6
एक-बीहराअ मोदोत केरा!
1 मांअ पावु-बोंअयुहुं, मोंडोळाअ केल्लों बी मांहुंअ पाप केअता तेराय ता, पोवीतोर आत्माअ दोरवोणी पोरमाणे चालनारें तुमां, दायालु सोबाव राखीन तीयाल हुदारा। आने तीयाल हुदारनारा तुं बी तीयाअ होच पापाअ लालोचुम नांय पोळो तीयाअ कालजी राखजे। 2 तुमां एक-बीहराअ मोदोत केअजा। आने एंहकींअ कीअहा ता, तुमां ख्रीस्तुअ नीयोम पुरी रीते पालतेंह एंहकींअ आखाय। 3 “बीहराहांअ केअता आंय मोडो हाय तीयाअ लीदे, बीहराहांन मोदोत केरांअ मांअ जोरुल नांह!” एंहकींअ तुमां आखा ता, तुमां सोतालुज ठोगतेंह। 4 दोरेक मांहुंअ सोताअ कामाहांन पारखे, आने तें कामें हारें वेअ ता, तीयाहांअ लीदे तों खुस वीअ सेके, आने बीहरा केल्ला बी मांहांअ कामाहांअरी सोताअ कामाहांअ हारकामोणीकींअ सोताअज काम हारों हाय एंहडो तों ओभीमान नांय राखे। 5 काहाका, दोरेक मांहांअ सोत-सोताअ फोरोज पुरी केरांअ पोळीअ।
6 जोंबी मांहुंअ ख्रीस्ती बोद लेहे तों, तीयाल बोद देनाराल सोतापेअ जेबी हार्या वोस्तु वेअ तीयुहुंमेनेअ भाग दे।
7 तुमां सोताल ठोगतें मां। पोरमेहेराअ केअता केडों बी हुच्यार नांह। एक मांहुंअ जेंहकींअ पोअहे तेंहडोंज फोलवों मीलवेह। 8 जों मांहुंअ सोताअ पापी सोबावुल राजी राखांअ कोसीस केअहे, तों सेल्ले दीह नास वीअ। जों मांहुंअ पोवीतोर आत्माल राजी राखांअ कोसीस केअहे, तों सेल्ले दीह पोवीतोर आत्माअ मारफोते आत्मीक रीते कायोमाअ खातुर जीवीअ। 9 हारें कामें केअता आपुअ थाकांअ नांय जोजे। काहाका, जो आपुंह हींमोत नांय हारजी आने हारें कामें केरांअ नांय सोळजी ता, पोरमेहेराअ नोक्की केअला सोमोये आपनेंह तीया हारा कामाहांअ बोदलो मीलीअ। 10 तीयाअ लीदे, जांहांअ बी तोक मीले तांहांअ आपुंह बादा मांहांहांअ, आने खास कीईन ख्रीस्तुपेअ वीसवास राखनारा मांहांहांअ भोलों केअजी।
सेल्या गोठ्या आने सालाम्या
11 आमी मांअ सोताअ आथाकींअ तुमाहांपेअ कोताअ मोडा आकसोरुंहकींअ ए सेल्या गोठ्या आंय लेखुंह तों हेरा। 12 जे येहुदी ख्रीस्ती लोक बीहरा येहुदीहींअ आगलांअ सोताल सोरीलाअ सोबोंदुम धोरमी देखावांअ मोर्जी राखताह, ते तुमनेंह सुन्नोत केरावांअ फोरोज पाळताह। एंहकींअ केरांअ एकुज ईरादो हाय का, कुरुसापेअ मोयन आपनेंह वाचावनारा ख्रीस्तुपेअ तीयाहां राखला वीसवासाअ लीदे तीयाहांन ते येहुदी लोक दुखें नांय पाळे। 13 मांअ एंहकींअ आखांअ कारोण ईं हाय का, सुन्नोत केरावनारा ते लोक सोते बी नीयोम नांह पालता तेबी ते तुमांअ सुन्नोत केरावांअ मागताह, ईयाअ खातुर का, तीयाहांअ आखल्या पोरमाणे सोरीलाअ ते वीदी तुमां पालीह तीयाअ लीदे ते ओभीमान केअ। 14 पेन आंय ता, जीया कुरुसापेअ आपुअ मालीख ईसु ख्रीस्तुंह सोताअ जीव देदलो, तीया कुरुसाअ बाबोताअ बोदा मुज ओभीमान राखुंह। काहाका, कुरुसापेअ तीयांय जों केअयों तीयाअ मारफोते ए दुन्याअ वोस्तु मांन लालचावी नांय सेके एंहडया ताकोतु वोगुराअ बोंणी गीयाह, आने मांयुं बी तीयुहुंअ आर्योअ वेहवार बोंद कीअ देदोह, आने तीयुंय बी मांअ आर्योअ वेहवार बोंद कीअ देदोह। 15 काहाका, एक मांहुंअ सुन्नोत केरावे का नांय केरावे, ते पोरमेहेराअ नोजराम खास बाबोत नांह। पेन तों मांहुंअ पोवीतोर आत्माअ मारफोते नोवी जीनगी मीलवे तेज तीयाअ नोजराम खास बाबोत हाय। 16 ईया नीयोमा पोरमाणे जीवनारा बादाहांन, मोंजे का, हाची रीते जे पोरमेहेराअ लोक हाय तीयाहांन बादाहांन, पोरमेहेर सुख-सांती दे आने तीयाहांपेअ दाया केअ। 17 आमीनेअ केल्ला बी दीह केडाअ बी मांन तोकलीत नांय दांअ जोजे। काहाका, मांन पोळला मारुअ वोण साबीती देताह का, आंय ख्रीस्तुअ हाचो सेवोक हाय। 18 मांअ पावु-बोंअयुहुं, आपुअ मालीख ईसु ख्रीस्त तुमांअ बादाहां पेअ मेरबानी केअ! आमेन!