13
पावुलाअ सेल्या हीकामोण्या
1 ए तीजी वोखत आंय तुमांअ मुलाकात लांअ आवनारो हाय। पोरमेहेरांय पोवीतोर लेखाणाहांम एंहडो हुकोम केअयोह का, “केल्लों बी मांहुंअ बीहरा मांहांपेअ दोस थोवे ता, तों ओसाम-ओसी बेन-तीन साक्सीहींअ आदारेज साबीत वेरांअ जोजे।” 2 मांअ आगली मुलाकातुअ वोखत मांयुं, जें पाप केअया केअत्लें तीयाहांन चेतवोंणी देदली का, आंय तीयाहांन सीक्सा केअहें। तेंहकींअज कीईन आमी बी, मोंजे, आंय तुमांअ से सेटे हाय तांहांअ बी, आंय फाचो तीयाहांन आने बीहरा बादाहांन चेतवोंणी दीहुं का, आमी फाचो आंय तुमांअहीं आवेंह तांहांअ आंय, पाप केअया केअनारा तीया मांहांहांन कोळोक सीक्सा केअया वोगुर नांय सोळुं। 3 तुमां मांअपेअ मागणी केअयीह तीयाअ लीदे आंय तुमनेंह, ख्रीस्तज मांन गोगावेह तीयाअ जोजत्या बादया साबीत्या देहें। ख्रीस्त तुमांअ पापी सोबावुल वेठी लेनारो नांह। पेन उलटों, तो सोताअ ताकोताकींअ तुमनेंह सीक्सा कीअ। 4 ख्रीस्तुल मांहांहां कुरुसापेअ जोळीन माय टाकलो तांहांअ तो ताकोतु वोगुराअ लागत्लो ता खेरोज। पेन पोरमेहेरांय तीयाल सोताअ ताकोताकींअ फाचो जीवतो केअयो तीयाअ लीदे ख्रीस्त आमी जीवतो हाय, ते बी होकीकोतुज हाय। एंहकींअज कीईन, जेंहकींअ ख्रीस्त पेअलांअ गोती वोगुराअ आथो तेंहकींअ, आंय बी पोरमेहेराअ सेवा केअता-केअता गोती वोगुराअज हाय। पेन आंय फाचो जीवता उठला ख्रीस्तुअरी जोळाअलो बी हाय। मोंजे, जो तुमां तुमांअ पापी चाल-चोलगोत्या नांय बोदला ता, तीयाअ आदीकार आने पोरमेहेराअ ताकोताकींअ आंय तुमनेंह सीक्सा केअहें।
5 तुमां हाची रीते ख्रीस्तुपेअ वीसवास राखतेंह का नांह तों सोत-सोताअज पारखी हेअजा! आने तुमांअमेर्याअ दोरेकुअ खातरी केरांअ जोजे का, तुमां ख्रीस्तुअज हाय का नांह। तुमनेंह नोक्कीज खोबुर हाय का, ईसु ख्रीस्त तुमांअ मोनाहांम रेहे। पेन तो तुमांअ मोनाहांम रेहे एंहकींअ जो तुमां आखी नांय सेका ता, ईयाअ ओर्थो ओ हाय का, तुमांअ जो वीसवास हाय तो झुटो हाय। 6 मांन खातरी हाय का, आंय मालीखांय मोकलुअलो हाचो चेलो हाय का नांह तीयाअ पारखाम आंय पास वीअ गीयोह तों बी तुमनेंह खोबुर हाय।
7 आंय तुमनेंह सीक्सा केरांअ नांह मागतो। तीयाअ लीदे, आंय पोरमेहेराल एंहडी ओरुज कीअहुं का, जे खाराब बाबोत्या केअतें देखीन तुमनेंह मांअ सीक्सा केरांअ पोळेह ते बाबोत्या नांय केरा तीयाअ खातुर तो तुमनेंह मोदोत केअ। जे लोक आंय मालीखाअ खास चेलो नांह एंहडों आखताह, ते तुमनेंह आंय सीक्सा द्युंव तों देखे तांहांअज, ख्रीस्तुंह मांन तो आदीकार देदोह तों माने एंहडों आंय नांह मागतो। पेन उलटों, आंय ता एंहडों मागुंह का, तुमनेंह सीक्सा कीईन, मांअ तो आदीकार देखावांअ मांन तोक नांय मीले तीयाअ लीदे तीया लोकाहांअ पारखाम आंय पास नांह वीयो एंहकींअ मांअ वीरुद केअनारा धारे तेबी, तुमां हाची रीते वोरतुअतें रा। 8 जो तुमां हारोंज केरा ता, आंय तुमनेंह सीक्सा नांय क्युंव। काहाका, पोरमेहेराअ हाची गोठीअ वीरुद आंय काय बी नांह कीअ सेक्तो। पेन, आंय ता तीयु गोठीहींअ पोरमाणे चालांअ मांहांहांन मोदोत कीअ सेकुंह। 9 आंय गोती वोगुराअ हाय एंहकींअ मांहेंअ धारतेंह तांहांअ, तीयाकींअ मांन काय फेर नांह पोळतो। काहाका, तुमां पाका पाये ख्रीस्तुअ आखलों मानतेंह तों देखीन आंय ता खुसुज हाय, आने तुमनेंह सीक्सा केरांअ मांअ तो आदीकार देखावांअ जोरुल नांह रेती। आंय पोरमेहेराल एंहडी ओरुज कीअहुं का, तो तुमांअ चाल-चोलगोतींहन खामी वोगुराअ बोंणावे। 10 तीयाअ लीदेज, तुमांअ से सेटे हाय तांवज ए बाबोत्या आंय लेखुंह, ईयाअ खातुर का, आंय तुमांअहीं आवुं तांहांअ तुमांअ चाल-चोलगोत्या पोरमेहेराल गोंवें एंहडया हाय तों देखीन, मालीखांय मांन जो आदीकार देदोह तो वापरीन मांअ तुमांअरी कोळोक रीते वोरतांअ नांय पोळे। मालीखांय तो आदीकार मांन तुमनेंह तीयापेअ वीसवास केअता ओटकावांअ खातुर नांह देदो, पेन तीयापेर्याअ वीसवासाम तुमनेंह मोडें बोंणावांअ खातुरुज देदोह।
पावुलाअ सेल्या सालाम्या
11 हारों, मांअ पावु-बोंअयुहुं, ए सेल्या गोठ्या लेखीन आंय ईं कागलों पुरों कीअहुं: खुस रेजा! तुमांअ चाल-चोलगोत्या पुरी रीते हुदारजा! मांयुं तुमनेंह जे सालाह देदीह तीयाअ पोरमाणे चालजा! ईयु बाबोतींहम तुमां एकुज मोनुअ बोंणजा! एक-बीहराअरी सांतीम रेजा! जो तुमां ईं बादों कीअहा ता, एक-बीहरापेअ माया राखांअ आने एक-बीहराअरी सांतीम रांअ तुमनेंह मोदोत केअनारो पोरमेहेर तुमनेंह आसीरवाद दीअ। 12 पोरमेहेराअ कुटुंबुअ मांहांहांअ तोरीके, तुमां एक-बीहराल मायालु सालाम देजा! 13 पोरमेहेराअ ईंहींर्याअ बादा लोक तुमनेंह सालाम देताह। 14 आपुअ मालीख ईसु ख्रीस्त तुमांअ बादाहां पेअ कायोम मेरबानी केअतो रे, पोरमेहेर बाहको तुमांअ बादाहां पेअ कायोम माया राखतो रे, आने पोवीतोर आत्मा कायोम तुमनेंह बादाहांन एक-बीहराअरी सोंगोत राखावतो रे।