2
ख्रीस्तुपेअ वीसवास राखता आपनेंह मीलनारी जीनगी
1 ख्रीस्तुपेअ वीसवास राखता पेअलांअ तुमां पोरमेहेराअ आखलों नांय मानत्लें। आने तुमां पाप केअला तीयाअ लीदे, तुमां आत्मीक रीते मोअलें आथें। 2 तांहांअ तुमां दुन्याअ खाराब रीवाज पालत्लें, आने दुन्याअ खोटायुअ होंवांयुं पोरमाणे वोरतुअत्लें, आने जुग आने तोरतीअ वोचला भागाम राज केअनारा पुतळाहांअ राजा सेतानाअ आखलों मानत्लें। ओज सेतान पोरमेहेराअ आखलों नांय माननारा बादाहांन आमी सोताअ काबाम राखनारो आत्मा हाय। 3 पेअलांअ आपुंह बादें तीया लोकाहांअ होच पोरमेहेराअ आखलों नांय मानत्लें, आने आपुअ पापी सोबावाअ मोर्जींअ पोरमाणे आपुंह जीवत्लें, आने आपुअ सोरीलुंहन ने मोनुंहन गोंवतें कामें आपुंह केअत्लें, आने आपुअ पेअलुरीअ दोसाम बीहरा लोकाहीं अ होच आपुंह बी पोरमेहेराल रोग चोळवुअनारें आथें, आने तीयाअ लीदे, तीयापेनेअ सीक्सा मीलवांअ लायोक आथें।
4-5 पेन खुब दाया केअनारा पोरमेहेरांय ता, आपुंहपेअ खुब माया राखीह। जेंहकींअ तीयांय ख्रीस्तुल मोअलामेनेअ फाचो जीवतो केअयोह, तेंहकींअ तीयाअ आखलों नांय मानीन आपुंह आत्मीक रीते मोअलें आथें तांहांअ तीयांय आपनेंह आत्मीक रीते जीवतें केअयें। ईत केरा! तीयाअ मेरबानीअ लीदेज तीयांय तुमनेंह तुमांअ पापाहांअ सीक्सामेनेअ वाचाव्यें। 6 ख्रीस्तुअ आर्याअ आपुअ जोळाणुअ लीदे पोरमेहेरांय आपनेंह ख्रीस्तुअरी आत्मीक रीते जीवतें उठव्येंह, ईयाअ खातुर का, होरगाम ख्रीस्तुअरी बोहीन आपुंह राज केअजी। 7 आखी नांय सेकाय ओतीअ मोडी मेरबानी सोतापेअ हाय तों आवनारी बादी पीळींअ लोकाहांन देखावांअ खातुर पोरमेहेरांय एंहकींअ केअयों। ख्रीस्त ईसुअ आर्याअ आपुअ जोळाणुअ लीदे पोरमेहेरांय आपुंहपेअ राखली दायाकींअ तीयांय आपुंहपेअ ए मेरबानी केअयीह। 8 पोरमेहेरांय सोताअ मेरबानीअ लीदे आने मालीख ईसुपेअ तुमां राखला वीसवासुकींअ तुमनेंह वाचाव्येंह। तुमां कायक हारों केअयों तीयाअ लीदे तीयांय तुमनेंह वाचाव्येंह एंहकींअ ता नांह। पेन उलटों, तीयांय तुमनेंह तुमांअ पापाहांअ सीक्सामेनेअ वाचाव्येंह ते ता पोरमेहेराअ भेट हाय। 9 तीयाअ लीदे, “मांअ केअला हारा कामाहांअ लीदे आंय पापाहांअ सीक्सामेनेअ वाचाय गीयोह” एंहडों केडों बी ओभीमान नांह कीअ सेकतों। 10 ख्रीस्त ईसुअ आर्याअ आपुअ जोळाणुकींअ पोरमेहेरांय आपनेंह आमी आत्मीक रीते नोवें मांहेंअ बोंणाव्येंह, ईयाअ खातुर का, आपुअ खातुर तीयांय पेअलांअज नोक्की कीअ थोवलें हारें कामें आपुंह आपुअ आखी जीनगी लोगुंअ केअतें रेजी।
येहुदी लोक आने जे येहुदी नांह ते लोक ख्रीस्तुअ मारफोते एक-बीहराअरी जोळाअताह
11 तुमां येहुदी जातीम नांह जोनम्यें तों वीहराअतें मां! सोताल “सुन्नोतुवाला” आखनारा येहुदी लोक तुमनेंह “सुन्नोतु वोगुराअ” आखताह। (सुन्नोत ता येहुदी आदमी सोताअ सोरीलाअ एक भागाम जे धारमीक वीदी केरावताह तेज हाय।) 12 पेअलांअ ख्रीस्तुअरी तुमांअ काय बी सोबोंद नांय आथो। आने पोरमेहेरांय पोसोंद केअला ईसरायेल सोमाजुम तुमां नांय गोंणाअत्लें। आने पोरमेहेरांय तीया लोकाहांअरी केअला कारारुंहम तुमांअ काय बी भाग नांय आथो। आने होरगाम कायोम जीवांअ आस्या वोगुर, आने पोरमेहेराअरी सोबोंद राख्या वोगुर ईयु दुन्याम तुमां जीवत्लें। 13 पेन आमी ख्रीस्त ईसुअ आर्याअ तुमांअ जोळाणुअ लीदे आने कुरुसापेअ ख्रीस्तुंह पाळला तीयाअ रोगुताअ ने तीयांय देदला जीवुअ भोगुकींअ पोरमेहेरांय तुमनेंह सोताअरी सोबोंद बांदाव्योह। पेअलांअ तीयाअरी तुमांअ काय बी सोबोंद नांय आथो। 14-16 काहाका, ख्रीस्तुंह आमनेंह येहुदी ख्रीस्तींहन आने तुमनेंह येहुदी जातीअ नांह तेंहडा ख्रीस्तींहन एक-बीहराअरी मेल-मीलाप केराव्योह। एंहकींअ केरावता तीयांय हुकोमुंहवाला ने वीदींहवाला नीयोम ाहांन सोताअ सोरीलाअ भोगुकींअ रोद केअयाह। आने आमी आपुंह तीया नीयोमाहांअ बांदाणुम नांह। आने एंहकींअ कीईन तीयांय आपनेंह बेनुं जातीअ वीसवासी लोकाहांन जुदा पाळनारी वेरु रुपी दीवाल तोळी टाकीह आने आपनेंह एकुज जातीअ लोक बोंणावी देदाह, ईयाअ खातुर का, तो बेन जातीअ लोकाहांअ बोदले तीयाअ आर्याअ आपुअ जोळाणुअ लीदे एकुज नोवी जातीअ लोक बोंणावे, आने कुरुसापेअ चोळवुअला तीयाअ सोरीलाअ भोगुकींअ पोरमेहेराअ आने आपुअ नीसमुर्योअ वेर मीटावे,आने एंहकींअ कीईन पोरमेहेराअरी मेल-मीलाप केरावे। 17 ख्रीस्तुंह सोताअ खास चेलाहांन ईयाअ खातुर मोकल्या, ते आवीन बादा लोकाहांन, मोंजे का, पोरमेहेराअरी सोबोंद नांह राखनारा तुमनेंह आने पोरमेहेराअरी सोबोंद राखनारा आमनेंह येहुदीहींन पोरमेहेराअरी मेल-मीलाप केरावांअ बाबोताअ ते हारी गोठ जाहेर केअ। 18 काहाका, ख्रीस्तुअ मारफोते एकुज पोवीतोर आत्माअ मोदोताकींअ आपुंह बेनुं जातीअ लोक पोरमेहेर बाहकाअ हाजरीम जाय सेकताह।
19 तीयाअ लीदे, आमीनेअ तुमां पारका आने बीहरा राज्याअ लोक नांह। पेन उलटों, तुमां पोरमेहेराअ लोकाहांअरी एकुज राज्यामेर्याअ आने पोरमेहेराअ मोंडोळु रुपी कुटुंबुअ लोक हाय। 20 आने मालीखाअ खास चेलाहां आने पोरमेहेराअ गोठ जाहेर केअनारा बीहराहां मोंडोळु रुपी बोंगलों बांदांअ खातुर टाकला ख्रीस्ती बोदा रुपी पायापेअ बांदाअनारा ढोगळाहांअ होच तुमां हाय। आने ख्रीस्त ईसु सोतेज तीया बोंगलाअ मोबुअ होच हाय। 21 आने जेंहकींअ मोब बोंगलाअ बादा भागुंहन एक-बीहराअरी बोराबोर जोळाअला राखेह, तेंहकींअ ख्रीस्त तुमनेंह बादाहांन आत्मीक रीते एक-बीहराअरी बोराबोर जोळाअलें राखेह। आने मालीखाअ खातुर जुदा केअला मोंदीराअ होच तुमां बोंणा तीयाअ खातुर तो तुमनेंह आत्मीक रीते वादावेह। 22 जेंहकींअ बोंगलाअ बादों वोगळों एक-बीहराअरी बोराबोर बांदायन बोंगलो बोंणेह, तेंहकींअ ख्रीस्तुअ आर्याअ तुमांअ जोळाणुअ लीदे तुमांअ बी बीहरा बादा वीसवास्यांअरी हारकींअ जोळायन मोंडोळ बोंणेह। आने तीया मोंडोळु रुपी बोंगलाम पोवीतोर आत्माअ मारफोते पोरमेहेर वोहती केअहे।