10
मालीखाअ खास चेला तोरीके पावुलाअ आदीकार
1 तुमांअमेर्याअ थोळाक लोक खोटी रीते आखताह का, जांहांअ आंय तुमांअरी वीअहुं तांहांअ मीठा ने गोरीबळा सोबावाअ रीहुं ने जांहांअ आंय तुमांअहींनेअ सेटे वीअहुं तांहांअ खुब हींमोत राखीन कागलें लेखुंह। तेबी, जेंहकींअ ख्रीस्त मीठा ने गोरीबळा सोबावुवालो आथो, तेंहकींअ आंय बी तेंहडा सोबावे तुमनेंह कालावाला कीअहुं। 2 आंय तुमनेंह कालावाला कीअहुं का, मेरबानी कीईन तीया लोकाहांन तेंहकींअ आखता बोंद केअजा। आंय तुमांअहीं आवुं तांहांअ आंय कोतोअ कोळोक सोबावुवालो हाय तों देखावांअ जोरुल नांय पोळे तीयाअ धीयान राखजा!
ख्रीस्तुपेअ वीसवास नांय राखनारा लोकाहांअ होच आंय वोरतुंह एंहकींअ जें मांहेंअ वीचारतेंह, तीयाहांअरी ता कोळोक रीतेज वोरतांअ मांयुं नोक्की केअयोंह। 3 बीहरा मांहांहांअ होच आंय बी मांहुंअज हाय तेबी, ख्रीस्तुपेअ वीसवास नांय केअनारें मांहेंअ सोताअ वीरुद केअनारांअरी जेंहकींअ लोळतेंह तेंहकींअ आंय मांअ वीरुद केअनारांअरी नांह लोळतो। 4 ख्रीस्तुपेअ वीसवास नांय केअनारांअ होच लोकाहांन पुलवुअनार्या दोलील्या आने मीठया-मीठया गोठ्या आंय नांह वापरुअतो। उलटों, पोरमेहेरांय मांन देदला गोतीवाला आत्मीक आथ्यारुंकींअ आंय तीया मांहांहांअ दोलील्या तोळी पाळुंह। सोताअ दुस्मानुंअ कोटुंहन तोळी पाळनारांअ होच आंय तें आत्मीक आथ्यारें वापरीन तीया मांहांहांन देखावुंह का, पोरमेहेराअ गोठीअ बाबोताम आने मांअ वीरुद तें जे गोठ्या केअतेंह, ते एकदोम खोट्या हाय। 5 जांहांअ बीहरा लोकाहांन पोरमेहेराल ओअखुअता ओटकावनार्या जे गोठ्या तें मांहेंअ ओभीमान राखीन आखतेंह, तांहांअ आंय तीयाहांन देखावुंह का, ते गोठ्या एकदोम खोट्या हाय। आने लोकाहांन तीयाहांअ वीचारांअ रीत्या बोदलांअ बी आंय मोदोत कीअहुं, ईयाअ खातुर का ते ख्रीस्तुअ मोर्जी पोरमाणेज बादी बाबोतीहींअ वीचार केअ। 6 तुमां ख्रीस्तुअ बाबोताअ बोद पुरी रीते माननारें बोंणाह तांहांअ आंय ते बोद नांय माननारा बादाहांन सीदें केअहीं।
7 तुमांअ नीसमें खोरेखोर काय चाली रीयोंह तों तुमां जांय ला एज मांअ मोर्जी हाय। तुमांअमेर्याअ ओमुक लोक आखताह का, ते ख्रीस्तुअ हाय, आने आंय ख्रीस्तुअ नांह। तीया लोकाहांअ ईं जांय लांअ जोजे का, जेंहकींअ ते ख्रीस्तुअ हाय, तेंहकींअ आंय बी ख्रीस्तुअज हाय। 8 ख्रीस्तुपेर्याअ तुमांअ वीसवासाअ नास केरांअ नांय पेन तीया वीसवासाम वादांअ तुमनेंह मोदोत केरांअज मालीख ईसु ख्रीस्तुंह मांन आदीकार देदलो। तीया आदीकाराअ बाबोताम जो मांयुं वादारे ओभीमान राखीनुंज आख्योंह तेबी तीयाअ मांन नाज नांह आवती। 9 मांअ कागलांहकींअ आंय तुमनेंह बीयावांअ नांह मागतो। 10 मांअ एंहकींअ आखांअ कारोण ईं हाय का, थोळाक लोक आखताह का, “पावुलाअ बीख राखांअ काय जोरुल नांह। तो सोताअ कागलांहम ता कोळोक आने जीवुम लागी जाय एंहडों लेखेह। पेन तो उरु-बुरु आपनेंह मीलेह तांहांअ, तो सोते मांद-रोग्यो जेअ देखाअहे आने तीयाअ गोठीहींम बी काय दोम नांह रेतो।” 11 एंहडों आखनारा लोकाहांअ ईं जांणांअ जोजे का, जेंहकींअ आंय मांअ कागलांहम कोळोक आने जीवुम लागी जाय एंहडों लेखुंह, तेंहकींअज उरु-बुरु आवेंह तांहांअ बी वोरतेंह।
12 मांअ वीरुद केअनारा ता बीहराहांअ आगलांअ सोताल खुब मोडा लोक आखावताह। तीयाहांअरी आंय केडों हानोंअ ने केडों मोडो एंहडी मांअ हारकामोणी केरांअ हींमोत नांय क्युंव। होकीकोतुम ता, ते मांअ केअता मोडा नांह। पोरमेहेराअ सेवोक केंहडा वेरांअ जोजे तीया बाबोताम ते सोतेज माप नोक्की केअताह। आने हातींअ सोताअ जीवोना ल तीयाअरी हारकामोणी कीईन सोतेज नोक्की केअताह का ते हाचा हाय। तेंहकींअ कीईन ते देखावताह का ते ओकली वोगुराअ हाय। 13 पोरमेहेरांय नोक्की कीअ देदला वीस्तारुंअ बार्याअ वीस्तारुंअ लोकाहांम सेवा केरांअ बाबोताम नांय, पेन तीयांय नोक्की कीअ देदला वीस्तारुंअ लोकाहांम सेवा केरांअ बाबोतामुज आंय ओभीमान केअहें। तुमांअ सेहेर बी तीया वीस्तारुंहमुज होमाअलों हाय। 14 मांअ वीरुद केअनारा तुमांअ वीस्ताराम आलला तीयाहांअ पेअलांअ ता मांयुं तींहीं आवीन ख्रीस्तुअ बाबोताअ हारी गोठ तुमनेंह आखली। तीयाअ लीदे, आंय तुमांअ सेहेर आललो तांहांअ आंय मांअ होद उनखीन आललो एंहकींअ नांय आखाय। 15 तीयाअ लीदे, बीहराहां केअलों काम मांयुं केअयोंह एंहकींअ आंय नांह आखावतो। मोंजे मांअ वीरुद केअनारांअ होच आंय ओभीमान नांह राखतो। उलटों, आंय एंहडी आस्या राखुंह का, तुमां वादारे ने वादारे वीसवास राखाह आने तुमांअ नीसमें मांअ काम वादारे ने वादारे वादतों रीअ। 16 हातींअ आंय तुमांअ वीस्तार सोळीन जींहीं हारी गोठ जाहेर केरांअ आजी केडों बी नांह गीयों तींहीं जाय सेकुं,आने तींहींर्याअ लोकाहांन हारी गोठ जाहेर कीअ सेकुं। आने हातींअ केडों बी एंहकींअ नांय आखी सेके का, बीहरों मांहुंअ जींहीं काम कीअ रीयोंह तीया वीस्ताराम जायन मांयुं काम केअयोंह। 17 पोवीतोर लेखाणाहांम लेख्योंह तीयाअ पोरमाणे वोरतांअ आंय कोसीस कीअहुं। तींहमें एंहकींअ लेख्योंह का,