12
पावुलुल वेअलें दोरसोनें आने पोरमेहेरांय तीयाल जाहेर केअल्या गोठ्या
1 मोडया-मोडया गोठ्या कीईन मांन काय फायदो नांह तेबी, आंय तेंहडों केरांअ चालु राखुंह। तीयाअ लीदे, मालीखांय ओमुक आदमील देदला दोरसोनुंअ बाबोताम, आने तीयांय तीयाल चोमोत्काराअ रीते जाहेर केअली गोठीहींअ बाबोताम आंय तुमनेंह आखुंह। ईं बादों आखांअ कारोण ईं हाय का, तींहींर्याअ थोळाक लोक ओभीमान राखीन आखताह का, तीयाहांअ बोद तीयाहांन दोरसोनुंहम मीलला। 2 चोवदा वोरसांअ पेअलांअ, आंय a उचाम-उचा होरगाम bउसली लेवाअलो। तांहांअ तींहीं आंय सोरीलाअरी आथो का सोरीलाअ वोगुराअ आथो, तों आंय नांह जांअतो, एखलो पोरमेहेरुज तों जांअहे। 3-4 तांहांअ आंय पारादीस नांवांअ जागे उसली लेवाअलो। तींहीं आंय सोरीलाअरी आथो का सोरीलाअ वोगुराअ आथो, तों आंय नांह जांअतो, एखलो पोरमेहेरुज तों जांअहे। तींहीं आंय एंहडया गोठ्या उनाअयो का जे सोब्दांहम आखीज नांय सेकाय आने जे आखांअ केल्ला बी मांहांअल राज्या बी नांह।
5 मांन वेअला तीया ओनुभोवुअ बाबोताम मोडया-मोडया गोठ्या कीअ सेकाय, पेन आंय तेंहकींअ नांय क्युंव। आंय ता मांअ नोबलाय देखावनारी बाबोतीहींअज मोडया-मोडया गोठ्या केअहें। 6 मांन वेअला दोरसोनुंअ बाबोताम आंय मोडया-मोडया गोठ्या क्युंव तेबी आंय गांडाअ होच गोगुंह एंहकींअ नांय आखाय। काहाका, जे होकीकोत हाय तेज आंय आखेंह। पेन आंय तीयु बाबोतीहींअ मोडया-मोडया गोठ्या नांय क्युंव, ईयाअ खातुर का, खाली तीया दोरसोनुंअ लीदेज तुमाहांमेनेअ केडों बी मांन मोडो नांय गोंएं। पेन उलटों, तुमां मांअ जीवोनाम जों देख्योंह आने मांअपेनेअ जे बोद तुमां उनाअयेंह, तीयाहांअ लीदे तुमां मांन मोडो गोंणा एंहडीज मांअ मोर्जी हाय। 7 पोरमेहेरांय देदला तीया दोरसोनुंअ लीदे आंय ओभीमानी नांय बोंणुं तीयाअ खातुर मांअ सोरीलाम आजार पेदा केअ एंहडा एक चेलाल मोकलांअ पोरमेहेरांय सेतानाल राज्या देदीह। तो आजार मांन कायोम काटाअ होच खुच्या केअहे। 8 तो आजार मीटावांअ मांयुं मालीखाल जुदी-जुदी तीन वोखत ओरुज केअली। 9 पेन दोरेक वोखत तीयांय मांन एंहकींअ आखी देदों का, “तो आजार वेठांअ आंय तुल गोती देहें, आने तेज तोअ खातुर पुरती हाय। काहाका, जांहांअ तुं नोबलो वीअहो, तांहांअज आंय मांअ ताकोत पुरी रीते देखावी सेकुंह।” तीयाअ लीदे मांन नोबलो बोंणावनारी वोस्ताहांअज आंय राजी-खुसी ने ओभीमान राखीन मोडया-मोडया गोठ्या केअहें, ईयाअ खातुर का, ख्रीस्तज मांन ताकोत देनारो हाय तों मांहेंअ हीअ सेके। 10 तीयाज कारोणे, आंय एंहकींअ आखी सेकुंह का, जांहांअ बी आंय नोबलो वीअहुं, आने जांहांअ मांहेंअ मांअ ओपमान केअतेंह, आने जांहांअ मांअपेअ आफोत्या आवी पोळत्याह, आने जांहांअ मांहेंअ मांन सोतावतेंह, आने जांहांअ ख्रीस्ताअ सेवाअ खातुर मांअपेअ मुस्कुल्या पोळत्याह, तांहांअ आंय खुब खुस रीहुं। काहाका, जांहांअ बी आंय नोबलो वीअहुं, तांहांअ ख्रीस्त मांन ताकोत देहे।
कोरींथ मोंडोळाअ लोकाहांअ खातुर पावुलाअ चींता
11 मांअ सोताअ बाबोताम एंहकींअ कीईन मोडया-मोडया गोठ्या केरुलोंअ मुरखाय हाय। पेन एंहडों केरांअ मांन फोरोज पाळनारें ता तुमांज हाय। मांअ बाबोताम तुमांअ वोखाण केरांअ जोजत्लों। आंय ना जेंहडो हाय तेबी, सोताल “मालीखाअ मोडा चेला” आखावनारा तीया लोकाहांअ केअता आंय केल्ली बी रीते ओसो नांह। 12 आंय तुमांअरी आथो तांहांअ मांयुं तुमनेंह खुब रीते साबीती देदली का आंय मालीखाअ खास चेलो हाय। मोंजे का, मांयुं तुमांअ आगलांअ नोवाय लागे एंहडें आने चोमोत्काराअ कामें धीरोज राखीन कीअ देखावलें आने तीयाकींअ तुमां पोरमेहेराअ ताकोत देखली। 13 आंय बीहरा मोंडोळाअ मांहांहांअरी वोरतुअलो तेंहकींअज तुमांअरी बी वोरतुअलो। तींहमें ओतोअज फेर आथो: तुमाहांपेअ वोजो नांय पोळे तीयाअ खातुर मांयुं मांअ सेवाअ बोदलाम तुमांहपनेअ पोयसा नांह लेदा। मेरबानी कीईन तीयु खोटायुअ लीदे मांन माफ केअजा!
14 तुमांअ मुलाकाते तीजी वोखत आवांअ आमी मांअ टेम वीयोह। दोर वोखताअ होच ईयु वोखत बी आंय तुमाहांपेअ पोयसाहांअ मागणी केअनारो नांह। काहाका, मांन तुमांअ पोयसा नांह जोजता, पेन उलटों तुमांज मांन जोजतेंह। वेहवारीक रीते, याहकी-बाहकाल पोहांअ खातुर पोयसा वाचावांअ फोरोज पोयराहांअ नांह रेती, पेन उलटों, पोयराहांन पोहांअ खातुर पोयसा वाचावांअ फोरोज याहकी-बाहकाअ रेहे। 15 तीयाअ लीदे, आंय तुमांअ मोदोत केरांअ खातुर मांअपेअ जोंबी हाय, तों बादों वापरांअ आने मांन बोंणे तोतोंअ बादों केरांअ खुब खुसी वेअहें। एंहकींअ आंय तुमाहांपेअ खुब माया राखुंह तेबी तुमां मांअपेअ जाराक बी माया नांय राखा, तों बोराबोर नांह।
16 तुमांअमेर्याअ थोळाक लोक मानताह का, मांअ जोरुलीहींअ खातुर मांयुं तुमाहांपेअ आदार नांह राख्यो। पेन बीहरा एंहकींअ आखीन मांअपेअ आजी बी दोस थोवताह का, आंय खुब हुच्यार आथो आने चालाकी वापरीन तुमांहपनेअ पोयसा पाळावी लेदाह। 17 पेन केल्ली बी वोखत मांयुं तुमनेंह ठोगलें का? मांयुं तुमांअहीं मोकलुअलांअ केडाअ बी मारफोते मांयुं तुमांहपनेअ पोयसा लेदला का? 18 मांअ कालावालांअ लीदे तीतु तुमांअहीं आलो। तीयाअरी मांयुं आपुअ एक ख्रीस्ती पावुहल, जीयाल तुमां ओअखुअतेंह तीयाल बी मोकली देदो। तुमां नोक्कीज मानी ल्याहा का, तीतुंह तुमांहपनेअ पोयसा मीलवांअ खातुर तुमनेंह नांह ठोग्यें। आने तुमां ईं बी मानी ल्याहा का, तीयांय ने मांयुं एकुज जातीअ वोलोण राखीन तुमांअरी एक हारकोज वेहवार राख्योह।
19 मांअपेअ दोस थोवनारांअ वीरुद आंय आमी लोगुंअ मांअ सोताअ वाचावुज केअतो रीहुं एंहकींअ ईं कागलों वाचतीअ वोखत तुमां वीचारतें वीअ ता ते तुमांअ भुल हाय। पोरमेहेर मांअ गोठ उनाअहे आने आंय ख्रीस्तुअ सेवोक हाय तों जांयनुंज आंय ए बादया गोठ्या आखतो रीहुं। मांअ मेरालाहां, जोंबी आंय कीअहुं आने आखुंह, तों बादों तुमां आत्मीक रीते वादतें रा तीयाअ खातुरुज हाय। 20 मांअ एंहकींअ आखांअ कारोण ईं हाय का, मांअ मोनाम एंहडी बीख हाय का जांहांअ आंय तुमांअहीं आवेंह, तांहांअ कादास तुमांअमेर्याअ थोळाकाहांन, आंय जेंहडें हेरांअ मागुंह तीयाअ केअता जुदी रीते वोरतुअतें हेंअहें। तेंहडों वीअ ता, तुमां मांन जेंहडो हेरांअ मागतेंह तीयाअ केअता मांन वादारे कोळोक रीते वोरतांअ पोळीअ। खास कीईन मांन एंहडी बीख हाय का, तुमाहांमेनेअ थोळेंक एक-बीहराअरी चुलाअतें वीअ, एक-बीहरापेअ आदराय राखतें वीअ, आने एक-बीहराल खीजवाअतें वीअ, आने ईगलाय राखीन एक-बीहराअरी वोरतुअतें वीअ, आने एक-बीहराअ बाबोताम खोटों आखतें वीअ, आने एक-बीहराअ बाबोताम खोट्या गोठ्या उडवुअतें वीअ, आने ओभीमान राखीन वोरतुअतें वीअ, आने काय बी रीतसोर नांय केअतें वीअ। 21 मांन एंहडी बीख हाय का, जीयाअ आंय सेवा कीअहुं तो पोरमेहेर आंय तुमांअहीं आवेंह तांहांअ तुमांअ वोरतोनुअ लीदे ईयु वोखत बी मांन एठाअज हेरावीअ। आने खास कीईन मांन एंहडी बीख हाय का, जे पेअलांअनेअ पाप केअता आलाह, तीयाहांमेर्याअ खुब लोकाहीं खाराब कामें, सीनालों, आने बीहरें खोटें कामें नांय सोळ्यें वीअ तीयाअ लीदे मांन खुब दुखी वेरांअ पोळीअ।