअ नेअ पांचसो केअता बी वादारे चेलाहां तीयाल एकुज सोमोयाम देख्यो। तीयाहांमेनेअ घोणें आजी जीवतेंज हाय। पेन थोळेंक ता मोय गीयेंह। 7 हातींअ याकोबांय तीयाल देख्यो। आने हातींअ मालीखाअ खास चेलाहां तीयाल देख्यो। 8 आने सेल-सेल्ले मांयुं बी तीयाल देख्यो। आंय ख्रीस्ती वीसवासी बोंणलो तों, मान्याम बी नांय आवे एंहडों आने आरदा मोयने पोळी गेहला गोरबुअ होच नाजवावे एंहडों आथों। 9 काहाका, मालीखाअ खास चेलाहां म आंय एकदोम उतरुअतो हाय। आने आंय मालीखाअ खास चेलो आखावांअ लायोक बी नांह। काहाका, मांयुं पोरमेहेराअ मोंडोळाअ लोकाहांन सोतावला।
10 पेन, आमी आंय जोंबी काय बोंण्योह तों, पोरमेहेराअ मेरबानीअ लीदेज हाय, आने मांअपेअ एंहडी मेरबानी कीईन तीयांय मांन मालीखाअ खास चेलो बोणाव्योह तों नोक्कामों नांह गीयों। मालीखाअ बीहरा बादा खास चेलाहांअ केअता मांयुं वादारेज मेहनोत केअयीह। ते मेहनोत खोरेखोर मांयुं मांअ जाते नांह केअयी, पेन पोरमेहेरांय मांन देदला वोरदानुंकींअज मांयुं ते मेहनोत केअयीह। 11 ते हारी गोठ, मांयुं जाहेर केअयीह का, मालीखाअ बीहरा खास चेलाहां जाहेर केअयीह, ते खास बाबोत नांह। खास बाबोत ता ए हाय का, आमां बादा एकुज हारी गोठ जाहेर केअताह, आने तुमां बी ईयुज हारी गोठीपेअ वीसवास केअयोह।
मोअलें मांहेंअ फाचें जीवतें उठीअ ते गोठ
12 तांहांअ आमां एंहडी हारी गोठ जाहेर केअताह का, पोरमेहेरांय ईसु ख्रीस्तुल मोअलामेनेअ फाचो जीवतो उठव्योह। तांहांअ तुमांअमेर्याअ थोळाक लोक काहाल एंहकींअ आखताह का, पोरमेहेर मोअला मांहांहांन फाचें जीवतें नांय कीअ? 13 जो पोरमेहेर मोअला मांहांहांन फाचें जीवतें नांय उठवीअ ता, आपुंह एंहकींअ बी आखी नांय सेकजी का, तीयांय ख्रीस्तुल मोअलामेनेअ फाचो जीवतो उठव्योह। 14 जो तीयांय ख्रीस्तुल मोअलामेनेअ जीवतो नांय उठव्यो वीअ ता, तीया बाबोताम आमां जे हारी गोठ आखताह तों बी नोककामों हाय। आने तीयु हारी गोठीपेअ तुमां केअलो वीसवास बी नोक्कामो हाय। 15 आने आमां मालीखाअ खास चेला बी पोरमेहेराअ बाबोताम झुटों आखनारा गोंणांअजी, काहाका आमां तुमनेंह आख्योंह, तीयांय ख्रीस्तुल मोअलामेनेअ फाचो जीवतो उठव्यो। पेन पोरमेहेर मोअला मांहांहांन फाचें जीवतें नांय उठवीअ ता, तीयांय ख्रीस्तुल बी जीवतो नांह उठव्यो एंहडों वेअहे। 16 जो पोरमेहेर मोअला मांहांहांन फाचें जीवतें नांय उठवीअ ता, तीयांय ख्रीस्तुल बी जीवतो नांह उठव्यो एंहडों वेअहे। 17 आने जो पोरमेहेरांय ख्रीस्तुल जीवतो नांह उठव्यो ता, ख्रीस्तुपेअ तुमां राखलो वीसवास नोक्कामो हाय, आने पोरमेहेरांय आजी लोगुंअ तुमांअ पाप माफ नांह केअया एंहडों वेअहे। 18 आने एंहकींअज वीअ ता, जेंबी ख्रीस्तुपेअ वीसवास राखीन मोअयेंह, तीयाहांन बादाहांन पोरमेहेर गुनालेंज गोंईंअ एंहकींअ आखाय। 19 ईयु जीनगीअ फायदाअ पुरतीज आपुंह ख्रीस्तुपेअ आस्या राखजी ता, दुन्याअ बीहरा बादाहांअ केअता आपुंह वादारे कींअवालें मांहेंअ आखाअजी।
20 पेन होकीकोतुम ता, पोरमेहेरांय ख्रीस्तुल मोअलामेनेअ जीवतो उठव्योह। ईं एंहडी खातरी देहे का, पोरमेहेर मोय गेअला वीसवास्यांहन बी c मोअलामेनेअ जीवतें उठवीअ। 21 एक मांहांय, मोंजे आदामुंह जों केअलों तीयाअ पोरीणामो आपुंह बादेंज मोअतेंह। d तेंहकींअज बीहरा मांहांय, मोंजे ख्रीस्तंह जों केअयोंह तीयाअ पोरीणामो पोरमेहेर मोय गेअला वीसवास्यांहन बादाहांन फाचें जीवतें उठवीअ। 22 आदामुंह जों केअलों तीयाअ पोरीणामो आपुंह बादेंज मोअतेंह। तेंहकींअज ख्रीस्तंह जों केअलों तीयाअ पोरीणामो पोरमेहेर आपनेंह बादाहांन मोअलामेनेअ जीवतें उठवीअ। 23 पेन बादें सोत-सोताअ वारी पोरमाणे जीवतें उठीअ: पेअलांअम-पेअलांअ पोरमेहेरांय ख्रीस्तुल जीवतो उठव्यो। ख्रीस्त फाचो आवीअ तांहांअ तीयाअ लोकाहांन पोरमेहेर फाचा जीवता उठवीअ।
24 हातींअज दुन्याअ ओंत आवीअ। तांहांअ ख्रीस्त जुग-तोरतीपेअ राज केअनारा पुतळाहांअ रुपी दुसमोनाहांन हारवीन पोरमेहेर बाहकाल राज होपी दीअ। 25 मोंजे, ख्रीस्त तीयाअ बादा दुसमोनाहांन हारवीन सोताअ पागे पोळावे तांव लोगुंअ तो सोतेज राज केअ तेज पोरमेहेराअ मोर्जी हाय। 26 बादाहांअ सेल्ले ख्रीस्त जीया दुसमोनाअ नास कीअ तों ता मोत हाय। 27 काहाका, पोवीतोर लेखाणाहांम एंहडों लेखलों हाय का, “पोरमेहेर तीयाल बादी वोस्ताहांपेअ आदीकार दीअ।” (बादी वोस्ताहांपेअ एंहडों लेखलों हाय ईंहमें पोरमेहेर सोते नांह होमाअतो; काहाका, बादी वोस्ताहांपेअ ख्रीस्तुल आदीकार देनारो ता पोरमेहेरुज हाय।) 28 आने जीयु वोखत पोयरो मोंजे ख्रीस्त बादापेअ जीत मीलवीअ, तांहांअ तो सोताल पोरमेहेराल होपी दीअ, ईयाअ खातुर का, पोयराल बादी वोस्ताहांपेअ आदीकार देनारो पोरमेहेर बादी जागर्याअ बादाअ उपरी बोंणे।
29 मोय गेअला वीसवास्यांहन पोरमेहेर फाचें जीवतें नांय उठवे ता, तीयाहांअ खातुर बीहरा लोक बापतीस्मा ले तीयाकींअ काय फायदो हाय? मोय गेअला वीसवास्यांहन पोरमेहेर कीदीह बी जीवतें नांय उठवे ता, तीयाहांअ खातुर केडों बापतीस्मा ले तीयाअ काय जोरुल हाय?
30 आने आमां मालीखाअ खास चेला बी आमांअ जीव-जोखोमुअ काम कीईन घेळी-घेळी दुखें काहाल वेठजी? 31 मेराला पावु-बोंअयुहुं, आपुअ मालीख ईसु ख्रीस्तुअ आर्याअ आपुअ सोबोंदुअ लीदे आंय तुमांअ बाबोताम ओभीमान कीअहुं ए गोठ जेंहकींअ हाची हाय, तेंहकींअज, रोददीह आंय मांअ जीव मुठीमुज लीईन फीरुंह ए गोठ बी हाची हाय। 32 जो मोअलें मांहेंअ फाचें जीवतें नांय उठीअ एंहडों वीअ ता, एफेसु सेहेराम ओळखाअला जोनावोराहांअ होच जें मांहेंअ आथें, तीयाहांअरी ईयु बाबोताम वीअगीन मांन काय फायदो वीयो? जो मोअलें मांहेंअ फाचें जीवतें नांय उठीअ एंहडों वीअ ता, “चाला, आपुंह आज खाय-पीन मोज्या केअजी! काहाका, हाकाल ता आपुंह मोय जानारें हाय!” एंहकींअ आखायकने!
33 एंहडों आखनारा मांहांयकींअ ठोगाअतें मां! काहाका, “खाराब सोबोंदुकींअ हारा मांहांअ बी चाल-चोलगोत्या बीगळी जात्याह।” 34 भानुम आवी जा आने पाप केरांअ सोळी दा। तुमनेंह नाजवावांअ खातुरुज आंय आखुंह, तुमांअमेर्याअ थोळाक लोक पोरमेहेराल ओअखुअताज नांह।
मोअलें मांहेंअ जीवतें वीअ तांहांअ तीयाहांअ सोरीलें केंहडें वीअ?
35 पेन एगोंह एंहकींअ फुचे का, “मोअला मांहांहांन केंहकींअ जीवतें उठवाय? तीयाहांअ सोरीलें केंहडें वीअ?” 36 एंहडा सोवाल फुचनारों केडों बी गांडों मांहुंअ हाय। तुल खोबुर हाय का, तुं पोअहो तीया बीयाराअ दाणों जांव लोगुंअ सोताअ रुप नांह बोदलुअतो, eतांव लोगुंअ तीयाअ सोडो नांह उगतो। 37 तीयाल तुं सोडाअ रुपाम नांह पोअतो, पेन खाली गोंवांहांअ हुकलो ने हानोअ बीयारो, नेता बीहरा केंहडाअ बी बीयारो पोअहो। 38 हातींअ पोरमेहेर सोताल गोंवें एंहडों रुप तीया बीयाराल देहे। आने जुदी-जुदी जातीअ बीयाराअ सोत-सोताअ जाती पोरमाणे जुदा-जुदा रुप आवे एंहडों तो केअहे। 39 बादा जीव-जीवळांअ मांह एक हारकों नांह रेतों। मांहांअ मांह जुदों, जोनावोराहांअ मांह जुदों, चीळाहांअ मांह जुदों, आने मासाहांअ मांह जुदों रेहे। 40 जुगामेर्याअ वोस्ताहांअ बी सोरीलें हाय, आने तोरतीपेर्याअ मांहांहांअ बी सोरीलें हाय। जुगामेर्याअ वोस्ताहांअ सोबा ओलोग हाय आने तोरतीपेर्याअ मांहांहांअ सोबा ओलोग हाय। 41 दीहाअ तेज जुदों, चांदाअ तेज जुदों, आने तारांअ तेज जुदों रेहे। आने तारां-तारांअ तेजुम बी फेर हाय।
42 मोअला मांहांहांन जीवतें उठवाय तांहांअ बी एंहडोंज वीअ। मोयन होळी जानारें आपुअ सोरीलें फाचें जीवतें उठवाय तांहांअ ओलोगुज रीअ। तें फाचें कीदीह बी नांयज मोए। 43 डाटाअतेंह तांहांअ आपुअ सोरीलें सोबा वोगुराअ आने नोबलें रेतेंह। पेन जीवतें उठवाय तांहांअ तें सोबालें आने गोतीवालें रीअ। 44 डाटाअतेंह तांहांअ तें आटका-चांबळाअ सोरीलें रेतेंह; पेन जीवतें उठवाय तांहांअ तें पोरमेहेराअ आत्माअ पुरा काबाम रेनारें सोरीलें fवीअ। काहाका जेंहकींअ आटका-चांबळाअ सोरीलें हाय, तेंहकींअ पोरमेहेराअ आत्माअ पुरा काबाम रेनारें सोरीलें g बी हायज।
45 पोवीतोर लेखाणाहांम एंहकींअ लेखलों हाय का, “पेअलोअ आदमी आदाम होरजाअयो तांहांअ तो जीवतों मांहुंअ बोंण्यो।” फाचलांअ नेअ आललो ख्रीस्त बी मांहुंअज बोंण्यो, पेन तो आदामाअ से जुदो हाय। काहाका, तो आपनेंह नोवों जीवोन देहे। 46 पेल्लांम-पेल्लोंअ आवनारों ता आटका-चांबळावालों सोरील हाय; हातींअज आत्मीक सोरील आवेह। 47 पेअलों मांहुंअ आदामुल पोरमेहेरांय तोरतीअ कादुमनेअ बोंणाव्यो। पेन बीहरों मांहुंअ ख्रीस्त ता होरगामेनेअ आलो। 48 तोरतीअ कादुमनेअ बोंणला आदामाअ सोरीलाअ होचुज तोरतीपेर्याअ बादा मांहांहांअ सोरीलें हाय। पेन पोरमेहेर आपनेंह मोअलामेनेअ जीवतें उठवीअ तांहांअ, आपुअ सोरीलें बी होरगामेर्याअ ख्रीस्तुअ सोरीलाअ होचुज वीअ। 49 आदामाअ जेंहडों सोरील आथों तेंहडें सोरीलें आमी आपुअ बी हाय। तेंहकींअज मांहांअ पोयराअ मोंजे ख्रीस्तुअ जेंहडों सोरील हाय, तेंहडेंज एक दीह आपुअ बी नोवें सोरीलें वीअ।
50 मेराला पावु-बोंअयुहुं, आंय जों आखांअ मागुंह तों ईं हाय का, आपुअ ईं सीदें-सादें सोरीलें पोरमेहेर राज केअहे तीया होरगाम जाय नांह सेकतें। नास वेअनारें आपुअ ईं सोरीलें कायोमाअ खातुर जीवी नांह सेकतें। 51-52 पोरमेहेरांय मांन जाहेर केअली भेदुवाली गोठ आमी आंय तुमनेंह आखुंह। ते गोठ ए हाय का, युगुअ ओंत आवेह तों जाणावनारो पीपारो वाजीअ। तोताअमुज आपुंहमेर्येंअ थोळेंक मोय गीयें वीअ तेबी एक घेळीमुज, मोंजे डोंओं मीमरावे ओताअज सोमोयाम , तीया मांहांहांअ आने जीवता रेहला आपुअ वेह बोदलाय जाय। काहाका, पीपारो वाजीअ तांहांअ, जे ख्रीस्ती वीसवासी मोय गीयेंह तें, नास नांय वीअ तेंहडा सोरीलाहांअरी जीवतें उठीअ। आने हातींअ तांहांअ जीवतें रेनारा आपुअ वेह बी बोदलाय जाय, ईयाअ खातुर का, आपुंह हातींअ कीदीह बी नांय मोअजी। 53 काहाका, नास वेअनारा आपुअ ईया सोरीलाहांअ बोदलायन नास नांय वेअ एंहडें बोंणांअ जोजे, आने मोय जानारा ईया सोरीलाहांअ बोदलायन ओमोर बोंणांअ जोजे।
54 जांहांअ एंहडों बोंणीअ, मोंजे का, जांहांअ नास वेअनारें आपुअ ईं सोरीलें बोदलायन नास नांय वेअ एंहडें बोंणीअ आने मोय जानारें आपुअ ईं सोरीलें ओमोर बोंणीअ, तांहांअ पोवीतोर लेखाणाहांम जों लेखलों हाय तों आखरीप खेरों पोळीअ। तींहमें एंहकींअ लेखलों हाय का,
“मोताअ नास वीयोह आने आपनेंह पुरी जीत मीलीह!
55 मोत हाराय गीयोंह!
मोत आमीनेअ आपनेंह कीदीह बी नुकसान कीअज नांय सेके!” 56 आपनेंह नुकसान केरांअ ताकोत मोतुल, आपुंह पाप केअतेंह तींहमेंनेअ मीलेह, आने आपुअ नास केरांअ ताकोत पापुल, पोरमेहेरांय मोसेल देदला नीयोमुंहमनेअ मीलेह। 57 आपुअ मालीख ईसु ख्रीस्तुअ मारफोते आपनेंह पापुपेअ आने मोतुपेअ जीत देनारा पोरमेहेराअ आपुंह आभार मानजी! 58 तीयाअ लीदे, मांअ मेराला पावु-बोंअयुहुं, मांहांहांन मोअलामेनेअ पोरमेहेर फाचें जीवतें उठवीअ एंहडा तुमांअ वीसवासाम मोजबुत रेजा! आने केल्ली बी बाबोत तीया वीसवासुपेअ तुमनेंह सोंका केरावे एंहडों बोंणांअ मा देतें! आने मालीखाअ सेवाम कायोम पुरी रीते चोटलें रेजा! काहाका, तुमां जांअतेंह का, मेहनोत कीईन मालीखाअ सेवाम तुमां जोंबी केअतेंह, तों कीदीह बी नोककामों नांय जाय, पेन तीयाअ तुमनेंह फोलवों मीलीअज।