गालातीया वीस्ताराअ मोंडोळुंहन पावुलाअ कागलों
1
सालामाअ गोठ
1-2 गालातीया वीस्ताराअ ख्रीस्ती मोंडोळुंअ लोकुंह! आंय पावुल तुमनेंह ईं कागलों लेखुंह। आंय तुमनेंह ईत केरावुंह का, आंय मालीखाअ खास चेलो हाय। ओ होददो ता मांन केल्ली बी टुकळीअ लोकाहीं नांह देदो। नांह ता केल्ला बी मांहांय ओ आदीकार मांन देदो। पेन ईसु ख्रीतुंह आने तीयाल मोअलांमेनेअ जीवतो केअनारा पोरमेहेर बाहकांय ज मांन मालीखाअ खास चेलो बोंणाव्योह। मांअरी ईंहीं सेवा केअनारा बादा पावुह बी तुमनेंह सालाम देताह।
3 पोरमेहेर आपुअ बाहको आने मालीख ईसु ख्रीस्त तुमाहांपेअ मेरबानी केअ आने तुमनेंह सुख-सांती दे।
4 आमीर्याअ ईया दुन्याअ खाराब रीवाजा ंहमनेअ आपनेंह सोळवांअ खातुर ख्रीस्तुंह सोताल आपुअ पापाहांअ लीदे भोगु तोरीके दीअ देदो। 5 तीया पोरमेहेर बाहकाल मांहेंअ कायोम मोडाय देतें रे! आमेन!
एकुज हारी गोठ
6 मांन खुब नोवाय लागेह का, जीया पोरमेहेरांय तुमनेंह ख्रीस्तुअ मेरबानीकींअ सोताअ लोक बोंणांअ हादयाह, तीयाल ओताअ माहरी सोळीन, जीयुल थोळेंक मांहेंअ “हारी गोठ” आखतेंह तीयु गोठील मानी लांअ तुमां तीयार वीयाह। 7 होकीकोतुम ता, बीहरी हारी गोठ हायज नांह। पेन थोळेंक मांहेंअ तुमनेंह गुचवोंणुम टाकीन ख्रीस्तुअ बाबोताअ हारी गोठील बोदली टाकांअ कोसीस केअतेंह। 8 पेन जे हारी गोठ मांयुं तुमनेंह जाहेर केअयीह तीयुअ केअता जुदी हारी गोठ आंय सोते, का होरगाअ दुत बी तुमनेंह जाहेर केअ ता, तीयाल हाराप लागे। 9 जेंहकींअ मांयुं पेअलांअ तुमनेंह आखलों तेंहकींअ, आमी फाचो बी आखुंह, जे हारी गोठ तुमां मानी लेदीह, तीयुअ केअता जुदी जातीअ हारी गोठ जोंबी तुमनेंह जाहेर केअ, तीयाल पोरमेहेर सीक्सा केअ! a
10 एंहकींअ आखीन आंय आमी मांहांहांअ साबासी मीलवांअ नांह मागतो। पेन पोरमेहेराअ साबासीज आंय मीलवांअ मागुंह। आंय मांहांहांन राजी राखांअ कोसीस नांह केअतो। जो आंय मांहांहांन राजी राखांअ आजी कोसीस केअतो वीअ ता, आंय ख्रीस्तुअ हाचो सेवोक नांह।
पावुल केंहकींअ ख्रीस्ताअ खास चेलो बोंण्यो
11 मांअ पावु-बोंअयुहुं, जे हारी गोठ मांयुं तुमनेंह जाहेर केअली, ते मांहांय बोंणावली नांह। ईं तुमां जांय ल्या एंहडी मांअ मोर्जी हाय। 12 ते केल्ला बी मांहांपनेअ मांन नांह मीली, का केल्ला बी मांहांय ते मांन नांह हीकवी। पेन ईसु ख्रीस्तुंह सोतेज ते मांन जाहेर केअली।
13 पेअलांअ आंय येहुदी धोरमो पालत्लो तांहांअ मांअ वोरतोन केंहडों आथों तीया बाबोताम तुमां उनाअयाह। तांहांअ आंय पोरमेहेराअ मोंडोळाअ लोकाहांन होद वोगुराअ दुखें देहलो आने एंहकींअ कीईन मांयुं मोंडोळाअ नास केरांअ कोसीस केअली। 14 मांअ हारकी उंमोरुअ बीहरा खुब येहुदी लोकाहांअ केअता आंय येहुदी धोरमो वादारे हारकींअ पालत्लो, आने आमांअ आगलाअ डायाहांअ रीवाजा ंहपेअ खुब लागणी राखीन ते बीहराहांन बी पालावत्लो।
15-17 पेन आंय जोनम्यो तीयाअ पेअलांअज पोरमेहेरांय सोताअ मेरबानीकींअ मांन पोसोंद केअलो आने तीयाअ सेवा केरांअ मांन हादलो। आने तीयाअ पोयराअ बाबोताअ हारी गोठ येहुदी जातीअ नांह तेंहडा लोकाहांन आंय जाहेर क्युंव तीयाअ खातुर “ईसुज तीयाअ पोयरो हाय” तों मांन जाहेर केरांअ तीयांय नोक्की केअलों तांहांअ, ईयु हारी गोठीअ बाबोताम वादारे जांणांअ मांयुं केल्ला बी मांहांअ सालाह नांह लेदी, का मांअ पेअलांअ मालीखाअ खास चेला बोंणला सेवोकुंअहीं बी येरुसालेम नांह गीयो। पेन उलटों, तुरुतुज आंय आराब देसाम जातो रेहलो। आने हातींअ दामास्कु सेहेराम फाचो आललो। 18 आने तींहीं तीन वोरसें रीईन हातींअ, आंय पीतोराल मीलांअ येरुसालेम गेहलो आने तीयाअरी पोंदोरेक दीह रेहलो। 19 मालीख ईसुअ पावुह याकोबु सीवाय आने पीतोरु सीवाय मालीखाअ बीहरा केल्ला बी खास चेलाल आंय नांह मील्यो।
20 (पोरमेहेराल खोबुर हाय का, आंय ईयु बाबोताम जों लेखुंह तों पुरी रीते खेरों हाय।)
21 आने हातींअ आंय सीरीया आने कीलीकीया वीस्तारुंहम गेहलो। 22 तांहांअ येहुदीया वीस्ताराअ ख्रीस्ती मोंडोळाअ लोकाहीं मांन नांह देख्यो। 23 ते मांअ बाबोताम ओतोंअज उनाअला का, “जो आपुअ लोकाहांन पेअलांअ दुखें देहलो, तो पेअलांअ जीया वीसवासाअ नास केरांअ कोसीस केअत्लो, तीया वीसवासाअ गोठील आमी जाहेर केअहे।” 24 आने तीयाहां मांअ लीदे पोरमेहेराअ गुणगान केअया।