5
ख्रीस्तुअ मारफोते मीलला सुटकाराल हाचवी राखा!
1 आपुंह कीदीह बी बांदाणुम नांय रेजी तीयाअ खातुरुज ख्रीस्तुंह आपनेंह मोसेअ नीयोमाहांअ बांदाणुमनेअ सुटें केअयेंह। तीयाअ लीदे, सुन्नोत केरावांअ जेंहडी वीदींअ बांदाणुम फाचें मां रेतें।
2 उनाया! आंय पावुल तुमनेंह आखुंह, जो तुमां पापाहांअ सीक्सामेनेअ वाचाय जांअ खातुर सुन्नोत केरावा ता, तीयाअ ओ ओर्थो हाय का, ख्रीस्तुंह जों तुमांअ खातुर केअयोंह तीयाअ मारफोते तुमनेंह काय बी लाब नांह मीलतो। 3 पोरमेहेराअ मेरबानी मीलवांअ खातुर सुन्नोत केरावांअ मोर्जी राखनारा केल्ला बी मांहांअल आंय नोक्कीज आखुंह, तों बादाज नीयोम पालांअ बांदाअलों हाय। 4 “नीयोम पालीन तीयाअ मारफोते पोरमेहेराअ नोजराम गुना वोगुराअ गोंणाअहुं” एंहकींअ धारनाराहां, तुमां ख्रीस्तुअ आर्याअ जोळाणुमनेअ जुदें पोळी गीयेंह, आने सोताअ मेरबानीकींअ लोकाहांन वाचावे एंहडो पोरमेहेराअ मारोग बी तुमां सोळी देदोह। 5 आपुअ ता एंहडी आस्या हाय का, पोरमेहेर आपनेंह गुना वोगुराअ गोंईअ, आने तेंहडें गोंणांअज आपुंह वीसवासुकींअ आने पोवीतोर आत्माअ मारफोते मीलनारी खातरीकींअ, पोरी-पोरी वाट जोवतेंह। 6 काहाका, ख्रीस्तुअरी आपुअ जोळाण हाय तीयाअ लीदे आपुंह सुन्नोत केरावजी का नांय केरावजी, ते पोरमेहेराअ नोजराम खास बाबोत नांह। पेन आपुंह माया राखीन ख्रीस्तुपेअ वीसवास केअजी, तेज खास बाबोत हाय।
7 ख्रीस्ती जीवोनाम तुमां हारकींअज वादतें जाहलें। तांहांअ हाचो बोद मानता तुमनेंह केडों बी ओटकावे एंहडों तुमां काहाल वेरांअ देदों? 8 तुमनेंह हादनारा पोरमेहेरांय ता तुमनेंह एंहकींअ नांह होमजाव्यों का, तुमां हाचो बोद मां मानतें। 9 एंहडी एक आखाअती गोठ हाय का, “फुलवुअनारी थोळीकुज वोस्तु बी मोगलुअला नोटुअ आखा उंडाल फुलवी देहे।” एंहकींअ कीईन थोळोकुज खोटो बोद बी, मोंडोळाअ बादा लोकाहांन आत्मीक रीते बीगाळी टाकेह। 10 तेबी, मालीखाअ आर्याअ आपुअ जोळाणुअ लीदे मांन तुमांअ बाबोताम खातरी हाय का, मांयुं देदला बोदा सीवाय बीहरो बोद तुमां नांयज मानाह। आने मांन एंहडी बी खातरी हाय का, तुमनेंह गुचकावनारो गोंवें तेंहडो मोडो वेअ, पोरमेहेर तीयाल सीक्सा कीअ।
11 पेन पावु-बोंअयुहुं, “पापाहांअ सीक्सामेनेअ वाचायांअ खातुर सुन्नोतुअ जोरुल हाय” एंहकींअ जो आंय जाहेर केअतो ता, येहुदी लोक आजी लोगुंअ मांन दुखें नांय पाळता। 12 सुन्नोत केरावांअ फोरोज पाळनारा ते लोक मालीखाअ मोंडोळामनेअ नींगी जाय ता कोतोंअ हारों!
13 मांअ पावु-बोंअयुहुं, पोरमेहेरांय तुमनेंह मोसेअ नीयोमाहांअ बांदाणुमनेअ सुटकारो दांअ खातुरुज हादयेंह। पेन तीया सुटकाराल तुमां सोताअ पापी सोबावाअ मोरजया पुर्या केरांअ मां वापुरुअतें। उलटों, तुमां माया राखीन एक-बीहराअ सेवा केरा। 14 काहाका, “जेंहकींअ सोतापेअ तुं माया राखोह, तेंहकींअज बीहरा मांहांअपेअ बी माया राख!” ईया एकुज नीयोमाम पोरमेहेराअ बादा नीयोम होमाय जाताह। 15 पेन जो तुमां जोनावोराहांअ होच एक-बीहराल आत्मीक रीते तोळी खायन एक-बीहराअ नुकसान केअतें वीअ ता, चेतीन रेजा! नेता तुमां एक-बीहराअ मारफोते नास वीअहा।
पोवीतोर आत्माअ दोरवोणी आने मांहांहांअ पापी सोबावाअ मोरज्या
16 तीयाअ लीदे आंय एंहकींअ आखुंह: पोवीतोर आत्मा जेंहकींअ तुमनेंह दोरवोणी देहे तेंहकींअ तुमां जीवा। आने एंहकींअ कीअहा ता, तुमां तुमांअ पापी सोबावाअ मोरज्या पुर्या नांय कीअहा। 17 काहाका, मांहांहांअ पापी सोबावाअ मोरज्या पोवीतोर आत्माअ मोर्जींअ वीरुद हाय। आने पोवीतोर आत्माअ मोरज्या मांहांहांअ पापी सोबावाअ मोर्जींअ वीरुद हाय। तुमां जों केरांअ मोर्जी राखतें वीअ तों तुमां कीअ नांय सेका तीयाअ खातुर ते मोरज्या एक-बीहराअ वीरुद हाय। 18 जो पोवीतोर आत्मा तुमनेंह दोरवोणी देतो वीअ ता, तुमां मोसेअ नीयोमाहांअ बांदाणुम नांह।
मांहांहांअ पापी सोबावुकींअ तीयाहांम जाहेर वेअनारें कामें
19 मांहांहांअ पापी सोबावुकींअ तीयाहांम जाहेर वेअनारें कामें ता चोख्खेंज ओअखाय जातेंह। तें कामें एंहडें हाय: सीनालों केरुलोंअ, आने एंहडें बीहरें खाराब कामें केरुलोंअ। सीनालाअ जेंहडा खोटा कामुंहम गुथाअला रेवुलोंअ, 20 मुरतीअ पुंजा केरुलोंअ, मेली वीदया हीकुलोंअ, वेर राखुलोंअ, भानगुळ केरुलोंअ, बोलला जीवुअ वेरुलोंअ, खीजवाय जावुलोंअ, ईग्लाय केरुलोंअ, होप नांय राखुलोंअ, फाट-फुट पोळे एंहडों केरुलोंअ, 21 आदराय राखुलोंअ, साकटा वेरुलोंअ, जोलसा केरुलोंअ, आने एंहडें बीहरें खोटें कामें केरुलोंअ। आंय तुमांअरी आथो तांहांअ जेंहकींअ मांयुं तुमनेंह चेतवोंणी देदली, तेंहकींअ आमी बी चेतवोंणी दीहुं का, एंहडें कामें केअनाराहांन पोरमेहेराअ राज्याम भाग नांय मीले।
पोवीतोर आत्माअ मारफोते मांहांयम पेदा वेअनारा गुण
22 पेन पोवीतोर आत्माअ मारफोते मांहांयम पेदा वेअनारा गुण ता एंहडा हाय: बीहराहांपेअ माया राखुलोंअ, पोरमेहेराअ आर्याअ सोबोंदुअ आदारे खुसीम आने सांतीम रेवुलोंअ, खोटों केअनारांअ बोदलो लेया वोगुर वेठी लेवुलोंअ, बीहराहांपेअ दाया केरुलोंअ, बीहराहांअ लाबुअ आने भोलायाअ कामें केरुलोंअ, बीहरें भोरुचो राखी सेके एंहकींअ वोरतुलोंअ। 23 गोरीबळा रीते वोरतुलोंअ, आने सोताल काबाम राखुलोंअ। एंहकींअ वोरतुअनारा मांहांहांन पोरमेहेराअ केल्लो बी नीयोम गुनालें नांय जाहेर केअ। 24 आने जें ईसु ख्रीस्तुअ खेरें चेलें बोंणी गीयेंह, तीयाहां सोताअ पापी सोबावुल आने तीयाअ खाराब मोर्जींहन कुरुसापेअ जोळीन माय टाक्या वीअ तेंहकींअ ते तीयाहांन पाप केरावी नांय सेके एंहडया ताकोतु वोगुराअ बोंणावी देदयाह। 25 पोवीतोर आत्मांय आपनेंह खेरों जीवोन देदोंह। तीयाअ लीदे, आपुंह पोवीतोर आत्माअ ताबांम रीईन जीवजी। 26 आपुंह ओभीमान नांय राखजी, बीहराहांन नीचें पाळीन सोताअ मान नांय वादावजी, आने एक-बीहरापेअ आदराय नांय राखजी!