6
ख्रीस्ती पोयराहांअ ने याहकी-बाहकाअ एक बीहराअरी वेहवार
1 पोयराहां! ख्रीस्ती पोयरें तोरीके तुमां तुमांअ याहकी-बाहकाअ आखलों मानजा। काहाका, ए तुमांअ फोरोज हाय। 2-3 वोचोनाअ री पोरमेहेरांय देदलो पेअलोअ हुकोम ओ हाय: “तोअ भोलों वीअ आने तोरतीपेअ तुं लांबों जीवो तीयाअ खातुर, तोअ याहकी-बाहकाल मान दे!”
4 याहकी-बाहकाहां, तुमांअ पोयराहांन खीजवी मां टाकतें। उलटों, तीयाहांन मालीखाअ बाबोताम हीकवीन आने तीयाहांअ भुल हुदारता तीयाहांन मोडें केरा।
ख्रीस्ती चाकोराहांअ आने सेटाहांअ एक-बीहराअरी वेहवार
5 चाकोराहां, जेंहकींअ तुमां ख्रीस्तुअ सेवा केअता वीअ, तेंहकींअ दुन्याअ रीते जे तुमांअ सेट हाय तीयाहांन पुरतों मांन देजा आने तीयाहांअ बीख राखजा आने खेरा मोनाकींअ तीयाहांअ आखलों मानजा। 6 तीयाहांन खुस राखांअ खातुर तीयाहांअ देखता ओतोंअज सेवा-चाकरी केअनारा नांय, पेन ते नांय वेअ तांहांअ बी ख्रीस्ती चाकोराहांअ तोरीके पुरा मोनाकींअ तीयाहांअ सेवा-चाकरी केअजा आने एंहकींअ पोरमेहेराअ मोर्जी पुरी केअजा। 7 एखला मांहांहांअज सेवा-चाकरी केअता वीअ तेंहकींअ नांय, पेन मालीखाअ बी सेवा-चाकरी केअता वीअ तेंहकींअ, खुस वीईन तुमांअ सेटाहांअ सेवा-चाकरी केअजा। 8 ईं होमजी ला का, गुलाम वेअ का गुलामीमेनेअ सुटों वेअलों मांहुंअ वेअ, पेन जोंबी हारों काम तीयांय केअयों वीअ, तीयाअ बोदलो मालीख ईसु तीयाल दीअ।
9 सेटुहुं, तुमांअ चाकोराहांअरी एंहडोज हारो वेहवार राखजा। तीयाहांन धोमकी दांअ सोळी देजा। ईत राखजा का, होरगाम तुमांअ आने तीयाहांअ एकुज मालीख हाय। तीयाल तुमांअ हीसाब दांअ पोळीअ आने तो बादाहांअ हारकोज नीयाय कीअ।
आपुअ आत्मीक लोळाय
10 सेल्ले आंय तुमनेंह आखुंह, मालीख ईसुअ आर्याअ तुमांअ जोळाणुकींअ तुमां आत्मीक रीते ताकोतावालें बोंणा। 11 पोरमेहेर जें आत्मीक आथ्यारें तुमनेंह देहे तें बादें तुमां बांदी ला, ईयाअ खातुर का, तुमां सेतानाअ चालाकींअ हुंबुर वीअ सेका। 12 काहाका, आपुअ ए लोळाय मांहांहांअरी नांह, पेन पुतळाहांअ राजा ाहांअरी, आने खेरा पोरमेहेराल नांय ओअखुअनारा ईयु दुन्याअ लोकाहांपेअ राज चालवुअनारा ताकोतावाला आंदारा रुपी पुतळाहांअरी, आने जुगामेर्याअ पुतळाहांअ लोस्कोरुंअरी हाय। 13 तीयाअ लीदे, पोरमेहेर जें आत्मीक आथ्यारें देहे तें बादें तुमां आमी लीअ ला, ईयाअ खातुर का, पुतळाहांअरी लोळांअ दीह आवे तांहांअ तुमां दुसमोन सेतानाअ हुंबुर वीअ सेका, आने सेल्ले लोगुंअ तीयाअरी लोळी सेका, आने आजी तीयाअ हुंबुर मोजबुत रीते उबें रीअ सेका।
14 तीयाअ लीदे, हाचा जीवोना रुपी पोटटाकींअ कोंबुर बांदीन आत्मीक रीते हींमोत केअजा। नीयायी वोरतोनु रुपी बोकतोरुकींअ तुमांअ आत्मीक जीवोना ल हाचवुअजा। 15 पोरमेहेराअरी आपनेंह सांतीवालो सोबोंदुम लावनारी हारी गोठी रुपी खाहळें पोवीन तीयु गोठीपेअ पाको वीसवास राखजा। 16 आरी-आरी, वीसवासु रुपी ढालीकींअ तुमांअ आत्मीक जीवोना ल हाचवुअजा। एंहकींअ कीईन तुमां सेतानाअ हुमला होटावी सेकाह। 17 तारोणु रुपी टोपुकींअ तुमांअ आत्माहांन हाचवुअजा। पोरमेहेराअ गोठी रुपी तारवाअ जे पोवीतोर आत्मांय तुमनेंह देदीह तीयुकींअ सेतानाअरी लोळजा। 18 पोवीतोर आत्माअ दोरवोणी पोरमाणे कायोम बादी जातीअ ओरुज आने कालावाला केअजा। एंहकींअ ओरुज केरांअ खातुर केल्ली बी वोखत जीव पाळ्या वोगुर चेतीन रेजा, आने पोरमेहेराअ बादा लोकाहांअ खातुर तीयाल ओरुज केअजा। 19 आने आंय हींमोत राखीन लोकाहांन हारी गोठीअ भेदुअ खुलासो दीअ सेकुं तीयाअ खातुर, मांअ खातुर बी पोरमेहेराल ओरुज केअजा का, लोकाहांन जों आखुलोंअ जोजे तों आखांअ तो मांन हींमोत दे। 20 ए हारी गोठ जाहेर कीअहुं तीयाअ लीदेज आंय, ख्रीस्तुअ चेलो, आमी जेलाम कोंडाअलो हाय।
पावुलाअ सेल्ली सालाम
21 मांअ हालोत केंहडी हाय तीया बाबोताम आपुअ मेरालो पावुह आने मालीखाअ सेवाम ईमानदार सेवोक तुखीकु तुमनेंह बादी होकीकोत आखीअ। 22 आमांअ हालोत केंहडी हाय ते तुमां जांआ आने तुखीकु तुमनेंह दीलासो दे तीयाअज खातुर आंय तीयाल तुमांअहीं मोकलुंह।