11
खोटी रीते सोताल “मालीखाअ खास चेला” एंहकींअ आखावनारांअ बाबोताम
1 आंय आस्या राखुंह का, आमी आंय मुरखा मांहांअ होच गोठ्या कीअहुं तेबी तों तुमां वेठी ल्याहा। मेरबानी कीईन तों तुमां वेठी लेजा! 2 पोरमेहेराल तुमाहांपेअ जेंहडी लागणी हाय, तेंहडीज लागणी तुमाहांपेअ मांन बी हाय। जेंहकींअ एक बाहको सोताअ पोयरीअरी वोराळ केअनारा जोवांयुल ते पोयरी देती वोखत ते एकदोम कुवारीज वेअ एंहडी मोर्जी राखेह, तेंहकींअ आंय बी मोर्जी राखुंह का तुमां पुरी रीते ख्रीस्तुअज लोक वेरा। आंय तुमनेंह एखला तीयालुज ईमानदार रेनारा लोकाहांअ तोरीके होपांअ मागुंह। 3 तेबी, लुच्या हापळाअ रुपाम आलला सेतानांय जेंहकींअ हाव्वाल भोरमावी टाकली, तेंहकींअ खोटो बोद देनारा ते लोक, तुमां एखला ख्रीस्तुअ आखलों नांयज माना तीयाअ खातुर तुमनेंह जुदोंज वीचारतें कीअ दीअ एंहडी आमी मांन बीख लागीह। 4 आंय एंहकींअ आखुंह काहाका, तुमांअहीं आवनारा गोंवें तीया लोकाहांअ गोठ्या मानी लेवुलोंअ तों हारों हाय एंहकींअ तुमां धारतेंह। ईसुअ बाबोताम ते लोक जे गोठ आखताह, ते मांयुं तीया बाबोताम तुमनेंह आखली गोठीहींअ केअता जुदीज हाय तेबी तुमां ते गोठ मानी लेतेंह! आने ते तुमनेंह जो आत्मा देताह, तो पोरमेहेरांय तुमनेंह देदला आत्मा केअता जुदोज हाय तेबी तुमां तो लीअ लेतेंह! आने ते जे हारी गोठ जाहेर केअताह, ते मांयुं तुमनेंह जाहेर केअली हारी गोठी केअता जुदीज हाय तेबी तुमां ते मानी लेतेंह! 5 ते लोक सोताल “मालीखाअ खास चेला” आखावताह। पेन आंय तीयाहांअ केअता जाराक बी उतुअतो नांह एंहडों आंय मानुंह। 6 आंय मानुंह का, आंय हारो भासोण केअनारो नांह, पेन पोरमेहेराअ बाबोताअ हाची गोठ ता आंय नोक्कीज जांअहुं। ईं मांयुं तुमनेंह बादी रीते देखावी देदोंह।
7 पोरमेहेराअहींनेअ आवनारी ख्रीस्तुअ बाबोताअ हारी गोठ मांयुं तुमनेंह जाहेर केअली तांहांअ, मांयुं तीयाअ बोदलाम तुमांहपनेअ एक पोयसो बी नांह लेदो। एंहडों कीईन तुमांअ मान वादावांअ खातुर मांयुं सोताअ मानुअ पारवाअ नांह केअयी। एंहकींअ मांयुं जों केअयों तों मांयुं गुनो केअलो एंहडों तुमनेंह लागेह का? 8 थोळेंक मांहेंअ एंहडों वीचारीअ का, तुमांहम सेवा केरांअ खातुर मांयुं बीहरा मोंडोळुंअ लोकाहीं देदला पोयसा लेदला। 9 आंय तुमांअरी आथो तांहांअ मांन पोयसाहांअ जोरुल पोळली तांहांअ बी मांयुं तुमांअमेर्याअ केडाअ बी आगलांअ आथ नांह लांबो केअयो। तांहांअ ता, माकेदोनीयानेअ आलला ख्रीस्ती पावुहुं मांअ बादया जोरुल्या पुर्या पाळल्या। जेंहकींअ पेअलांअ बी पोयसाहांअ मागणी कीईन आंय तुमनेंह केल्ली बी रीते वोजा रुप नांह बोंण्यो, तेंहकींअ भोवीस्यांम बी आंय तुमनेंह वोजारुप नांय बोंणुं तीयाअ कालजी राखेंह। 10 ख्रीस्त जों आखेह तों जेंहकींअ खेरों हाय, तेंहकींअ आमी आंय जों आखुंह तों बी खेरोंज हाय। तुमांहम पोरमेहेराअ काम केरांअ खातुर तुमांहपनेअ आंय एक बी पोयसो नांह लेतो। एंहडों ओभीमान राखीन गोठ केअता मांन आखाया वीस्ताराअ केडों बी रोकी नांय सेके। 11 मांन तुमाहांपेअ माया नांह तीयाअ लीदे आंय तुमांहपनेअ पोयसा नांह लेतो एंहडों केडाल बी नांय लागांअ जोजे। पोरमेहेर जांअहेज का, आंय तुमाहांपेअ माया राखुंह।
12 तुमांअमेर्याअ थोळाक लोक तुमांहम ते जों काम केअताह तीया बाबोताम ओभीमान राखीन आखताह आने तीयाहांअ काम बी मांअ कामुअ होचुज हाय एंहडों आखावांअ मागताह। तीयाहांन तेंहडों आखावांअ तोक नांय मीले तीयाअ खातुर आंय तुमांहपनेअ पोयसा लेदा वोगुर काम केरांअ आजी चालुज राखेंह। 13 ते लोक झुटी रीते सोताल मालीखाअ खास चेला आखावताह। ते ठोगताह का, ते पोरमेहेराअ खातुरुज काम केअताह। आने ते सोताल ख्रीस्ताअ खास चेलाहांअ होच देखावांअ कोसीस केअताह। 14 ते एंहडों वोरतुअताह तीयाअ मांन काय नोवाय नांह लागती। काहाका, सेतान सोते बी तेजुवाला होरगाअ दुताअ रुप लीईन लोकाहांन ठोगेह। 15 तीयाअ लीदे, होकीकोतुम सेतानाअ सेवा केअनारा ते लोक सोताल पोरमेहेराअ सेवा केअनारा हाय एंहकींअ देखावांअ खातुर हारें काम केरांअ ढोंग केअ ता तीयाअ तुमनेंह नोवाय नांय लागांअ जोजे। फाचलांअ नेअ, पोरमेहेर तीया लोकाहांन तीयाहांअ खोटा कामाहांअ पोरमाणे सीक्सा कीअ।
पावुलुंह वेठलें दुखें
16 आंय फाचो तुमनेंह आखुंह, एक मुरोख मांहुंअ जेंहकींअ सोताअ बाबोताम मोडया-मोडया गोठ्या केअ तेंहकींअ आंय बी कीअहुं एंहडों तुमाहांमेनेअ केडों बी नांय धारे। पेन तुमांअमेर्याअ थोळाक मांन मुरोखुज धारता वीअ तेबी, जेंहकींअ तुमां तीया झुटा खास चेलाहांअ गोठ्या उनाअतेंह तेंहकींअ मांअ गोठ्या बी उनाअजा, ईयाअ खातुर का, जे होकीकोतुज हाय तीया बाबोताम आंय बी ओभीमान राखीन आखी सेकुं। 17 आमी आंय मांअ बाबोताम जे मोडया-मोडया गोठ्या तुमनेंह आखांअ हाय ते ता मालीखाअ दोरवोणी पोरमाणे आंय नांह आखतो। पेन ते ता, आंय मुरोख मांहांअ होचुज आखुंह। 18 ख्रीस्तुपेअ वीसवास नांय केअनारांअ होच तुमांअमेर्याअ खुब लोक सोताअ कामुअ बाबोताम मोडया-मोडया गोठ्या केअताह तीयाअ लीदे, आंय बी तीया बाबोताम मोडया-मोडया गोठ्या केअहें। 19 आंय जांअहुं का, आंय तुमांअरी एंहकींअ गोठ्या कीअ सेकुंह। काहाका, सोताल खुब ओकलीवालें माननारें तुमां तीया नोकली चेलाहांअ गोठ्या राजी-खुसी उनाअतेंह आने तीयाहांअ बोद मानी बी जातेंह। 20 दाखला तोरीके, केडों तुमांअ सेट वेअ तेंहकींअ तुमांअरी वोरते तांहांअ तों तुमां राजी-खुसी वेठी लेतेंह। केडों सोताअ फायदाअ खातुर तुमांअ बादाज पोयसा खाय जाय तों बी तुमां वेठी लेतेंह। केडों तुमनेंह सोताअ दाबाणुम राखे, का केडों सोताअ बाबोताम मोडया-मोडया गोठ्या केअ, का केडों तुमनेंह थापळाटीन तुमांअ ओपमान केअ, तों बी तुमां वेठी लेतेंह। वाह! तुमां केंहडें मीठें मांहेंअ हाय! 21 आंय मानुंह का, ते लोक तुमांअरी वोरतुअताह तेंहकींअ वोरतांअ आंय ओतोअ बादो हींमोतुवालो नांह। तीयाअ लीदे, मांअ नाजवायांअ जोजे एंहकींअ तुमां वीचारतेंह का?
तांहांअ, जेंहकींअ तीया नोकली चेलाहांन जीयु-जीयु बाबोतींहम मोडया-मोडया गोठ्या केरांअ हींमोत हाय, तेंहकींअ तीयु बादी बाबोतींहम ओकली वोगुराअ मांहांअ होच मोडया-मोडया गोठ्या केरांअ मांन बी हींमोत हाय। 22 ते लोक सोताल हीबरु जातीअ आखताह का? आंय बी हीबरु जातीअज हाय। ते सोताल ईसरायेल राज्याअ लोक आखताह का? आंय बी सोताअ बाबोताम एंहकींअ आखी सेकुंह। ते सोताल आबराहामाअ वोसुलामेर्याअ आखताह का? आंय बी आबराहामाअ वोसुलामेर्योअज हाय। 23 ते सोताल ख्रीस्तुअ सेवोक आखताह का? आंय तीयाहांअ केअता ख्रीस्तुअ खुब हारो सेवोक हाय। ख्रीस्तुअ खातुर ते खुब काम केअताह एंहकींअ ते आखताह का? हारों, तीयाहांअ केअता आंय ख्रीस्तुअ खातुर वादारे हारों काम कीअहुं। ए गोठ गांडा मांहांअ गोठीअ होच लागेह तेबी, आंय ते आखेंह। ख्रीस्ताअ खातुर आंय तीयाहांअ केअता वादारे वोखत जेलाम कोंडाअयोह, तीयापेअ आंय वीसवास कीअहुं तीयाअ लीदे मांयुं पुसकोळ मार खादोह, आने तीयाअ सेवाअ खातुर खुब वोखत आंय मोताअ मुंयांम लोगुंअ पोची गेहलो। 24 जुदी-जुदी पांच वोखत येहुदी धोरमाअ वोळीलाहीं मांन ओगोन-चालीस, ओगोन-चालीस चापकाहांअ मार ठोकलो। 25 रोम सारकाराअ ओमोलदाराहां मांन तीन वोखत डांन्डांअ मार ठोकलो। एक वोखत लोकाहीं मांन माय टाकांअ खातुर ढोगळाकींअ ठोकलो। आंय जीया जाहाजुंहम बोहीन जाहलो तें जाहाजें तीन वोखत पाजाय गेहलें आने पांअयांम बुडी गेहलें। तींहमेंनेअ एक वोखत आंय एक आखी रात आने आखो दीह, बीहराहां मांन वाचाव्यो तांव लोगुंअ, जाहाजुअ पाजाअला कुटका आदारे पांअयांमुंज रेहलो। 26 ख्रीस्तुअ सेवाअ खातुर आंय ईंहीं-तींहीं फीरत्लो। खुब वोखत ता, मांअ मोरुलोंअज सोमोय आवी जाहलो। ओमुक वोखत खाडया उनखुअती वोखत खुब आकरो टेम आवी लागत्लो। ओमुक वोखत वाटे जाता बांडुंअ बी धाक रेहली। ओमुक वोखत मांअ जाती भाय येहुदीहींअ मारफोते बी, आने ओमुक वोखत जें येहुदी नांह तीयाहांअ मारफोते बी, आने ओमुक वोखत सेहेराहांम बी, ने ओमुक वोखत उजाळुंहम बी, आने ओमुक वोखत उळीम बोहीन जाती वोखत पांअयांम बी, आने ओमुक वोखत नोकली वीसवास्यांअ मारफोते बी, मांअ आकरो टेम आवी लागत्लो। 27 जीवांअ खातुर मांयुं आटकें पाजाय जाय एंहडी मेहनोत केअयीह, आने खुब वोखत मांयुं उजागरा वेठयाह, आने ओमुक-ओमुक वोखत खुब कामुअ लीदे मांन खांअ बी पारवाअ नांह झुळी। ओमुक वोखत मांअपेअ पुरतें पोतळें नांय आथें तीयाअ लीदे मांन हीअ बी लागत्लों। 28 ए बादया मुस्कुल्या ता आथ्याज, आने उपेअनेअ, मांयुं चालु केअला मोंडोळुंअ चींताअ वोजो रोददीह मांअ मोगोजुपेअ रेहे। 29 जांहांअ मांन खोबुर पोळेह का एक वीसवासी वीसवासाम नोबलो हाय, तांहांअ आंय तीयापेअ दाया कीईन तीयाल मोदोत कीअहुं। आने जांहांअ मांन खोबुर पोळेह का एक वीसवासी आर्याअ बीहरा वीसवास्याल पाप केरावेह, तांहांअ तेंहकींअ पाप केरावनारापेअ मांन खुब रोग चोळेह।
30 जो मांअ सोताअ बाबोताम मोडया-मोडया गोठ्या केरांअ वीअ ता, जीयु बाबोतीहींअ खातुर मांहेंअ मांन नोफरोत केअ, एंहडी बाबोतीहींअज आंय मोडया-मोडया गोठ्या केअहें। 31 पोरमेहेर जो आपुअ मालीख ईसु ख्रीस्तुअ बाहको हाय आने जीयाअ गुणगान आपुअ कायोम केरांअ जोजे, तो जांअहे का, मांयुं जोंबी आख्योंह तीहमेंर्योंअ काय बी झुटों नांह। 32 एक वोखत आंय दामास्कु सेहेराम आथो तांहांअ, आरेता राजांय नीमला राजपालांय मांन तेरांअ खातुर सेहेराअ गेटाअहीं चोकीदाराहांन थोव्या। 33 पेन मांअ दोस्दारुहुं मांन एक मोडा सीबलांम बोहाव्यो, आने दोअळाहांकींअ तों सीबलों बांदीन कोटुअ बारे पादरो एठा उतावी देदो, आने एंहकींअ कीईन वाचाय जांअ तीयाहां मांन मोदोत केअयी।