3
येहुदी जातीअ नांह तेंहडा लोकाहांम पावुलाअ सेवा
1 येहुदी जातीअ नांह तेंहडा तुमांअ खातुर पोरमेहेरांय ओतोंअ बादों केअयोंह तीयाअ लीदे आंय पावुल पोरमेहेराल ओरुज कीअहुं। ईत केरा का, तुमहांम ख्रीस्तुअ सेवा कीअहुं तीयाअ खातुरुज आंय जेलाम कोंडाअलोह। 2 तुमां नोक्कीज उनाअयाह, पोरमेहेरांय मांअपेअ मेरबानी कीईन तुमांहम सेवा केरांअ जोवाबदारी मांन होपीह। 3 पोरमेहेरांय सोताअ सुपी राखली योज्नाअ मांन दोरसोनुअ मारफोते जाण केअली। (ईयु बाबोताम मांयुं ईया कागलाम पेअलांअज थोळोंक लेख्योंह।) 4 आने तुमां जो ए बाबोत्या धीयान राखीन वाचाह ता, ख्रीस्तुअ बाबोताअ भेदुअ बाराम आंय जों होमज्योह तों तुमां जांय सेकाह। 5 ईयु योज्नाअ भेद पेअलार्याअ जोमानाअ लोकाहांअ आगलांअ पोरमेहेरांय नांह खोल्यो। पेन आमी तीयांय सोताअ पोवीतोर आत्माअ मारफोते सोताअ पोवीतोर चेलाहांअ आगलांअ, मोंजे का, आमांअ आगलांअ आने तीयाअ गोठ जाहेर केअनारा बीहराहांअ आगलांअ खोल्योह। 6 तो भेद ओ हाय का, येहुदी ख्रीस्तींहन मीलनारा पोरमेहेराअ आसीरवादुंअ तेज भाग हारी गोठीअ मारफोते येहुदी जातीअ नांह तेंहडा ख्रीस्तींहन बी मीलताह। आने ते लोक बी सोरीलाअ भागुंअ होच एकुज मोंडोळामेर्याअ हाय। आने ख्रीस्त ईसुअ आर्याअ तीयाहांअ जोळाणुअ लीदे ते बी पोरमेहेरांय जे आसीरवाद दांअ वोचोन देदोंह, ते आसीरवाद मीलवुअताह।
7 पोरमेहेरांय सोताअ ताकोताकींअ मांन देदला खास वोरदानु पोरमाणे आंय ए हारी गोठ जाहेर केअनारो सेवोक बोंण्योह। 8-9 “आंय बी पोरमेहेराअ लोकाहांमेर्योअ हाय” एंहकींअ आखांअ आंय लायोक नांह। तेबी पोरमेहेरांय भेट तोरीके मांन ए सेवा होपीह। मोंजे का, आपुंह गोंईं बी नांह सेकतें एंहडा ख्रीस्तुअ आसीरवादुंअ बाबोताअ हारी गोठ, येहुदी जातीअ नांह तेंहडा लोकाहांन जाहेर केरांअ आने बादी वोस्ताहांन बोंणावनारा पोरमेहेरांय गीया जोमानाम दोबावी राखली सोताअ योज्ना आमी तो केंहकींअ पुरी कीअ तों बादा लोकाहांन होमजावांअ सेवा पोरमेहेरांय मांन होपीह, 10 ईयाअ खातुर का, पोरमेहेर बादी रीते गीयानुवालो हाय तों, जुगुंहम राज केअनारा ताकोतावाला आत्मा आमीर्याअ जोमानाम ख्रीस्तुअ मोंडोळाअ मारफोते जांए। 11 पोरमेहेरांय पेअलांअनेअ केअली ए योज्ना तीयांय आपुअ मालीख ईसु ख्रीस्तुअ मारफोते पुरी केअयीह। 12 ख्रीस्तुअ आर्याअ आपुअ जोळाणुअ लीदे आने तीयापेअ आपुंह राखला वीसवासाअ लीदे पोरमेहेर राजी-खुसी आपुअ आवकार कीअ एंहडी खातरी ने हींमोत राखीन तीयाअ हाजरीम जांअ आपनेंह सुट मीलीह। 13 मोंजे, आंय तुमनेंह कालावाला कीअहुं का, तुमांअ खातुर जें दुखें आंय वेठुंह, तीयाअ लीदे तुमां हींमोत मा हारतें। ईं दुखें ता तुमांअ लाबुअ खातुरुज हाय।
ईं कागलों वाचनारांअ खातुर पावुल पोरमेहेराल ओरुज केअहे
14-15 ईं बादों वीचारुंह तांहांअ, आंय पोरमेहेर बाहकाअ आगलांअ गुठोणें पोळुंह आने तीयाल ओरुज कीअहुं। तीया पोरमेहेराअ नांवांपेनेअज होरगामेन्याअ आने तोरतीमेर्याअ दोरेक कुटुंबुल नांव मीलेह। तीयाल आंय ओरुज कीअहुं का, 16 तो सोताअ खुब मोडी मीलकोतु आने ताकोतु पोरमाणे सोताअ आत्माअ मारफोते तुमनेंह तुमांअ आत्मांयम ताकोत आने गोती दे, 17 आने ख्रीस्त तीयापेअ तुमां राखला वीसवासाअ लीदे पोवीतोर आत्माअ मारफोते तुमांअ मोनाहांम वोहती केअ, आने तो तुमनेंह पोरमेहेरापेअ आने बीहरा लोकाहीं पेअ कीदीह बी टुटे नांय आने मोजबुत रे एंहडी माया राखांअ मोदोत केअ, 18 ईयाअ खातुर का, आपुंहपेअ ख्रीस्त राखेह ते माया खुब पोली आने खुब लांबी आने खुब उची आने खुब उंडी हाय ते बी तुमां पोरमेहेराअ बादा लोकाहांअरी मीलीन होमजी सेका। 19 खोरेखोर ता, ख्रीस्त आपुंहपेअ कोतीअ बादी माया राखेह तों तुमां पुरी रीते कीदीह बी जांय नांह सेकतें। तेबी आंय ओरुज कीअहुं का, ते तुमां जांय सेका आने एंहकींअ कीईन तुमांअ जीवोनाहांम पोरमेहेराअ बादा सोबाव पुरी रीते उते।
20-21 सोताअ ताकोताकींअ आपुअ माज काम केअनारा आने आपुअ मागणी केअता ने वीचारु केअता बी आपनेंह खुब वादारे दीअ सेकनारा पोरमेहेराल, ख्रीस्त ईसुअरी जोळायन तीयाअ मोंडोळाम रेनारें आपनेंह आने आवनारी पीळींअ बादें मांहेंअ होर-होमीसा मोडाय ने मान दे! आमेन!