4
एक-बीहराअरी ईली-मीलीन रांअ सालाह
1 तीयाअ लीदे, मालीखाअ सेवाअ खातुर जेलाम कोंडाअलो आंय तुमनेंह कालावाला कीअहुं का, पोरमेहेराअ लोक वेरांअ तीयांय हादलांहन सोबे एंहडी जीनगी जीवा! 2 मोंजे का, पुरी रीते गोरीबळा आने सांत सोबाव राखीन एक-बीहराअरी वोरता, आने एक-बीहरापेरीअ तुमांअ मायाअ लीदे धीरोज राखीन एक-बीहराअ भुल वेठी ला!
3 पोवीतोर आत्मांय तुमनेंह एक-बीहराअरी एक होप राखीन रांअ मोदोत केअयीह। तो होप तुमां एक-बीहराअरी तुमांअ सोबोंद बांदनारी सांतीकींअ जालवी राखांअ कोसीस केरा। 4 जेंहकींअ होरगाअ आसीरवाद मीलवांअ ते एकुज आस्या राखांअ खातुर पोरमेहेरांय तुमनेंह हादयेंह, तेंहकींअज आपुंह बादें सोरीलाअ होच हाय तीया एकुज मोंडोळामेर्येंअ हाय। आने आपनेंह बादाहांन एकुज पोवीतोर आत्मा मील्योह। 5 आने आपुंह एकुज मालीखाअ भोकती केअतेंह। आने आपुंह बादाहां ख्रीस्तुपेअ एकुज जातीअ वीसवास राख्योह आने एकुज जातीअ बापतीस्मा लेदोंह। 6 आने आपुअ बादाहांअ एकुज पोरमेहेर बाहको हाय, का जो आपुअ बादाहांअ मारफोते काम केअनारो हाय आने आपुअ बादाहां म वोहती केअनारो हाय।
7 पोरमाण नोक्की कीईन ख्रीस्तुंह आपनेंह देदला वोरदानुंअ पोरमाणे आपुंहमेर्याअ दोरेक वीसवास्याल मोंडोळाम सेवा केरांअ खास वोरदान मील्योंह। 8 पोरमेहेर सोताअ पोवीतोर लेखाणाहांम ख्रीस्तुअ बाबोताम एंहकींअ आखेह का,
“तो उचाम-उचा जागे चोळी गीयो तांहांअ,
तीयाअ दुसमोनाहांन सोताअरी तीअ लीअ गीयो,
आने तीयांय सोताअ लोकाहांन वोरदानें देदें।”
9 “तो चोळ्यो” एंहकींअ तो आखेह तांहांअ, तीयाअ ओर्थो ओ हाय का, चोळता पेअलांअ तो तोरतीअ उंडाम-उंडा जागे उत्यो। 10 जो उत्लो तोज उचाम-उचा जुगुंअ केअता बी उची जागे चोळ्यो, ईयाअ खातुर का, जुग-तोरतीम बादी जागे तीयाअ हाजरी रे। 11 तीयांय थोळाकाहांन सोताअ खास चेला बोंणांअ वोरदान देदों। बीहरा थोळाकाहांन तीयांय पोरमीहेरुंह जाणावल्या गोठ्या आखांअ वोरदान देदों। बीहरा थोळाकाहांन हारी गोठ जाहेर केरांअ वोरदान देदों। बीहरा थोळाकाहांन मोंडोळाअ देखरेख राखांअ आने मोंडोळाअ लोकाहांन बोद दांअ वोरदान देदों। आने ईया बादाहांन मोंडोळाम भेट तोरीके देदाह, 12 ईयाअ खातुर का, ते ख्रीस्तुअ सोरीलु रुपी मोंडोळाअ लोकाहांन आत्मीक रीते मोजबुत बोंणावे आने एंहकींअ कीईन पोरमेहेराअ बादा लोक बीहराहांअ सेवा केरांअ तीयार वेअ। 13 आने एंहकींअ कीईन आपुंह बादें पोरमेहेराअ पोयराअ बाबोताम एक हारकीज बाबोत जांयन तीयापेअ वीसवास कीअहुं आने आत्मीक जीवोनाम वादता-वादता ख्रीस्तुअ होच खामी वोगुराअ बोंणुंह। 14 तांहांअ वीसवासाम जें आजी नांह वादयें, आने दोरीयाअ चुवांअरी हाअडाअनारा जाहाजुअ होच आने वाराअरी हाअडाअनारा चाळाहांअ होच, सोताअ चालाकीं आने कावोतरांहकींअ बीहराहांन खाराब वाटे लीअ जानारा ठोगनारा लोकाहांअ बोदा कींअ सोताअ वीसवास कायोम बोदल्या केअनारा तीया वीसवास्यांअ होच आपुंह नांय बोंणजी। 15 तीयाअ बोदले, आपुंह माया राखीन हारी गोठीअ हाचाय बीहराहांन आखुंह, आने एंहकींअ कीईन, मांहांअ आखा सोरीलाल सोताअ काबाम राखनारा मुंनकाअ होच सोताअ मोंडोळाअ लोकाहांन सोताअ काबाम राखीन चालवुअनारो ख्रीस्तु जेंहकींअ बादी रीते खामी वोगुराअ हाय तेंहकींअ बोंणांअ आपुंह वादतें रीहुं। 16 आने ख्रीस्त सोताअ सोरीलु रुपी मोंडोळामेर्याअ आपनेंह बादाहांन सोताअ काबाम राखीन एक-बीहराअरी बोराबोर जोळाअलें राखेह। आने जेंहकींअ सोरीलाअ दोरेक भाग हांदांहकींअ जोळाअताह, आने एंहकींअ कीईन एक सोरील बोंणेह, आने सोरीलाअ भाग सोत-सोताअ काम हारकींअ केअताह, आने एंहकींअ कीईन आखों सोरील वादेह ने मोजबुत बोंणेह, तेंहकींअ आपुंह बी एक-बीहरापेअ माया राखीन मोंडोळाम एक-बीहराअरी जोळाअलें रेतेंह, आने पोरमेहेरांय देदलों सोत-सोताअ काम हारकींअ केअतेंह, आने एंहकींअ कीईन आपुंह आत्मीक रीते वादतेंह, आने मोजबुत बोंणतेंह।
ख्रीस्तुअ आर्याअ जोळाणुअ लीदे नोवी रीते जीवा!
17 तीयाअ लीदे, मालीखाअ नांवें तुमनेंह मांअ एंहकींअ आखुलोंअ ने चेतवुलोंअ हाय का, खेरा पोरमेहेराल नांय ओअखुअनारा लोकाहांअ होच तुमां मा जीवतें। तीयाहांअ मोनें ता नोक्कामी वोस्तुंहमुज गुथाअलें रेतेंह। 18 आने तीयाहांअ बुददी बेरजाय गीयीह। आने पोरमेहेर जे आत्मीक जीनगी देहे तीयुम ते काय बी भाग मीलवी नांह सेकता। काहाका, खेरा पोरमेहेराल ते ओअखुअता बी नांह ने ओअखांअ मागता बी नांह। 19 आने खोटें कामें केअता तीयाहांन नाजुज नांह आवती। आने ते सीनालाअ जेंहडा खोटा कामुंहम गुथाअला रेताह। आने एंहडी बादी जातीअ खोटें कामें कायोम केअया केअताह।
20 पेन ख्रीस्तुअ बाबोताम आमां देदला बोदा म तुमां एंहडों नांह हीकयों। 21 पेन मांन खातरी हाय का, ख्रीस्तुअ बाबोताअ गोठ तुमां नोक्कीज उनाअयेंह आने तीयाअरी जोळाअलें रीईन तुमां तीयापेनेअ हाचो बोद हीक्योह। 22 ईयाअ लीदे, ख्रीस्तुल मान्या पेअलांअ तुमांअ जीवोनाम जो जुनो सोबाव आथो आने जो ठोगनारी पापी मोरजीहींकींअ बीगळी जाहे तीया जुना सोबावु पोरमाणे तुमां मा जीवतें। 23 पेन उलटों, तुमांअ वीचारुंहम आने वोरतोनुंहम पुरी रीते नोवें बोंणतें जा। 24 आने पोरमेहेरांय सोताअ होच बोंणावला नोवा सोबावु पोरमाणे, तुमां खोरेखोर हाची रीते आने पोवीतोर रीते जीवा।
25 तीयाअ लीदे, एक-बीहराअरी झुटों गोगांअ सोळी दीईन दोरेक वीसवासी सोताअ आर्याअ वीसवास्यांअरी खेरों गोगे। काहाका, ख्रीस्तुअ सोरीलु रुपी मोंडोळाअ भागुंअ तोरीके आपुंह बादें एक-बीहराअ हाय। 26 तुमनेंह केडापेअ रोग चोळे ता तीयु रोगुकींअ पाप मा केअतें। दीह बुडे तीयाअ पेअलांअ तुमांअ रोग सोळी दा। 27 नेता, सेतानाअ ओसोर तुमनेंह लागे एंहडी तोक तुमां तीयाल देनारें बोंणी जाहा। 28 जोंबी मांहुंअ आमी लोगुंअ चोरी केअया केअत्लों, तों आमीनेअ चोरी केरांअ सोळी दे आने सोताअ आथाहांकींअ एगोह हारो धोंदो केअ, ईयाअ खातुर का, गोरीबाहांन मोदोत केरांअ खातुर तीयापेअ सोगवोळ रे। 29 तुमां जोंबी गोगा तों उनाअनाराहांन नुकसान केअनारों नांय वेरांअ जोजे। पेन उलटों, तों तीयाहांअ जोरुली पोरमाणे आत्मीक रीते वादावनारों आने मोदोत केअनारों वेरांअ जोजे। 30 पोरमेहेराअ पोवीतोर आत्माल तुमां दुखी मा केअतें। काहाका, पोरमेहेर तुमनेंह पुरी रीते सोळवांअ दीह आवनारो हाय तीयाअ खातरी देनारो ओज पोवीतोर आत्मा हाय। 31 बादी जातीअ कोळवो सोबाव राखांअ, आने तुरुत रोगवाय जांअ सोळी दा। आने केडाल बी गाई मा देतें। आने केडाअ बी नींदा मां केअतें। आने बीहराहांअ खोटों केरांअ मोर्जी बी मां राखतें। 32 उलटों, तुमां एक-बीहरापेअ दाया राखा, ने एक-बीहराअ भोलों केरा, आने ख्रीस्तुअ आर्याअ तुमांअ जोळाणुअ लीदे पोरमेहेरांय जेंहकींअ तुमनेंह माफी देदीह, तेंहकींअ तुमां बी एक-बीहराल माफी दा।