3
मोसेअ नीयोम पालांअ जोरुल हाय का ख्रीस्तुपेअ वीसवास राखांअ जोरुल हाय?
1 ओ गालाती वीस्ताराअ मोंडोळुंअ ओकली वोगुराअ लोकुंह! कुरुसापेअ ईसु ख्रीस्त मोअलो तीयाकींअ मांहांहांन मीलनारा कायोमाअ लाबुअ बाबोताम तुमांअ आगलांअ मांयुं उगाळी रीतेज जाहेर केअलों। तेबी तुमां केल्ला बी मांहांअ गोठीकींअ काहाल भोरमाय गीयेंह? 2 आंय तुमांहपनेअ ओतोंअज जांणांअ मागुंह का, मोसेअ नीयोमा पोरमाणे तुमांअ केअला कामाहांअ लीदे तुमनेंह पोवीतोर आत्मा मील्योह का, तुमां उनाअली तीयु हारी गोठीपेअ तुमां राखला वीसवासाअ लीदे? 3 तुमां एकदोम काची बुददीवालांअ होच वोरतुअतेंह का? तुमां ता पोवीतोर आत्माअ मारफोते ख्रीस्ती जीवोन चालु केअयोंह। आने आमी तों जीवोन तुमांअ पापी सोबावुकींअ चालु राखांअ मोर्जी राखताह का? 4 तुमां बादें दुखें नोककामेंज वेठयेंह का? आंय आस्या राखुंह का, नोक्कीज तें दुखें तुमां नोककामें नांह वेठयें। 5 पोरमेहेर तुमनेंह काहाल पोवीतोर आत्मा देहे आने तुमांअ नीसमें काहाल चोमोत्कार केअहे? तुमां मोसेअ नीयोमाहांअ मागणी पोरमाणे कामें केअताह तीयाअ लीदे का, तुमां उनाअली गोठीपेअ तुमां वीसवास राखतेंह तीयाअ लीदे?
6 आबराहामाअ बाबोताम पोवीतोर लेखाणाहांम जों लेखलों हाय तीया बाबोताम वीचारा: “आबराहामुंह पोरमेहेराअ वोचोनुपेअ वीसवास केअयो, आने तीया वीसवासाअ लीदे, पोरमेहेरांय तीयाल गुना वोगुराअ गोंअयो।” 7 तांहांअ तुमां होमजी ला का, ईसुअ बाबोताअ हारी गोठीपेअ वीसवास राखनारें आने तीया वीसवासुकींअ पोरमेहेराअ नोजराम गुना वोगुराअ गोंणाअनारेंज पोरमेहेरांय आबराहामाल देदला वोचोनाअ खेरें वारोसदार हाय। 8 आने आबराहामाल देदलों तों वोचोन फाचला सोमोयाम लेखावनारा पोरमेहेराल पेअलांअनेअज खोबुर आथों का, तो हारी गोठीपेअ वीसवास राखनारा येहुदी जातीअ नांह तेंहडा लोकाहांन तीयाहांअ तीया वीसवासुकींअ गुना वोगुराअ गोंईअ। तीयाज पोरमेहेरांय आबराहामाल ए हारी गोठ पेअलांअज जाहेर केअली का, “तोअ मारफोते बादी जातीअ लोकाहांन आंय आसीरवाद देहें।” 9 तीयाअ लीदे, पोरमेहेराअ वोचोनुपेअ वीसवास राखनारा आबराहामाल तीयांय जेंहकींअ आसीरवाद देदला, तेंहकींअ तो वीसवास राखनाराहांन बादाहांनुंज आसीरवाद देहे।
10 आने पोरमेहेर तीयाहांअ पाप तुवी टाके तीयाअ खातुर मोसेअ नीयोमाहांअ पोरमाणे केअला कामुंहपेअ भोरुचो राखनारा बादा मांहांहांन हाराप लाग्योह। काहाका, पोवीतोर लेखाणाहांम एंहकींअ लेखलों हाय का, “नीयोमाहांअ चोपळीम लेखला बादाज नीयोमाहांअ पोरमाणे जोंबी मांहुंअ कायोम नांह चालतों, तीयाल हाराप लाग्योह।” 11 आमी ए गोठ चोख्खीज हाय का, मोसेअ नीयोमुंहम लेख्या पोरमाणे चालीन केल्लों बी मांहुंअ पोरमेहेराअ नोजराम गुना वोगुराअ नांह गोंणाअतों। काहाका, पोवीतोर लेखाणाहांम लेखलों हाय का, “वीसवासाअ मारफोते पोरमेहेराअ नोजराम गुना वोगुराअ गोंणाअनारों केल्लों बी मांहुंअ कायोमाअ जीनगी मीलवीअ।”
12 पेन नीयोम पालांअ खातुर ता, पोरमेहेरांय आपनेंह आपुअ पापाहांअ सीक्सामेनेअ वाचावांअ खातुर जों केअयोंह तीयापेअ भोरुचो राखांअ जोरुल नांह रेती। उलटों, पोवीतोर लेखाणाहांम एंहकींअ लेखलों हाय का, “नीयोमाहांअ चोपळीम लेखला बादा नीयोम जों मांहुंअ पुरी रीते पालेह, तों तीयाहांअ मारफोते कायोमाअ खातुर जीवीअ।”
13 पेन ख्रीस्त कुरुसापेअ मोअयो तांहांअ तीयांय, जो हाराप आपुंहपेअ पोळनारो आथो, तीया हारापुल सोतापेअ लीअ लेदो। आने तीया हारापुमनेअ आपनेंह वाचावी लेदेंह। तीया बाबोताम पोवीतोर लेखाणाहांम एंहकींअ लेखलों हाय, “कुरुसापेअ जोळीन माय टाकाअनारों हाराप लागलों मांहुंअ हाय।” 14 ख्रीस्तुंह एंहडों ईयाअ खातुर केअयों का, पोरमेहेरांय जो आसीरवाद आबराहामाल देदलो, तो आसीरवाद ख्रीस्त ईसुअ मारफोते येहुदी जातीअ नांह तेंहडा लोकाहांन बी देवाय आने एंहकींअ कीईन, ख्रीस्तुपेअ आपुंह राखला वीसवासाअ मारफोते आपुंह पोवीतोर आत्मा मीलवुअजी। तोज पोवीतोर आत्मा दांअ पोरमेहेरांय वोचोन देदोंह।
पोरमेहेराअ नीयोमाहांअ आने वोचोनाहांअ बाबोताम
15 मांअ मेराला पावु-बोंअयुहुं, आंय तुमनेंह मांहांअ वेहवारुअ एक दाखलो दीहुं: बेन मांहांहांअ नीसमें वेनारो कारार केडों बी तोळी नांह सेकतों, का तीयाअरी काय जोळी बी नांह सेकतों। 16 वोचोनें ता पोरमेहेरांय आबराहामाल आने तीयाअ वोसुलामेर्याअ मांहांअल देदलें। आने तीयाहांमेर्याअ एक वोचोनाअ बाबोताम पोवीतोर लेखाणाहांम “तोअ वोसुलामेर्याअ मांहांअल,” एंहकींअ लेखलों हाय, “खुब मांहांहांन” एंहकींअ नांह लेख्यों। पेन “तोअ वोसुलामेर्याअ मांहांअल” एंहकींअज लेखलों हाय। ईयाअ ओर्थो ओ वेहे का, “एकुज मांहांअल”, आने तों मांहुंअ ता ख्रीस्त हाय। 17 आंय एंहकींअ आखुंह, पोरमेहेरांय पेअलांअनेअ आबराहामाअरी नोक्की केअला काराराल, तीयाअ चारहोव ने तीस वोरसांअ फाचलांअ पोरमेहेरांय देदला नीयोम, रोद कीअ नांह सेकता आने एंहकींअ कीईन ते पोरमेहेरांय देदला वोचोनुल बी रोद नांह कीअ सेकता। 18 काहाका, जो पोरमेहेराअ आसीरवाद नीयोमाअ पालनीअ आदारे मीलतो ता, ईयाअ ओर्थो ओ वेहे का, तो आसीरवाद पोरमेहेराअ वोचोनाअ आदारे नांय मीलतो। पेन पोरमेहेरांय सोताअ वोचोनाअ आदारेज आबराहामाल आसीरवाद देदोह।
नीयोम दांअ ईरादो
19 तांहांअ पोरमेहेरांय नीयोम देदला तीयाअ काय ईरादो हाय? कारारुअरी तीयांय नीयोम जोळ्या तीयाअ ओ ईरादो हाय का, आबराहामाअ वोसुलामेर्योंअ जों मांहुंअ आवांअ आथों तों, मोंजे का, ख्रीस्त आवे तांव लोगुंअ, ते नीयोम लोकाहांन तीयाहांअ पापाहांअ खेरो सोबाव देखावे। आने ते नीयोम पोरमेहेरांय सोताअ ने ईसरायेल लोकाहांअ नीसमें होमुज काडावनाराअ होच जो आथो तीया मोसेअरी गोगनारा होरगाअ दुताहांअ मारफोते देदला। 20 पेन एकुज टुकळी वेअ ता, तींहीं होमुज काडावनारा बीहरा मांहांअ जोरुल नांह रेती। आने पोरमेहेरांय बी होरगाअ दुताहांअ मारफोते आबराहामाल वोचोन नांह देदों। पेन तीयांय तीयाल जाते-सोते सीदोंज वोचोन देदलों।
21 तांहांअ ईयाअ काय ओर्थो हाय? पोरमेहेरांय सोताअ वोचोनें दीईन खुब लांबा वोखत हातींअ सोताअ नीयोम देदा तीयाअ लीदे ते नीयोम तीयाअ वोचोनाहांअ वीरुद हाय का? एंहकींअ ता बीलकुल नांय बोंणे। काहाका, मांहांअल आत्मीक जीनगी दीअ सेके एंहडो केल्लो बी नीयोम जो पोरमेहेरांय देदो वीअ ता, ईयाअ ओ ओर्थो हाय का, खोरेखोर मांहुंअ नीयोम पालीन पोरमेहेराअ नोजराम गुना वोगुराअ बोंणी सेकेह। 22 पेन पोवीतोर लेखाणाहांम लेख्या पोरमाणे बादें मांहेंअ पापाअ बांदाणुम बांदायन गुनालें बोंणलें हाय तीयाअ लीदे, ईसु ख्रीस्तुपेअ राखला वीसवासाअ आदारे मांहांहांन जो आसीरवाद दांअ पोरमेहेरांय वोचोन देदलों, तो आसीरवाद ख्रीस्तुपेअ वीसवास केअनाराहांनुंज देवाअहे।
23 आने ईसुपेअ वीसवास केरांअ वोखत आलो तीयाअ पेअलांअ, पोरमेहेरांय वीसवासाअ तो मारोग जाहेर केअयो तांव लोगुंअ आमां येहुदी लोक केदीहींअ होच मोसेअ नीयोमाहांअ बांदाणुम बांदाअला आथा। 24 एंहकींअ कीईन ते नीयोम ख्रीस्त आलो तांव लोगुंअ आपुंअ देखरेख राखनारा आथा, ईयाअ खातुर का, ख्रीस्तुपेअ थोवला आपुअ वीसवासुकींअज पोरमेहेर आपनेंह गुना वोगुराअ गोंएं। 25 पेन आमी ख्रीस्तुपेअ वीसवास केरांअ वोखत आवी गीयोह तीयाअ लीदे, आमी आपुंह तीया नीयोमाहांअ देखरेखुम नांह रीयें।
पोरमेहेराअ पोयरें
26 काहाका, ख्रीस्त ईसुपेअ तुमांअ राखला वीसवासाअ मारफोते तीयाअरी जोळाअली तुमांअ सोबोंदुअ लीदे तुमां येहुदी आने येहुदी जातीअ नांह तेंहडें बादें मांहेंअ पोरमेहेराअ पोयरें बोंणी गीयेंह। 27 काहाका, तुमां बादाहां ख्रीस्तुअरी जोळायन बापतीस्मा लेदोंह। आने एंहकींअ कीईन तुमां ख्रीस्तुअ गुण सोताअ जीवोनाहांम उतावी लेदाह। 28 तीयाअ लीदे, पोरमेहेराअ नोजराम आमी येहुदी लोकाहांम आने येहुदी जातीअ नांह तेंहडा लोकाहांम काय फेर नांह, गुलामुंहम आने जे गुलाम नांह तीयाहांम काय फेर नांह, आने आदमींहम आने बायुंयम बी काय फेर नांह। काहाका, ख्रीस्त ईसुअ आर्याअ तुमांअ सोबोंदुम, तुमां बादा एकुज सोमाजुअ लोक बोंणी गीयाह। 29 आने तुमां ख्रीस्तुअ लोक हाय। तीयाअ लीदे, तुमां आत्मीक रीते आबराहामाअ वोसुलामेर्याअ बी हाय। आबराहामुंह पोरमेहेराअ वोचोनुंहपेअ जेंहकींअ वीसवास थोवलो, तेंहकींअ तीया वोचोनुंहपेअ तुमां थोवला वीसवासु पोरमाणे तुमां तीयाअ आसीरवादुंअ वारोसदार बी हाय।