4
1 तीयाअ लीदे मांअ पावु-बोंअयुहुं, तुमां जें मांअ मेरालें हाय, आने जीयाहांन हेरांअ मांअ खुब मोर्जी हाय, आने जें मांन खुस केअनारें हाय, आने बीहराहांअ आगलांअ जीयाहांअ गुणगान केअता आंय खुब खुस वीअहुं, एंहडा मांअ पावु-बोंअयुहुं, मालीखाअ आर्याअ तुमांअ जीवोनाम मोजबुत रा।
पावुलाअ सेल्ली सालाह
2 युवदीयाल आने सींतुखेल आंय कालावाला कीअहुं का, ते बेनुं मालीखाअ आर्याअ तीयुहुंअ जोळाणुअ लीदे एक-बीहराअरी होप कीईन रे। 3 आने मालीखाअ कामाम ओ मांअ खातरीअ भागीदार, तुल बी आंय कालावाला कीअहुं का, होप कीईन रांअ खातुर तुं ईयु बेनुं बायाहांन मोदोत केअजे! काहाका, खुब लोकाहांन ईसुअ हारी गोठ जाहेर केरांअ कामाम मांअरी आने कीलेमेतोसुअरी आने बीहरा मांन साहकार देनाराहांअरी मीलीन ईयु बेनुं बायुहुं खुब मेहनोत केअयीह। कायोमाअ खातुर जीवनारांअ नांवें जीयु चोपळीम लेखाअयेंह, तीयु चोपळीम तीयुहुंअ नांवें बी हाय।
4 मालीखाअ आर्याअ तुमांअ जोळाणुअ लीदे तुमां कायोम खुस रेजा! आंय फाचो बी आखुंह, खुस रेजा!
5 बादा लोकाहांन तुमांअ भोलो सोबाव देखावजा। ईत केरा का, मालीख माहरी फाचो आवनारो हाय। 6 केंहडाअ बी चींता मा केअतें। पेन उलटों, बादा सोंजोगाहांम तुमां पोरमेहेराल ओरुज केअजा आने कायोम तीयाअ आभार मानता-मानता तुमांअ जोरुलीहींअ खातुर तीयापेअ मागजा। 7 एंहकींअ कीअहा ता, पोरमेहेरापेनेअ मीलनारी सांती जे मांहुंअ होमजी नांय सेके एंहडी हाय, ते ख्रीस्त ईसुअ आर्याअ तुमांअ जोळाणुअ लीदे तुमांअ रुदोयुंहन आने मोनुंहन हाचवी राखीअ।
8 मांअ पावु-बोंअयुहुं, सेल्ले आंय ओतोंअ आखांअ मागुंह का, जोंबी खेरों हाय, जोंबी मान दांअ लायोक हाय, जोंबी खेरों हाय, जोंबी खामी वोगुराअ हाय, जोंबी हारों हाय, जोंबी साबासी दांअ लायोक हाय, जोंबी मांहांहांन गोंवें एंहडें हाय, जोंबी गुणगान केरांअ लायोक हाय, तीयाहांअज वीचार केअतें रेजा। 9 मांअ गोठीहींकींअ आने कामाहांकींअ मांयुं जोंबी तुमनेंह हीकव्योंह, तीयाअ पोरमाणे केअजा। आने सांती देनारो पोरमेहेर तुमांअरी रीअ।
फीलीप्पी सेहेराअ वीसवास्याहां मोकलुअली भेटुंअ लीदे पावुल तीयाहांअ आभार मानेह
10 मालीखाअरी जोळायन जीवता आंय खुब खुस हाय। काहाका, मांअपेअ तुमां खुब लागणी राखतेंह तों देखावांअ खातुर तुमनेंह बीहरो एक मोको मील्योह। आंय एंहकींअ आखांअ नांह मागतो का, मांअपेअ लागणी राखांअ तुमां सोळी देदलों। पेन एंहकींअ आखुंह, मांअपेअ तुमां लागणी राखतेंह तों देखावांअ खातुर तुमनेंह मोको नांय मीलत्लो।
11 मांन एगाह केंहडा जोरुल पोळीह तीयाअ लीदे एंहडों आखुंह एंहकींअ नांह; काहाका, केल्ली बी हालोताम आंय व्युंव, तींहमें खुस रांअ आंय हीकयोह। 12 मांअ जोरुली केअता मांअपेअ ओसों वेअ तांहांअ केंहकींअ रेवुलोंअ, तों आंय जांअहुं। आने जोरुली केअता वादारे वेअ तांहांअ केंहकींअ रेवुलोंअ, तों बी आंय जांअहुं। मांअपेअ पुसकोळ खांअ वेअ का आंय पुखोज व्युंव, जोरुली केअता मांअपेअ वादारे वेअ का ओसों वेअ, जीनगीअ बादा सोंजोगाहांम खुस रांअ आंय हीकयोह। 13 ख्रीस्त जे गोती मांन देहे तीयुकींअ आंय बादी जातीअ सोंजोगाहांम रीअ सेकुंह।
14 तेबी मांअ दुखाअ वोखतुंहम तुमां मांन मोदोत केअयी तों हारोंज केअयों। 15 ओ फीलीप्पी सेहेराअ वीसवासी लोकुंह! तुमनेंह खोबुरुज हाय का, तींहीं मांयुं हारी गोठ जाहेर केअली तीयु वोखत माकेदोनीयानेअ आंय नींग्यो तांहांअ, तुमांअ मोंडोळ ओतोंअज मांन पोयसाअ मोदोत केअनारों आथों। 16 आंय थेस्सालोनीका सेहेराम आथो तांहांअ बी मांअ जोरुलीअ खातुर एक केअता बी वादारे वोखत तुमां मांन पोयसा मोकलुअला। 17 तुमांअ भेटुपेअज मांअ लागणी हाय एंहकींअ ता नांह। पेन, तुमांअ कामाहांअ ईयादीम आजी खुब हारें कामें होरगाम नोंदाय तेज मांअ मोर्जी हाय। 18 जोंबी तुमां मांन मोकली देदोंह, तों बादों मीली गीयोंह। आने तों मांअ जोरुली केअता वादारे हाय। आने जे भेट्या तुमां मांन मोकली देदयाह ते बादया एपाफीरोदीतु लालोह। ईयाअ लीदे आमी मांअपेअ मांअ जोरुली पोरमाणे बादों हाय। ते भेट पोरमेहेराल पोसोंद पोळनारा भोगुअ होच हाय। मोंजे का, पोरमेहेर राजी वीईन लीअ ले एंहडा भोगुअ होच हाय।
19 आने जीया पोरमेहेराअ सेवा आंय कीअहुं तो तुमांअ भेटुअ बोदलाम सोताअ खुब माल-मीलकोतुमनेअ ख्रीस्त ईसुअ मारफोते तुमांअ बादया जोरुल्या पुर्या पाळीअ। 20 पोरमेहेर आपुअ बाहकाअ मोडाय आपुंह कायोम केअतें रेजी! आमेन!
पावुलाअ सेल्ली सालाम
21 ख्रीस्त ईसुअ आर्याअ जोळाणुअ लीदे जे पोरमेहेराअ लोक हाय, तीयाहांन बादाहांन मांअ सालाम। आने मांअरी जे वीसवासी पावुह हाय ते तुमनेंह सालाम देताह। 22 पोरमेहेराअ ईंहींर्याअ बादा लोक, खास कीईन राजाअ मेहेलाम जे नोकरी केअताह ते बादा, तुमनेंह सालाम देताह।
23 मालीख ईसु ख्रीस्त तुमांअ बादाहां पेअ मेरबानी केअ!