एफेसु सेहेराअ मोंडोळाल पावुलाअ कागलों
1
पावुलाअ सालाम
1 आंय पावुल, एफेसु सेहेरामेर्याअ पोरमेहेराअ लोकाहांन, मोंजे तुमनेंह, ईं कागलों लेखुंह। आंय पोरमेहेराअ मोर्जी पोरमाणे ख्रीस्त ईसुअ खास चेलो हाय। तुमां ख्रीस्त ईसुअरी जोळाअला तुमांअ जीवोनाम ईमानदार रेतेंह।
2 पोरमेहेर आपुअ बाहको, आने मालीख ईसु ख्रीस्त तुमाहांपेअ मेरबानी केअ आने तुमनेंह सांती दे।
आत्मीक आसीरवाद
3 आपुअ मालीख ईसु ख्रीस्तुअ पोरमेहेर आने बाहकाअ आपुंह गुणगान केअजी! काहाका, ख्रीस्तुअ आर्याअ आपुअ जोळाणुअ लीदे, होरगामेनेअ जीया आसीरवादुंअ आपुंह ओनुभोव केअनारें हाय, a तेंहडा बादी जातीअ आत्मीक आसीरवाद तीयांय आपनेंह देदाह। 4 तीयांय दुन्या बोंणावी तीयाअ पेअलांअज, ख्रीस्तुअ आर्याअ आपुअ जोळाणुअ लीदे, तीयांय आपनेंह सोताअ लोक बोंणांअ पोसोंद केअला, ईयाअ खातुर का, आपुंह तीयाअ नोजराम पोवीतोर आने गुना वोगुराअ रेजी। 5 आपुंहपेअ केअली मायाअ लीदे पोरमेहेरांय पेअलांअज नोक्की केअलों का, तो आपुअ लीदे ईसु ख्रीस्तुंह चोळवुअला भोगुकींअ आपनेंह सोताअ पोयरें बोंणावीअ। एज तीयाअ मोर्जी आथी आने ईंहमें तो राजी बी आथो।
6 आपुंह तीयाअ गुणगान केअजी! काहाका, तीयांय आपुंहपेअ खुब मोडी मेरबानी केअयीह। तीयु मेरबानीअ बोदलाम आपुंहपेअ काय बी माग्या वोगुर तीयांय सोताअ मेराला पोयराअ मारफोते आपुंहपेअ मेरबानी केअयीह। 7 ख्रीस्तुअ आर्याअ आपुअ जोळाणुअ लीदे तीयाअ रोगुतुकींअ पोरमेहेरांय आपनेंह पापाहांअ बांदाणुमनेअ सोळव्येंह। मोंजे का, पोरमेहेरांय आपुअ पाप माफ केअयाह। एज तीयांय आपुंहपेअ केअली खुब मेरबानीअ साबीती हाय। 8 तीयांय आपुंहपेअ वादारे ने वादारे मेरबानी केअयीह, आने आरी-आरी तीयांय आपनेंह बादी जातीअ बुददी ने गीयान बी देदोंह।
9 सोताअ मोर्जी पोरमाणे ख्रीस्तुअ मारफोते पुरी केरांअ खुब वोखत पेअलांअ नोक्की केअली सोताअ भेदुवाली योज्ना पोरमेहेरांय आमी आमनेंह जाहेर केअयीह। 10 नोक्की केअला सोमोयाम पोरमेहेर पुरी केरांअ हाय ते योज्ना एंहडी हाय: होरगा ने तोरतीमेर्याअ बादाहांन एक-बीहराअरी जोळीन ख्रीस्तुल बादाहांअ उपरी थोवुलोंअ। 11 पोरमेहेराअ योज्ना ने मोर्जी पोरमाणेज बादों वेअहे। आने ख्रीस्तुअ आर्याअ आमांअ जोळाणुकींअ आने पोरमेहेराअ योज्ना पोरमाणे आने जों तीयांय पेअलांअनेअ नोक्की केअलों तीयाअ आदारे आमनेंह येहुदीहींन सोताअ लोक बोंणावांअ तीयांय पोसोंद केअयाह, 12 ईयाअ खातुर का, ख्रीस्त आवता पेअलांअ तीयाअ आवांअ वाट जोवनारा आमां येहुदी मोडायावाला पोरमेहेराअ गुणगान केअजी।
13 आने आमी एफेसुमेर्याअ तुमां बी हाची गोठ, मोंजे का, पोरमेहेर तुमनेंह पापाअ सीक्सामेनेअ केंहकींअ वाचावेह तीयु बाबोताअ हारी गोठ उनाअयाह। आने जांहांअ तुमां ख्रीस्तुपेअ वीसवास केअयो, तांहांअ पोरमेहेरांय, तो तुमांअ मालीख हाय तीयाअ साबीती तोरीके तुमनेंह पोवीतोर आत्मा देदो आने एंहकींअ कीईन तीयांय तुमनेंह सोताअ लोक बोंणाव्याह। ओज पोवीतोर आत्मा दांअ तीयांय वोचोन देदलों। 14 ओ पोवीतोर आत्मा बीयाना तोरीके हाय। मोंजे का, तो आपनेंह एंहडी खातरी देहे का, पोरमेहेरांय आपनेंह जो वारसो दांअ वोचोन देदोंह तो, तो आपनेंह नोक्कीज दीअ। एंहकींअ कीईन आपनेंह खातरी वीअ का, तो आपनेंह पापुंहमनेअ पुरी रीते सोळवीअ। खुब मोडायावाला पोरमेहेराअ गुणगान केरांअ ईं बीहरों एक कारोण हाय।
पोरमेहेराल पावुलाअ ओरुज
15 ईया कारोणे, मालीख ईसुपेअ तुमां थोवला वीसवासाअ बाबोताम आने पोरमेहेराअ बादा लोकाहांपेअ तुमां राखली मायाअ बाबोताम आंय उनाअयो तेहेअनेअ, 16 तुमांअ लीदे कायोमुज आंय पोरमेहेराअ आभार मान्या कीअहुं आने तुमांअ खातुर तीयाल ओरुज बी केअया कीअहुं। 17 आपुअ मालीख ईसु ख्रीस्तुअ पोरमेहेर, मोंजे का, होरगामेन्याअ आपुअ खुब मोडो आने मानुवालो पोरमेहेर बाहको तुमनेंह पोवीतोर आत्माअ मारफोते आत्मीक बाबोतीहींअ गीयान दे आने सोताअ बाबोताअ हाचाय जाहेर केअ, ईयाअ खातुर का, तुमां तीयाल वादारे ओअखा। 18 आने आंय एंहकींअ बी ओरुज कीअहुं का, पोरमेहेर सोताअ बाबोताम तुमनेंह वादारे होमजुण दे, ईयाअ खातुर का, पोरमेहेरांय तुमनेंह हादयाह तीयाअ लीदे जे आसीरवाद मीलवांअ तुमां आस्या राखताह तीयाअ तुमनेंह खोबुर पोळे, आने पोरमेहेर सोताअ लोकाहांन जेबी आसीरवाद वारसायुम दांअ हाय ते कोताअ कींमती आने हारा हाय ते बी तुमां जांआं। 19-20 आने ख्रीस्तुपेअ वीसवास राखनारा आपनेंह कोतीअ वादारे आने मोडी ताकोताकींअ पोरमेहेर मोदोत केअहे, तों बी तुमां जांय ला। तीयुज खुब ताकोताकींअ तीयांय ख्रीस्तुल मोअलामेनेअ जीवतो उठव्योह आने होरगाम बोहीन बादाहां पेअ राज केरांअ तीयाल आदीकार देदोह। 21 आने जुगाम आदीकाराकींअ आने ताकोताकींअ राज केअनारा बादा होरगाअ दुताहांअ आने बीहरा आत्माहांअ केअता वादारे आदीकार आने ताकोताकींअ होरगामेनेअ ख्रीस्त तीयां बादाहां पेअ राज केअहे। आने तीयापेअ जों मान आने जो आदीकार हाय, तो आमीर्याअ आने आवनारा जोमानाम बी राज केअनारा बीहरा बादाहांअ मान आने आदीकाराअ केअता खुब वादारे हाय। 22 पोरमेहेरांय ख्रीस्तुल बादी वोस्ताहांपेअ पुरी रीते आदीकार देदोह आने तीयुहुंअ कोब्जो होप्योह। आने तीयांय बादी वोस्ताहांपेअ राज केअनारा ख्रीस्तुल मोंडोळुपेअ आदीकार चालवुअनारा तोरीके बी नीम्योह। b 23 जेंहकींअ मांहांअ सोरीलाअ भाग मुनकाअरी सोबोंद राखताह, तेंहकींअ आपुंह ख्रीस्ताअरी सोबोंद राखतेंह। जेंहकींअ ख्रीस्त सोताअ ताकोत बादी जागे वापरेह, तेंहकींअ तो ते ताकोत आपुंहम बी वापरेह।