16
येरुसालेमामेर्याअ गोरीब वीसवास्यांअ खातुर पोयसाहांअ मोदोत
1 येरुसालेमामेर्याअ पोरमेहेराअ लोकाहांन मोदोत केरांअ खातुर मांयुं तुमनेंह जे पोयसा टोलवांअ आखलों, तीया बाबोताम तुमां मांन फुच्योंह। तीया बाबोताम आमी आंय तुमनेंह लेखुंह। गालातीया वीस्ताराअ मोंडोळुंन ईयु बाबोताम मांयुं जे सालाह देदीह, तेंहकींअज तुमां बी केअजा। 2 दोर रोवीवारे, तुमांअमेर्योअ दोरेक वीसवासी सोत-सोताअ कामाणी पोरमाणे थोळाक पोयसा ईया दानुअ खातुर ओलोग काडीन थोवी राखे। तुमां एंहकींअ कीअहा ता, आंय आवुं तांहांअ ते उगरावांअ जोरुल नांय पोळे। 3 आंय तींहीं आवेंह तांहांअ आंय, तुमां टोलवुअलों दान लीअ मोकलांअ जीयाहांन तुमां पोसोंद केरा तीयाहांन ओअखावांअ आने तीयाहांअ भोलामोण केरांअ कागलों लेखी देहें, आने तीयाहांअ मारफोते तों दान येरुसालेमामेर्याअ पोरमेहेराअ लोकाहांन मोकली दीहुं। 4 आने मांअ बी येरुसालेम जांअ जोजे एंहडों तुमनेंह लागे ता, आंय तीयाहांअरी जाहें।
पावुलाअ सेल्ली सालाह
5 आंय माकेदोनीया वीस्ताराम पादरो जानारो हाय। तांहांअ माकेदोनीया वीस्तारुल उनखीन तुमांअहीं आवेंह; 6 तांहांअ कादास आंय तुमांअहीं थोळाक वोखताअ खातुर रोकाअहें। बोंणी सेके ता, आखों हीयालों तींहींज रोकाअहें। हातींअ मांअ जींहीं जांअ वेअ तींहीं जांअ खातुर वाट खोरची दीईन तुमां मांन वाटे पाळी सेकाह। 7 आमी वाटे जातीअ वोखत तुमनेंह उबा-उबाज मीली लीईन जांअ मांअ मोर्जी नांह। काहाका, मालीखाअ मोर्जी वीअ ता, थोळाक दीह तुमांअहीं रोकाय सेकुं एंहडी मांअ आस्या हाय। 8 पेंतेकोस्त तेहवारु लोगुंअ आंय ईंहीं एफेसु सेहेरामुज रांअ हाय। 9 काहाका, हारों पोरीणाम आवे एंहडों काम केरांअ खातुर मांन ईंहीं हारो मोको मील्योह आने खुब मांहेंअ हारी गोठ मानी बी लेतेंह। पेन हारी गोठीअ वीरुद केअनारें बी ईंहीं खुब हाय।
10 तीमोथी तींहीं आवे आने तो तुमांअहीं रोकाय तांहांअ तीयाअरी एंहडों वोरतुअजा का, तीयाल तुमांअ बीख नांय लागे! काहाका, तो बी मांअ होचुज मालीखाअ सेवा केअहे। 11 मोंजे केडों बी तीयाल ओलको नांय गोंणांअ जोजे। तो मांअहीं फाचो आवी पोचे तीयाअ खातुर तुमां तीयाल हारकींअ वाटे पाळी देजा! ईंहींर्येंअ वीसवासी पावु-बोंअयांह आने आंय तीयाअ वाट जोवतेंह।
12 आमी आंय आपुअ ख्रीस्ती पावुह आपोल्लोअ बाबोताम लेखुंह। मांयुं तीयाल बीहरा पावुंअरी तुमांअ मुलाकात लांअ खुब वोखत उफ देदलो, पेन तुमांअहीं आमी आवांअ तीयाअ मोर्जी नांह। मोको मीलीअ तांहांअ तो तुमांअहीं आवीअ।
सेल्या गोठ्या
13 तुमांअ आत्मीक जीवोनाहांअ खातुर जे जे बाबोत्या खोतोरनाक हाय, तीयुहुंअ से चेतीन रेजा! मालीखापेअ तुमां राखला वीसवासाम मोजबुत रेजा! हींमोतुवालें ने गोतीवालें बोंणजा! 14 बादों काम मायालु मोने केअजा!
15-16 स्तेफानुल आने तीयाअ कोर्यांहन तुमां ओअखुअतेंह। आखाया वीस्ताराम मालीखापेअ पेअलांम-पेअलांअ वीसवास केअनारें तेंज आथें। पोरमेहेराअ बीहरा लोकाहीं अ सेवा केरांअ खातुर तीयाहां सोताअ जीवोन ओरपोण केअयोंह। मेराला पावु-बोंअयुहुं, आंय तुमनेंह एंहकींअ कालावाला कीअहुं: एंहडा लोकाहांन आने तीयाहांअ होच एंहडा खेरा ओरपोणुकींअ सेवा केअनारा बीहराहांन पुरतों मान दा। 17 स्तेफाना, फोरतुनातु, आने आखायकु, तीनुं तुमांअ सेहेरनेअ मांअहीं आलाह। तीयाअ लीदे, जे मोदोत तुमां मांन कीअ नांह सेक्यें, ते मोदोत तीयाहां मांन केअयीह। 18 ते ईंहीं आवीन मांन मील्या तीयाकींअ तीयाहां मांन ने तुमनेंह खुब उफ देदोह। एंहडा लोकाहांन खुब मान देजा!
19 आसीया राज्यामेर्याअ ईंहींर्याअ मोंडोळुंअ लोक तुमनेंह सालाम देताह। आकवीला आने तीयाअ कोअवाली पीरीस्कीला आने तीयाहांअ कोअमें टोलवाअनारा मोंडोळाअ लोक बी तुमनेंह मायालु सालाम देताह। 20 ईंहींर्याअ बादा वीसवासी लोक बी तुमनेंह सालाम देताह।
ख्रीस्ती पावु-बोंअयुंअ तोरीके तुमां बी एक-बीहराल भेटीन सालामी केअजा!
21 जीयापेअ आंय ईं कागलों लेखावुंह तीयापेनेअ पेन मागीन आंय पावुल सोते बी आमी मांअ सोताअ आथाकींअ लेखीन तुमनेंह सालामी दीहुं। 22 तुमाहांमेनेअ जों केडों बी मालीखापेअ माया नांय राखे, तीयाल पोरमेहेर हाराप दे! ओ आमांअ मालीख, आव! 23 मालीख ईसु तुमाहांपेअ मेरबानी केअ! 24 ख्रीस्त ईसुअ आर्याअ तुमांअ सोबोंदुअ लीदे आंय तुमांअ बादाहां पेअ माया राखुंह।