2
ख्रीस्तुअ गोरीबळो सोबाव आने मोडाय
1 ख्रीस्तुअ आर्याअ तुमांअ जोळाणुअ लीदे तुमां आत्मीक रीते मोजबुत हाय। आने तीयाअ मायाकींअ तुमनेंह दीलासो मील्योह। आने तीयाअ आत्माअरी तुमां सोंगोत राखतेंह। आने तुमां एक-बीहरापेअ दाया आने लागणी राखतेंह। 2 तीयाअ लीदे, एक होप कीईन रेजा, एक-बीहरापेअ एक हारकी माया राखजा, आने एक जीवुअ आने एक मोनुअ बोंणीन रेजा, आने एंहकींअ कीईन तुमां मांन पुरी रीते खुस केअजा। 3 आने सोताअज लाबुअ खातुर काय बी मां केअतें, आने खोटी रीते मान मीलवांअ मां कोसीस केअतें। पेन उलटों, गोरीबळो सोबाव राखीन तुमां सोताअ केअता बीहराहांन हारें गोंअजा। 4 आने तुमाहांमेनेअ दोरेक मांहुंअ सोताअ लाबुअ ओतोअज नांय, पेन बीहराहांअ लाबुअ बी वीचार केअ। 5 ख्रीस्त ईसु जेंहकींअ वीचारत्लो, तेंहकींअज तुमां बी वीचारजा ने वोरतुअजा।
6 तीयाम पोरमेहेराअ बादाज गुण आथा तेबी, तीयांय पोरमेहेराअ हारको बोंणांअ तीअ नांय राख्यों।
7 पेन उलटों, तीयांय सोताअ मेतेज सोताअ उचाम-उचो होददो सोळी देदो, आने तो मांहुंअ बोंणयो आने तीयांय एक चाकोराअ रुप लेदो। a तो मांहुंअ बोंणलो तांहांअ,
8 तीयांय सोताल गोरीबळो बोंणाव्यो। खास कीईन, मोअता लोगुंअ, तो बी गुनेगारु तोरीके कुरुसापेअ तो मोअयो तांव लोगुंअ तीयांय पोरमेहेराअ आखलों मान्यों।
9 तीयाअ लीदे, पोरमेहेरांय तीयाल मोअलामेनेअ जीवतो कीईन होरगाम उचाम-उचो होददो देदोह।
10 ईयाअ लीदे, होरगामेन्यॆंअ आने तोरतीमेर्येंअ आने पाताळामेर्येंअ बादें ईसुअ तो आदीकार मानीन तीयाल पागे लागीअ।
11 आने तें बादें जाहेर रीते आखीअ, ईसु ख्रीस्तज मालीख हाय, ने एंहकींअ कीईन तें पोरमेहेर बाहकाल मोडाय दीअ।
12 तीयाअ लीदे मांअ मेरालाहां, आंय तुमांअरी आथो तांहांअ जेंहकींअ तुमां कायोम मांअ आखलों मानत्लें, तेंहकींअ आमी आंय तुमांअहीं हाजोर नांह एंहडाम बी तीयाअ केअता वादारे मांअ आखलों मानजा। पोरमेहेराल बीता-बीता ने कापता-कापता तुमां पापाअ सीक्सामेनेअ वाचाय गेहला लोकाहांन सोबे एंहडें कामें केअजा।
13 काहाका, तुमां एंहडें कामें केरा तीयाअ खातुर पोरमेहेर तुमांअ मोनाहांम मोर्जी पेदा केअतो रेहे आने गोती बी देतो रेहे। आने ईंहमें तो खुब राजी बी हाय।
14 आने बोळ-बोळ आने ताकरार केअया वोगुर बादों केअजा, 15 ईयाअ खातुर का, खातरी वोगुराअ आने खाराब वाटे चालनारा लोकाहांअ नीसमें तुमां पोरमेहेराअ, गुना वोगुराअ आने आत्मीक रीते चोख्खें, आने खामी वोगुराअ पोयरें तोरीके रा। आने तीया लोकाहांन हाची जीनगीअ गोठ जाहेर केअता तुमां जुगाम उजवोळ देनारा तारांअ होच तीया लोकाहांअ आगलांअ तुमांअ हारी चाल-चोलगोतींहकींअ उजवोळ पाळा। 16 जो तुमां एंहकींअ कीअहा ता, ख्रीस्त फाचो आवीअ तीदीह तुमांअ लीदे खुस वेरांअ मांअपेअ कारोण रीअ। काहाका, तुमांअ गोठ्या आने कामें एंहडी साबीती दीअ का, तुमांअ लीदे मांयुं केअली मेहनोत आने दोळ-धाम नोककामी नांह गीयी।
17 कादास आंय एक भोगु तोरीके माय टाकाअहें आने एंहकींअ कीईन मांअ रोगुत तुमांअ वीसवासु रुपी भोगुपेअ रीसवाअनारा भोगुअ होच वीअ का जों पोरमेहेराल चोळवुअलों हाय। आंय माय टाकांव तेबी आंय खुस हाय आने तुमांअ बादाहांअरी आनोंद बी कीअहुं। 18 आने एंहकींअज कीईन तुमां बी खुस वेअजा आने मांअरी आनोंद केअजा।
तीमोथी आने एपाफीरोदीतु
19 आंय आस्या राखुंह का, मालीख ईसुअ मोर्जी वीअ ता, आंय तीमोथील तुमांअहीं माहरीज मोकली देहें, ईयाअ खातुर का, तो फाचो ईंहीं आवीअ तांहांअ तीयाअ मारफोते तुमांअ बाबोताम जांयन आंय खुस व्युंव। 20 तुमांअ बाबोताम मांअ होचुज वीचारनारो आने हारकींअ तुमांअ कालजी राखे एंहडो तीमोथीअ होच मांअरी बीहरो एक बी नांह। 21 काहाका, बीहरा बादा ता, ईसु ख्रीस्तुअ सेवाअ खातुर नांय, पेन सोताअ लाबुअ खातुरुज कोसीस केअताह। 22 आने तुमां सोतेज जांअतेंह का, तीमोथींह साबीती देदीह का, तों खातरीअ मांहुंअ हाय। आने सोताअ बाहकाअरी मीलीन काम केअनारा पोयराअ होच तीयांय मांअरी मीलीन हारी गोठ जाहेर केअयीह। 23 ईयाअ लीदे, ओमोलदार मांन जेलाम नेअ सुटो कीअ का नांय तों जांयन आंय तुरुतुज तीमोथील तुमांअहीं मोकली देहें एंहडी आंय आस्या राखुंह। 24 आने मांन पुरी आस्या हाय का, आंय सोतेज तुमांअहीं माहरी आवी सेकुं तीयाअ खातुर, मालीख मांन मोदोत कीअ।
25 पेन तांव, एपाफीरोदीतुल फाचो तुमांअहीं मोकलांअ जोरुल हाय एंहडों मांन लाग्यों। तो मांअ आर्योअ वीसवासी आने मांअरी मीलीन हारी गोठ जाहेर केअनारो आने तीयु गोठीअ हाचायुअ साबीती दांअ मांअरी मीलीन कोसीस केअनारो हाय। आने तो मांअ जोरुलीहींअ कालजी राखांअ खातुर तुमां मोकलुअलो चेलो हाय। 26 तुमनेंह बादाहांन मीलांअ तीयाअ खुब मोर्जी हाय। तो आजार्यें आथो तों तुमां उनाअलें तों जांयन तो खुब दुखी वीयोह। 27 खोरेखोर, तो मोय जाय ओतोअ आजार्यें आथो। पेन पोरमेहेरांय तीयापेअ दाया केअयी आने तीयाल हारो केअयो। तो मोय जाय ता तीयाकींअ मांन आजी वादारे दुख नांय पोळे तीयाअ खातुर, पोरमेहेरांय तीयापेअ ओतीअज नांय पेन मांअपेअ बी दाया केअयी। 28 तुमां तीयाल देखीन फाचें खुस वेरा आने मांअ सोताअ चींता बी मीटी जाय तीयाअ खातुर आंय तीयाल तुमांअहीं माहरीज मोकलांअ खुब मोर्जी राखुंह। 29 तीयाअ लीदे, तो आवीअ तांहांअ तो फाचो तुमांअहीं हारकींअ पोची गीयोह तीयाअ लीदे मालीखाअ आभार मानीन आने खुस वीईन तीयाअ आवकार केअजा। आने तीयाअ होच सेवा केअनारा लोक जों मान मीलवांअ लायोक हाय तों मान तीयाल देजा। 30 काहाका, ख्रीस्तुअ सेवाअ खातुर तो खोरेखोर मोय जाय एंहडो वीअ गेहलो। ईयु सेवाम मांअरी रीईन जे मोदोत तुमां सोते कीअ नांह सेक्यें, ते मोदोत केरांअ खातुर मोय जाय एंहडो वेरांअ बी तो तीयार आथो।