3
पोरमेहेराअ नोजराम खेरी रीते गुना वोगुराअ गोंणायुलोंअ
1 मांअ पावु-बोंअयुहुं, ईं कागलों पुरों केअता पेअलांअ आंय तुमनेंह आखुंह, मालीखाअ आर्याअ तुमांअ जोळाणुअ लीदे खुस वेअजा। मांयु तुमनेंह पेअलांअ जों लेखलों तोंज फाचों लेखता आंय थाकतो नांह। तों तुमांअ आत्मीक जीवोना ल हाचवांअ खातुर हाय। 2 बीहराहांन सुन्नोत केरावांअ फोरोज पाळनारा, आने मोंडोळाल बीगाळनारें कामें केअनारा जे लोक रोखळुअनारा हुंणांअ होच हाय, तीया लोकाहांअ से चेतीन रेजा। 3 आत्मीक रीते हाची सुन्नोतुवाला ता ते लोक नांह, पेन आपुज हाय। काहाका, पोवीतोर आत्माअ मोदोताकींअ पोरमेहेराअ भोकती केअनारें ता आपुज हाय। आने ख्रीस्त ईसुअ आर्याअ आपुअ जोळाणुअ लीदे आपुंह खुस रेतेंह। आने सोताअ सोरीलाहांपेअ सुन्नोतुअ जे वीदया ते केरावताह, तीयुहुंपेअ आपुंह सोताअ पापाहांअ सीक्सामेनेअ वाचायांअ भोरुचो नांह राखतें। 4 एंहडी वीदींहपेअ भोरुचो राखांअ वेअ ता आंय बी राखी सेकुंह। जो एगोंह एंहडी वीदींहपेअ भोरुचो राखांअ धारतों वीअ ता, आंय तीया केअता तेंहकींअ वादारे धारी सेकुंह। 5 काहाका, आंय जोन्मुअलो हातींअ आठमे दीह, लोकाहीं मांअ बी सुन्नोत केरावली। मांअ याहकी-बाहको बेनुं बी ईसरायेल जातीअज आथें। आने आंय बीन्यामीनुअ कुळोमेर्योअ हाय। तीयाअ लीदे आंय खेरो येहुदी हाय। आंय फोरीसी आथो तीयाअ लीदे येहुदीहींअ बादा नीयोमाहांअ पोरमाणे आंय चालत्लो। 6 आने पोरमेहेरापेअ खुब माया राखुंह एंहकींअ होमजीन मांयुं ईसुपेअ वीसवास राखनाराहांन खुब दुखें पाळलें। नीयोम ाहांअ पोरमाणे चालनारों मांहुंअ पोरमेहेराअ नोजराम गुना वोगुराअ गोंणाअहे एंहकींअ केडों धारे ता, आंय बी तेंहकींअ धारी सेकुं। काहाका, तीया नीयोमाहांअ पोरमाणे आंय पुरी रीते चालत्लो आने तीया बाबोताम केडों बी मांअ भुल नांय काडी सेके। 7 पेन पेअलांअ जीयु बाबोतीहींन आंय मांअ फायदाअ गोंअत्लो, तीयुहुंन आमी आंय ख्रीस्तुअरी पुरी रीते जोळायांअ खातुर नोक्काम्या गोंअहुं। 8 ते बाबोत्या ओत्याअज नांय, पेन जोंबी आंय पेअलांअ कींमती गोंईंन केअत्लो, तों बादों बी आमी आंय, मोडांम-मोडी कींमती वोस्तु मीलवांअ खातुर, मोंजे का, मांअ मालीख ख्रीस्त ईसुल ओअखांअ खातुर, कींमोतु वोगुराअ गोंअहुं। पोरमेहेराल राजी राखांअ जोंबी पेअलांअ आंय केअत्लो, तों बादों ख्रीस्तुअरी पुरी रीते जोळायांअ खातुर मांयुं सोळी देदोंह। आने आंय ख्रीस्तुल खुब मान दांअ खातुर तीयाल बादाल कुटाराअ होचुज गोंअहुं। 9 नीयोम मांयुं पाल्यो तीयाअ आदारे पोरमेहेरांय मांन गुना वोगुराअ गोंअयोह एंहकींअ नांह। पेन एंहकींअ हाय का, ख्रीस्तुपेअ मांयु राखला वीसवासाअ मारफोते आने तीयाअ आदारेज पोरमेहेरांय मांन गुना वोगुराअ गोंअयोह।
10 मांअ मोर्जी एज हाय का, आंय ख्रीस्तुल पुरी रीते ओअखुं, आने जीयु ताकोताकींअ पोरमेहेरांय तीयाल मोअलामेनेअ जीवतो केअयो तीयु ताकोतुअ आंय बी ओनुभोव क्युंव, आने ख्रीस्तुअ खातुर दुखें वेठुं, आने जेंहकींअ तो मोअयो, तेंहकींअ आंय पापी सोबावाअरीअ मांअ सोबोंद तोळी टाकुं, आने एंहकींअ कीईन तीयाअ होच आंय मोंव। 11 आने आंय एंहडी आस्या राखुंह का, पोरमेहेर मांन मोअलामेनेअ जीवतो उठवीअ।
होरगाअ जीनगी दांअ ख्रीस्त ईसुअ मारफोते पोरमेहेर आपनेंह हादेह
12 “ए बादा ओनुभोव मांयुं मीलवी लेदाह आने पोरमेहेर मांन जेंहडो बोंणावांअ मागेह तेंहडो आंय पेअलांअज बोंणी गीयोह” एंहकींअ आंय आखांअ नांह मागतो। पेन जों ईनाम दांअ खातुर ख्रीस्त ईसुंय मांन तेअयोह, तों ईनाम मीलवांअ आंय कोसीस कीअहुं। 13 मांअ पावु-बोंअयुहुं, मांयु तों ईनाम जीती लेदोंह एंहकींअ आंय नांह धारतो। पेन आंय एंहकींअ कीअहुं: मांअ जीवोनाअ गीया दीहाहांअ ओनुभोवुंहपेअ वीचार केरांअ आंय सोळी दीहुं, आने जों काय मीलवांअ पोरमेहेरांय मांअ खातुर नोक्की केअयोंह तों बादों मीलवांअ खुबुज कोसीस कीअहुं। 14 तीयाअ लीदे, ईनाम जीतांअ खातुर होरीफायुम नीसाणीअ वेल दोवळुअनारा मांहांअ होच आंय, ईनामु तोरीके पोरमेहेर मांन देनारो हाय ते होरगाअ जीनगी मीलवांअ कोसीस कीअहुं। होरगाअ ए जीनगी दांअज पोरमेहेरांय मांन ख्रीस्त ईसुअ मारफोते हादयोह।
15 आत्मीक जीवोनाम हारकींअ वादला आपुंअ बादाहांअ एंहडोज वीचार राखांअ जोजे। पेन तुमाहांमेनेअ जेंबी बीहरी रीते वीचारतें वीअ ता, पोरमेहेर तीयाहांन तों चोख्खी रीते होमजावीअ। 16 तेबी, आपुंह आमी लोगुंअ जेंहकींअ आपुअ आत्मीक जीवोनाम वादतें आलेंह, तेंहकींअज आजी बी वादतें जाजी।
ख्रीस्त कुरुसापेअ मोअयो तीयु गोठील नोफरोत केअनारा लोक
17 मांअ पावु-बोंअयुहुं, जेंहकींअ आंय ख्रीस्ती जीवोन जीवुंह, तेंहकींअज तुमां बी बीहरा वीसवास्यांअरी मीलीन तों जीवोन जीवजा। आने तुमनेंह तीया जीवोनाअ जो खेरो नोमुनो आमां देदोह, तीयाअ पोरमाणे चालनारांअ होच तुमां बी चालजा। 18 काहाका, खुब लोक सोताअ चाल-चोलगोतींहकींअ देखावताह का, ते ख्रीस्त कुरुसापेअ मोअयो तीया बोदाअ वीरुद केअताह। मांयुं तीयाहांअ बाबोताम पेअलांअ बी आखलों, आने आमी बी रोळता-रोळता आखुंह। 19 तीया लोकाहांअ ओंत ता नोरोकुज हाय। a काहाका, ते सोताअ सोरीलाहांअ पापी सोबावाअ मोर्जींअज भोकती केअताह, आने ते नाज आवे एंहडें कामें केरांअ सोताअ ओभीमानुअ गोठ गोंअताह, आने ईयु दुन्याअ मोज-सोकुंअज वीचार केअया केअताह। 20 पेन आपुअ खेरो देस ता होरगों हाय। आने तींहींनेअ आपनेंह वाचावनारो मालीख ईसु ख्रीस्त फाचो आवे तीयाअ आपुंह वाट जोवतेंह। 21 आने जीयु ताकोताकींअ तो बादी वोस्ताहांन सोताअ काबाम राखी सेकेह, तेज ताकोत वापरीन ईसु ख्रीस्त आपुअ नोबला आने मोय जानारा सोरीलुंहन बोदली टाकीअ, आने तीयाहांन तो सोताअ तेजुवाला सोरीलाअ होच बोंणावी दीअ।