5
आत्मीक रीते उजवोळाम रा!
1 तीयाअ लीदे, पोरमेहेराअ मेराला पोयराहांअ तोरीके तुमां बादी बाबोतींहम पोरमेहेराअ होचुज वोरतुअजा! 2 आने जेंहकींअ ख्रीस्तुंह आपुंहपेअ माया राखीह आने आपुअ भोलायाअ खातुर पोरमेहेराल पोसोंद पोळे एंहड्या भेटु आने भोगु तोरीके सोताअ जीव देदो, तेंहकींअ तुमां बी एक-बीहरापेअ खुब माया राखजा!
3 तुमां एंहडों काय बी मां केअतें का जीयाकींअ बीहराहांन तुमाहांपेअ सोक जाय का, तुमां सीनालों आने तीयाअ होच बीहरें खोटें कामें केअयें वीअ का, लोब राख्यो वीअ। काहाका, पोरमेहेराअ लोकाहांन ईं बादों नांह सोबतों। 4 काची बुददीवालें जेंहकींअ गोठ्या केअ, तेंहकींअ तुमां नाज आवे एंहड्या गोठ्या मां केअतें, आने फाजुल गोठीहींकींअ मोस्कुरी बी मां केअतें। काहाका, पोरमेहेराअ लोकाहांन ईं बी नांह सोबतों। पेन उलटों, पोरमेहेरांय देदला आसीरवादुंअ खातुर तीयाअ आभार माना। 5 तुमां ईं नोक्कीज जांअतेंह का, सीनालों आने तीयाअ जेंहडें बीहरें खाराब कामें केअनाराल, का लोब राखनाराल, ख्रीस्तुअ आने पोरमेहेराअ राज्याम भाग नांय मीलीअ। लोब राखुलोंअ मुरतीअ पुंजा केअया बोराबोर हाय।
6 केडों बी सोताअ झुटी गोठीहींकींअ तुमनेंह ठोगी जाय एंहडों वेरांअ मां देतें। काहाका, आगलांअ मांयुं जीया पापाहांअ बाबोताम लेख्योंह तीया पापाहांअ लीदेज पोरमेहेराल तीयांय आखलों नांय माननारांहपेअ रोग चोळीअ आने तो तीयाहांन सीक्सा बी कीअ। 7 तीयाअ लीदे, पोरमेहेराअ आखलों नांय माननारा लोकाहांअ पापी जीवोनाम गोंवांदी मां बोंणतें। 8 पेअलांअ तुमां आत्मीक रीते आंदाराम आथें, मोंजे का, आत्मीक बाबोताअ गीयानु वोगुराअ आथें। पेन आमी मालीखाअ आर्याअ तुमांअ जोळाणुअ लीदे तुमां आत्मीक रीते उजवोळाम हाय, मोंजे का, आत्मीक बाबोताअ गीयान मीलवुअलें हाय। तीयाअ लीदे, आत्मीक बाबोताअ गीयान मीलवुअला लोकाहांन सोबे तेंहडों जीवा। 9 काहाका, पोरमेहेरापेनेअ मीलला ईया आत्मीक गीयानाअ लीदेज तों गीयान मीलवुअला लोक हारें कामें, खेरें कामें, आने हाचें कामें केअताह।
10 मालीखाल जों पोसोंद हाय तों जांणांअ कोसीस केरा। 11 आत्मीक रीते आंदाराम रेनारा लोक जें नोककामें कामें केअताह, तीया कामुंहम तुमां गोंवांदी मा बोंणतें। पेन उलटों, तीया कामाहांन नोफरोत केअजा आने तीयाहांन बीहराहांअ आगलांअ उगाळें पाळजा। 12 होकीकोतुम ता, जें खोटें कामें ते लोक दोबीन केअताह, तीया बाबोताम आखता बी नाज आवेह। 13 जीयाल बी पोरमेहेराअ उजवोळ उगाळो पाळेह तांहांअ, तीयाअ खेरो सोबाव मांहांहांन चोख्खो देखाय आवेह। 14 काहाका, जो एंहकींअ कीईन चोख्खों देखाय आवेह तीयाअ सोबाव बी हारो बोंणी जाहे। तीयाअ लीदे आपुंह वीसवासी एंहकींअ आखतेंह का,
“ओ आत्मीक रीते पापाम हुवी रेनारा, तुं जागेअ!
ओ आत्मीक रीते मोअला, तुं जीवतो उठेअ!
आने ख्रीस्त तोअपेअ उजवोळ पाळीअ।”
15 गीयानु वोगुराअ लोकाहांअ होच नांय पेन गीयानुवाला लोकाहांअ होच जीवजा। 16 मांहांहांअ खाराब कामाहांअ लीदे ओ जोमानो खाराब हाय। तीयाअ लीदे, जोबी मोको पोरमेहेर तुमनेंह दे तो हारकींअ वापरुअजा। 17 ईयाअ लीदे, बुददी वोगुराअ मांहांहांअ होच मां रेतें। पेन तुमांअ मारफोते पोरमेहेर काय काम केरांअ मागेह तों होमजी लेजा।
18 साकट्यें मां बोंणतें। काहाका, तीयु होंवांयुंकींअ ता तुमांअ सोरीलाअ आने आत्माअ नासुज वेअहे। पेन तीयाअ बोदले पोवीतोर आत्माअ पुरा काबाम रेजा। 19 आने पोवीतोर लेखाणाहांअ आदारे लेखाअला गीतुंहकींअ, आने बीहरा ख्रीस्ती भोजनांहकींअ, आने पोवीतोर आत्माअ मोदोताकींअ लेखाअला बीहरा गीतुंहकींअ एक-बीहराअरी गोठ्या केअजा। आने तुमांअ पुरा मोनाकींअ मालीखाअ बाबोताअ गीतें आखता तीयाअ गुणगान केअजा। 20 आने बादी बाबोतीहींअ लीदे कायोम आपुअ मालीख ईसु ख्रीस्तुअ मारफोते आपुअ पोरमेहेर बाहकाअ आभार मानजा।
ख्रीस्ती आदमींअ ने बायाहांअ एक-बीहराअरी वेहवार
21 ख्रीस्तुपेअ तुमां राखला मानुअ लीदे तुमां एक-बीहराअ आदीनुम रेजा।
22 बायुहुं, जेंहकींअ तुमां मालीखाअ आदीनुम रेत्याह, तेंहकींअ तुमांअ कोअवालाहांअ आदीनुम बी रेजा। 23 काहाका, जेंहकींअ ख्रीस्तुल सोताअ सोरीलु रुपी मोंडोळुपेअ आदीकार हाय, तेंहकींअज आदमीहींन सोताअ कोअवालींहपेअ आदीकार हाय। आने ख्रीस्त सोतेज मोंडोळाल वाचावनारो हाय। 24 तीयाअ लीदे ओ बायुहुं, जेंहकींअ मोंडोळ ख्रीस्तुअ आदीनुम रेहे, तेंहकींअज तुमां बी बादी बाबोतींहम तुमांअ कोअवालाहांअ आदीनुम रेजा।
25-27 आदमीहीं, जेंहकींअ ख्रीस्तुंह सोताअ मोंडोळुपेअ माया राखी आने सोताअ वोल्लाअ आगलांअ डागु वोगुराअ उबी रेनारी वोल्लीअ होच सोताअ आगलांअ डागु वोगुराअ, ने खामी वोगुराअ, ने काय बी गुना वोगुराअ, ने हारा देखाअनारा मोंडोळु तोरीके उबी राखांअ खातुर आने तीयाल बापतीस्माअ पांअयांकींअ आने हारी गोठीकींअ चोख्खों कीईन पोरमेहेराअ खातुर जुदा केरांअ खातुर सोताअ जीव देदो, तेंहकींअ तुमां बी सोताअ कोअवालींहपेअ माया राखजा। 28 आदमी जेंहकींअ सोताअ सोरीलाहांपेअ माया राखताह, तेंहकींअ सोताअ कोअवालींहपेअ बी माया राखांअ जोजे। सोताअ कोअवालीपेअ माया राखनारो आदमी खोरेखोर सोतापेअज माया राखेह। 29-30 केल्लो बी आदमी सोताअ सोरीलाल कीदीह बी नोफरोत नांह केअतो। पेन जेंहकींअ ख्रीस्त सोताअ मोंडोळुपेअ कालजी राखेह, तेंहकींअ तो आदमी सोताअ सोरीलाल पोहेह आने तीयाअ कालजी राखेह। आपुंह ख्रीस्तुअ सोरीलु रुपी मोंडोळाअ भाग हाय। 31 पेन सोताअ कोअवालीअरी जोळाअला रेनारा आदमीअ बाबोताम पोवीतोर लेखाणाहांम एंहकींअ लेखलों हाय का,
“ईया कारोणाअ लीदे दोरेक आदमी सोताअ याहकी-बाहकाल सोळीन सोताअ कोअवालीअरी जोळायन रीअ। तें बेनुं एकुज सोरीलाअ होच बोंणी जाय।”