कोलोसे सेहेराअ मोंडोळाल पावुलाअ कागलों
1
पावुलाअ सालाम
1-2 ख्रीस्त ईसुअ खास चेलो वेरांअ खातुर पोरमेहेरांय पोसोंद केअलो पावुल, आने ख्रीस्ती पावुह तीमोथी, कोलोसे सेहेराअ पोरमेहेराअ लोकाहांन का जे ख्रीस्तुअ आर्याअ जोळाणुअ लीदे खातरीअ पावु-बोंअयांह हाय तीयाहांन ईं कागलों लेखताह।
पोरमेहेर आपुअ बाहको तुमाहांपेअ मेरबानी केअ आने तुमनेंह सुख-सांती दे! 3-4 ख्रीस्त ईसुपेअ तुमां राख्योह तीया वीसवासाअ बाबोताम आने पोरमेहेराअ बादा लोकाहांपेअ तुमां राखीह तीयु मायाअ बाबोताम आमां उनाअयाह। तीयाअ लीदे, जीयु बी वोखत आमां तुमांअ खातुर ओरुज केअताह तीयु वोखत आमां पोरमेहेराअ, मोंजे का, आपुअ मालीख ईसु ख्रीस्तुअ बाहकाअ कायोम आभार मानताह। 5 पोरमेहेराअ बाबोताअ हाचायुअ गोठ, मोंजे का, हारी गोठ तुमनेंह मालीखाअ सेवोकुहुं पेअलीअ वोखत आखली तांहांअ तुमां, पोरमेहेरांय तुमांअ खातुर होरगाम थोवी राखला आसीरवाद मीलवांअ आस्याअ बाबोताम तीयु हारी गोठीम उनाअलें। तीयाअ लीदे, तुमां ईसु ख्रीस्तुपेअ वीसवास राखतेंह आने पोरमेहेराअ बादा लोकाहांपेअ माया राखतेंह। 6 आने जीदीह तुमां पोरमेहेराअ मेरबानीअ बाबोताम पेअलीअ वोखत उनाअलें आने खेरी रीते तीयाअ ओनुभोव केअलो तीदीहनेअ, जेंहकींअ ईयु हारी गोठीपेअ तुमां राखला वीसवासुकींअ तुमांअ खाराब सोबाव आने चाल-चोलगोत्या तुमांअ जीवोनाहांमनेअ नींगी जात्याह आने जेंहकींअ तुमांअहींर्याअ वादारे ने वादारे लोक हारी गोठ उनायन तीयुपेअ वीसवास राखताह, तेंहकींअज दुन्याअ बीहरा खुब लोकाहांअ खाराब सोबाव आने चाल-चोलगोत्या बी तीयाहांअ जीवोनाहांमनेअ नींगी जात्याह आने दुन्याअ बीहरा वादारे लोक हारी गोठ उनायन तीयुपेअ वीसवास राखताह। 7 आमांअ आर्याअ मेराला सेवोक एपाफीरापनेअ तुमां पोरमेहेराअ ईयु मेरबानीअ बाबोताम हीकयेंह। एपाफीरा तुमांअ खातुर ख्रीस्तुअ खातरीअ सेवोक हाय। 8 आने पोवीतोर आत्मांय तुमांअ मोनाहांम बीहरा लोकाहीं अ खातुर जे माया पेदा केअयीह, तीया बाबोताम तीयांय आमनेंह आख्योंह।
9 आमां तों उनाअला तीदीहनेअ तुमांअ खातुर ओरुज केरांअ कीदीह बी आमां चुकया नांह। तुमां पोरमेहेराअ मोर्जी पुरी रीते जांआं तीयाअ लीदे पोवीतोर आत्मा तुमनेंह आत्मीक गीयान आने बुददी दे, एंहडी आमांअ ओरुज हाय। 10 आमां ईयाअ खातुर ओरुज केअताह का, तुमां मालीखाअ लोकाहांन सोबे तेंहकींअ जीवा, आने बादी रीते तीयाल पोसोंद पोळे तेंहडें कामें केरा, आने बादी जातीअ हारें कामें केरा, आने वादारे ने वादारे पोरमेहेराअ ओनुभोव केरा। 11-12 आने आमां एंहडी बी ओरुज केअताह का, खुस वीईन पोरमेहेर बाहकाअ आभार मानता-मानता तुमां धीरोज राखीन बादों वेठी ला तीयाअ खातुर तो सोताअ खुब मोडी ताकोताकींअ तुमनेंह वादारे आत्मीक गोती दे। तीयांय सोताअ तेजुवाला होरगाअ राज्याम सोताअ लोकाहांअ खातुर जे आसीरवाद थोवी राख्याह, ते आसीरवाद मीलवांअ तीयांय तुमनेंह लायोक बोंणाव्येंह। 13 तो आपनेंह आंदाराअ काबामनेअ, मोंजे का, सेतानाअ काबामनेअ सोळवीन सोताअ मेराला पोयराअ राज्याम लीअ आलोह। 14 तीया पोयराअ मारफोतेज पोरमेहेरांय आपनेंह सोळव्येंह, मोंजे का, आपुअ पाप माफ केअयाह।
ख्रीस्तुअ गुण आने कामें
15 ख्रीस्त ता केडाल बी नांय देखाअनारा पोरमेहेराल देखावनारो हाय, आने तो पोरमेहेराअ होचुज हाय, आने पोरमेहेरांय बादों बोंणावलों तीयाअ पेअलांअ बी तो आथो। एंहकींअ कीईन तो पोरमेहेरांय बोंणावला बादाहांअ उपरी हाय। 16 काहाका, ख्रीस्तुअ मारफोतेज पोरमेहेरांय जुग आने तोरतीमेरीअ बादी वोस्ताहांन बोंणाव्याह, मोंजे का, मांहांहांन देखाअनार्या आने नांय देखाअनार्या वोस्ताहांन बोंणाव्याह। तींहमें खास कीईन, बादी जातीअ होददावाला होरगाअ दुताहांन तीयाअ मारफोतेज तीयांय बोंणाव्याह। पोरमेहेरांय तीयाअ मारफोते आने तीयाअ मोर्जी पुरी केरांअ खातुरुज बादों बोंणाव्योंह। 17 पोरमेहेरांय बादों बोंणावलों तीयाअ पेअलांअ बी ख्रीस्त आथो। आने बादी वोस्ताहांन सोत-सोताअ जागे हारकींअ गोठवुअनारो बी ख्रीस्तज हाय। 18 तो सोताअ सोरीलु रुपी मोंडोळाअ उपरी हाय। आने तो तीया मोंडोळाल आत्मीक रीते जीवावनारो हाय। आने पोरमेहेरांय मोअलांहमनेअ जीवता केअलांहम तो पेअलो हाय, ईयाअ खातुर का, पोरमेहेरांय बोंणावला बादाहांअ तो उपरी बोंणे। 19 काहाका, पोरमेहेरांय सोतेज पोसोंद केअयों का, तीयाअ पुरा गुण तीयाअ पोयराम रे। 20 तीयाअ लीदे, पोरमेहेरांय सोताअ पोयराअ मारफोते जुग आने तोरतीमेर्याअ बादाहांन सोताअरी मेल-मीलाप केरावांअ पोसोंद केअयों, मोंजे का, तीयाअ पोयरो कुरुसापेअ मोअयो तांहांअ पाळला रोगुतुकींअ जुग आने तोरतीमेर्याअ बादाहांन सोताअरी मेल-मीलाप केरावांअ तीयांय पोसोंद केअयों।
21 ख्रीस्तुपेअ वीसवास केअया पेअलांअ तुमांअ खाराब वीचार आने कामाहांअ लीदे तुमां पोरमेहेराअ से खुब सेटे वीअ गेहलें आने तीयाअ दुसमोन बी आथें। 22 पेन तो तुमनेंह पुरी रीते चोख्खा वेअला ने डागु वोगुराअ ने गुना वोगुराअ लोक तोरीके सोताअ हाजरीम लावे तीयाअ खातुर, आमी तीयांय सोताअ पोयराअ सोरीलाअ मोतुकींअ तुमनेंह सोताअरी मेल-मीलाप केअयोह। 23 पेन तीयाअ खातुर ए सोरोत हाय का, हारी गोठीपेअ तुमां राखलो वीसवास तुमां जालवी राखा, आने तीया वीसवासाम पाकें रा, आने हारी गोठ उनाअलें तांहांअ तुमां जे आसीरवाद मीलवांअ आस्या राखली ते नांय सोळा। एज हारी गोठ पोरमेहेराअ सेवोकुहुं दुन्याअ खुब मांहांहांन जाहेर केअयीह, आने पोरमेहेरांय मांन पावुलुल एज हारी गोठ जाहेर केरांअ नीम्योह।
24 तुमांअ लीदे जें दुखें आंय वेठुंह तीयाअ मांन आमी आनोंद हाय। काहाका, ख्रीस्तुंह मांन होपली सेवाअ लीदे तीयाअ सोरीलु रुपी मोंडोळाअ खातुर मांअ जें दुखें वेठांअ आजी बाकी हाय, तें मांअ सोरीलुकींअ आंय पुरें कीअहुं। 25 पोरमेहेरांय मांन तीयाअ मोंडोळाअ सेवा केरांअ जोवाबदारी होपीह। आंय तीयाअ बाबोताअ बादया गोठ्या तुमनेंह आखुंह तीयाअ खातुर तीयांय मांन ईं काम होप्योंह। 26 पोरमेहेरांय सोताअ गोठीहींअ भेद जुना जोमानाअ लोकाहांअ आगलांअ नांह खोल्यो। पेन आमी तो भेद तीयांय सोताअ लोकाहांअ आगलांअ खोल्योह। 27 तो भेद सोताअ लोकाहांअ आगलांअ खोलांअ तीयांय पोसोंद केअलों। तो भेद खोरेखोर खुब हारो हाय आने बादा लोकाहांअ भोलायाअ खातुर हाय। तो भेद ओ हाय का, ख्रीस्त सोताअ पोवीतोर आत्माअ मारफोते येहुदी जातीअ नांह तेंहडा लोकाहांअ, मोंजे का तुमांअ मोनाहांम बी वोहती केअहे। ईयाअ ओर्थो ओ हाय का, तुमां होरगाम मोडाय मीलवीन रीहा। 28 तीयाअ लीदे, आमां ख्रीस्तुअ बाबोताम बादी जातीअ लोकाहांन आखताह। तीयाहांन बादाहांन ख्रीस्तुअ आर्याअ जोळाणुम आने वीसवासाम पाका वेअला लोक तोरीके पोरमेहेराअ हाजरीम लावांअ खातुर खुब गीयानुकींअ आमां तीयाहांन बादाहांन चेतवुअताह आने हीकवुअताह। 29 जे खुब मोडी गोती ख्रीस्त मांन देहे, तीयुकींअ आंय ईं बादों केरांअ तोकलीत वेठीन मेहनोत कीअहुं।