4
पोरमेहेराअ पोयरें बोंणांअ बाबोत
1 आमी आंय एंहकींअ आखुंह, वारोसदार तीयाअ बाहकाअ बादी मीलकोताअ धोणी हाय तेबी, जेंहकींअ गुलामुपेअ तीयाअ सेटुअ मीलकोताअ कोबजो नांह रेतो तेंहकींअ, वारोसदार उंमोर लायोक बोंणे तांव लोगुंअ तीयापेअ तीयाअ बाहकाअ मीलकोताअ कोबजो नांह रेतो। 2 आने तो वारोसदार तीयाअ बाहकांय नोक्की केअलो वोखत आवे तांव लोगुंअ देखरेख राखनारांअ आने पोंगाअ कारभारो चालवुअनारांअ ताबांम रेहे। 3 एंहकींअज कीईन, ख्रीस्त आलो तीयाअ पेअलांअ आपुंह बी आत्मीक रीते उंमोर लायोक नांय आथें। आने तांहांअ आपुंह बी दुन्याअ लोकाहीं बोंणावला धोर्माअ खामीवाला बोदाहांअ बांदाणुम आथें। 4 पेन खेरो वोखत आलो तांहांअ, पोरमेहेरांय सोताअ पोयराल ईयु दुन्याम मोकली देदो। तो पोयरो बायाअ पेटे जोनम्यो, 5 ईयाअ खातुर का, तो आपनेंह पोरमेहेराअ आसीरवादुंअ पुरो होक मीलवुअनारें पोयरें बोंणावे। आने तो जोन्मेदेखुंअ नीयोम ाहांअ बांदाणुम रीयो, ईयाअ खातुर का, जेंबी मोसेअ नीयोमाहांअ बांदाणुम आथें तीयाहांन तो तींहमेंनेअ सोळवे।
6 आने आमी तुमां पोरमेहेराअ पोयरें बोंणी गीयेंह। तीयाअ साबीती दांअ खातुर, पोरमेहेरांय तुमांअ मोनाहांम तीयाअ पोयराअ पोवीतोर आत्मा मोकली देदोह। आने तो आत्मा, पोरमेहेराल “बा! ओ बाहका” एंहकींअ हात केरांअ आपनेंह मोदोत केअहे। 7 तांहांअ आमी तुमाहांमेनेअ केडों बी गुलाम नांह। पेन पोरमेहेराअ पोयरो हाय। आने तुं तीयाअ पोयरो हाय तीयाअ लीदे तीयांय तुल तीयाअ बादा आसीरवादुंअ वारोसदार बी बोंणाव्योह।
मोंडोळाअ लोकाहांपेअ पावुलाअ लागणी
8 पेअलांअ तुमां पोरमेहेराल ओअखुअत्लें नांय। तीयाअ लीदे तांहांअ तुमां, जे होकीकोतुम देवुज नांह तीयाहांअ गुलाम आथें। 9 पेन आमी तुमां पोरमेहेराल ओअख्योह। खोरेखोर एंहकींअ आखांअ जोजे का, आमी पोरमेहेरांयज तुमनेंह ओअख्येंह। तांहांअ तुमां पापाअ सीक्सामेनेअ तुमनेंह वाचावी नांय सेके आने तुमांअ आत्मीक मीलकोत वादावी नांय सेके एंहडा तीया खामीवाला बोदाहांअ पोरमाणे फाचें काहाल चालतेंह? आने फाचें तीया बोदाहांअ गुलाम बोंणांअ काहाल मागतेंह? 10 पोरमेहेराअ मेरबानी मीलवांअ खातुर तुमां आरामाअ दीहुल आने दोरेक मोयनाअ पेअलाअ दीहुल मोडो दीह तोरीके पालतेंह, आने ओमुक-ओमुक तेहवारुंहन बी खास तेहवार तोरीके वालतेंह। 11 तीयाअ लीदे, मांन एंहडी बीख लागेह का, तुमांअ खातुर मांयुं जे खुब मेहनोत केअयीह ते बादी नोककामी गीयीह।
12 मांअ पावु-बोंअयुहुं, आंय तुमनेंह ओरुज कीअहुं का, मांअ होच तुमां बी नीयोम ाहांअ पोरमाणे नांय चालनारें मांहेंअ बोंणा। काहाका, आंय बी तुमांअ होच तीया नीयोमाहांअ पोरमाणे नांह चाल्यो।
पेअलीअ वोखत मांयुं तुमनेंह हारी गोठ जाहेर केअली तांहांअ तुमां मांअरी हारी रीते वोरतुअलें। 13 तुमां जांअतेंह का, पेअलीअ वोखत मांयुं तुमनेंह ख्रीस्तुअ हारी गोठ जाहेर केअली तांहांअ आंय आजार्यें आथो। 14 आने मांअ सोरीलाअ हालोत तुमांअ खातुर कोसोटीअ होच आथी तेबी, तुमां मांअ नोफरोत नांह केअयी, मांन दुर बी नांह केअयो। उलटों होरगाअ दुताल आवकारतें वीअ तेंहकींअ, आने खुद ख्रीस्त ईसुल आवकारतें वीअ तेंहकींअ तुमां मांन आवकारलो। 15 तांहांअ तुमांअ खातुर मांयुं जे सेवा केअयीह तीयुअ लीदे तुमाहांपेअ पेअलांअ जे खुसी आथी, ते आमी कांहीं गीयी? आंय तुमांअ बाबोताम साक्सी दीअ सेकुंह का, बोंणे ता तुमां मांअ खातुर तुमांअ डोंआं बी काडीन ते मांन दीअ देतें। 16 तांहांअ मांयुं तुमनेंह हाची गोठ जाहेर केअली तीयाअ लीदे आमी आंय तुमांअ दुसमोन बोंणी गीयो वीअ तेंहकींअ तुमां मांअरी काहाल वोरतुअतेंह?
17 नीयोम पालांअ तुमनेंह फोरोज पाळनारा ते येहुदी लोक तुमाहांपेअ खुब लागणी देखावताह। पेन तीयाहांअ ईरादा हारा नांह। तीयाहांअ होच तुमां बी तीयाहांपेअ खुब लागणी राखा तीयाअ खातुर तुमनेंह मांअ से जुदें पाळांअज तीयाहांअ ईरादो हाय। 18 पेन, जेंहकींअ बीहरा लोक तुमाहांपेअ खुब लागणी देखावे तों कायोम तुमनेंह हारों लागेह तेंहकींअ, आंय तुमांअरी व्युंव तांहांअ ओतोंअज नांय पेन कायोम तुमां मांअपेअ खुब लागणी राखा एज मांअ मोर्जी हाय। 19 मांअ मेराला पोयराहां, तुमांअ जीवोनाहांम ख्रीस्तुअ सोबाव पुरी रीते नांय उते तांव लोगुंअ तुमांअ बाबोताम मांन एंहडों दुख वेअहे का जों पोयरों जोन्माअ वोखत बायुल वेअहे। 20 तुमाहांपेअ लेखुं तीयाअ केअता आंय सोतेज तुमांअहीं आवुं आने तुमांअरी गोठ्या क्युंव एंहडी मांअ खुब मोर्जी हाय। काहाका, तुमांअ बाबोताम मांन खुब चींता वेअहे।
हागार आने साराअ नोमुनो
21 मोसेअ नीयोमाहांअ बांदाणुम रांअ मोर्जी राखनाराहां, तुमनेंह आंय आखुंह, तीयु नीयोमाहांअ चोपळीम जों लेखलों हाय तीया बाबोताम वीचार केरा। 22 तींहमें एंहकींअ लेखलों हाय का, “आबराहामाअ बेन पोयरा आथा। एक पोयरो गुलाम बायाअ पेटे जोन्मुअलो आने बीहरो पोयरो सोतोंतोर बायाअ पेटे जोन्मुअलो।” 23 गुलाम बायाअ पेटे जोन्मुअलो आबराहामाअ पोयरो सांवसारुअ रीते जोन्मुअलो। पेन सोतोंतोर बायाअ पेटे जोन्मुअलो तीयाअ पोयरो ता पोरमेहेरांय तीयाल देदला वोचोनुकींअ चोमोत्काराअ रीते जोन्मुअलो। 24 ईया पोयराहांअ ईयु गांअयुल दाखलाअ रुपाम लीअ सेकाय। ए बेन बाया पोरमेहेरांय तीयाअ लोकाहांअरी केअला बेन कारारुंअ होच आखाय। पोरमेहेरांय मोसेल देदला नीयोम तीयांय केअलो कारार हाय। हागार तीया कारारुअ रुपाम हाय। तीयुअ पोयरें नीयोमाअ बांदाणुम रांअ खातोरुज जोन्मो लेतेंह। 25 एंहकींअ कीईन हागार ता, आरबास्तानुमेर्याअ तीया सीनाय डोगुअ आने आमीर्याअ येरुसालेम सेहेराअ रुपाम हाय। काहाका, आमी येरुसालेम आने तीयाअ माज रेनारें मांहेंअ नीयोमाअ बांदाणुम रेतेंह। 26 पेन होरगाअ येरुसालेमामेर्येंअ आपुंहज हाची रीते पोरमेहेराअ पोयरें हाय। आने तों येरुसालेम आपुअ याहकीअ होच हाय। 27 पोवीतोर लेखाणाहांम एंहकींअ लेखलों हाय:
“एक बी पोयराल जोन्मो नांय देनारी ओ वांयटी बाय, तुं खुस वेअ!
आने पोयरों जोन्मुअती वोखत जों दुख वेअहे तीयाअ ओनुभोव नांह केअयो एंहडी बाय,
तुं खुब आनोंद केअ!
काहाका, सोताअ कोअवालाअरी रेनारी बायाअ केअता
तोअ वादारे पोयरें वीअ।”
28 मांअ पावु-बोंअयुहुं, जेंहकींअ पोरमेहेराअ वोचोनुपेअ आबराहामुंह थोवला वीसवासाअ लीदे ईसाक जोन्मुअलो, तेंहकींअ पोरमेहेराअ वोचोनुपेअ तुमां थोवला वीसवासाअ लीदे आमी तुमां आत्मीक रीते जोनम्येंह। 29 कुदरोती रीते जोन्मुअला पोयरा ईस्मायेलुंह पोरमेहेराअ ताकोताकींअ जोन्मुअला पोयरा ईसाकुल तीयु वोखत दुखें पाळलें। तेंहकींअज आमी बी मोसेअ नीयोम पालांअ फोरोज पाळनारा ते येहुदी लोक तुमनेंह दुखें पाळताह। 30 पेन तीया बाबोताम पोवीतोर लेखाणाहांम जों लेखलों हाय तीयाअ वीचार केरा: “गुलाम बायुल आने तीयुअ पोयराल काडी थोव! काहाका, गुलाम बायाअ पोयराल सोतोंतोर बायाअ पोयराअरी मीलकोतुम भाग नांय मीले।” 31 तांहांअ मांअ पावु-बोंअयुहुं, आपुंह गुलाम बायाअ पोयरें नांह। पेन आपुंह सोतोंतोर बायाअ पोयरें हाय।